?Mared i Rod Ya Nomo Blong Stap Glad?
“Hem i fri blong i mared long wanem man we hem i wantem. Be wan samting nomo, man i mas wan man blong Masta blong yumi. Be long tingting blong mi, sipos hem i stap olsem nomo, bambae hem i glad moa.”—1 KORIN 7:39, 40.
1. ?Olsem wanem Baebol i tokbaot Jeova, mo hem i givim wanem long ol samting we hem i bin wokem?
JEOVA i wan “hapi God.” (1 Timote 1:11, NW) Hem i olsem Man We i Glad Blong Givim “evri samting we oli gud mo evri presen we oli nambawan” long ol waes samting we hem i wokem—ol man mo ol speret man—hem i givim ol samting we oli nidim blong stap glad long wok blong hem. (Jemes 1:17) Olsemia nao, wan pijin we i stap singsing, wan smol dog we i stap pleplei, no wan dolfin we i stap jyam ol samting ya oli soemaot se Jeova i wokem ol anamol blong oli haremgud long laef long ol ples we oli stap laef long hem. Man blong raetem Ol Sam i gohed blong yusum naesfala tok blong talem se, “ol tri ya blong Jeova oli kasem ol samting we oli nidim, ol sidatri ya long Lebanon we hem i planem.”—Ol Sam 104:16, NW.
2. (a) ?Wanem samting i soemaot se Jisas i glad taem hem i mekem wil blong Papa blong hem? (b) ?Wanem risen ol disaepol blong Jisas oli glad?
2 Jisas Kraes “i olsem wan stret pija blong God, we i stap soemaot prapa fasin blong hem.” (Hibrus 1:3) Taswe yumi no sapraes we Baebol i tokbaot Jisas se “Bigfala Rula ya we i harem gud.” (1 Timote 6:15, NW) Hem i givim gudfala eksampel long yumi olsem wanem hem i glad blong mekem wil blong Jeova bitim we i haremgud long kakae. Jisas i soemaot tu se, man i save haremgud taem hem i fraet long God, olsem, ona long hem mo i no wantem mekem se God i no glad long hem. (Ol Sam 40:8; Aesea 11:3; Jon 4:34) Ol 70 disaepol “oli glad” afta we oli mekem wok blong talemaot Kingdom, nao “Tabu Speret i mekem Jisas i harem i gud tumas.” Afta we hem i prea blong talemaot glad blong hem long Papa blong hem, hem i tanraon long ol man blong hem mo hem i se: “Yufala we i stap lukluk ol samting ya, yufala i save harem gud. Mi mi talem long yufala, bifo i gat plante profet mo plante king we oli wantem tumas blong luk ol samting ya we yufala i stap luk, be neva oli luk.”—Luk 10:17-24.
Ol Risen Blong Stap Glad
3. ?Wanem ol narafala risen blong man i stap glad?
3 ?Olsem wanem, yumi glad taem yumi luk ol samting oli stap kamtru folem tok blong Jeova mo plan blong hem long taem blong en? ?Yumi glad se yumi kasem save long ol profet tok we ol profet mo ol king bifo olsem Aesea, Daniel, mo Deved oli no kasem save long olgeta? ?Yumi glad blong mekem wok blong Jeova, God ya we i stap haremgud, aninit long Bigfala Rula ya, Jisas Kraes, King blong yumi we i stap haremgud? !Si, yumi glad ya!
4, 5. (a) ?Blong stap glad long wok blong Jeova, wanem samting yumi mas lukaot long hem? (b) ?Wanem samting oli save givhan blong mekem man i glad, mo wanem kwestin yumi save tingbaot?
4 Sipos yumi wantem stap glad long wok blong God, yumi no mas tingbaot ol samting we ol man blong wol oli ting se oli save glad from. Ol samting ya oli save spolem tingting blong yumi from we oli karem ol rij samting long saed blong bodi, laef we i flas, mo ol samting olsem. From samting ya “gladtaem” bambae i no stap longtaem, from we wol ya i stap lus.—1 Jon 2:15-17.
