Wan Ransom Blong Pemaot Plante Man

LONG Maj 31, 1970, ol man oli tekem paoa long wan plen kolosap long Maont Fuji long Japan. Naen memba blong wan grup we oli kolem Red Ami Blong Japan oli holemtaet bitim 120 pasenja blong plen mo ol man we oli wok long hem mo oli fosem plen blong flaegud nomo i go long Not Korea.

Taem plen ya i godaon long Seul, long Ripablik blong Korea, namba tu minista blong transpot long Japan, Shinjiro Yamamura, i putum laef blong hem long denja blong sevem ol man we oli stap kalabus long plen. Ol man we oli tekem paoa long plen ya oli agri blong holem namba tu minista blong transpot go kasem taem we oli save ronwe, nao oli letem ol pasenja mo olgeta we oli wok long plen oli goaot, be paelot nomo i stap. Nao oli flae i go long Piongiang, long ples ya oli letem olgeta nomo i go long han blong ol polis long Not Korea. Masta Yamamura mo paelot tufala i gobak long Japan, tufala i no karem kil.

Long saed ya, wan man i pemaot laef blong bitim 120 man we oli stap kalabus long plen. Samting ya i givhan long yumi blong luk olsem wanem wan man i save givim laef blong hem olsem wan ransom blong pemaot plante man. Be blong kasem save long bilif blong Baebol long saed blong ransom, yumi mas jekemap gud samting ya.

Wan samting se, yumi mas faenemaot stampa blong sin. Baebol i eksplenem se, “Bifo, fastaem olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:12) ?Olsem wanem samting ya i kamaot? Man ya i Adam, hem i faswan man we God i wokem. Yu save ridim store we God i wokem hem mo wanem samting i mekem se hem i no stretgud olgeta blong kasem mak we God i putum. Store blong hem i stap long ol tri faswan japta blong buk blong Jenesis.

Fastaem we Adam i mekem sin, store blong Jenesis i soemaot se i gat wan man we yumi no save luk i stap pulum hem blong agensem God. Blong kasem paoa ya we hem i wantem, man blong pulum man i agensem God i stap mekem rabis plan blong rulum Adam mo ol pikinini blong hem. Man ya hemia Devel Setan. Nem blong hem tu se “snek ya blong bifo” from we hem i yusum wan snek bifo blong mekem Adam i sin. (Revelesen 12:9) Nating se God we i laekem ol man i talem long Adam blong Adam i ona long raet blong Hem blong talem wanem i gud mo wanem i nogud, be snek ya i gyaman long woman blong Adam, Iv, blong hem i no obei long God. Biaen hem i pulum hasban blong hem blong i no obei. Long rod ya, Adam i kam independen long God, hem i wantem kam sinman, mo hem i mekem se ol pikinini blong hem oli kasem wan laef we i no stretgud olgeta.

Naoia yumi stap harem nogud from. ?Olsem wanem? Tingbaot, Man We i Wokem tufala i givim oda se, sipos Adam mo Iv tufala i jusum blong no obei long hem, bambae tufala i save ded from. Taswe from sin ya, Adam i salem olgeta man oli go kalabus long sin mo ded.​—⁠Jenesis 2:17; 3:1-7.

?Olsem wanem ol man oli save fri long sin? Jisas Kraes i kam long wol “blong givim sol blong hem olsem wan ransom blong pemaot plante man,” (NW) mo samting ya i openem rod long ol man blong oli fri.​—⁠Matyu 20:28.

Pembak Mo Mekem i Fri

Baebol i soemaot tu samting we i kamaot blong pemaot ol man blong oli fri, hemia: (1) pembak samting we i lus mo (2) mekem i fri. Long saed blong Grik tok ya (lyʹtron) we oli tanem i kam “ransom,” Baebol studen, Albert Barnes i se: “Tok ya ransom i minim wan praes we man i givim blong pemaot samting we i stap kalabus i kam fri. Long taem blong faet, taem ol enemi oli holemtaet ol man oli kalabus, mane we oli askem blong letem olgeta ya oli fri, hem i ransom. Hemia, samting we i mekem olgeta oli fri. Taswe olgeta samting we oli mekem ol man oli fri from panis, no from trabol, no from sin, oli olsem ransom.”

