Yumi Save Laekem Ol Man Raonabaot Long Yumi
PARABOL blong Jisas Kraes long wan man Sameria i soem trufala mining blong prapa fasin blong laekem ol man raonabaot long yumi. (Luk 10:25-37) Jisas i tijim tu se: “‘Yu mas laekem Hae God ya we i God blong yu long olgeta tingting blong yu, mo long olgeta laef blong yu, mo long olgeta maen blong yu.’ Hemia loa ya we i hae moa long ol narafala loa, mo i nambawan blong folem. Mo narawan, kolosap i olsem. ‘Yu mas laekem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’ Hemia namba tu loa ya.”—Matyu 22:37-39.
?Yu yu harem se i strong blong laekem ol man raonabaot long yu we oli blong defren ples, olsem plante man tede oli stap mekem? Maet yu yu harem olsem from we ol narafala oli mekem i no stret long yu mo oli daonem yu from we yu yu blong defren ples. Maet yu no ol famle blong yu oli stap harem nogud from we ol man blong defren ples oli stap spolem olgeta.
Jisas i talem se wan long olgeta loa blong God se yumi mas laekem ol man raonabaot long yumi, from samting ya i mas gat rod blong winim ol strong filing olsem. Impoten samting blong mekem olsem, i blong yumi lukluk ol man olsem we God mo Kraes tufala i stap lukluk olgeta. I gud yumi tingbaot eksampel blong Jisas mo ol Kristin bifo, long saed ya.
Gudfala Eksampel Blong Jisas
Ol man Jyu long faswan handred yia oli gat strong filing agensem ol man Sameria, we oli stap laef bitwin Judia mo Galili. Long wan taem ol man Jyu we oli enemi mo oli stap agensem Jisas, oli askem hem se: “?Man, mifala i makem yu stret, a? Yu yu wan man Sameria, mo devel i stap long yu finis.” (Jon 8:48) Ol nogud filing agensem ol man Sameria i strong tumas mekem se sam man Jyu oli daonem ol man Sameria long fored blong ol man insaed long ol haos prea, mo oli stap prea oltaem se ol man Sameria oli no kasem laef we i no save finis.
Jisas i save dip filing ya blong no laekem man, taswe hem i talem parabol ya blong wan man Sameria we i rili laekem man raonabaot long hem taem hem i lukaot gud long man Jyu ya we ol man oli kilim mo oli stilim hem. ?Olsem wanem Jisas i save ansa taem man Jyu ya we i save gud Loa blong Moses i askem hem se: “Be hu ol man ya we oli stap raonabaot long mi?” (Luk 10:29) Yes, Jisas i save ansa stret se: ‘Ol man we oli stap raonabaot long yu i no ol man Jyu nomo be ol narafala man tu, nating sipos i man Sameria.’ Be ol man Jyu bambae oli faenem i strong tumas blong akseptem samting ya. Taswe hem i talem pijatok ya blong wan man Jyu we wan man Sameria i sore long hem. Olsemia nao Jisas i givhan long ol man Jyu we oli stap lesin blong luksave se fasin blong soem trufala lav long ol man raonabaot long olgeta i go long ol man we oli no man Jyu.
Jisas i no gat strong filing agensem ol man Sameria. Long wan taem we hem i stap wokbaot tru long Sameria, hem i spel kolosap long wan wel taem ol disaepol blong hem oli go long taon kolosap blong pem kakae. Taem wan woman Sameria i kam blong kasem wora, hem i talem se: “E, yu givim smol wora long mi. Mi wantem dring.” Ol man Jyu oli no stap joen wetem ol man Sameria, from samting ya woman ya i askem se: “!Man! Yu yu wan man Isrel. Mi mi wan woman Sameria. ?Olsem wanem yu askem smol wora long mi olsem?” Nao Jisas i wetnes long hem, mo hem i talemaot long hem se hem nao i Mesaea ya. Hem i bilif long samting ya from hem i go long taon mo singaot ol narafala blong oli kam mo oli lesin long Jisas. ?Wanem frut i kamaot? “Nao long taon ya, i gat plante man Sameria we oli bilif long Jisas.” Wan gudfala frut i kamaot from we nogud tingting blong ol man Jyu long taem blong Jisas, i no blokem hem.—Jon 4:4-42.
