Tijing Blong God i Win

“Ae blong yufala i mas kam ae we i lukluk Bigfala Man blong tijim yufala. Mo sora blong yufala bambae i harem wan tok biaen long yufala se: ‘Hemia rod ya. Wokbaot long hem, yufala olgeta man.’”​—AESEA 30:​20, 21.

1. ?From wanem i stret blong kolem tijing blong Jeova se tijing we i kamaot long God?

JEOVA GOD i Stampa blong nambawan tijing we eniman i save kasem. Sipos yumi lesin taem hem i tok, antap moa, tru long Tabu Tok blong hem, nao hem i kam olsem Bigfala Man blong tijim yumi. (Aesea 30:20) Mo tu Hibru Baebol i kolem hem se “Hemia we i olsem God.” (Ol Sam 50:1) Taswe, tijing blong Jeova, i tijing ya we i kamaot long God.

2. ?Long wanem rod i tru se God nomo i waes?

² Wol ya i flas from plante hae skul blong hem we oli givim edukesen, be i no gat wan long olgeta we i givim tijing blong God. Yes, stat bifo i kam, olgeta waes we man i kasem oli smol nomo taem yumi skelem wetem tijing blong God we i stanap long waes blong Jeova we i no gat mak blong hem. Rom 16:27 i talem se God nomo i waes, mo samting ya i tru long rod ya se Jeova nomo i gat olgeta waes.

3. ?From wanem Jisas Kraes i hae bitim ol narafala tija we i wokbaot long wol?

³ Pikinini blong God, Jisas Kraes, i nambawan eksampel blong soem fasin waes mo hem i wan tija we i hae moa long ol narafala tija we i bin wokbaot long wol ya. !Yumi no sapraes long samting ya! Long plante, plante yia bifo, Jeova i bin stap olsem Tija blong hem long heven. Yes, tijing blong God i stat taem God i stat blong tijim faswan man we hem i wokem, Pikinini blong hem, wan nomo we hem i gat. From samting ya, Jisas i save talem se: “Mi stap talemaot ol samting ya nomo we Papa blong mi i tijim mi finis long hem.” (Jon 8:28; Proveb 8:​22, 30) Ol prapa tok blong Kraes we oli raetemdaon long Baebol, oli mekem se yumi kasem plante moa save long tijing blong God. Taem ol tabu Kristin oli tijim samting we Jisas i bin tijim, oli stap obei long Bigfala man blong Tijim olgeta, we wil blong hem se oli mas talemaot ‘bigfala waes blong hem we i gat plante rod blong hem,’ tru long kongregesen.​—Efesas 3:​10, 11; 5:1; Luk 6:40.

Lukaot Fasin Waes

4. ?Oli bin talem wanem long saed blong ol wok we bren i save mekem?

⁴ Blong kasem fasin waes we i kamaot long tijing blong God, yumi mas yusumgud fasin blong tingting we God i givim long yumi. Yumi save mekem olsem from bren blong man i naf blong mekem bigbigfala wok. Buk ya The Incredible Machine i talem se: “Ol spesel kompyuta we yumi save tingbaot, oli nating nomo taem yumi skelem wetem bren blong man we i save karem fulap save bitim mak mo mekem plante defren kaen wok bitim mak​—samting ya i save kamaot from plan blong bren we i harem save mo i putum long stret oda plante plante smosmol saen we hem i stap kasem tru long ol kemikol we oli joen wetem lektrik long bodi. . . . I gat plante milyan saen oli stap pastru long bren blong yu kwiktaem, mo ol saen ya oli karem ol mesej we oli plante tumas. Oli karem nyus long ol samting we oli stap hapen insaed mo afsaed long bodi blong yu: olsem yu harem fingga blong leg blong yu i soa, no smel blong kofe, no tok blong wan fren we i mekem yu laf. Taem ol narafala saen oli stap wok mo oli stap skelem ol mesej, oli mekem sam kaen filing i kamaot, memori, ol tingting, no ol plan we oli lidim man blong mekem wan disisen. Kolosap long sem taem nomo, ol saen long bren blong yu oli talemaot long ol narafala haf blong bodi samting we oli mas mekem: muvmufum fingga long leg blong yu, dring kofe, laf, no ating givim wan ansa we i mekem man i laf. Long sem taem, bren blong yu i stap lukaotgud long fasin blong bodi blong pulum win, blad i gat ol stret kemikol long hem, bodi i no hot no i kolkol tumas, mo sam narafala impoten wok we yu no harem save se hem i stap mekem. Hem i givim oda we i mekem se bodi blong yu i save stap strong mo wokgud nating se oltaem ol samting oli stap jenis raonabaot long yumi. Hem i rerem tu ol samting we yu nidim long fyuja.”​—Pej 326.

