Haremgud Long Ol Frut Blong Tijing Blong God
“Mi, Jeova, mi mi God blong yu, God ya we i stap tijim yu blong givhangud long yu.”—AESEA 48:17.
1. ?Bambae yumi kasem wanem sipos yumi folem tijing blong God long laef blong yumi?
JEOVA GOD i save ol samting we oli nambawan. I no gat wan man i bitim hem long fasin blong tingting, toktok, no fasin blong mekem ol samting. Olsem Man we i Wokem yumi, hem i savegud ol nid blong yumi mo i stap givim plante long ol samting ya. I tru se hem i save olsem wanem blong tijim yumi. Mo sipos yumi folem tijing blong hem, yumi save kasem frut mo haremgud long trufala fasin glad.
2, 3. (a) ?Olsem wanem ol man blong God bifo oli save kasem blesing sipos oli obei long ol loa blong hem? (b) ?Bambae wanem i hapen sipos yumi folem tijing blong God long laef blong yumi tede?
2 Tijing blong God i soem se God i wantem tumas we ol man blong hem oli folem ol loa mo rul blong hem, blong oli no kasem trabol mo oli save haremgud long laef. Sipos ol man blong Jeova bifo oli bin lesin long hem, oli save haremgud long ol nambawan blesing, from we hem i bin talem long olgeta se: “Mi, Jeova, mi mi God blong yu, God ya we i stap tijim yu blong givhangud long yu. Mi mi stap mekem yu yu wokbaot long rod ya we yu mas wokbaot long hem. !Mi mi wantem tumas we yu lesingud long ol oda blong mi! Sipos yu mekem olsem, bambae pis blong yu i kam olsem wan bigfala reva, mo stret fasin blong yu bambae i kam olsem ol wef blong solwora.”—Aesea 48:17, 18.
3 Ol man blong God bifo oli save kasem blesing sipos oli obei long ol loa mo tijing blong God. Oli save haremgud long pis mo gudfala laef we i fulap, i dip, mo i olsem wan reva we i ron oltaem, bitim we oli stap harem nogud long han blong ol man Babilon. Antap long samting ya, stret fasin blong olgeta i save kam olsem ol wef blong solwora we man i no save kaontem. I sem mak, sipos yumi folem tijing blong God long laef blong yumi, yumi save haremgud long plante frut blong hem. ?Wanem sam long ol frut ya?
Hem i Jenisim Laef Blong Man
4. ?Olsem wanem tijing blong God i bin jenisim laef blong plante man?
4 Tijing blong God i bin halpem plante man taem hem i mekem laef blong olgeta i kam moa gud. Olgeta we oli folem tijing blong Jeova oli lego ‘ol fasin we tingting blong olgeta nomo i wantem,’ olsem ol fasin blong sem, fasin blong prea long narafala god, ol bisnes blong posen mo kleva, faet, mo fasin jelas. Defren nao, oli soemaot ol frut blong tabu speret, hemia lav, glad, pis, longfala tingting, gat sore long man, gudfala fasin, bilif, oli kwaet man, mo fasin blong bos long tingting. (Galesia 5:19-23) Mo tu oli folem advaes we i stap long Efesas 4:17-24, we Pol i talem long ol brata mo sista blong no folem fasin blong ol hiten man, we tingting blong olgeta i no hevi, i no save karem frut nating mo tingting blong olgeta i stap long tudak nomo, nao oli stap longwe tumas long laef ya we God i stap givim. Ol wanwan man we oli folemgud Kraes, oli no letem hat we i strong olsem ston i lidim olgeta, be ‘oli putumaot olfala laef ya blong bifo we oli stap folem ol fasin blong olgeta nomo. Oli mekem paoa we i stap wok long tingting blong olgeta i kam nyuwan. Oli kasem nyufala laef we God i wokem blong olgeta, we i stret wetem laef blong hem. Ol fasin blong nyufala laef ya oli stret, oli gud, oli tabu, from we oli kamaot long trutok nomo.’
