Gohed Blong Stanap Strong Long Wok Blong Paenia
KOLOSAP 4,500,000 Wetnes blong Jeova oli talemaot gud nyus long olgeta ples long wol. Long olgeta ya i gat ova long 600,000 we oli paenia, no ol man blong talemaot Kingdom fultaem. Olgeta ya we oli stap insaed long ami blong ol paenia ya, yia blong samfala i aninit long 13 kasem olgeta we oli retae finis mo samfala oli bitim 90 yia. Oli kam long ol defren ples mo fasin blong laef.
Tru ya, olgeta man blong prij fultaem oli wantem blong gohed long wok blong paenia. Plante oli wantem blong mekem wok ya long ful laef blong olgeta. Sam oli no save mekem olsem from sam kaen risen. Bakegen, sam narafala oli bin gohed gud blong paenia nating se i kam had wok from mane, sik, tingting we i foldaon, mo sam narafala problem. Taswe ?olsem wanem ol man we oli prij fultaem oli save fesem ol problem olsem mo gohed blong stanap strong long wok blong paenia?
Fesem Ol Nid Long Saed Blong Mane
Long oltaem, ol paenia oli gohed long wok blong kasem mane blong pem ol samting we oli nidim, olsem Aposol Pol i mekem. (1 Tesalonaeka 2:9) Long plante ples long wol, oli fesem ol hae praes blong ol kakae, ol klos, haos, transpot. Plante taem i had wok blong kasem haf taem wok we oli nidim blong gohed. Sipos i oraet, plante taem oli givim wok olsem blong smol pei nomo we i no gat insurens blong helt we i blong givhan.
Sipos yumi ‘gohed blong lukaot kingdom blong God fastaem mo stret fasin blong hem,’ yumi save bilif se Jeova bambae i lukaot long ol nid blong yumi long saed blong bodi. From samting ya, taem ol paenia oli gat trabol long saed blong mane, oli no nidim blong ‘tingting tumas from ol samting blong tumora.’ (Matyu 6:25-34) Taem oli traehad blong stretem ol problem olsem, strong bilif long Jeova bambae i mekem olgeta i no moa wari tumas.
Taem wan man i fesem ol had taem long saed blong mane, ating hem i save daonem ol kaon blong hem. Wetem sam jenis long fasin blong hem blong spenem mane hem i save kasem ol samting we hem i nidim, be i no ol samting we i wantem long saed blong bodi. Blong katem daon ol kaon, sam paenia oli serem wan haos wetem ol narafala Kristin. Blong sapotem ol pikinini blong olgeta blong paenia, ol papa mama samtaem oli givim haos we i fri no long wan praes we i smol nomo. Ol narafala oli halpem ol paenia wetem ol kakae mo ol transpot. Be ol paenia oli no wantem kam olsem wan had wok long ol narafala, from oli gat wok we Baebol i givim long olgeta blong sapotem olgeta wanwan.—2 Tesalonaeka 3:10-12.
Praes blong transpot i save kam daon taem oli serem wetem ol narafala paenia. Sipos tu paenia i gat tu trak, maet tufala i joen tugeta long wok blong prij long sem eria, tufala i yusum wan trak nomo mo no yusum tumas mane long tu trak wan taem. Ol paenia we oli no gat trak oli save wok tugeta wetem olgeta we oli gat trak mo serem mane blong olgeta blong kavremap praes blong transpot. Praes blong transpot i save kam smol moa taem oli wokbaot nomo blong go long ol teritori we i stap kolosap. Long plante kantri ol paenia oli yusum ol pablik transpot we i no sas.
Long olgeta we oli winim ol problem long saed blong mane, mo gohed blong stanap strong long wok blong fultaem paenia i gat Newton Cantwell mo waef blong hem. Tufala i salem fam blong tufala mo stat blong paenia wetem sikis long ol seven pikinini blong tufala long 1932, long bigfala taem blong trabol long wol long saed blong mane. Brata Cantwell i raetem se “I no longtaem mifala i spenem plante long ol mane we mifala i kasem taem mifala i salem fam blong mifala, blong pem ol kaon blong mifala long dokta. Mifala i tingbaot se taem mifala i muv i go long seken ples we mifala i go wok long hem, mifala i jes gat inaf nomo blong pem ren blong tu wik we i kam wetem faef dola we i stap. Nating se i olsem, mifala i save se sipos mifala i traehad long wok blong Jeova, bambae Hem i lukaot long ol nid blong mifala . . . Mifala i lanem blong katem mane we mifala i stap spenem. Eksampel, taem mifala i muv i go long nyu teritori, bambae mi mi toktok long sam man we ples blong bensin i blong olgeta mo eksplenem se mifala i draevem tri trak long rod long wan dei wetem ol Kristin wok blong mifala. Samting we i kamaot se oltaem mifala i karem bensin long smol praes nomo. Ol pikinini boe blong mitufala oli lanem kwik taem blong fiksimap ol trak blong mifala, blong sevem moa mane blong fiksimap trak.” Famle Cantwell oli winim ol trabol long saed blong mane mo gohed strong long ful taem wok olsem long paenia. Brata Cantwell i stap yet long lis blong paenia taem hem i ded long 103 yia blong hem.
