Wok Blong Paenia—?Yu Yu Save Joen Long Hem?
1 “Mi no save tingbaot blong mekem wan narafala wok. Mo i sua se, mi no save tingbaot wan wok we i givim bigfala glad olsem hemia.” ?Hu i talem ol tok ya? Wan long ol handred taosen Wetnes blong Jeova we oli bin jusum wok blong paenia, olsem faswan wok long laef blong olgeta. ?Yu bin prea long Jeova mo tingbaot sipos yu save joen long wok blong paenia? Yumi bin givim laef blong yumi fulwan i go long Jeova, taswe yumi mas tingbaot sipos yumi save joen moa long wok blong talemaot gud nyus blong Kingdom. Blong givhan long yu blong skelem samting ya, plis tingbaot sam kwestin we plante oli askem long saed blong wok blong paenia.
KWESTIN 1: “Samfala oli talem se wok blong paenia i no blong evriwan. ?Olsem wanem mi save sipos mi mi stret blong mekem wok ya?”
2 Ansa long kwestin ya i dipen long ol samting long laef blong yu mo ol narafala wok we Baebol i talem se yu mas mekem. I gat plante man we helt blong olgeta no wan narafala samting long laef, i no letem olgeta blong spenem 90 haoa evri manis long wok blong prij. Tingbaot ol gudfala Kristin sista we oli waef mo mama tu. From we olgeta ya oli gat plante narafala wok blong mekem, oli joen long wok blong prij go kasem mak we olgeta wanwan oli naf blong mekem. Taem oli gat jans, oli haftaem paenia blong wan manis, no bitim wan manis, evri yia. Long rod ya, oli kasem bigfala glad ya we i kamaot taem yumi joen moa long wok blong prij. (Gal. 6:9) Nating se ol samting long laef blong olgeta i no letem olgeta blong joen blong wok blong fultaem paenia, be oli soemaot tingting blong paenia, mo fasin blong olgeta blong wok strong blong talemaot gud nyus olsem ol pablisa, i wan blesing long kongregesen.
3 Be, plante brata mo sista oli no gat plante wok long laef blong olgeta, ale oli bin jenisim sam samting blong oli save putum wok blong paenia long fasples long laef. ?Olsem wanem long yu? ?Yu yu wan yangfala we i jes finis long skul? ?Yu yu wan waef we i no nid blong wok from we hasban blong yu i kasem naf mane blong sapotem famle? ?Yu yu mared, mo ol pikinini blong yu oli bigwan finis? ?Yu yu ritae finis long wok blong yu? Yumi wanwan i mas tekem prapa disisen blong yumi, blong paenia no nogat. Bigfala kwestin se, ?Yu save jenisim sam samting long laef blong yu blong gat taem blong paenia?
4 Setan i stap yusum wol ya blong fulumap laef blong yumi wetem ol narafala tingting mo wok, mo blong pulum yumi blong folem wan fasin blong laef we yumi tingbaot yumi wan nomo. Sipos yumi gat strong tingting blong stap longwe long ol fasin blong wol, Jeova bambae i givhan long yumi blong putum ol samting long saed blong Kingdom oli stap long fasples long laef, mo blong traehad blong kasem ol nambawan tiokratik wok we yumi naf blong mekem. Sipos yu save jenisim sam samting long laef blong yu blong kam wan paenia, ?from wanem yu no traem mekem olsem?
KWESTIN 2: “?Olsem wanem mi save sua se bambae mi kasem naf mane blong laef sipos mi joen long wok blong fultaem paenia?”
5 I tru se, long plante kantri naoia, ol man oli mas wok plante moa haoa evri wik blong kasem naf mane blong pem ol samting we oli nidim. Nating se i olsem, plante oli bin wok olsem ol paenia blong plante yia finis, mo Jeova i stap gohed yet blong lukaotgud long olgeta. Blong gohed gud long wok blong paenia, yumi nidim bilif, mo yumi mas rere blong lego sam samting we yumi nomo i wantem. (Mat. 17:20) Ol Sam 34:10 i promes long yumi se: ‘Olgeta we oli traem faenem Jeova, bambae oli no sot long ol gudfala samting.’ Wan man we i stat long wok blong paenia i mas bilif fulwan se Jeova bambae i lukaotgud long hem. !Jeova i stap mekem samting ya blong olgeta paenia long evri ples, we oli holemstrong long Hem! (Sam 37:25) Be i tru tu se, ol paenia oli folem rul blong 2 Tesalonaeka 3:8, 10, mo 1 Timote 5:8, taswe oli no wet long ol narafala blong sapotem olgeta long saed blong mane.