5. ?Olsem wanem tijing blong God i save jenisim rod we man i folem?
5 Wan nambawan frut we yumi save kasem taem yumi folem tijing blong God, se hem i soem long yumi olsem wanem blong wokbaot wetem God. Sipos yumi wokbaot wetem Jeova, olsem Noa i mekem, yumi folem fasin blong laef we Bigfala Tija blong yumi i soem. (Jenesis 6:9; Aesea 30:20, 21) Olsem aposol Pol i talem, ol man blong ol nesen oli stap wokbaot we “tingting blong olgeta i no hevi, i no save karem frut nating.” !Mo i tru, sam raeting we i kamaot long tingting blong ol man ya oli no save karem frut nating! Wan man i luklukgud ol raeting blong sam narafala long wan stonwol long Pompei, nao hem raetem se: “Hem i wan samting blong sapraes, O stonwol, se yu no foldaon yet from hevi blong plante raeting ya we oli no gat mining nating.” Be long ‘tijing blong Jeova’ mo long wok blong talemaot Kingdom we i kamaot from tijing ya, i no gat wan samting we i no gat mining. (Ol Wok 13:12) Wok ya nao i wekemap tingting blong olgeta we oli laekem trutok. Oli lanem olsem wanem blong no moa folem rabis fasin blong olgeta, we oli no save long ol stampa tingting blong God. Tingting blong olgeta i no moa stap long tudak, no hat we i strong olsem ston i no moa pusum olgeta blong traem kasem ol mak we oli no save karem frut nating.
6. ?Olsem wanem fasin blong yumi blong obei long tijing blong Jeova i joen wetem fasin glad blong yumi?
6 Tijing blong God i givhan long yumi tu blong kasem moa save long Jeova mo ol wok blong hem. Save olsem i pulum yumi i kam moa kolosap long God, i mekem lav we yumi gat long hem i gru, mo i mekem yumi wantem tumas blong obei long hem. Fas Jon 5:3 i talem se: “Sipos yumi laekem God tumas, hemia i min se yumi stap folem ol loa blong hem. Mo ol loa blong hem oli no strong tumas blong yumi folem.” Yumi folem ol loa blong Jisas tu from we yumi save se ol tijing blong hem oli kam long God. (Jon 7:16-18) Fasin obei olsem i blokem yumi blong no kasem trabol long saed blong speret mo i mekem yumi glad moa.
Wan Trufala Risen Blong Laef
7, 8. (a) ?Wanem mining blong Ol Sam 90:12? (b) ?Olsem wanem yumi save kasem wan hat we i waes?
7 Tijing blong Jeova i givhan blong soem long yumi olsem wanem blong yusum laef blong yumi long fasin we i gat mining. Tru ya, tijing blong God i soem long yumi olsem wanem blong kaontem ol dei blong yumi long wan spesel fasin. Wan man we i hop se bambae hem i laef 70 yia i save se bambae hem i kasem 25,550 dei. Sipos hem i gat 50 yia, hem i spenem 18,250 dei finis, mo i luk olsem ol 7,300 dei blong hem we oli stap yet, oli no plante nating. Long taem ya nao hem i save luksave moa from wanem profet Moses i prea long God long Ol Sam 90:12 se: ‘Plis yu soem long mifala olsem wanem blong kaontem ol dei blong mifala long fasin we mifala i save kam waes long hat blong mifala.’ ?Be Moses i minim wanem long tok ya?
8 Moses i no minim se God bambae i soemaot stret namba blong ol dei long ful laef blong wanwan man Isrel. Ol Sam 90, vas 9 mo 10, i soem se Hibru profet ya i luksave se maet laef blong man i save kasem 70 no 80 yia—i rili sot. Taswe i klia se ol tok blong Ol Sam 90:12 i soemaot prea blong Moses we hem i wantem tumas se Jeova i soem, no tijim hem, mo ol man blong Hem, blong oli soem fasin waes blong tinghae long ‘ol dei blong ol yia blong olgeta’ mo blong yusum ol dei ya long fasin we God i glad long hem. Nao, ?olsem wanem long yumi? ?Yumi gat fasin tangkyu long ol wanwan dei ya we oli gud tumas? ?Yumi stap kam waes long hat blong yumi taem yumi stap traehad blong yusum evri dei long wan gudfala rod we i leftemap nem blong Bigfala Tija blong yumi, Jeova God? Tijing blong God i givhan long yumi blong mekem olsem.
