Ripot Long Wok Blong Kingdom

Sipsip Blong Jisas i Harem Voes Blong Hem

TAEM wok blong prij i stap go moa long olgeta ples long wol, tru long ol enjel blong hem, Jeova i lidim ol man blong hem blong oli faenem ol man we oli olsem sipsip. Olgeta i harem voes blong Jisas mo oli lanem blong mekem wok blong hem wetem tingting ya blong laef we i no save finis. Jisas i talem long Jon 10:​27, 28 i se: “Ol sipsip blong mi oli save harem voes blong mi. Mi mi savegud olgeta, mo olgeta oli save biaen long mi. Mo mi mi givim laef ya long olgeta we i no save finis.” Makemgud olsem wanem ol man we oli gat gudhat blong Madagaska oli lesin long voes blong Jisas.

Wan long ol Wetnes blong Jeova i givim ol buk ya Yu Save Laef Foreva Long Paradaes Long Wol mo Your Youth​—⁠Getting the Best Out Of It long dokta we i kam blong visitim papa blong hem we i sik.

Dokta ya i wan Protestan mo hem i agensem bigwan ol Wetnes, be hem i ridim buk ya mo i skelem ol vas long prapa Baebol blong hem. Waef blong hem, hem i wan Katolik mo hem tu i wan dokta, hem i ridim Youth buk plante taem from we hem i talem se buk ya oli raetem speseli blong hem. Mining blong ol vas blong Baebol we oli tokbaot saen blong 1914 i pulum tufala. Hasban ya i go luk Wetnes we i givim ol buk long hem. Wetnes ya i givim wan narafala buk Life​—⁠How Did It Get Here? By Evolution or by Creation? long hem mo i mekem plan blong visitim hem mo waef blong hem blong ansa long ol kwestin blong tufala. Taem hem i visitim tufala, hem i statem wan Baebol stadi wetem tufala mo trifala pikinini blong tufala. Save blong olgeta long Baebol i gru kwiktaem.

Afta long faswan stadi, evri famle oli stat blong kam long ol miting long Haos Kingdom mo samtaem biaen oli joen long Tiokratik Skul. Fasin blong ol pikinini blong tufala oli kamgud moa. Long Baebol stadi we oli mekem, oli lanem we lafet blong mekem betde mo ol narafala holidei we skul i stanemap oli no Kristin, olsemia nao, oli no moa mekem olgeta. Hasban ya i no wantem givim blad blong hem long wan famle blong hem, nating we oli no tokbaot haf ya yet long stadi. I no longtaem yunifom blong karate blong hem i no moa stap long ples we hem i stap putum klos long hem. Hem i sanem i go long wan ples blong somap klos blong oli mekem i kam klos blong ol pikinini blong hem. Hem i bonem evri magasin mo buk blong hem blong talemaot fyuja. Afta long tri manis nomo we oli stat blong stadi, hasban ya mo waef blong hem tufala i mekem wan leta i go long jyos blong tufala blong tufala i aot long hem mo tufala i soemaot se tufala i wantem joen long wok blong prij. Naoia tufala i baptaes.

◻ Wan woman long Tailan i stap lukaot trutok. Nating se hem i wan Budis, be hem i neva fasgud long skul blong hem from we hem i luk se ol man oli gat tu fes mo oli griri. Antap long hemia, hem i luk se i gat plante kastom we oli no stret. Hem i taed long skul blong hem.

Biaen, wan woman we i stap kolosap long hem i talem long hem blong joen long ol Kristin mo i tekem woman ya i go long skul blong Pentekostal. Be long taem blong miting, woman ya i gat strong tingting blong goaot mo gobak long haos from i gat noes, from olgeta we oli stap insaed oli prea wetem bigfala voes. Hemia i laswan blong hem we i joen long skul ya.

Samtaem biaen, hem i traem Katolik skul. Taem hem i stap longtaem smol, hem i harem nogud bakegen from ol man oli gat tu fes mo oli griri, sem mak bakegen long ol rij samting we ol pris oli gat. Hem i harem se hem i taed mo hem i no moa go long ples ya. Be pris i wantem save from wanem hem i no moa kam. Taem pris i faenemaot risen blong samting ya, hem i jikim hem se: “Sipos yu wantem joen wetem ol man we oli stap folem ol strong rul yu go luk ol Wetnes blong Jeova.” Woman ya i askem i se: “?Olgeta oli stap wea?” Pris ya i ansa i se: “Oli stap kolosap long ofis blong wora saplae.” Long nekis dei hem i lukaot olgeta be i no faenem olgeta. Hem i harem nogud, hem i stap tingting oltaem long ol Wetnes blong Jeova.

Wan dei hem i harem wan fren we i stap kolosap long hem i jikim fren blong hem se: “!Bambae i no longtaem yu kam wan Wetnes blong Jeova!” Taem woman i harem tok ya, hem i resis i go long man ya mo i askem se: “?I gat sam Wetnes blong Jeova long ples ya?” Hem i ansa se: “Yes. Sam long olgeta bambae oli kam long eria ya blong prij long ol haos wanwan. Bambae yu luksave olgeta from we oli klin mo fasin blong olgeta blong putum klos i stret.” Taem hem i harem samting ya hem i goaot blong faenem olgeta. Fastaem hem i no faenem olgeta, be taem hem i stap gobak long haos blong hem, hem i luk tu woman we fasin blong klos blong tufala i stret, tufala i stap toktok long wan man. Woman ya i kam kolosap mo hem i askem long tufala sipos tufala i Wetnes blong Jeova. Taem tufala i talem se tufala i Wetnes blong Jeova, hem i se: “Plis, yutufala i kam long haos blong mi. Mi wantem storeyan wetem yutufala.”

Hem i stat blong stadi Baebol, mo nating we ol memba blong famle oli agensem hem mo oli laf long hem, gel ya i stat blong go long ol miting mo hem i prij long famle blong hem.

I tru we Jisas i savegud ol sipsip blong hem mo hem i stap hivimap olgeta long ogenaesesen blong hem blong olgeta i save laef foreva long nyufala wol we stret fasin i stap long hem.