5. ?Long Baebol, fasin waes i minim wanem?

⁵ Nating se bren blong man i gat nambawan paoa blong wok, ?olsem wanem yumi save yusum maen long fasin we i nambawan? I no long fasin ya we yumi joen fulwan blong mekem dip stadi long wan lanwis, histri, sayens, no blong skelem ol skul. No gat. Yumi mas yusum tingting blong yumi blong kasem tijing blong God fastaem. Fasin ya nomo i karem trufala waes. ?Be wanem ya trufala waes? Long mining we i stap long Baebol, bigfala haf blong fasin waes hemia gudfala fasin blong skelem samting, we i stanap long stret save mo fasin blong kasem trufala mining blong save ya. Fasin waes i mekem yumi naf blong yusumgud save blong yumi mo yusum fasin blong kasem dip mining blong save ya blong stretem ol problem, blong blokem no stap longwe long ol denja, blong givhan long ol narafala, mo blong kasem ol mak. I gud tumas blong save we Baebol i talem se fasin waes i defren olgeta long krangke fasin mo fasin we man i no soem waes nating​—tufala fasin we yumi rili wantem stap longwe long tufala.​—Dutronome 32:6; Proveb 11:29; Eklesiastis 6:8.

Bigfala Buk Blong Jeova Blong Tijim Man

6. ?Sipos yumi wantem soem trufala waes, yumi mas yusumgud wanem samting?

⁶ Waes blong wol i fulap raonabaot long yumi. (1 Korin 3:​18, 19) !Tru ya, wol ya i fulap wetem ol skul mo ol laebri we insaed oli gat plante milyan buk! Plante long ol buk ya oli tijim man long saed blong lanwis, matematik, sayens, mo save long sam narafala samting. Be Bigfala Man blong Tijim yumi i givim wan buk blong tijim man we i bitim ol narafala buk​—tabu Tok blong hem, Baebol. (2 Timote 3:​16, 17) Baebol i stret taem i tokbaot ol sabjek olsem histri, jiografi,a mo save long saed blong ol tri mo gras, be i no hemia nomo, hem i stret tu taem hem i talemaot fyuja. Antap long samting ya, hem i halpem yumi naoia blong gat wan laef we i hapi tumas mo wan laef we i gat mining. Tru ya, ol studen long wan skul blong wol oli mas yusum ol buk blong olgeta, ale yumi tu yumi mas savegud mo yusum bigfala Buk blong God we i tijim yumi, sipos yumi wantem soem trufala waes olsem ol man we ‘Jeova i tijim olgeta.’​—Jon 6:45.

7. ?From wanem yu save talem se, i no naf blong man i fulumap bren blong hem wetem save long Baebol?

⁷ Be, fasin ya blong fulumap bren blong yumi wetem save long Baebol i no sem mak long trufala waes mo fasin blong folemgud tijing blong God. Blong mekem wan eksampel: Afta long yia 1600 K.T., wan man blong Katolik we nem blong hem Cornelius van der Steen i wantem kam wan Jesuit be oli no akseptem hem from hem i sotfala tumas. Manfred Barthel i talem long buk ya blong hem The Jesuits​—History & Legend of the Society of Jesus i se: “Komiti ya i talem long van der Steen se oli rere blong lego rul ya we man i mas longfala, be nomo se hem i mas lanem olgeta tok blong Baebol baehat. Bambae i no nid blong talem store ya sipos van der Steen i no bin folem oda ya we i blong jikim man nomo.” !Hem i no isi nating blong rimemba olgeta samting long Baebol! Be, i moa impoten blong kasem save long Tok blong God bitim we man i lanem baehat.