9. ?Yumi save tingbaot wanem fyuja sipos yumi lanem blong kaontem ol dei blong yumi blong leftemap nem blong Jeova?
9 Sipos yumi lanem blong kaontem ol dei blong yumi blong leftemap nem blong Jeova, bambae yumi save gohed blong kaontem, from we tijing blong God i givim save blong laef we i no save finis. Jisas i talem se: “Mo hemia laef ya we i no save finis, we man i save yu, we yu nomo yu God tru, mo we man i save mi ya, Jisas Kraes we yu yu sanem mi mi kam.” (Jon 17:3) Tru ya, sipos yumi gat olgeta waes we wol ya i save givim, samting ya i no save givim laef we i no save finis long yumi. Be yumi save gat laef we i no save finis sipos yumi kasem mo folem stret save long saed blong tufala man we tufala i moa impoten long olgeta man long heven mo long wol mo sipos yumi rili soem bilif.
10. ?Wan insaeklopedia i talem wanem long saed blong edukesen, mo olsem wanem yumi save skelem samting ya wetem ol frut blong tijing blong God?
10 Nating se yumi bin laef hamas yia finis, i gud yumi tingbaot nambawan frut ya blong tijing blong God: Hem i givim wan trufala risen blong laef long ol man we oli stap folem. The World Book Encyclopedia i talem se: “Edukesen i mas halpem ol man blong kam ol memba blong wan sosaeti we oli stap givhan long ol defren rod. Hem i mas halpem olgeta tu blong gat fasin tangkyu from ol gudfala fasin we oli kasem from kantri we oli bon long hem mo blong gat wan laef we oli harem gud moa long hem.” Tijing blong God i halpem yumi blong haremgud long laef. Hem i mekem se long hat blong yumi, yumi gat fasin tangkyu long ol gudfala samting we yumi kasem long saed blong speret olsem ol man blong God. Mo hem i rili mekem se yumi kam ol memba blong wan sosaeti we yumi save givhan long olgeta long ol defren rod, from hem i mekem se yumi kam i naf blong mekem impoten wok we i stret long nid blong ol man long olgeta ples long wol. ?From wanem yumi save talem samting ya?
Program Blong Tijim Ol Man Raonabaot Long Wol
11. ?Olsem wanem Thomas Jefferson i leftemap nid blong gat gudfala edukesen?
11 Tijing blong God i defren olgeta long ol narafala program blong tij, hem i kavremap olgeta nid blong ol man long saed blong edukesen. Thomas Jefferson, we i kam namba tri presiden blong Yunaeted Stet i makemgud nid ya blong tijimgud olgeta man. Long wan leta blong Ogis 13, 1786, we Jefferson i sanem i go long George Wythe, wan fren mo man we i joen wetem hem blong saenem ‘Declaration of Independence,’ hem i raetem se: “Mi ting se loa we i moa impoten long olgeta loa blong yumi, hemia loa blong tijimgud save mo mekem i goaot long olgeta man. Yumi no save tingbaot wan narafala strong fandesen bakegen, blong holemtaet fasin fri mo fasin glad. . . . Dia masta, talemaot klia long ol man, ol strong tok agens long fasin blong no gat save; stanemap mo mekem loa ya blong tijim enikaen man i kam moa gud. Letem ol man long kantri blong yumi oli save . . . se takis we bambae oli pem [blong sapotem edukesen] i smol we i smol taem yumi tingbaot mane we oli mas pem long ol king, ol pris, mo ol haeman we bambae oli stanap long medel blong yumi, sipos yumi no tijim olgeta man.”