6 Wan man we i stap tingting blong joen long wok blong paenia, i mas mekem olsem Jisas i talem, se: “Sidaon fastaem blong kaontem praes.” (Luk 14:28) Fasin ya i soemaot waes we i save karem gudfala frut. Storeyan wetem olgeta we oli bin haremgud long wok blong paenia blong plante yia finis. Askem olgeta, long wanem rod Jeova i bin givhan long olgeta. Seket elda blong yufala i bin paenia plante yia finis, taswe hem bambae i glad blong givim advaes long yu, olsem wanem blong gohed gud long wok blong fultaem paenia.
7 Maet wan man bambae i neva luksave fulwan se promes blong Jisas long Matyu 6:33 i tru, sipos hem i neva putum laef blong hem long han blong Jeova. Wan sista we i stap holemstrong long wok blong paenia i talem se: “Mi mo sista we i wok wetem mi, mitufala i bin kamtru long nyufala ples we mitufala i mas paenia long hem, wetem sam ligim mo smol bata nomo, mitufala i no gat mane. Mitufala i finisim ol kakae ya long faswan naet, nao mitufala i talem se, ‘Yumitu no gat samting blong tumora.’ Ale mitufala i prea long saed ya, nao mitufala i slip. Eli long nekis moning, wan Wetnes i kam long haos mo i sekhan long mitufala. Hem i talem se: ‘Mi mi prea long Jeova blong sanem sam paenia oli kam long ples ya. Tede, mi save prij wetem yutufala kolosap fuldei. Be from we haos blong mi i stap longwe, mi mas kakae wetem yutufala long medel dei. Taswe, mi karem kakae ya i kam blong yumitrifala.’ Hem i karem plante mit mo ligim.” !Yumi luksave from wanem Jisas i talem long yumi blong ‘no tingting tumas from laef blong yumi’! Mo biaen, hem i talem se: “?Yufala i ting se taem man i stap tingting tumas from laef blong hem we i sotfala, bambae i save mekem laef blong hem i kam longfala moa?”—Mat. 6:25, 27.
8 Wol ya i stap kam fulap moa oltaem wetem ol sas samting. Hem i stap traehad oltaem blong pulum yumi blong ronem ol sas samting ya. Be, sipos tingting blong yumi i stap daon mo yumi gat fasin tangkyu from wok blong paenia, bambae yumi glad long smol samting nomo we yumi gat. (1 Tim. 6:8) Ol paenia we oli no wantem plante tumas samting, mo we laef blong olgeta i no fasfas, oli gat moa taem blong prij, mo oli kasem bigfala glad mo paoa long saed blong speret, from wok blong tijim ol narafala long trutok. Oli no laef long fasin we oli no gat wan samting nating, be stret tingting blong olgeta long saed blong smol mane we oli gat, i mekem se oli save haremgud long ol blesing long wok blong paenia.
9 Sipos yu luksave se yumi stap laef long ol las dei, mo se smoltaem nomo i stap bifo we rabis wol ya i lus, ale samting ya i mas pusum yu blong lego sam samting we yu nomo i wantem, mo talemaot gud nyus long evri jans we yu kasem. Sipos yu traem skelem bakegen mane we yu stap kasem, mo putum bisnes ya long han blong Jeova, maet yu luksave se yu yu naf blong joen long wok blong fultaem paenia. Nating se yu mas lego sam sas samting we yu wantem, blong mekem se yu save paenia, be bambae yu kasem plante sas blesing long Jeova.—Sam 145:16.
