God Ya We i No Save Gyaman i Givhan Long Mi

OLSEM MARY WILLIS I TALEM

Long 1932, hadtaem long saed blong mane we i stap kamaot long olgeta ples long wol, i kasem ol ples we oli stap long bus long Wes Ostrelya. Long yia ya, taem mi gat 19 yia nomo, oli askem mi mo Ellen Davies blong go prij long wan eria we i kavremap samwe long 100,000 skwea kilomita. Mitufala i mas stat long smol taon blong Wiluna, we i stap samwe long 950 kilomita long not-is blong taon ya blong mitufala, Peth, bigfala taon blong Wes Ostrelya.

LONG rod blong mitufala blong go long ples ya, mi mo Ellen, mitufala i serem wan smol rum biaen long tren wetem wan man we i lukaot long tren, man ya i gat kaen fasin. Taem tren i stop smoltaem long ol smol ples long rod blong hem, wetem kaen fasin, man ya we i lukaot long tren i talem long mitufala hamas taem bambae mifala i stap long ples ya. Samting ya i givim jans long mitufala blong kamaot long tren mo prij long ol man we oli stap long ol ples blong tren we oli stap olbaot long bus. Biaen, mifala i kasem taon blong Wiluna, wan taon we i fulap long ol man we oli wok long maen, mo taem ya i gat wan win i kasem taon ya we i karem fulap smok blong graon.

Be, ples blong tren long Wiluna i stap samwe long 3 kilomita afsaed long taon. Mitufala i no strong tumas, mo mitufala i gat tri hevi katon we oli fulap long ol buk wetem tu bokis blong mitufala blong karem. ?Bambae mitufala i mekem olsem wanem? Mitufala i fasem wan katon long medel blong wan wud, ale mi holem wan saed blong wud ya mo Ellen i holem narasaed. Long rod ya, mitufala i karem ol trifala katon, wan afta long narawan. Mitufala i mekem seven trep, i go mo i kam, blong karem trifala katon ya mo ol bokis blong mitufala i go long taon, we i stap longwe olsem 3 kilomita. Plante taem, mitufala i stop blong spel, from we han blong mitufala i soa tumas.

Nating se i gat smok blong graon, han i soa, leg i taed, mitufala i glad long wok ya we i traem mitufala lelebet mo i defren. Mitufala i harem se Jeova i stap wetem mitufala, mo hem i stap givhan long mitufala blong winim traem ya we i faswan samting we mitufala i mas mekem long wok blong prij long ol ples we oli stap longwe. Smoltaem biaen, mitufala i luk we Jeova i stap blesem wok blong mitufala tu, from we hadwok we mitufala i mekem long trep ya i mekem se yangfala man ya, Bob Horn i akseptem trutok blong Baebol. Mitufala i glad tumas se Bob i save spenem sam yia blong wok long Betel mo se kolosap 50 yia, hem i gohed strong blong mekem wok blong Jeova, gogo kasem we hem i ded long 1982.

Mitufala i aot long Wiluna blong go long Jeralton we i stap kolosap long solwora, wan trep we longfala blong hem i bitim 725 kilomita, ale mitufala i prij long ol man long ol smol velej long rod. Taem mitufala i aot long ples ya, mitufala i gobak long Peth. Long sam naet, mitufala i slip long ol haos blong wet long tren nomo, mo wan naet, mitufala i slip kolosap long rod blong tren, long wan bigfala hif blong gras we oli stap fidim ol anamol long hem.

Mitufala i karem wan kaliko bag we i blong kavremap pilo we i fulap wetem bisket blong wit we oli wokem long haos. Hemia nao kakae blong mitufala long fashaf blong trep. Blong kasem kakae blong mitufala, samtaem mitufala i go wasem dis mo brasem floa blong ol rum we ol man oli rentem blong slip, mo ples we plante man oli stap kakae long hem. Long sam narafala taem, mitufala i wok long hot san blong pikimap ol defren kaen ligim long garen. Taem ol man we oli intres oli givim mane long mitufala blong pem ol buk we oli tokbaot Baebol, samting ya i givhan blong pem ol samting blong mitufala.

Samting we i givim paoa long mi blong holemtaet bilif long Jeova mo blong winim plante hadtaem wetem glad long taem ya, hemia eksampel mo trening we mi mi kasem long mama blong mi taem mi mi pikinini nomo.

Mi Kasem Wan Kristin Tijing

Mama blong mi i gat strong bilif long wan Man we i Wokem Olgeta Samting, mo long ol taem bifo we mi save rimemba yet, Mama i stap tokbaot Hem long mifala ol pikinini. Nating se i olsem, Mama i kasem bigfala traem long bilif blong hem, we hem i harem nogud tumas from, taem brata blong mifala we i gat seven yia i ded long wan nogud akseden long skul. Be Mama i no gat tingting se i fol blong God, long defren fasin, hem i stat blong stadi strong long Baebol. Sipos i gat rod, hem i wantem blong lanem risen blong ol trabol soa olsem. Fasin blong hem blong traehad blong faenem ol trutok blong Baebol i karem frut, mo hem i soemaot se hem i givim laef blong hem long trufala God, Jeova, taem hem i baptaes long wora jes biaen long 1920.