12. ?From wanem yumi save talem se tijing blong God i karem moa frut mo i nambawan long olgeta program blong edukesen raonabaot long wol?
12 Tijing blong Jeova i no livim ol man we oli laekem stret fasin oli stap we oli no gat save, hem i folem nambawan program bitim ol narafala program blong tijim ol man raonabaot long wol blong oli kasem frut. Taem Namba Tu Bigfala Faet blong Wol i stap gohed 50 yia bifo, ‘Committee on Educational Reconstruction’ blong Yunaeted Stet i luksave impoten nid blong “edukesen raonabaot long wol.” Nid ya i stap yet, be tijing blong God nomo i program blong edukesen raonabaot long wol we i karem frut. Hem i bitim ol narafala tijing tu from we hem i givim hop long olgeta we oli no gat hop, i mekem olgeta oli kasem wan mak we i hae moa, long saed blong ol fasin blong olgeta mo long saed blong speret, i sevem olgeta long fasin flas mo fasin blong mekem i moa gud long sam man bitim sam narafala man, olsem wol i folem, mo i givim save blong laef we i no save finis. Antap long ol samting ya, program ya i stap mekem i gud long ol man long evri ples taem hem i stap tijim olgeta blong mekem wok blong Jeova God.
13. ?Olsem wanem Aesea 2:2-4 i kamtru tede?
13 Bigfala hif blong man we naoia oli stap kam man blong God oli stap haremgud long ol frut blong tijing blong God. Oli luksave nid blong olgeta long saed blong speret mo oli savegud se dei blong Jeova i kolosap. (Matyu 5:3; 1 Tesalonaeka 5:1-6) Stret naoia, “long laswan haf blong ol dei,” ol man ya we oli kamaot long olgeta nesen oli stap kam kwiktaem long hil blong Jeova, klin wosip blong hem. Hem i stanap strong finis mo i hae moa bitim ol wosip we oli no laenap wetem wil blong God. (Aesea 2:2-4) Sipos yu wan Wetnes we yu givim laef blong yu finis long Jeova, ?yu yu glad blong stap long medel blong bigfala hif blong ol man we oli stap wosip long God we namba blong olgeta i stap gohed blong gru, mo oli stap kasem blesing from tijing blong God? I gud tumas blong stap long medel blong ol man ya we oli talem se: ‘!Oltaem yufala i mas presem Ja!’—Ol Sam 150:6.
Hem i Save Mekem Maen Blong Yumi i Kamgud Moa
14. ?Olsem wanem i save givhan long yumi sipos yumi folem advaes blong Pol long 1 Korin 14:20?
14 Wan long ol frut blong tijing blong God se, hem i save mekem tingting mo paoa blong maen we i stap pusum yumi i kamgud moa. Hem i mekem se yumi putum tingting blong yumi long ol samting we oli stret, oli tru, oli klin gud, mo we ol man oli stap ona long olgeta. (Filipae 4:8) Tijing blong Jeova i givhan long yumi blong folem advaes ya blong Pol se: “Long fasin blong yufala, yufala i mas stap longwe long sin, olsem smol pikinini nomo. Be long tingting blong yufala, yufala i mas kam olsem we yufala i bigman finis.” (1 Korin 14:20) Sipos yumi folem advaes ya, bambae yumi no lukaot save long saed blong ol rabis fasin. Pol i raetem tu se: “Yufala i mas lego olgeta fasin blong kros. Yufala i mas no holem kros. Mo yufala i mas no kros kwik. Yufala i mas no sakem tok blong yufala i go antap, mo yufala i mas no tok nogud long yufala. Mo yufala i mas finis long olgeta fasin nogud.” (Efesas 4:31) Sipos yumi folem advaes olsem, bambae hem i halpem yumi blong no mekem nogud long saed blong seks mo ol narafala sin we oli bigwan. Bambae samting ya i halpem yumi long saed blong bodi mo tingting, be antap moa bambae hem i rili mekem yumi glad from yumi save se yumi stap mekem Jeova i glad.