KWESTIN 3: “?From wanem mi, wan yangfala, i mas tingbaot wok blong paenia olsem wok we mi jusum long ful laef blong mi?”
10 I tru se, long ol laswan yia long skul, yu stap tingbaot fyuja blong yu. Yu wantem se bambae yu sef, yu hapi, mo yu mekem wok we yu haremgud long hem. Maet sam man blong givim advaes long skul oli traem pulum yu blong jusum wan wok we yu mas stadi plante yia long haeskul blong kasem, mo we bambae i givim plante mane long yu. Be Kristin tingting we yu yu trenem finis blong lidimgud yu, i talem long yu se yu mas tingrere blong mekem wok blong Jeova fulwan. (Ekles. 12:1) Mo tu, wan dei, maet yu wantem mared mo gat pikinini. Ale, ?bambae yu mekem wanem?
11 Ol disisen we yu tekem taem yu yu yangfala, oli save gat paoa long ful laef blong yu. Sipos yu tekem baptaes finis olsem wan Wetnes blong Jeova, ale yu givim ful laef blong yu long Hem finis. (Hib. 10:7) Taswe, long faswan jans we yu yu kasem, traem haftaem paenia blong wan manis no blong plante manis. Long rod ya, bambae yu luksave glad mo wok we i joen wetem wok blong fultaem paenia. Mo tu, i sua se, tingting blong yu long saed blong wanem we yu mas mekem long laef blong yu, bambae i kam klia moa. Nao, afta we yu finis long skul, ?from wanem yu no traem stat long wok blong fultaem paenia, i bitim we yu spenem fultaem blong yu long wan wok blong kasem bigfala mane? Samfala we oli bin wet blong paenia go kasem taem we oli olfala moa, oli sore we oli no bin stat taem oli yangfala.
12 Yu we yu yangfala yet, yu no mas hareap blong mared, nao bambae yu save haremgud long ol gudfala samting we oli kamaot taem yu joen fulwan long wok blong prij. Sipos wan dei yu wantem mared, wok blong fultaem paenia we yu bin mekem, bambae i putum wan faondesen blong mared blong yu we i moagud i bitim olgeta narafala wok. Taem yu kam bigman moa long tingting mo long saed blong speret, maet yu jusum blong gohed blong paenia long ful laef blong yu, wetem wan hasban no waef we i gat semfala tingting. Sam hasban mo waef we oli bin paenia tugeta, oli mekem wok blong seket elda no oli kam misinari. !I no gat wan fasin blong laef we i save mekem yu yu haremgud moa!
13 Nomata sipos yu gohed longtaem long wok blong paenia no smoltaem nomo, be hemia bambae i finisim edukesen blong yu, mo bambae i tijim yu moagud i bitim eni narafala wok long wol. Wok blong paenia i tijim yumi blong stretem yumi wan, blong folem wan gudfala plan long laef, olsem wanem blong toktokgud wetem ol narafala man, dipen long Jeova, gat longfala tingting mo kaen fasin—hemia ol fasin we bambae oli mekem yu yu naf blong kasem wok we i bigfala moa.
14 I no gat wan taem bifo we i olsem naoia, we laef blong ol man i no suagud. Ol samting we Jeova i promes nomo oli save stap longtaem, i no gat plante narafala samting olsem. From we plante yia blong laef oli stap yet long fyuja blong yu, i no gat wan taem we i moagud bitim naoia, blong tingting gud long wanem we bambae yu yu mekem long laef blong yu long ol yia we oli kam. Tingting gud long jans we yu gat blong paenia. Bambae yu no save harem nogud long fyuja, sipos yu jusum wok blong paenia olsem bigfala wok long laef blong yu.
KWESTIN 4: “?Bambae mi wari oltaem blong kasem haoa blong mi? ?Olsem wanem sipos mi no kasem haoa blong mi?”
15 Taem yu fulumap pepa blong fultaem paenia, yu mas ansarem kwestin ya: “?Yu bin mekem wan gudfala plan long laef blong yu, blong yu naf blong kasem 1,000 haoa long wan yia?” Blong kasem mak ya, yu mas spenem tri haoa evri dei long wok blong prij. I klia se yu mas gat wan gudfala plan, mo sam samtaem, yu mas stretem yu wan, blong yu folemgud plan ya. Bighaf blong ol paenia oli faenem se, afta we oli paenia blong sam manis, oli gat wan gudfala program we i stret long laef blong olgeta.
