Folem Gudfala Rod Blong Lav
JEOVA GOD hem i lav. (1 Jon 4:8) Pikinini blong hem, Jisas Kraes, i talem se yumi mas laekem God mo ol man raonabaot long yumi. (Matyu 22:37-40) !Olgeta samting we God i stap mekem long heven mo long wol oli kamaot from lav blong hem! Taswe blong yumi kasem laef we i no save finis long heven no long wol, yumi mas folem rod ya blong lav.
God i stap soemaot lav long nesen blong Isrel be biaen hem i sakemaot hem olsem wan ogenaesesen from we oli no stap tru long hem. Nao hem i makemaot kongregesen blong ol disaepol blong Jisas olsem nyufala ogenaesesen blong Hem. ?Olsem wanem? Taem tabu speret i givim paoa long olgeta blong oli toktok long narafala lanwis mo talemaot ol tok we God i givim olsem ol samting blong sapraes. Taswe, long Pentekos long yia 33 K.T., 3,000 man Jyu mo ol man we oli stap wosip wetem ol man Jyu oli kam man blong bilif mo oli livim olfala ogenaesesen blong kam long nyufala ogenaesesen blong God. (Ol Wok 2:1-41) From we ol paoa we tabu speret i stap givim, oli go nomo long ol aposol blong Jisas, taswe ol samting blong sapraes oli finis taem olgeta oli ded. (Ol Wok 8:5-18; 19:1-6) Long taem ya ol paoa ya we tabu speret i givim oli pruvum se God i laekem Isrel long saed blong speret.—Galesia 6:16.
Ol merikel we oli kamaot from paoa we tabu speret i givim oli givhan long man. Be, fasin blong soemaot lav, no fasin blong tingbaot ol narafala man i impoten moa long ol paoa ya we tabu speret i givim long ol man. Aposol Pol i soemaot samting ya long faswan leta blong hem long ol man Korin (kolosap 55 K.T.). Long leta ya blong hem, hem i tokbaot lav olsem we hem i “gudfala moa.” (1 Korin 12:31) Hem i tokbaot long 1 Korin japta 13.
Man i Nating Nomo Sipos Hem i No Gat Lav
Pol i talem se: “Sipos mi gat paoa blong tok long ol lanwis blong ol man mo blong ol enjel tu, be mi no laekem ol man, tok ya bambae i olsem noes nomo. Bambae mi olsem wan bigfala tamtam we i stap krae nomo, mi olsem wan bel we i stap singaot blong nating.” (1 Korin 13:1) Sipos man i no gat lav, paoa blong toktok long narafala lanwis blong man no blong enjel i nating nomo. Pol i glad moa blong talem faef tok we i klia bitim we hem i talem ten taosen tok long narafala lanwis we ol man oli no kasem save long hem. (1 Korin 14:19) Wan man we i no gat lav i “olsem wan bigfala tamtam we i stap krae nomo”—wan samting we i mekem noes, wan noes we i mekem ol man oli kros—no i olsem “wan bel we i stap singaot” saon blong hem i no naes. Fasin blong man i toktok long narafala lanwis be hem i no gat lav, hemia i no givhan long man nating, i no mekem man i gru long saed blong speret blong leftemap nem blong God mo givhan long ol man blong hem. Tede yumi stap soemaot lav taem yumi yusum ol tok we ol man oli kasem save long hem long Kristin minista wok blong yumi.
Aposol Pol i gohed i se: “Sipos mi gat paoa blong talemaot ol tok we God i givim, be mi no laekem ol man, bambae mi olsem nating. Mo sipos mi kasem ol save blong man, mo mi save mining blong ol tok ya tu we God i haedem, be mi no laekem ol man, bambae mi olsem samting nating. Mo sipos mi bilif strong long God we i naf blong mi save seftem ol bigfala hil, be mi no laekem ol man, bambae mi olsem nating nomo.” (1 Korin 13:2) Paoa blong talemaot profet tok, spesel save long ol tok ya we God i haedem, mo save we speret i givim maet i givhan long ol narafala man be i no save givhan long olgeta we oli gat save ya sipos oli no gat lav. Pol i yusum ol spesel save long ol tok haed blong givhan long ol narafala man, mo paoa ya blong save i mekem hem i talemaot finis ol man we oli save laef taem sip bambae i rek. (Ol Wok 27:20-44; 1 Korin 4:1, 2) Be, sipos hem i ‘gat olgeta save mo strong bilif,’ be hem i no laekem ol man, long ae blong Jeova hem i nating nomo.