Tekem Haftaem Wok
Plante paenia oli kasem ol samting we oli nidim long haftaem wok we oli mekem blong kasem smol mane. Blong sapotem hem wan long minista wok long Korin, Pol i wok olsem man blong somap haos tapolen wetem Akwila mo Prisila we tufala i gat sem bilif. (Ol Wok 18:1-11) Tede, ol brata long saed blong speret oltaem oli glad blong givim haftaem wok long ol paenia. Sam narafala paenia oli tekem wok olsem long ol kampani we i givim wok we i blong smoltaem. Bilif long God i impoten wetem prea we i dip blong askem God blong lidim hem blong mekem gudfala disisen long saed blong wok.—Proveb 15:29.
Wan paenia brata i talem se, “Afta we mi kasem bigfala paoa long prea, mi talem long man we i lukaot long wok blong mi se minista wok blong mi i impoten responsabiliti blong mi wan, mo se bambae mi no save akseptem blong mekem fultaem wok. Long Wenesdei we i kam, oli askem mi sipos mi save tekem haf taem wok nomo. Mi mi glad tumas blong akseptem.” Yu no mas ting nating long paoa blong prea, mo wok folem prea we yu mekem.
Maet ol paenia oli faenem se i waes blong talem long man we bambae oli wok blong hem se risen blong olgeta blong lukaot haftaem wok i blong sapotem olgeta wanwan long minista wok. Maet oli save talem ol dei we oli save wok long hem mo hamas haoa long wan wik we oli save spenem long wok. Tu stret sista tufala i divaedem ful taem wok long wan ofis blong loea blong letem wanwan long tufala i wok tu dei mo haf long wan wik. Hem ya i sapotem tufala olsem paenia kasem taem tufala i go long Wajtaoa Baebol skul blong Gilead mo kasem wok blong misinari.
Ol defren kaen wok we i laenap wetem Baebol yu save faenem taem yu toktok wetem ol man blong bilif mo ol narafala no long advaes long ol nyuspepa. Tingting daon i givhan, i save mekem se ol paenia oli glad blong mekem enikaen wok, oli no wantem ol hae wok nomo. (Skelem Jemes 4:10.) Blong gohed long paenia maet oli nidim blong mekem samkaen wok we long lukluk blong sam man wok ya i daon tumas. Sipos oli akseptem wok olsem be biaen oli wantem wan defren kaen wok, wan jenis long wok i save kam antap samtaem.
Sik Mo Tingting We i Foldaon
Be sam oli no save gohed long paenia wok blong olgeta from problem blong helt we oli mas lukluk long hem. Sipos ol paenia oli no hareap blong stop long wok ya, maet bambae oli faenem se wan sik i save kamgud no helt i save kamgud i naf blong oli save gohed blong paenia. Plante paenia oli save stap wetem problem blong helt from we oli tekem meresin, oli stap kakae ol samting we i stret long olgeta, mo oli tekem spel mo eksasaes. Elda we i stap goraon i luk se wan paenia sista we i kasem sik ya we ol joen long bodi oli soa, i nidim wan blong givhan long hem blong wokbaot i go long ol haos long minista wok. (Ol Wok 20:20) Be, hem mo hasban blong hem tufala i mekem 33 Baebol stadi mo oli givhan finis long 83 man blong akseptem trutok blong God. Helt blong hem i kamgud biaen, mo hem i joen long skul blong paenia 11 yia.
