?I Gat Rod Blong Kamaot Long Sin?

JISAKO wetem fo pikinini blong hem we oli gat bitim twelef yia finis, oli stap go klinim ol tolet long wan taon we i longwe olsem 600 kilomita long haos blong hem. Taem hem i stap mekem wok blong hem, hem i stap sing long wan singsing blong skul ya Buda, hem i no kasem save long mining blong hem. Hem i olsem wan fasin blong wan grup blong skul we oli stap traem faenemaot stampa blong ol skul.

Jisako i talem se, “Nating se mi stap strong long mi wan, be mi no save jenisim fasin blong mi. Insaed long mi, mi no save fogivim narafala man mo soemaot trufala lav long olgeta.”

Long ol kantri blong Is, plante man oli no bilif se oli gat sin olsem Baebol i tijim, be oli stap haremsave se voes blong hat blong olgeta i stap stikim olgeta from ol nogud fasin we oli mekem from sin, olsem Jisako i harem. (Rom 2:​14, 15) ?Yu harem olsem wanem taem yu no soemaot sore long man we i kasem trabol no yu harem olsem wanem taem yu mastik long tok blong yu mo i mekem man i harem nogud? (Jemes 4:17) Mo fasin jelas we i olsem wan rabis anamol i stap haed insaed long ol yangfala mo tu long ol olfala.

?From wanem ol man oli stap harem nogud long ol samting ya? Nating se ol man oli luksave no no gat, be oli haremsave rong blong olgeta, from we oli sin. Yes, nating se ol man oli luksave tijing blong Baebol long saed blong sin no no gat, ol slak fasin blong sin oli kasem evri man. Wan man we i savegud long bisnes ya i talem se: “Olgeta evriwan oli mekem nogud finis, mo oli stap longwe long ol gudgudfala fasin blong God.”​—Rom 3:23.

?Yu Save Waepemaot Sin?

Plante man tede, olsem olgeta long Krisendom, oli stap traem blong waepemaot ol nogud filing blong sin mo ol rabis fasin we oli stap mekem voes blong hat blong olgeta i stikim olgeta. Dokta Karl Menninger i talem long buk blong hem (Whatever Became of Sin?) i se, “Tok ya ‘sin’ . . . kolosap ol man oli no moa yusum.” Be, ol man we oli no yusum tok ya “sin” oli olsem wan olfala man we i no wantem yusum tok ya “olfala”. Yumi mas luksave se yumi gat ol slak fasin blong sin mo yumi nidim man blong tekemaot yumi long ol trabol ya. ?Be hu i save mekem?

Kristin aposol Pol i askem kwestin ya afta we hem i luksave ol slak fasin blong hem blong mekem sin, nating se hem i no wantem mekem sin. Hem i se: “Man, mi mi no save harem gud nating. ?Hu man we bambae i save pulumaot mi long laef ya we i stap holemtaet mi, we bambae mi ded from?” Nao Pol i gohed blong ansa, i se: “Mi mi talem tangkyu tumas long God, we hem bambae i mekem. Masta blong yumi Jisas Kraes bambae i wokem samting ya.” ?From wanem hem i talem tangkyu? From we God i mekemrere finis rod blong fogivim sin blong yumi tru long ransom sakrafaes blong Jisas.​—Rom 7:​14-25.

Be, plante long ol 3,500,000,000 man we oli no Kristin long wol (namba ya i dabolem namba blong ol man we oli stap talem se oli Kristin) oli faenem i hadwok tumas blong kasem save long ransom. Eksampel, bilif ya blong ransom i mekem wan Muslim man we i stap stadi blong smoltaem long Japan i lego stadi blong hem. Long ol man Is, bilif ya se wan man i save ded blong sevem plante man i narakaen olgeta.

Tru ya, ol man long Krisendom tu oli faenem i had blong kasem save long stampa bilif ya. Buk ya, New Catholic Encyclopedia, i talem se, “Long sam ples ol man oli no kasem save long tijing blong Pemaot Man Blong i Kasem Sef, mo hem i olsem wan trabol long ol skul.”

Tok blong N. H. Barbour, man blong raetem ol buk blong skul, i soemaot se ol man oli no klia long bilif ya. Hem i se: “Ded blong Kraes i no pemaot ol man long sin blong olgeta, ded blong hem i olsem wan flae we oli stikim long nidel mo i stap harem nogud mo wan papa long wol i no save talem se samting ya i wan stret pei blong rabis fasin long pikinini blong hem.” Bifo long taem ya Charles T. Russel i stap joengud wetem Barbour, be from samting ya Russel i luksave se hem i mas holemtaet tijing blong ransom. Hem i no moa joen wetem Barbour mo long 1879 hem i stat blong prentem wan nyufala magasin, we biaen hem i kam magasin ya we yu stap ridim. Stat long taem ya we oli wokem kam kasem naoia Wajtaoa i nambawan magasin blong tokbaot ransom sakrafaes long Jisas Kraes.

?Olgeta we oli no “Kristin” oli save agri long bilif ya samtaem? Blong faenemaot, i gud yumi jekemgud tijing ya se wan man i ded from olgeta man.