Tede, speret blong Jeova i givhan long ol Wetnes blong hem blong kasem save long ol tok profet blong Baebol mo ol tok haed mo i lidim olgeta blong talemaot ol save ya long ol narafala man. (Joel 2:28, 29) Mo speret ya tu i givim bilif we oli nidim blong winim ol trabol we oli olsem ol bigfala hil. (Matyu 17:20) From we speret i mekem ol samting ya, i no stret blong leftemap yumi from. Yumi olsem nating nomo sipos yumi no mekem evri samting blong leftemap nem blong God, no yumi no laekem God mo ol man raonabaot long yumi.—Galesia 5:6.
No Gat Blesing Long Sakrafaes We i No Gat Lav
Pol i talem se: “Sipos mi givim olting blong mi oli go nating long ol puaman, mo mi letem ol enemi blong mi oli bonem mi long faea from we mi man blong Kraes, be mi no laekem ol man, bambae mi no winim wan samting nating.” (1 Korin 13:3) Sipos Pol i stap givimaot olting blong hem blong givim kakae long ol narafala man be hem i no gat lav bambae hem i no kasem ol gudfala samting from. God i givim pei long yumi from lav we yumi gat taem yumi givim ol presen long ol man, i no from ol sas samting no from we yumi stap wantem leftemap yumi wanwan olsem man blong givim ol samting long narafala man, olsem Ananaeas mo Safaera tufala i man blong gyaman. (Ol Wok 5:1-11) Pol i givim wan gudfala eksampel taem hem i givhan long minista wok long ol man blong bilif long Judia.—1 Korin 16:1-4; 2 Korin 8:1-24; 9:7.
Sipos wan man i ded olsem wan wetnes blong trutok be man ya i no gat lav, samting ya i nating nomo long God. (Proveb 25:27) Jisas i tokbaot sakrafaes blong hem be hem i no tok flas from. Hem i no tok flas from samting we hem i mekem be hem i givim hem wan from we hem i laekem ol man. (Mak 10:45; Efesas 5:2; Hibrus 10:5-10) Ol brata blong hem long saed blong speret oli ‘givim olgeta laef blong olgeta i go nomo long’ wok blong God i no blong leftemap olgeta wanwan from we oli ded mo i no blong soem olgeta be oli stap leftemap Jeova mo soemaot lav blong olgeta long hem.—Rom 12:1, 2.
Sam Fasin We Lav i Mekem Se Yumi Gat
Pol i raetem se: “Man we i stap laekem ol man tumas, tingting blong hem i longfala, mo hem i gat sore long man.” (1 Korin 13:4a) Long plante man, longfala tingting blong God stat long taem we Adam i mekem sin, i stap givim jans long olgeta blong oli tanem tingting blong olgeta from ol sin blong kasem sef ples. (2 Pita 3:9, 15) Sipos yumi gat lav, bambae yumi gat longfala tingting blong tijim trutok long ol narafala man. Bambae yumi no save faerap long ol man mo bambae yumi save tingbaot ol man mo yumi save fogivim olgeta. (Matyu 18:21, 22) Lav i mekem i gud long ol man, mo yumi kam kolosap long God from we hem i kaen long yumi. Frut blong tabu speret blong hem hemia kaen fasin i mekem se yumi no strong tumas long ol narafala man olsem we God i no strong tumas long yumi. (Efesas 4:32) Lav i mekem se yumi kaen tu long ol man we oli no gat fasin tangkyu long yumi.—Luk 6:35.
Pol i gohed i se: “Man we i stap laekem ol man tumas, hem i no save jelas, mo i no save mekem tingting blong hem i go antap, mo i no save flas.” (1 Korin 13:4b) Fasin jelas hem i fasin blong bodi nomo we i save mekem man i mestem Kingdom blong God. (Galesia 5:19-21) Lav i givhan long yumi blong yumi no jelas long ol man from ol samting we oli gat, no gudfala samting we hem i mekem. Sipos hem i kasem wan gudfala wok we yumi wantem, lav bambae i mekem yumi haremgud wetem hem, yumi sapotem hem, mo yumi talem tangkyu long God se hem i save yusum man ya blong blesem kongregesen.