15. ?Wanem i save halpem yumi blong gat stret tingting oltaem?
15 Sipos yumi wantem se tingting blong yumi i stap stret oltaem, wan rod blong givhan i blong no joen wetem ‘ol rabis fren we oli save spolem ol gudfala fasin.’ (1 Korin 15:33) Yumi ol Kristin, yumi no mas joen wetem ol man blong slip olbaot, ol man blong slip wetem man no woman blong narafala, mo ol man blong mekem ol narafala rabis fasin. Ale, i klia se yumi no mas joen wetem ol man olsem, maet taem yumi ridim store long saed blong olgeta no yumi lukluk olgeta long televisin no long ol sinema, blong pulum filing blong yumi nomo. Hat i save trikim man, i isi nomo blong hem i wantem ol samting we oli no stret, mo sam samting oli save pulum hem blong mekem ol fasin ya. (Jeremaea 17:9) From samting ya, i gud yumi obei oltaem long tijing blong God, ale yumi ronwe long ol ol samting olsem we oli pulum yumi blong mekem nogud. Tijing blong God i save gat paoa long tingting blong “ol man we oli laekem Jeova” gogo oli kasem nambawan mak ya we oli “agens long ol rabis fasin.”—Ol Sam 97:10.
16. ?Olsem wanem tijing blong God i save gat paoa long tingting we yumi soemaot?
16 Pol i talem long man we i wok wetem hem, Timote se: “Masta blong yumi bambae i stap wetem yu long tingting blong yu. Mo hem bambae i stap givhan long yu long gladhat blong hem.” (2 Timote 4:22) Aposol Pol i wantem se God, tru long Masta Jisas Kraes, i agri long paoa we i stap pusum tingting blong Timote mo ol narafala Kristin. Tijing blong God i halpem yumi blong soem lav, kaen fasin mo kwaet fasin. (Kolosi 3:9-14) !Mo hem i defren tumas long fasin blong plante man long lasdei ya! Tingting blong olgeta i antap tumas, oli no man blong talem tangkyu, oli no man blong sore, oli man blong mekem i strong tumas oltaem long ol narafala man, oli no kea, oli wantem tumas ol samting we oli stap haremgud long hem, mo oli stap longwe long trufala fasin blong ona long God. (2 Timote 3:1-5) Be, taem yumi gohed blong yusum ol blesing blong tijing blong God long laef blong yumi, yumi soemaot wan tingting we i mekem yumi frengud wetem God mo ol brata sista blong yumi.
Hem i Givhan Long Fasin Joen Blong Olgeta Man
17. ?From wanem fasin blong wokgud tugeta wetem tingting daon i impoten?
17 Tijing blong Jeova i halpem yumi blong luksave ol blesing we oli save kamaot taem yumi holem tingting daon blong wokgud wetem ol brata mo sista. (Ol Sam 138:6) I defren olgeta long plante man tede, yumi no brekem ol stret rul be yumi traehad blong gat pis wetem ol man. Eksampel, plante gudfala frut oli kamaot from ol elda oli traehad blong gat wan tingting nomo long taem blong ol miting blong ol elda. Ol man ya oli no letem filing i winim gudfala tingting no i mekem fasin seraot i kamaot, be oli save toktok long kwaet fasin blong leftemap trutok. Olgeta memba blong kongregesen bambae oli kasem blesing from tingting blong joengud tugeta we yumi stap haremgud long hem sipos yumi evriwan yumi gohed blong folem tijing blong God.—Ol Sam 133:1-3.
18. ?Tijing blong God i givhan long yumi blong gat wanem tingting long ol brata mo sista blong yumi?