16 Be, tok blong Eklesiastis 9:11 i tru, se: ‘Ol taem mo ol samting we man i no save long hem, oli hapen long yumi evriwan.’ Bigfala sik no wan narafala trabol i save kamaot wantaem nomo, mekem se paenia i no kasem haoa blong hem. Sipos problem ya i blong smoltaem nomo mo i kamaot long stat blong sevis yia, maet hem i nidim nomo blong wok strong moa, blong kasem ol haoa ya we hem i mestem. Be, ?olsem wanem sipos wan bigfala trabol i kamaot long ol laswan manis blong sevis yia, mo paenia i no gat taem blong mekem ol haoa ya we hem i mestem?
17 Sipos yu yu sik blong sam manis, no sipos wan narafala impoten samting we yu no save blokem i mekem se yu no kasem haoa blong yu, yu save go luk wan brata long Sevis Komiti blong kongregesen mo eksplenem problem blong yu. Sipos ol elda ya oli ting se i gud blong letem yu yu gohed long wok blong paenia we yu no nidim blong traem mekem ol haoa we yu mestem, bambae oli tekem disisen ya. Sekretari bambae i makem long Kad blong Pablisa se yu no nid blong kasem ol haoa ya we yu mestem. Hemia i no olsem wan spel we oli givim long yu, be wan spesel disisen from trabol we i kamaot long laef blong yu.—Lukluk haf 18 blong pepa we i stap insaed long Kingdom Wok Blong Yumi, long Ogis, 1986.
18 Olgeta we oli bin mekem wok blong paenia longtaem finis, oli wok strong long ol faswan manis blong sevis yia blong gat plante haoa. Wok blong paenia i stap long faswan ples, taswe sam samtaem oli mas livim wan wok we i no impoten. Sipos wan paenia i stap mestem plante haoa from we hem i no gat wan gudfala plan, no i no stap stretem hem wan lelebet blong folemgud plan ya, hem i mas luksave se hem i gat wok blong fulumap ol haoa ya we hem i mestem. Hem i no mas ting se ol brata bambae oli mas tekem wan spesel disisen blong letem hem i gohed we i no mekem ol haoa ya.
19 Samtaem, i gat sam samting i hapen we paenia i no save blokem. Maet hem i gat wan problem blong helt we i stap gohed nomo, no maet hem i kasem moa wok insaed long famle, no wan narafala samting olsem. Maet plante manis i pas we hem i no save kasem ol haoa blong hem. Sipos samting ya i kamaot, hem i waes blong kam wan pablisa bakegen, nao hem i save joen long wok blong haftaem paenia taem hem i gat jans nomo. I no gat wan plan i stap, blong letem wan man i gohed long wok blong paenia, sipos sam samting long laef blong hem oli blokem hem evritaem blong kasem ol haoa blong hem.
20 Mifala i hop se spesel plan blong givhan long olgeta we oli gat wan problem blong smoltaem, bambae i pulum moa man blong stat long wok blong paenia, we oli no wari bitim mak long ol haoa blong olgeta. Mo tu, hem i mas pulum olgeta we oli stap long wok blong paenia finis, blong oli gohed nomo. Yumi wantem se ol paenia oli gohed gud long fultaem wok blong prij.
KWESTIN 5: “Mi wantem mekem wan gudfala wok long laef blong mi mo haremgud long hem. ?Wok blong paenia bambae i givim samting ya?”