5 Plante long ol man blong Jeova we oli givim laef blong olgeta long hem oli luksave se fasin blong kasem ol mak blong wol bambae i no givim trufala gladtaem. Papa blong yumi long heven nomo i save givim ol samting long saed blong speret mo bodi we oli save givim trufala gladtaem long ol man blong hem. !Yumi glad tumas long ol kakae long saed blong speret we hem i stap givim long yumi tru long “slef ya we i stret mo waes”! (Matyu 24:45-47, NW) Yumi talem tangkyu tumas long God from ol kakae mo ol narafala samting long saed blong bodi we yumi stap kasem long hem. Mo tu, i gat nambawan presen ya blong mared mo fasin glad we i kamaot from. Naomi i harem long tingting blong hem se samting ya i mas kamaot long tufala widowoman blong tufala pikinini blong hem, taem i talem ol tok ya se: “Maet Jeova i mekem wan presen long yutufala, mo yutufala i faenem wan ples blong stap long haos blong ol prapa hasban blong yutufala.” (Rut 1:9) Taswe mared i wan rod blong i save givim bigfala gladtaem. ?Be, mared i rod ya nomo blong man i gat wan hapi laef? Ol yangfala oli mas skelemgud samting ya blong luk sipos i olsem.
6. ?From wanem i gat mared olsem Jenesis i tokbaot?
6 Tingbaot faswan mared, Baebol i talem se: “Nao [God] i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman. Nao hem i blesem tufala, mo i talem long tufala, se ‘I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.’” (Jenesis 1:27, 28) Jeova i stanemap mared, blong mekem se Adam i gat plante pikinini we bambae oli stap mo fulumap wol. Be i gat plante samting yet long saed blong mared.
‘Mared Long Masta Nomo’
7. ?Wanem loa blong mared we wan man blong bilif bifo i traehad blong mekem?
7 From we Jeova God i Stampa blong mared, yumi save se hem i stanemap ol rul blong mared blong mekem ol man blong hem oli glad. Bifo, ol man blong Jeova oli no leftemap fasin blong mared long ol man we oli no wosipim Jeova. Ebraham i mekem se Eliasara, man blong wok blong hem, i promes long nem blong Jeova se bambae hem i no tekem wan waef blong pikinini blong hem Aesak long ol man Kenan. Eliasara i mekem trep mo hem i folemgud ol oda blong Ebraham blong faenem ‘woman we Jeova i wantem givim long pikinini blong Masta blong hem.’ (Jenesis 24:3, 44, NW) Nao Aesak i mared long Rebeka. Taem pikinini blong tufala, Esao i tekem ol waef blong hem long laen blong Het, “samting ya i stap mekem Aesak mo Rebeka, tufala i harem nogud tumas.”—Jenesis 26:34, 35; 27:46; 28:1, 8.
8. ?Kontrak blong Loa i putum tabu long wanem fasin blong mared, mo from wanem?
8 Aninit long kontrak blong Loa, Loa i blokem fasin blong mared long ol man no ol woman we oli kamaot long ol nesen blong Kenan. Jeova i givim oda long ol man blong hem se: “Yu no mas mekem mared wetem olgeta. Yu no mas givim gel blong yu long boe blong hem, no yu no mas tekem gel blong hem blong boe blong yu. From we samting ya i save mekem se boe blong yu i tanem baksaed long mi, mo bambae hem i save wosip long ol narafala god. Nao bambae kros blong Jeova i faerap long yufala, ale kwiktaem nomo bambae hem i mekem we yu yu lus olgeta.”—Dutronome 7:3, 4.
9. ?Wanem advaes blong mared we Baebol i givim long ol Kristin?
9 Taswe yumi no sapraes se sem rul ya blong no mared long ol man we oli no wosip long Jeova, i go tu long ol man insaed long Kristin kongregesen. Aposol Pol i talem long ol narafala man blong bilif, i se: “Bambae yufala i no go joen wetem ol hiten man blong mekem wok, we yufala i karem haf, olgeta oli karem haf. Fasin ya i no save stanap. ?Olsem wanem stret fasin mo rabis fasin, tufala i save mekem fren? ?Olsem wanem delaet mo tudak, tufala i save stap wan ples? ?Olsem wanem Kraes mo Setan, tufala i save agri? ?Olsem wanem man we i bilif mo man we i no bilif, tufala i save joen long wan tingting?” (2 Korin 6:14, 15) Advaes ya i stret long ol defren fasin mo i stret tu long mared. Pol i talem klia se ol man we oli givim laef blong olgeta long Jeova finis oli mas tingbaot blong mared long “wan man blong Masta blong yumi.”—1 Korin 7:39.