Lav ‘i no save mekem tingting blong man i go antap,’ taswe yumi no save tok flas from wok blong God we yumi stap mekem. Sam man Korin oli tok flas olsem we presen blong tabu speret i kamaot long olgeta, be ol samting ya oli kam long God, olsem ol wok long ogenaesesen blong hem tede. Sipos yumi stap tok flas from wok we yumi stap mekem long ogenaesesen blong God, yumi mas lukaot se yumi no foldaon. (1 Korin 1:31; 4:7; 10:12) Man we i gat lav “i no save flas,” be man we i no gat lav hem i stap ting se hem i impoten. Man we i laekem ol man hem i no harem se hem i hae moa long ol narafala man.—1 Korin 4:18, 19; Galesia 6:3.
Lav i No Jikim, Tingbaot Hem Wan, Kros Kwik
Man we i gat lav “hem i no save jikim man, mo i no save tingbaot hem nomo. Hem i no save kros kwik.” (1 Korin 13:5a) Lav i leftemap ol gudfala fasin, ol fasin we God i glad long ol, fasin ona long haeman, mo gudfala fasin long ol Kristin miting. (Efesas 5:3-5; 1 Korin 11:17-34; 14:40; lukluk Jud 4, 8-10.) Lav i mekem evri man i harem se ol narafala man oli nidim hem, olsem ol defren haf long bodi blong man, from samting ya kongregesen we i gat lav hem i wan ples blong pis mo wan ples blong haed long hem. (1 Korin 12:22-25) I defren long fasin blong man i ‘stap lukaot long ol bisnes blong hem nomo,’ lav i pusum yumi blong samtaem yumi save fogetem ol samting we yumi nomo yumi wantem mekem mo soemaot intres long ol narafala man mo long ol samting we oli save mekem olgeta oli haremgud. (Filipae 2:1-4) Lav i mekem se ‘long fes blong olgeta defrenkaen man, yumi mekem olsem we yumi tu yumi gat sem fasin we olgeta oli gat, blong yusum olgeta rod evriwan blong sevem sam long olgeta’ long minista wok blong yumi.—1 Korin 9:22, 23.
Man we i gat lav “i no save kros kwik.” Fasin kros hem i slak fasin blong bodi blong yumi, be lav i mekem se yumi “no hareap blong kros.” (Jemes 1:19; Galesia 5:19, 20) Be sipos yumi gat raet blong kros, lav i mekem se yumi no holem kros i stap longtaem, ale yumi no save letem Setan i traem yumi. (Efesas 4:26, 27) Olsem ol elda nao oli no mas kros sipos ol man blong bilif oli no folem ol advaes we oli givim long olgeta.
Pol i tokbaot lav tu se man we i gat lav, “i no save stap kros longtaem.” (1 Korin 13:5b) Man we i gat lav i no stap tingbaot ol rong we ol man oli mekem long hem. Man we i gat lav i stap lukluk ol gudfala fasin blong man blong bilif mo hem i no save givimbak taem man i mekem i rong long hem no taem hem i ting se man i mekem i rong long hem. (Proveb 20:22; 24:29; 25:21, 22) Fasin lav i givhan long yumi blong “yumi mas strong blong folem ol fasin we i save mekem pis.” (Rom 14:19) Pol mo Banabas tufala i gat wan rao, mo tufala i seraot long wok blong God, be lav i mekem se tufala i kam fren bakegen mo i givhan long tufala blong tufala i fogetem rao ya.—Levitikas 19:17, 18; Ol Wok 15:36-41.
Laekem Stret Fasin Mo Trutok
Long saed blong lav, Pol i gohed blong talem se: “Hem i no save glad taem i luk we wan narafala man i mekem i no stret, hem i save glad long ol trutok nomo.” (1 Korin 13:6) Sam man oli laekem rabis fasin, “oli mas mekem rabis fasin blong oli slip.” (Proveb 4:16) Be insaed long ogenaesesen blong God yumi no stap raorao no yumi haremgud taem wan long yumi i foldaon long trap blong sin. (Proveb 17:5; 24:17, 18) Sipos ol man long kongregesen blong Korin oli rili laekem God mo stret fasin, bambae oli no save letem rabis fasin i stap insaed long hem. (1 Korin 5:1-13) Wetem ol narafala samting ya, fasin blong laekem stret fasin i mekem se yumi no stap haremgud blong lukluk video, sinima, no ol pleplei we oli soemaot ol rabis fasin.
Fasin lav “i save glad long ol trutok nomo.” Long ples ya trutok i defren long rabis fasin. Samting ya i klia se lav i pusum yumi blong glad long paoa blong stret fasin we trutok i givim long ol man. Yumi glad long ol samting we oli givhan long ol man mo oli sapotem trutok mo stret fasin. Lav i blokem yumi blong yumi no talem ol gyaman tok, yumi glad taem yumi luk wan stret man i no gat fol long sam samting ya, mo i mekem yumi haremgud taem yumi luk trutok blong God i stap win.—Ol Sam 45:4.