8. ?Wanem bambae i halpem yumi blong haremgud long tijing blong God mo blong soem trufala waes?

⁸ Sipos yumi wantem haremgud fulwan long tijing blong God mo blong soem trufala waes, yumi mas gat stret save long Baebol. Tabu speret, no strongfala paoa blong Jeova i mas lidim yumi tu. Samting ya bambae i mekem se yumi save kasem save long ol dip trutok, “ol tingting blong God we man i no save faenemaot.” (1 Korin 2:10) Taswe, yumi mas stadi gud long bigfala Buk blong Jeova mo prea long hem blong lidim yumi wetem tabu speret blong hem. Olsem Proveb 2:​1-6 i talem, yumi mas lesingud long ol waes tok, mekem hat blong yumi i laekem fasin luksave, mo singaot long dip save. Yumi mas mekem samting ya olsem we yumi stap lukaot ol sas samting we oli haed, from we long rod ya nomo, ‘bambae yumi kasem save long fasin fraet gud long Jeova, mo bambae yumi faenem save blong God.’ Sipos yumi tingbaot olsem wanem tijing blong God i stap win mo ol frut blong hem bambae i mekem se yumi gat moa fasin tangkyu long waes ya we God i givim.

Gohed Blong Kasem Mining

9, 10. ?God i talem wanem, olsem i stap long Jenesis 3:​15, mo wanem stret mining blong ol tok ya?

⁹ Tijing blong God i win taem hem i stap gohed sloslou blong givim mining blong Baebol long ol man blong Jeova. Eksampel, yumi bin lanem se Devel Setan nao i tok long maot blong snek long garen blong Iden mo i talem gyaman tok ya se, God i gyaman taem Hem i talem se sipos tufala i kakae long frut we hem i putum tabu long hem bambae tufala i kasem ded olsem wan panis. Nating se i olsem, yumi luk se fasin blong no obei long Jeova God i mekem se ded i kasem olgeta man. (Jenesis 3:​1-6; Rom 5:12) Be, God i givim hop long olgeta man taem hem i talem long snek, hemia Setan se: “Yu mo woman ya, bambae yutufala i no laeklaekem yutufala, bambae yutufala i stap agens long yutufala. Ol pikinini we bambae oli kamaot biaen long yu, mo ol pikinini we bambae oli kamaot biaen long hem, bambae oli badfren long olgeta. Nao ol pikinini ya blong hem bambae oli smasem hed blong ol pikinini ya blong yu, mo ol pikinini ya blong yu bambae oli kakae leg blong ol pikinini ya blong hem.”​—Jenesis 3:15.

¹⁰ Ol tok ya oli wan tok haed we sloslou tijing blong God i bin mekem i kam moa klia. Jeova i tijim ol man blong hem se bigfala stampa tok blong Baebol i blong leftemap hae rul blong hem tru long Laen ya, wan pikinini blong Ebraham mo Deved we hem i gat raet blong rulum Kingdom. (Jenesis 22:​15-18; 2 Samuel 7:​12, 13; Esikel 21:​25-27) Bigfala Tija blong yumi i tijim yumi se Jisas Kraes nao i faswan Laen blong “woman,” ogenaesesen blong God long heven. (Galesia 3:16) Long evri traem we Setan i mekem long Jisas, Jisas i holemstrong long God​—gogo kasem we hem i ded, fasin ya we snek i kakae leg blong Laen blong woman. Yumi bin lanem tu se ol 144,000 man we God i tekemaot olgeta long medel blong olgeta man, blong rul wetem Kraes long Kingdom, bambae oli joen wetem Kraes blong smasem hed blong Setan, “snek ya blong bifo.” (Revelesen 14:​1-4; 20:2; Rom 16:20; Galesia 3:29; Efesas 3:​4-6) !Yumi glad tumas blong kasem save olsem long Tok blong God!