Tingting we i foldaon i save mekem samfala blong lego wok blong paenia. (Proveb 24:10) Wan paenia i talem long elda we i stap go raon se: “Bambae mi mi stop blong paenia. . . . Mi mi gat kaon blong pem.” Hem i nidim glas blong ae we praes blong hem i 20 dola. Elda we i stap go raon i askem long hem se, “?Bambae yu stop paenia from we yu nidim 20-dola?” Hem i talem long paenia ya blong i wok long lokol plantesin blong kofe blong wan dei, i kasem 20 dola, pem glas, mo gohed blong paenia. Toktok moa i mekem i klia se problem we i kamaot se tingting i foldaon from ol kaon blong riperem trak. Blong mekem se ol kaon blong paenia ya i smol nomo, hem i kasem advaes blong draevem trak long ol wanwan dei long eria we i no longwe tumas. Hem i kasem advaes tu blong traehad blong stap strong long saed blong speret. Paenia ya i mekem advaes ya i wok mo sikis manis biaen oli askem hem blong go long Giled skul. Afta hem i finisim kos long Giled skul, oli sanem hem i go long narafala kantri we i no save, mo hem i wok tru long plante yia kasem taem hem i ded. Yes, plante taem bigfala blesing i kamaot sipos yumi no letem tingting i foldaon be putum long tingting se Jeova i stap wetem yumi.
Tinghae Long Spesel Wok Blong Yu
Nating se Pol i kasem ol trabol, olsem long ol samting we man i nidim, mo i no gat kakae, be hem i luk minista wok blong hem olsem wan sas samting. (2 Korin 4:7; 6:3-6) Long fored blong hadtaem mo traem tede, plante blong ol man blong Jeova long Afrika, Esia, Is saed long Yurop mo sam narafala ples bakegen oli holemtaet gudfala wok blong paenia. From samting ya taem ol traem oli kam antap, ale, oli traehad blong gohed blong stanap strong long wok ya, blong presem Jeova.
Plante blong ol paenia oli save kam fultaem long wok blong prij nomo from we oli mekem fasin blong laef blong olgeta i isi moa. Olsem Pol, oli agensem fasin blong wantem plante samting tumas long saed blong bodi mo harem gud long “kakae mo klos blong olgeta we oli naf nomo.” Blong gohed long wok blong paenia, oli nidim blong stap glad wetem ol samting we i impoten nomo. (1 Timote 6:8) Glad i kamaot taem yumi tinghae long ol spesel wok we God i givim long yumi, mo putum olgeta antap long ol samting blong bodi.
Blong mekem i klia: Anton Koerber i gat spesel jans blong soemaot ol wok blong kingdom long ol hae man blong gavman long Wasington, D.C. Hem i wok olsem wan paenia samtaem finis mo hem i wan seket elda long ol yia 1952 kasem 1959. Sam long ol bisnesman we hem i bin wok wetem olgeta bifo oli kam mitim hem wan taem wetem plan se bambae i mekem i isi long hem blong mekem profit blong wan milyan dola we i blong hem wan. Be, blong mekem olsem, maet ating bambae hem i mas yusum olgeta taem blong hem long ol samting ya blong bisnes blong ating wan yia. Afta we hem i prea blong Jeova i save lidim hem mo givim klia tingting long hem, hem i talem se: “Mi no save lego nambawan jans ya blong mekem wok blong Jeova long ples ya blong wan yia nomo, no gat, nating sipos mi save kasem olgeta mane long wol. Halpem ol brata blong mi long ples ya long Wasington i moa gud long mi, mo long ples ya mi save se mi gat blesing blong Jeova. Mi save se bambae mi save mekem wan milyan dola, be long en blong wan yia blong kaen laef olsem, ?bambae mi mi olsem wanem long saed blong speret no long saed blong bodi?” From risen ya hem i no wantem mekem. Fasin blong tinghae long ol spesel wok olsem, i halpem plante blong stanap long wok blong paenia.
!Ol paenia oli harem gud long plante bigfala blesing! Hem i wan blesing blong spenem plante haoa blong tokbaot bigfala paoa blong Jeova we hem i king. (Ol Sam 145:11-13) From we oli givim fulap taem long minista wok, ol paenia oli gat blesing blong tekem ol gudfala samting long saed blong speret blong halpem ol man we oli pua mo oli harem nogud, no oli lusum wan long ded mo samfala oli harem nogud tumas, mo oli nidim wan trufala hop. From risen ya, sipos yumi save joen long ful taem wok blong prij, bambae yumi harem gud long plante blesing. Hem i ‘blesing blong Jeova we i mekem man i rij.’ (Proveb 10:22) Mo wetem help mo blesing blong hem, plante man blong talemaot kingdom oli glad blong stanap strong long wok blong paenia.