Olsem Wanem Lav i Wok Long Olgeta Samting
Pol i gohed blong tokbaot mining blong lav, i raetem se: “Man we i stap laekem ol man tumas, tingting blong hem i no save kam nogud. Oltaem hem i stap bilif strong long God, mo i stap putum tingting blong hem i strong long God oltaem. Bigfala trabol i save kasem hem, be tingting blong hem i no save foldaon.” (1 Korin 13:7) Man we i gat lav “tingting blong hem i no save kam nogud,” hem i no save harem nogud taem man i tok nogud long hem, hem i olsem wan gudfala ruf blong haos we i blokem ren. Sipos man i mekem nogud long yumi be afta i askem yumi blong fogivim hem, lav i givhan long yumi blong winim nogud tingting ya, yumi fogivim man we i mekem nogud long yumi, yumi no save tokbaot bisnes ya long narafala man. Long fasin lav yumi traem blong ‘mekem hem i kam brata blong yumi bakegen.’—Matyu 18:15-17; Kolosi 3:13.
Lav i mekem yumi ‘bilivim strong’ Tok blong God mo yumi gat fasin tangkyu long ol kakae long saed blong speret we i kam tru long “slef ya we i stret mo waes.” (Matyu 24:45-47, NW) Nating se yumi no save bilivim evri samting, lav i givhan long yumi blong yumi no hafhaf long bilif blong yumi mo yumi no stap tingting nogud long ol narafala man blong bilif. (Eklesiastis 7:21, 22) Mo tu man we i gat lav “i stap putum tingting blong hem i strong” long olgeta samting long Baebol, olsem ol trutok blong Kingdom blong God. Lav i pusum yumi blong yumi putum tingting blong yumi i stap strong mo yumi prea blong yumi winim ol traem. Lav i pusum yumi tu blong talem risen blong hop blong yumi long ol narafala man. (1 Pita 3:15) Mo tu, man we i gat lav “tingting blong hem i no save foldaon,” olsem ol sin we oli agensem yumi. (Proveb 10:12) Lav long God i givhan tu long yumi blong stanap strong oltaem taem ol man oli ronem yumi mo long ol narafala traem.
Pol i gohed i se: “Fasin ya we man i stap laekem ol man tumas, bambae i no save finis samtaem.” (1 Korin 13:8a) Olsem we Jeova i stap olwe nomo, lav tu i sem mak hem i no save finis samtaem. From we God ya blong yumi we i no save ded samtaem hem i stampa blong lav, fasin ya bambae i neva save finis samtaem. (1 Timote 1:17; 1 Jon 4:16) Oltaem lav bambae i rulum heven mo wol. I gud yumi prea blong bambae God i givhan long yumi blong winim ol fasin blong tingbaot yumi nomo mo soemaot gudfala frut ya blong tabu speret blong hem.—Luk 11:13.
Ol Samting We Bambae Oli Lus
Pol i raet blong tokbaot fyuja se: “Maet sam man oli gat paoa blong talemaot ol tok we God i givim, be fasin ya bambae i finis. Maet sam man oli gat paoa blong tok long ol narafala lanwis, be ol lanwis ya bambae oli no moa yusum. Maet sam man oli save evri samting, be save ya bambae i lus.” (1 Korin 13:8b) “Paoa blong talemaot ol tok we God i givim” i mekem se ol man we oli gat ol paoa ya oli save talemaot ol nyufala profet tok. Nating se ol paoa we God i givim oli finis afta we Kristin kongregesen i bin stap finis olsem ogenaesesen blong God, paoa blong profet tok blong hem i no save lus, mo Tok blong hem i holem olgeta profet tok we naoia yumi nidim. Paoa blong toktok long narafala lanwis tu i finis, mo save we man i gat “i lus,” olsem we Pol i bin talem. Be ful Toktok blong Jeova i givim ol samting we yumi nidim blong sef. (Rom 10:8-10) Antap moa, ol man blong God oli fulap long tabu speret blong hem mo oli karem ol frut blong hem long laef blong olgeta.