God i Stap Mekem i Sem Mak Nomo Long Olgeta Man
Hem i stampa tingting blong God se Jisas i mas prij nomo long ol man Jyu, “we oli olsem ol sipsip we oli lus.” (Matyu 15:24) Taswe, ol faswan man blong hem oli man Jyu. Be tri yia afta we tabu speret i kafsaed long olgeta long Pentekos long yia 33 K.T., Jeova i mekem i klia se hem i wantem ol man Jyu we oli bilif finis blong oli gohed long wok blong mekem disaepol long olgeta man blong nesen, hemia ol Hiten man.
Long tingting blong ol man Jyu, fasin blong laekem wan man Sameria olsem we oli stap laekem olgeta i strong tumas. Bambae i strong moa blong laekem ol hiten man raonabaot long olgeta, we oli no sakomsaes, ol hiten man ya oli longwe moa long ol man Jyu bitim ol man Sameria. Buk ya The International Standard Bible Encyclopaedia i tokbaot fasin blong ol man Jyu long ol Hiten man, i se: “Yumi luk, long taem blong Nyutestaman, nogud tingting we i bitim ol narafala, fasin blong daonem man mo no laekem nating narafala man. Ol man Jyu oli luk ol Hiten man olsem we oli no klin, mo oli no gat raet blong toktok gud wetem olgeta. Olgeta oli enemi blong God mo ol man blong Hem, oli no gat raet blong save God sipos oli no sakomsaes mo joen long sam haf blong wosip long God, mo nating se oli sakomsaes oli no gat raet yet olsem long taem bifo, blong oli joen fulwan long wosip blong God. Ol man Jyu oli no gat raet blong givim advaes long olgeta, mo sipos oli askem ol samting long saed blong God, bambae oli daonem olgeta from.”
Nating se plante man oli gat ol tingting ya, Jeova i mekem aposol Pita i luk wan vison. Long vison ya God i talem hem blong hem i no ‘talem doti long ol samting we God i talem finis se oli klin.’ Nao God i lidim hem i go long haos blong Hiten man ya Konilyas. Pita i stap tokbaot Kraes long Konilyas, famle blong hem, mo long ol narafala Hiten man. Pita i talem se: “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan man Isrel, no i kamaot long wan narafala laen olgeta.” Taem Pita i stap prij yet, tabu speret i kamdaon long ol nyufala man ya blong bilif, we long taem ya oli tekem baptaes mo oli faswan long ol Hiten man blong oli kam man blong Kraes.—Ol Wok, japta 10.
Ol man blong Jisas we oli man Jyu oli akseptem samting ya, oli luksave se oda blong Jisas blong ‘go long olgeta ples long wol, blong pulum olgeta man oli kam man blong hem’ i no blong ol man Jyu nomo we oli stap long olgeta ples be i go tu long ol Hiten man. (Matyu 28:19, 20; Ol Wok 11:18) Taem oli winim sam nogud filing we maet oli gat long ol Hiten man, nao oli strong blong mekem wok blong prij blong pulum ol man aot long olgeta nesen blong oli kam man blong Jisas. I no bitim 30 yia yet oli save talem se oli bin talemaot gud nyus ya “finis long olgeta man long wol.”—Kolosi 1:23.