Yes, “olgeta samting we oli mekem ol man oli fri” oli olsem lyʹtron. Taswe Grik tok ya i makem fasin ya blong pemaot man i kam fri.a

Aposol Pol i yusum narafala tok ya an·tiʹly·tron blong makem praes blong ransom. Long 1 Timote 2:​6, hem i raetem se: “[Jisas] i givim hem blong pem rod blong olgeta man oli gofri.” Parkhurst i tokbaot samting ya i se: “Hem i minim wan praes blong pemaot ol man we oli kalabus oli kam fri long enemi, mo fasin ya i blong givim laef blong wan man blong mekem narafala man i kam fri.” (Greek and English Lexicon to the New Testament) Long ples ya i tokbaot olsem praes we i stret no praes blong ransom we i skelgud wetem stret fasin blong Jeova. ?Olsem wanem ransom sakrafaes blong Jisas, hem i ‘praes we i stret’ (NW)?

Wan Praes We i Stret

Adam i mekem se olgeta man, olsem yumi, oli kalabus long sin mo ded. From samting ya, hem i lusum laef ya blong hem we i stretgud olgeta, we i save laef blong olwe. Blong winimbak samting ya, wan narafala man we i stretgud olgeta​—⁠wan praes we i stret⁠—​i mas pembak. Be, i no gat man we i bon i stretgud olgeta blong hem i save mekem samting ya. (Job 14:4; Ol Sam 51:⁠5) Be long waes fasin, God i mekem wan rod blong winim ol trabol ya. Hem i putum laef blong prapa Pikinini blong hem we i stretgud olgeta long heven, i go long bel blong wan vejin, mekem se hem i bon olsem wan man we i stretgud olgeta. (Luk 1:​30-38; Jon 3:​16-18) Store ya blong Jisas we i bon long wan vejin i no store blong leftemap wan man we i statem wan skul. Be, hem i eksplenem olsem wanem God i givim ransom.

Blong hem i mekem ol man oli fri, Jisas i mas holem laef we i stret taem hem i stap long wol ya. Hem i mekem olsem. Nao hem i ded olsem sakrafaes. Long rod ya, Jisas i givim praes blong laef blong hem we i stretgud olgeta olsem wan ransom blong sevem ol man. (1 Pita 1:19) Taswe yumi save talem se “wan nomo, hem i ded finis blong sevem olgeta man.” (2 Korin 5:14) Yes, “olsem we olgeta man we oli joen long Adam oli save ded, ale, long sem fasin, olgeta man we oli joen long Kraes oli save laef bakegen long ded.”​—⁠1 Korin 15:⁠22.

Wan Man i Pemaot Plante Man

Long store blong ol man we oli holem ol pasenja blong plen oli kalabus, olgeta ya we oli stap insaed long plen oli no gat rod blong oli kam fri olgeta nomo, no gat, nating sipos oli rij. Man afsaed i mas givhan long olgeta, mo man olsem i mas kasem samkaen mak. Samting ya i tru long nambawan fasin long saed blong ransom blong mekem ol man oli fri. Wan man blong raetem Ol Sam i se: “Ol man nogud ya we oli trastem plante samting we oli gat, mo oli stap tok flas from plante samting ya blong olgeta, oli wantem ronem mi, be mi mi no save fraet long olgeta. I no gat man i save pemaot laef blong hem blong bambae i no go long beregraon. Man i no save pem laef blong hem long God blong bambae i stap laef olwe, from we praes blong laef blong man i bigfala tumas, olgeta samting we man i save givim, neva bambae i naf blong samting ya.” (Ol Sam 49:​6-8) Tru ya, ol man oli nidim wan man afsaed blong givhan long olgeta. Laef blong wan man nomo i naf blong pemaot olgeta man sipos man ya i kasem ol mak we i skelgud wetem stret fasin blong God. Jisas Kraes nomo i stretgud olgeta blong hem i save kasem ol mak ya.