No Save Mared ‘Long Masta’
10. ?Plante Kristin man we oli no mared oli stap mekem wanem, mo wanem kwestin i kamaot from?
10 Plante Kristin we oli no mared oli wantem folem eksampel blong Jisas Kraes, oli wantem stap olsem oli no mared. Mo tu, plante Kristin we oli holemstrong, oli trastem Jeova oli no mared long man no woman we i no bilif, nating se oli no save faenem wan man no woman we i fraetgud long God blong oli mared ‘long Masta.’ Speret blong God i givim ol frut ya olsem glad, pis, mo bilif long olgeta blong oli save blokem ol samting we olgeta nomo oli wantem, mo oli stap olsem we oli no mared. (Galesia 5:22, 23) Plante long olgeta Kristin sista blong yumi, we yumi stap tinghae long olgeta, oli kasem traem ya from fasin fasgud long God. Long plante defren ples, ol sista oli plante moa bitim ol brata mo oli wok plante long wok blong prij. Tru ya, “Jeova hem wan i talem tok ya. Ol woman we oli stap talemaot gud nyus oli olsem wan bigfala ami.” (Ol Sam 68:11, NW) Plante man blong God we oli no mared, olsem man mo woman, oli holemstrong long God from we ‘oli trastem Jeova long ful hat blong olgeta, mo hem i mekem ol rod blong olgeta oli stret.’ (Proveb 3:5, 6) ?Olgeta we oli no save mared ‘long Masta,’ bambae oli glad no no gat?
11. ?Ol Kristin we oli no mared from ol rul blong Baebol oli save haremgud long wanem?
11 I gud blong tingbaot se yumi ol Wetnes blong Jeova, God ya we hem i stap haremgud, yumi mekem wok aninit long bigfala Rula ya, Jisas Kraes we hem i stap haremgud. Taswe sipos yumi ona long ol rul blong Baebol, yumi no mared from i had blong faenem wan man blong mared ‘long Masta,’ ?yu ting se God mo Kraes tufala i livim yumi blong harem nogud? No gat. Yumi save glad olsem ol Kristin nating se yumi no mared. Jeova i save mekem yumi rili haremgud nating se yumi mared no yumi no mared.
Rod Blong Trufala Gladtaem
12. ?Fasin blong ol stronghed enjel ya i soemaot wanem long saed blong mared?
12 Mared hem i no rod ya nomo blong ol man blong God oli stap glad. Tingbaot, ol enjel. Bifo we Bigfala Wora i ron, sam enjel oli wantem ol samting we i no stret blong ol speret man oli mekem, oli no glad se bambae oli no save mared, mo oli tekem bodi olsem man blong oli save tekem ol woman long wol olsem waef blong olgeta. From we ol enjel ya oli ‘livim prapa ples blong olgeta, oli gowe long hem, God i fasem olgeta long jen we i no save brok samtaem, mo i lokem olgeta long ples blong tudak. Nao oli stap wet long bigfala Dei ya we God bambae i jajem olgeta.’ (Jud 6; Jenesis 6:1, 2) I klia se i no plan blong God se ol enjel oli mared samtaem. Yes, fasin blong mared i no rod ya nomo blong mekem ol man oli glad.
13. ?From wanem ol tabu enjel oli glad, mo samting ya i soemaot wanem long olgeta man blong God?