Long Nambawan Laet Blong God

11. ?From wanem yumi save talem se tijing blong God i win taem i tekem ol man oli kam insaed long laet long saed blong speret?

¹¹ Tijing blong God i win taem hem i tekem ol man oli kam insaed long laet long saed blong speret. Ol tabu Kristin oli bin kasem ekspiryens ya blong mekem tok ya long 1 Pita 2:9 i kamtru, se: “God i bin jusumaot yufala blong yufala bambae i laen blong hem. Yufala i olsem ol pris blong King. Yufala i olsem ol man blong wan ples nomo, we yufala i tabu man blong God. Yufala i olsem ol man we God i tekem yufala i blong hem nomo. God i mekem olsem long yufala, blong bambae yufala i save talemaot ol gudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem.” Tede, wan “bigfala hif blong man” we bambae oli laef foreva long wan paradaes wol, olgeta tu oli haremgud long laet ya we God i givim. (Revelesen 7:9; Luk 23:43) Taem God i stap tijim ol man blong hem, Proveb 4:18 i stap kamtru, i se: “Rod blong ol stret man i olsem wan laet we i saengud we i stap kam bigwan gogo dei i fulap gud long laet.” Fasin ya we sloslou yumi kasem moa save i mekem se mining blong tijing blong God i kam moa klia, olsem ol studen oli gru moa long saed blong save from wan tija i halpemgud olgeta taem oli stadi long saed blong lanwis, histri, no sam narafala sabjek.

12, 13. ?Tijing blong God i bin protektem ol man blong Jeova agens long ol denja blong wanem tijing?

¹² Wan narafala rod we tijing blong God i win long hem, hemia se, ol man we oli obei long hem wetem tingting daon, hem i protektem olgeta long ‘ol tijing blong ol devel.’ (1 Timote 4:1) !Long defren fasin, lukluk long Krisendom! Long 1878, John Henry Newman, we i wan haeman blong Roman Katolik, i raetem se: “From we long taem ya oli trastem paoa blong Kristin Skul blong agensem rabis wok blong devel, mo blong jenisim ol plan mo fasin blong wosip long ol dimon i kam fasin blong talemaot gud nyus, . . . ol lida blong Jyos long taem bifo oli rere, sipos oli mas, blong akseptem, no folem, no blong sapotem wosip mo kastom we i stap finis wetem olgeta man long ples ya, mo tu ol waes blong ol man we oli skul gud.” Newman i gohed se ol samting olsem tabu wora, klos blong ol pris, mo ol aedol “oli kamaot long ol hiten man, mo oli mekem ol samting ya oli kam klin taem oli tekem olgeta oli kam insaed long jyos.” Ol man blong God oli glad tumas from we tijing blong God i protektem olgeta long fasin blong apostasi.b Tijing blong God i winim olgeta kaen fasin blong wok wetem ol rabis speret.​—Ol Wok 19:20.

¹³ Tijing blong God i winim ol rong tijing blong ol skul long evri rod. Eksampel, olsem ol man we God i tijim olgeta, yumi no bilif long Triniti be yumi agri se Jeova i Hae Olgeta, Jisas i Pikinini blong hem, mo tabu speret i strongfala paoa blong God. Yumi no fraet long helfaea, from yumi save se hel blong Baebol i minim beregraon blong olgeta man. Mo nating se ol man blong gyaman skul oli talem se sol blong man i no save ded, yumi save se ol dedman oli no save wan samting nating. Yumi save gohed mo gohed blong talem plante moa trutok we yumi kasem tru long tijing blong God. !Hemia wan blesing blong kam fri long kalabus long saed blong speret long Bigfala Babilon, ogenaesesen blong ol gyaman skul long wol!​—Jon 8:​31, 32; Revelesen 18:​2, 4, 5.