21 Trufala glad i dipen bigwan long gudfala fasin fren we yumi gat wetem Jeova, mo strong bilif se yumi stap holemstrong long wok blong hem. Jisas i ded long pos, from “hem i luksave we bambae i save harem gud.” (Hib. 12:2) Hem i kasem glad from we hem i mekem samting we God i wantem. (Sam 40:8) Long wol ya, yumi save kasem trufala glad sipos bighaf blong ol wok blong yumi long laef oli joen wetem wosip blong Jeova. Ol wok long saed blong speret oli givim mining long laef blong yumi, from we yumi haremsave long hat blong yumi se yumi stap mekem samting we i stret. Yumi kasem glad taem yumi givhan long narafala. Mo yumi save se i no gat wan narafala rod we i moagud blong givhan long ol narafala, i bitim we yumi tijim olgeta olsem wanem blong kasem laef we i no save finis long nyufala wol blong God.—Ol Wok 20:35.
22 Paenia we yumi tokbaot long haf 1 i eksplenem se: “?I gat wan glad we i bigwan moa i bitim hemia we yumi kasem taem yumi luk wan man we yumi stadi wetem hem, i stat presem Jeova? Taem yumi luk paoa blong Tok blong God blong pusum man blong jenisim laef blong hem mo mekem Jeova i glad, samting ya i mekem yumi hapi tumas mo i mekem bilif blong yumi i kam strong moa.” (Lukluk Wajtaoa Oktoba 15, 1997, pej 18-23.) Taswe, ?wanem samting i save givim glad long yu? Sipos yu wantem wan gudfala wok we bambae i stap olwe, i bitim we yu wantem kasem glad we wol i save givim blong smoltaem nomo, ale wok blong paenia bambae i givim nambawan filing long yu se yu stap karem frut long laef blong yu, mo bambae yu kasem trufala glad from.
KWESTIN 6: “Sipos i no nid blong paenia blong kasem laef we i no save finis, hem i disisen blong mi blong mi paenia, ?i tru no?”
23 I tru, yu nomo yu save tekem disisen blong paenia no nogat. Jeova nomo i save sipos yu naf blong mekem wok blong paenia wetem ol narafala wok we yu gat long laef blong yu. (Rom 14:4) Hem i gat raet blong askem yu blong mekem wok blong hem wetem ful hat, sol, maen, mo paoa blong yu. (Mak 12:30; Gal. 6:4, 5) Hem i laekem tumas wan man we i givim presen wetem gladhat, mo we i glad blong mekem wok blong hem. Hem i no wantem we man i wok long fasin we i no glad, olsem we narafala i stap fosem hem nomo. (2 Kor. 9:7; Kol. 3:23) Taswe, wan tingting long saed blong speret i mas pusum yu blong paenia. Sipos no, i no longtaem, bambae yu no moa glad long wok ya. Tingting we i mas pusum yu blong mekem wok blong Jeova fultaem, hemia lav we yu gat long Hem mo long ol man long ples we yu prij long hem. (Mat. 9:36-38; Mak 12:30, 31) Sipos yu yu gat tingting olsem, ale i gud yu tingbaot blong joen long wok blong paenia.
24 Mifala i hop se ol save ya bambae oli givhan long yu blong skelem ol samting long laef blong yu, mo luk sipos yu yu save joen long wok blong paenia. ?Yu save jenisim sam samting long laef blong yu blong mekem se yu save kam wan fultaem paenia? Long en blong haf ya, i gat wan program we nem blong hem se, “Program Blong Mi Long Wok Blong Paenia Evri Wik.” Traem fulumap program ya long fasin we i stret long laef blong yu, mo makemaot 23 haoa evri wik blong joen long wok blong prij. Biaen, bilif fulwan long Jeova mo trastem Hem fulwan. !Sipos hem i givhan long yu, bambae yu naf! Hem i promes se: “Bambae mi mi [mekem] . . . ol blesing oli kamdaon long yufala mo bambae mi givim olgeta samting ya long yufala gogo yufala i no moa nidim.”—Mal. 3:10.
25 Taswe, mifala i askem se: “Wok blong paenia—?yu yu save joen long hem?” Sipos yu ansa se “Yes,” ale, putum wan stret dei blong stat kwik long wok blong fultaem paenia. !Mo yu save sua se Jeova bambae i blesem yu wetem wan laef we i fulap long glad!
[Bokis]
Program Blong Mi Long Wok Blong Paenia Evri Wik
(Lukluk niuspepa)