13 Ol enjel we oli holemstrong long God oli stap glad nomo. Taem Jeova i putum faondesen blong wol “ol sta blong moning oli klaphan mo oli singaot tugeta mo ol pikinini blong God oli glad.” (Job 38:7, The New Jerusalem Bible) ?From wanem ol tabu enjel oli glad? From we oltaem oli stap wetem Jeova God, oli “stap lesin long ol samting we hem i talem” long olgeta blong oli save mekem. Oli glad blong “mekem ol samting we hem i wantem.” (Ol Sam 103:20, 21) Yes, fasin glad blong ol tabu enjel i kamaot from we oli mekem wok blong Jeova. Hemia nao rod blong trufala gladtaem long ol man tu. From samting ya, ol Kristin we tabu speret i makemaot olgeta we oli mared oli glad blong mekem wok blong God naoia, bambae oli no save mared taem oli laef bakegen long ded blong go long heven, be bambae oli stap glad blong mekem wil blong God olsem ol speret man. Nating se ol man blong Jeova oli mared no oli no mared, oli save glad from trufala stampa blong gladtaem hemia wok blong God ya We i Wokem yumi.
“Samting We i Moa Gud Bitim Ol Pikinini Boe Mo Ol Pikinini Gel”
14. ?Wanem profet tok we i givim promes long ol man we oli katem olgeta blong oli no karem pikinini long Isrel bifo, mo from wanem samting ya i defren?
14 Nating sipos wan Kristin i no mared nating, God i save mekem hem i stap glad. Tok ya blong leftemap tingting i kamaot long profet tok we i go long ol man long Isrel we oli katem olgeta blong oli no save gat pikinini, tok ya i se: “Hemia tok blong Jeova long ol man we oli katem olgeta blong oli no save gat pikinini, olgeta ya oli stap holem sabat blong mi mo oli jusum samting we mi mi glad long hem mo oli stap holem ol loa blong mi se: ‘Bambae mi mi givim long olgeta insaed long haos blong mi mo long wol blong haos blong mi wan samting blong memori mo wan nem, samting we i moa gud bitim ol pikinini boe mo ol pikinini gel. Wan nem we i no save finis bambae mi mi givim long olgeta, samting we bambae i no save lus samtaem.’” (Aesea 56:4, 5) Maet man i save ting se God i promes blong givim woman mo ol pikinini long olgeta blong oli save tekem nem blong olgeta. Be promes ya i blong “samting we i moa gud bitim ol pikinini boe mo ol pikinini gel”—wan nem we i no save finis insaed long haos blong Jeova.
15. ?Olsem wanem Aesea 56:4, 5 i save kamtru?
15 Sipos ol man ya we oli katem olgeta blong oli no save gat pikinini oli pija blong “Isrel blong God,” i min se ol Kristin we tabu speret i makemaot olgeta oli kasem wan ples insaed long haos blong Jeova long saed blong speret, no tempel blong hem. (Galesia 6:16) Profet tok ya bambae i kamtru tu long ol man ya long Isrel bifo we oli katem olgeta blong oli no save gat pikinini taem oli laef bakegen long ded. Sipos oli agri long ransom sakrafaes blong Kraes mo gohed blong mekem samting we Jeova i glad long hem, bambae oli kasem “wan nem we i no save finis” samtaem long nyufala wol blong God. Profet tok ya i stret long ol “narafala sipsip” we oli no mared mo olgeta we oli no gat pikinini long taem ya blong en, oli givim olgeta fulwan blong mekem wok blong Jeova. (Jon 10:16) Maet sam long olgeta ya oli no save mared mo oli no save gat pikinini gogo kasem taem we oli ded. Be sipos oli stap holemstrong long God, long taem we bambae oli laef bakegen long ded bambae oli kasem “samting we i moa gud bitim ol pikinini boe mo ol pikinini gel”—“wan nem we i no save finis” samtaem long nyufala fasin.
Mared i No Rod Ya Nomo Blong Gladtaem
16. ?From wanem yumi save talem se mared i no givim gladtaem oltaem?
16 Sam man oli harem se man i mas mared blong hem i haremgud. Be yumi save talem se, long medel blong ol man blong Jeova tede, mared i no stap givim gladtaem oltaem. Hem i givhan blong winim sam trabol be samtaem hem i mekem sam trabol we i hadwok moa blong winim, be i no hadwok olsem long wan man we i no mared. Pol i talem se mared i save mekem ‘trabol long laef blong olgeta.’ (1 Korin 7:28) Samtaem man we i mared i “stap tingbaot moa long ol bisnes blong wol” mo “tingting blong hem i seraot.” Man no woman olsem samtaem i faenem i had blong “mekem wok blong Masta blong yumi we i no gat narafala tingting i pulum” hem.—1 Korin 7:33-35.