14. ?From wanem ol man blong God oli save gohed blong wokbaot long laet long saed blong speret?

¹⁴ From we tijing blong God i win taem hem i soemaot rong tijing blong ol skul, hem i mekem se ol man blong God oli save wokbaot long laet long saed blong speret. I olsem se oli harem wan tok biaen long olgeta we i talem se: “Hemia rod ya. Wokbaot long hem, yufala olgeta man.” (Aesea 30:21) Tijing blong God i protektem ol man blong hem tu long ol gyaman tingting we ol man oli stap stanemap. Taem ol “gyaman aposol” oli stap mekem trabol long kongregesen long Korin, aposol Pol i raetem se: “Ol samting ya we mifala i stap yusum blong faet, oli no samting blong faet blong man. Mifala i stap yusum ol samting blong faet blong God, we olsem oli naf blong brekemaot ol strongfala haos. Nao mifala i stap brekemaot ol gyaman tok we ol man oli stap talem, blong blokem ol trutok. Mifala i stap pulum daon olgeta samting we ol man oli stap stanemap long flas blong olgeta, we oli blong blokem ol man blong oli no save God. Mifala i stap tanem olgeta rabis tingting blong man, blong mekem olgeta oli ona long Kraes.” (2 Korin 10:​4, 5; 11:​13-15) Ol advaes we oli givim insaed long kongregesen wetem kwaet fasin, mo wok blong talemaot gud nyus long ol man we oli no stap long trutok, i stap pulum daon olgeta tingting we oli no laenap wetem tijing blong God, we ol man oli stap stanemap.​—2 Timote 2:​24-26.

Wosip Wetem Speret Mo Trutok

15, 16. ?Olsem wanem blong mekem wosip long Jeova wetem speret mo trutok?

¹⁵ Taem wok blong talemaot Kingdom i stap gohed strong, tijing blong God i win from i soem long ol man we oli gat tingting daon olsem wanem blong wosip long God ‘wetem speret mo trutok.’ Long wel blong Jekob kolosap long taon blong Saeka, Jisas i talem long wan woman Sameria se, hem i save givim wora we i givim laef we i no save finis. Taem hem i stap tokbaot ol man Sameria, hem i gohed se: “Yufala i stap mekem wosip long God, we yufala i no save hem . . . I gat taem i stap kam, yes, taem ya i kam finis, we ol prapa man blong mekem wosip i save mekem wosip long Papa blong yumi wetem [speret mo trutok, NW]. Hemia nao ol prapa man blong mekem wosip we Papa blong yumi i wantem blong oli stap mekem wosip long hem.” (Jon 4:​7-15, 21-23) Long taem ya nao, Jisas i soemaot hem wan olsem Mesaea.

¹⁶ ?Be olsem wanem yumi save wosip long God wetem speret? Hemia taem yumi mekem klin wosip long God wetem hat we i gat fasin tangkyu mo i fulap long fasin ya blong laekem God tumas, we lav ya i stanap long stret save long Tok blong hem. Yumi save wosip long hem wetem trutok taem yumi sakemaot olgeta gyaman tijing blong ol skul mo taem yumi mekem wil blong God, olsem bigfala Buk blong Jeova blong tijim yumi i soem.

I Winim Ol Hadtaem Mo Wol

17. ?Olsem wanem yu save pruvum se tijing blong God i halpem ol man blong Jeova blong fesem ol hadtaem?