Aposol Pol i lidim wok ya blong prij, hem i wan man Jyu we i kam Kristin. Bifo we hem i kam wan man blong Kraes, hem i wan strong memba blong skul ya blong ol man Farisi. Oli lukluk daon long ol Hiten man, be oli stap lukluk daon tu long ol man ples blong olgeta nomo we oli no gat haenem. (Luk 18:11, 12) Be Pol i no letem ol tingting ya oli holemtaet hem blong hem i no soem fasin blong laekem ol man raonabaot long hem. Be defren, hem i kam ‘aposol blong ol hiten man,’ hem i givim laef blong hem long wok blong mekem disaepol long olgeta ples long Mediterenian.—Rom 11:13.
Taem Pol i stap mekem minista wok blong hem, ol man oli stonem hem, oli kilim hem, mo oli putum hem long kalabus. (Ol Wok 14:19; 16:22, 23) ?Ol nogud ekspiryens ya oli daonem tingting blong hem, blong ting se hem i stap westem taem blong hem wetem sam nesen mo sam grup blong man? No gat. Hem i save se i gat sam man we hat blong olgeta i stret oli stap olbaot long medel blong plante grup ya blong ol man long taem blong hem.
Taem Pol i faenem ol Hiten man we oli wantem save ol rod blong God, hem i laekem olgeta. Eksampel, hem i raet long ol man Tesalonaeka i se: “Taem mifala i stap wetem yufala, mifala i stap mekem i isi long yufala, olsem wan mama we i stap lukaot long ol pikinini blong hem. Mifala i no tingbaot blong talemaot gud nyus ya nomo long yufala. Mifala i rere tu blong lego long laef blong mifala, from we mifala i laekem yufala tumas, mifala i wantem tumas blong givhan long yufala.”(1 Tesalonaeka 2:7, 8) Ol gudfala toktok ya oli soem se Pol i rili laekem ol man Tesalonaeka we oli blong narafala laen mo hem i no letem wan samting i spolem fasin glad blong fren wetem olgeta.
Fasin Blong Laekem Ol Man Raonabaot Long Yumi
Tede, olsem long faswan handred yia, olgeta ya we oli joen long Kristin kongregesen oli gat fasin ya blong laekem ol man raonabaot long olgeta, ol man long olgeta defren kaen grup. Taem ol trufala Kristin oli stap lukluk ol narafala man olsem we God i stap lukluk olgeta mo taem oli go talemaot gud nyus blong Kingdom long olgeta, nao oli kasem moa save long ol man we maet oli neva gat jans blong kasem save ya sipos oli no mekem olsem. Oli laekem olgeta tu olsem we oli brata nomo. (Jon 13:34, 35) Yu yu save kasem ekspiryens ya tu.
Lav olsem i stap long medel blong ol Wetnes blong Jeova, nating se oli stap long 229 kantri we oli “kamaot long olgeta kala mo long olgeta laen, mo long olgeta kantri, mo long olgeta lanwis.” (Revelesen 7:9) Oli olsem brata nomo long fulwol, oli joengud tugeta long wosip blong Jeova, oli no wantem joen long ol rao mo ol faet blong ol defren grup blong ol man, oli sakemaot tingting blong no laekem man from kala no laen blong hem we i stap spolem man blong i no fren gud wetem ol narafala man.
Joen wetem ol Wetnes, mo bambae yu luk olsem wanem ol man we oli gruap long ol defren ples oli stap mekem wil blong God. Bambae yu luk se oli laekem ol man raonabaot long olgeta taem oli stap talemaot gud nyus blong Kingdom blong God. Yes, insaed long ol kongregesen blong olgeta, bambae yu mitim ol man we oli gat kaen fasin, mo oli rili soemaot long laef blong olgeta se oli rili lanem blong laekem ol man we oli stap raonabaot long olgeta.
[Tok Blong Pija Long Pej 6]
Insaed long ol kongregesen blong ol Wetnes blong Jeova, bambae yu faenem ol man blong ol defren kala no laen we oli stap glad nomo
[Foto Credit Line Blong Pija Long Pej 4]
Arrival of the Good Samaritan at the Inn/The Doré Bible Illustrations/Dover Publications, Inc.