17, 18. (a) ?Ol elda we oli goraon oli talem wanem? (b) ?Wanem advaes we Pol i givim, mo from wanem i gud blong folem?
17 Fasin blong mared mo no mared oli presen we God i givim. (Rut 1:9; Matyu 19:10-12) Blong yumi haremgud long wan long tufala, i impoten blong tingtinggud mo blong prea from. Ol elda we oli goraon oli talem se plante Wetnes oli mared taem oli yang tumas, samtaem oli kam papa mama bifo we oli naf blong lukaot ol responsabiliti we i kamaot long mared blong olgeta. Sam long ol mared ya oli no save stap longtaem. Sam oli winim trabol blong olgeta, be mared blong olgeta i no givim gladtaem long olgeta. William Congreve, wan Engglisman blong mekem pleplei i tokbaot ol man we oli mared kwiktaem i se, “oli save sore biaen from we oli mared kwik.”
18 Ol seket elda oli talem tu se sam yangfala brata oli no wantem askem wok long Betel, oli no wantem go long Skul Blong Trenem Ol Man Blong Givhan Mo Ol Elda from we oli wantem stap we oli no mared blong smoltaem nomo. Be Pol i givim advaes se i gud yangfala i no mared bifo we hem “i pastru long yang taem blong hem,” (NW) i min se hem i save wet go kasem taem we strong tingting long saed blong seks i godaon. (1 Korin 7:36-38) Ol yia we wan man i stap i no mared oli givim gudfala ekspiryens mo fasin luksave long hem, olsemia hem i naf blong jusum wan man no woman blong mared wetem hem no hem i save tingtinggud long disisin blong hem blong no mared.
19. ?Wanem tingting yumi mas gat sipos yumi no rili nidim mared?
19 Sam long yumi oli pastru yang taem blong olgeta finis, taem ya nao we tingting i strong long saed blong seks. Samtaem maet yumi save tingbaot ol blesing blong mared be yumi kasem presem ya we yumi no mared. Jeova bambae i lukaotgud long yumi blong yumi save gohed blong mekem wok blong hem taem yumi no mared mo yumi no rili nidim blong mared, maet mared i save mekem se yumi lusum sam gudfala wok long wok blong God. Sipos mared i no wan nid blong yumi mo yumi no faenem wan man no woman blong mared wetem, ating God i gat narafala samting we yumi save mekem. Taswe yumi mas trastem hem se hem bambae i givim samting we yumi nidim. Nambawan fasin glad i kamaot taem yumi gat tingting daon mo rere blong mekem samting we God i wantem, olsem ol brata we oli man Jyu oli “leftemap nem blong God” taem oli luksave se hem i tekem ol Hiten man we oli tanem tingting blong olgeta finis blong olgeta tu oli save gat laef.—Ol Wok 11:1-18.
20. (a) ?Wanem advaes long olgeta we oli no mared i stret long ol yangfala Kristin? (b) ?Wanem samting i stampa blong gladtaem?
20 Yes mared i save mekem man i haremgud, be tu hem i save openem rod long ol trabol. Wan samting we yumi sua long hem se: Mared hem i no rod ya nomo blong faenem gladtaem. Tingbaot ol samting ya, i waes se ol yangfala Kristin oli no mared kwiktaem. Oli save yusum ol yia we oli pas blong mekem wok blong Jeova mo blong oli kam bigman long saed blong speret. Nating se wanem yia no olsem wanem oli gohed long saed blong speret, bigfala tingting i stap long saed blong olgeta we oli givim olgeta fulwan long God, se: Trufala gladtaem i kamaot taem man i holemstrong blong mekem wok blong Jeova.
?Olsem Wanem Yu Ansa?
◻ ?From wanem ol man blong Jeova oli glad?
◻ ?From wanem mared i no rod ya nomo blong kasem nambawan gladtaem?
◻ ?Ol man blong Jeova oli mas mekem wanem blong jusum man no woman blong mared wetem?
◻ ?From wanem yumi save se ol Kristin we oli no mared oli save glad?
◻ ?Wanem samting i tru long saed blong mared mo gladtaem?