¹⁷ Taem ol man blong God oli fesem ol hadtaem, bakegen mo bakegen tijing blong God i win. Tingbaot samting ya: Long stat blong Namba Tu Bigfala Faet blong Wol, long Septemba 1939, ol man blong Jeova oli nidim spesel fasin luksave long bigfala Buk blong hem. Wan atikol long Wajtaoa, blong Novemba 1, 1939 i givhan bigwan, i soemaot klia tijing blong God long Kristin fasin blong no tekem saed long faet. (Jon 17:16) I sem mak, long stat blong ol yia biaen long 1960, ol atikol blong Wajtaoa we oli tokbaot stret rod blong stap aninit long “ol haeman” blong gavman, oli halpem ol man blong God blong folem tijing blong God taem i gat trabol long ol grup blong ol man raonabaot long olgeta.​—Rom 13:​1-7; Ol Wok 5:29.

18. ?Ol man blong namba wan mo tu handred yia K.T. we oli talem se oli Kristin, oli gat wanem tingting long ol rabis pleplei, mo tede tijing blong God i givim wanem help long saed ya?

¹⁸ Tijing blong God i givhan long yumi blong winim ol traem, olsem fasin ya we man i wantem lukaot ol rabis pleplei. Makemgud ol tok blong ol man ya we oli bin talem se oli Kristin, biaen long yia wan handred mo tu handred Kristin Taem. Tertullian i raetem se: “Mifala i no joen nating, long fasin blong toktok, lukluk no lesin, long ol krangke fasin we i joen wetem ol pleplei long pablik ples (circus), ol fasin blong sem we oli no fraet blong mekem long ol sinema, raf fasin we oli mekem long ol stad.” Wan narafala man blong raetem store long taem ya i askem se: “?Wan Kristin man we i gat strong bilif i save mekem wanem long medel blong ol samting ya, from we hem i no mas tingting nating long ol rabis samting? ?From wanem hem i haremgud long ol ples we oli olsem saen blong ol samting we bodi nomo i wantem?” Nating se tufala man ya blong raetem store, tufala i laef sam yia afta long ol Kristin blong faswan handred yia, tufala i agensem ol pleplei we oli leftemap rabis fasin. Tede, tijing blong God i givim waes long yumi blong ronwe long ol pleplei we oli doti, fulap long fasin nogud long saed blong seks, mo oli raf.

19. ?Olsem wanem tijing blong God i halpem yumi blong winim wol ya?

¹⁹ Taem yumi folem tijing blong God, yumi save winim wol ya. Yes, taem yumi folemgud tijing blong Bigfala Man blong Tijim yumi, i mekem se yumi winim ol rabis fasin we oli save pulum yumi, long wol ya we i stap long paoa blong Setan. (2 Korin 4:4; 1 Jon 5:19) Efesas 2:​1-3 i talem se God i mekem yumi laef nating se bifo i olsem we yumi ded from we yumi bin rong mo yumi bin mekem sin taem yumi stap wokbaot folem jif blong ol devel we oli stap olbaot long wol ya. !Yumi talem tangkyu long Jeova from we tijing blong hem i halpem yumi blong winim fasin blong laekem wol ya mo tingting we i kamaot long enemi ya blong hem mo enemi blong yumi​—papa blong gyaman, Devel Setan!

20. ?Yumi mas gohed blong faenemaot ansa blong wanem kwestin?

²⁰ Naoia, i klia se tijing blong God i stap win long plante rod. Yes, ating yumi no naf blong talemaot evri rod we hem i win long hem. Hem i gat paoa long laef blong ol man raon long wol. ?Be hem i stap mekem wanem long yu? ?Tijing blong God i stap wok olsem wanem long laef blong yu?

[Ol futnot]

?Yu Yu Bin Lanem Wanem?

◻ ?Olsem wanem yumi save eksplenem trufala waes?

◻ ?Sloslou God i bin gohed blong eksplenem wanem long saed blong Jenesis 3:15?

◻ ?Olsem wanem tijing blong God i win long ol samting long saed blong speret?

◻ ?I minim wanem blong wosip long God wetem speret mo trutok?

◻ ?Olsem wanem tijing blong God i halpem ol man blong Jeova blong winim ol hadtaem mo wol ya?

[Tok blong pija long pej 10]

Jisas i holemstrong long God gogo kasem ded​—taem ya we Laen ya i kasem kil long bak blong leg