Jeova God i mekem se olgeta man oli save kasem sef long ransom sakrafaes blong Jisas Kraes. Mo God i mekem sam samting moa tu. Hem i jajem Devel Setan blong i ded, man ya we i stap gyaman blong pulum ol man i go long sin. (Revelesen 12:​7-9) I no longtaem bambae Jeova i putum rabis man ya long kalabus mo biaen bambae hem i “sakem hem i go long bigfala hol ya blong faea, we i fulap long faea mo salfa nomo,” hol ya blong faea i min se hem i save lus blong olwe. (Revelesen 20:​1-3, 7-10, 14) Afta we hem i finisim rabis speret man ya mo mekem ol blesing blong ransom oli kamtru long ol man, ol man bambae oli haremgud long fasin fri i no long sin mo ded nomo, be oli fri tu long ol rabis fasin blong Setan. From fasin fri ya mo wetem wok blong praes blong ransom sakrafaes blong Kraes, sloslou ol man blong obei bambae oli kam stretgud olgeta.

Ransom Mo Yu

Afta we ol man long ol kantri blong Is oli lanem ol samting ya long saed blong ransom sakrafaes blong Jisas Kraes, plante oli soemaot fasin tangkyu long God from. Kasuo i wan long olgeta. Oltaem hem i stap smelem mo drong long wora blong mekem pen i smut. Oltaem hem i stap akseden long trak taem hem i drong long samting ya. Trifala fren blong hem oli kilim olgeta nomo i ded afta we oli spolem bodi blong olgeta from rabis fasin ya. Kasuo tu i traem blong kilim hem wan i ded. Biaen, hem i stat blong stadi long Baebol. From trutok we hem i stap lanem, hem i wantem mekem laef blong hem i klin. Hem i traehad blong lego fasin ya blong spolem bodi blong hem wetem wora blong smutum pen, samtaem hem i gobak bakegen long ol samting ya. Hem i harem nogud from we hem i wantem mekem samting we i stret be ol samting long saed blong bodi tu oli traem pulum hem. !Naoia, from ransom sakrafaes blong Jisas Kraes hem i save prea long God blong askem hem blong i fogivim hem! Prea wetem help we ol Kristin fren blong hem oli givim, i mekem se Kasuo i winim trabol blong hem mo naoia hem i glad blong mekem wok blong Jeova olsem wan minista wetem voes blong hat we i klin.

?Ating yu tingbaot Jisako, we yumi tokbaot long stat long faswan haf blong magasin ya? From we hem i stadi long Baebol, hem tu i luksave gudfala rod ya blong ransom. Hem i glad tumas taem hem i lanem se God i givim Pikinini blong hem blong mekem ol man oli fri long sin. Jisako i givim laef blong hem long Jeova. Nating se naoia hem i gat 77 yia, hem i spenem samwe 90 haoa long evri manis blong tokbaot bigfala lav mo kaengud fasin blong Jeova long ol narafala man.

Ransom i impoten tumas long yu tu. From sakrafaes blong Kraes, God bambae i openem rod long trufala fasin fri long olgeta man​—⁠fasin fri long saed blong sin mo ded. Wan gudfala fyuja blong laef we i no save finis long paradaes long wol i stap long fored blong olgeta we oli akseptem ransom sakrafaes blong Jisas Kraes. Plis yu toktok wetem ol Wetnes blong Jeova mo faenemaot olsem wanem yu save haremgud long fasin fri long sin mo ded tru long rod ya blong ransom.

[Futnot]

[Image Credit Line pej 5]

Courtesy of the Mainichi Shimbun