18 Tijing blong God i nambawan tu blong halpem yumi blong gat stret tingting long ol brata mo sista blong yumi. Jisas i talem se: “I no gat man i save kam long mi, sipos Papa blong mi we i sanem mi, hem i no pulum hem i kam.” (Jon 6:44) Stat long 1919, Jeova i yusum moa ol man blong hem blong talemaot ol jajmen blong hem, mo woning ya we i kasem olgeta ples blong wol i bin muvum mo seksekem wol blong Setan. Long sem taem, ol man we oli fraetgud long God—“ol gudgudfala samting”—God i bin pulum olgeta blong oli seraot long ol nesen mo joen wetem ol tabu Kristin blong leftemap nem blong Jeova long haos wosip blong hem. (Hagae 2:7) Tru ya, ol gudgudfala man ya we God i pulum olgeta, yumi mas tingbaot olgeta olsem ol gudfala fren.
19. ?Tijing blong God i soem wanem long fasin ya blong stretem ol problem bitwin ol Kristin brata mo sista blong yumi?
19 I tru, from we yumi evriwan yumi no stretgud olgeta, bambae olgeta samting oli no save ron stret oltaem. Taem Pol i rere blong mekem namba tu misinari trep blong hem, Banabas i gat strong tingting blong tekem Mak wetem hem. Pol i no agri from we “bifo, long Pamfilia, Jon Mak i aot long tufala, i tanraon i gobak.” From samting ya, “tufala i rao.” Banabas i tekem Mak wetem hem mo tufala i go long Saepras, be Pol i jusumaot Saelas blong i biaen long hem i go long Siria mo Silisia. (Ol Wok 15:36-41) Biaen, problem ya i kamgud bakegen, from Mak i stap wetem Pol long Rom, mo Pol i tok gud long saed blong hem. (Kolosi 4:10) Wan frut blong tijing blong God se taem yumi folem ol advaes olsem Jisas i givim long Matyu 5:23, 24 mo Matyu 18:15-17, hem i soem long yumi olsem wanem blong stretem ol wanwan problem bitwin ol Kristin.
Oltaem Hem i Gud Mo i Win
20, 21. ?Stadi blong yumi long tijing blong God i mas pusum yumi blong mekem wanem?
20 Long sotfala stadi blong yumi long sam frut mo fasin we tijing blong God i win long hem, i klia se yumi evriwan yumi save luksave nid blong gohed blong traehad oltaem blong folemgud tijing blong God long laef blong yumi. Ale, wetem fasin blong prea oltaem, i gud yumi gohed blong letem Bigfala Tija blong yumi i tijim yumi. Kolosap nao, bambae tijing blong God i win olgeta. Bambae hem i win taem ol waes man blong wol ya oli lus olgeta. (Lukluk 1 Korin 1:19.) Antap long samting ya, taem plante milyan moa man oli stap lanem mo mekem wil blong God, bambae save blong Jeova i fulumap wol ya olsem wora i kavremap solwora. (Aesea 11:9) !Samting ya bambae i givim bigfala blesing long ol man we oli gat fasin obei mo bambae i leftemap nem blong Jeova olsem Hae Rula blong heven mo wol!
21 Bambae oltaem nomo, tijing blong Jeova i givim blesing mo i win. ?Bambae yu gohed blong kasem blesing from tijing ya olsem wan gudfala man blong stadi long bigfala Buk we God i yusum blong tijim yumi? ?Yu yu stap folem Baebol long laef blong yu mo serem ol trutok blong hem wetem ol narafala? Sipos yes, yu save lukluk i go long taem ya we bambae yu save luk tijing blong God i win olgeta, blong leftemap Bigfala Tija blong yumi, Hae Rula blong heven mo wol, Masta Jeova.
?Yu Yu Bin Lanem Wanem?
◻?Tijing blong God i save gat wanem paoa long laef blong yu?
◻?Olsem wanem tijing blong Jeova i fulumap ol nid blong edukesen?
◻?Wanem gudfala paoa we tijing blong God i save gat long tingting mo fasin blong yumi?
◻?Olsem wanem tijing blong God i soem se hem i nambawan blong mekem ol man oli joengud?
[Tok blong pija long pej 15]
Tijing blong God i soem long yumi olsem wanem blong wokbaot wetem God, olsem Noa i mekem
[Tok blong pija long pej 17]
Ol man long olgeta nesen oli stap kam kwiktaem long hil blong Jeova