Pol i gohed i se: “From we save ya blong yumi i hafhaf nomo, mo paoa ya blong yumi blong talemaot ol tok we God i givim, hem tu i hafhaf nomo. Be taem ol samting ya we oli stret gud bambae oli kamtru, ol fasin ya blong yumi we oli hafhaf nomo, bambae oli lus.” (1 Korin 13:9, 10) Paoa we God i givim blong kasem save ya mo blong talemaot ol tok we God i givim oli hafhaf nomo. I klia se, profet tok olsem oli no talemaot evri smosmol samting, ol profet oli no savegud fyuja, oli no kasem save we i stretgud olgeta long saed blong ol samting we bambae oli kamtru long fyuja. Be naoia, save long profet tok i stap kam fulwan. Eksampel, ol profet tok blong Baebol oli stap kamtru oli soemaot se Jisas i kasem paoa blong hem olsem wan king long ol man long 1914. Stat long taem ya, yumi stap long “taem blong en” mo yumi stap haremgud from save long saed blong speret mo long ol profet tok blong Baebol we oli stap kam klia moa. (Daniel 12:4) Olsemia nao, yumi stap kasem stret save moa mo “ol samting ya we oli stret gud bambae oli kamtru” i no longtaem.
Nambawan Fasin Ya i Stap
Pol i tokbaot wok blong kongregesen, taem hem i raetem se: “Bifo, taem we mi pikinini yet, mi stap tok olsem pikinini, mi gat save olsem pikinini, mo tingting blong mi i tingting blong pikinini nomo. Be biaen, taem we mi kam man, mi livim ol fasin blong pikinini.” (1 Korin 13:11) Fasin blong wan pikinini i dipen long smol save blong hem mo hem i no kam bigman yet, i isi blong ol samting oli pulum hem i go i kam, olsem pikinini we i stap slip long bed we oli stap pusum i go i kam blong i slip. Be man we i bigman finis, hem i gat moa save, mo i no isi blong ol samting oli save pulum hem. Hem i finis long ol tingting, ol fasin, mo ol rod blong ol pikinini. Sem mak, afta we ogenaesesen blong God long wol i gru, i no moa stap olsem pikinini, God i luk se i no moa nidim paoa we tabu speret i givim blong man i talemaot ol tok we God i givim, toktok long narafala lanwis, mo paoa blong save. Nating se tede ol memba blong kongregesen ya we i olfala finis, oli harem se oli no nidim ol paoa ya we tabu speret i stap givim, be oli glad se tabu speret blong God i lidim olgeta blong mekem wok blong God.
Pol i gohed i se: “Naoia yumi save luk fasin blong God, olsem we yumi stap luk long wan glas we i no klia gud. Be taem we ol samting ya bambae oli kamtru, bambae yumi save luk hem stret long fes blong yumi. Naoia save blong mi i hafhaf nomo. Be long taem ya, bambae mi savegud olgeta samting, olsem we God i savegud olgeta fasin blong mi finis.” (1 Korin 13:12) Taem we kongregesen i stap olsem wan pikinini, hem i no stret taem blong God i soemaot klia sam samting long olgeta. Taswe oli no kliagud long ol samting, olsem we ol Kristin ya oli stap lukluk long wan glas we i no kliagud. (Ol Wok 1:6, 7) Be naoia yumi lukluk ol samting i klia moa. Naoia ol profet tok we oli stap kamtru oli klia nomo, from we naoia i stret taem blong God i soemaot klia olgeta samting. (Ol Sam 97:11; Daniel 2:28) Nating se Pol i save God, be bambae hem i kasem stret save long Jeova mo kasem gudfala fasin fren wetem God taem aposol ya i laef bakegen long ded blong kasem laef long heven, nao hem i save kasem ful pei long Kristin rod blong hem.
Blong finisim tok blong hem long saed blong lav, Pol i raetem se: “I gat trifala fasin oli stap we oli no save lus. Man i stap bilif long God. Man i stap putum tingting blong hem i strong long God. Mo man i stap laekem God mo man tumas. Be nambawan long trifala fasin ya, hemia we man i laekem God mo man tumas.” (1 Korin 13:13) Nating se ol paoa we tabu speret i givim blong mekem merikel oli no moa stap, be kongregesen naoia i kasem ful save mo i gat risen blong gat strong bilif, hop, mo lav. Kongregesen i gat bilif se evri samting we God i promes blong givim i olsem we hem i kamtru finis. (Hibrus 11:1) Bilif bambae i finis taem olgeta samting we Tok blong God i talem blong ol man oli bilif long hem oli kamtru. Hop bambae i finis taem ol samting we ol man oli stap putum hop long olgeta oli kamtru. Be lav hem i stap blong olwe nomo. Taswe i gud yumi evriwan ol Wetnes blong Jeova yumi gohed blong folem rod ya blong lav we i gudfala moa.