Stat long taem ya, plante taem, ol store we hem i stap talem long mifala, oli soem se ol promes blong God oli sua, oli mas kamtru. Hem i talem long mifala se oltaem mifala i mas tingbaot se, nomata wanem samting i save hapen, be ‘God i no save gyaman.’ (Taetas 1:⁠2) Frut we i kamaot se, mi mo sista blong mi mo tufala brata blong mitufala, wetem famle mo ol smol bubu blong mifala, tede, mifala i man blong presem Jeova God. Tufala nefiu blong mi, Alan mo Paul Mason, tufala i stap wok olsem elda blong visitim ol kongregesen.

Stat Blong Wantem Talemaot Gud Nyus

Mi wan pikinini we mi no stap stadigud, ale mi finis long skul long 1926, taem mi gat 13 yia. Be, mi wantem tumas blong serem ol samting we mi lanem long Baebol wetem ol narafala man. Papa i ting se mi no skul inaf blong givhan long narafala, be Mama i talem se: “Nating sipos hem i talem long ol man se faet blong Amageden i kolosap mo se ol man we oli gat tingting daon bambae oli tekem graon ya i blong olgeta, samting ya nomo bambae i talemaot Kingdom blong God.” Ale mi joen long wok blong prij long ol haos wanwan taem yia blong mi i jes bitim tatin nomo, nating se mi mi no baptaes go kasem 1930. Smoltaem afta we mi mi baptaes, mi statem fultaem wok blong talemaot gud nyus long ol eria raon long Peth.

Long yia we i kam biaen, 1931, mifala i stat blong yusum nyufala nem ya blong mifala, Ol Wetnes blong Jeova. Be, plante man we mifala i prij long olgeta oli agensem mifala, from mifala i yusum tabu nem ya blong God, mo oli tok strong long mifala. Be mi gohed long Kristin minista wok nating se mifala i fesem ol samting we oli mekem mifala i harem nogud. Mi mi bilif se God i no gyaman taem hem i promes se ol man blong hem oli save ‘dipen long paoa we hem i givim.’​—⁠1 Pita 4:11; Filipae 4:⁠13.

Makemaot “Bigfala Hif Blong Man”

Long 1935, oli askem mi blong go long narasaed blong bigfala kantri blong Ostrelya. Taswe, biaen mi spenem sam yia blong wok olsem paenia long Nyu Saot Wels, long eria blong Nyu Engglan, we i stap samwe long 4,000 kilomita afsaed long Peth, taon we mi stap long hem bifo.

Kam kasem taem ya, long Memoriol blong tingbaot ded blong Jisas we mifala i mekem wan taem long wan yia, mi bin kakae bred we i no gat yis long hem mo mi dring red waen, we oli olsem saen nomo. Nating we mifala i ting se i stret blong mekem samting ya, speseli olgeta we oli strong long fultaem Kristin minista wok, be mi neva savegud se mi gat hop blong go long heven. Ale, long 1935, i kam klia long mifala se i gat wan bigfala hif blong man we oli gat hop blong laef foreva long wol. Plante long mifala i glad tumas blong kasem save se mifala i haf blong bigfala kampani ya, mo mifala i stop blong kakae bred mo waen. (Jon 10:16; Revelesen 7:⁠9) Trutok blong Baebol i stap kam moa klia, olsem we Jeova i bin promes.​—⁠Proveb 4:⁠18.

Ol Nyufala Fasin Blong Prij

Long medel blong ol yia bitwin 1930 mo 1940, mifala i stat blong yusum teprikoda long Kristin minista wok blong mifala. Taswe, mifala i mekem tufala bokis long strongfala baskel blong mifala, wan long fored mo wan biaen, we i blong karem ol hevi teprikoda, mo tu, blong karem ol rikod mo ol basket blong mifala we i gat ol buk insaed. !Mi mas lukaotgud taem baskel blong mi i stap karem olgeta samting ya from we sipos hem i foldaon, i hevi tumas long mi blong leftemap bakegen!

Samwe long taem ya tu, mifala i statem samting we oli kolem, ol maj blong givim save. Mifala i wokbaot folem ol bigfala rod long ol taon, ale mifala i pinim ol bigfala kad long klos blong mifala no fasem ol saen long bodi blong mifala, we i soemaot ol tok blong pulum intres blong ol man. Mi faenem se wok ya i traem bilif blong mi bigwan, antap moa taem polis i holem mi mo putum mi mi stap wan naet long wan smol rum long haos kalabus long taon blong Lismo. !Oli mekem mi mi sem tumas taem oli karem mi i go long kot long nekis dei we oli no givim jans long mi nating blong komem hea blong mi! Be wan taem bakegen, Jeova i givhan long mi olsem hem i bin promes. Kot i sanemaot mi from we polis we i holemtaet mi i gat wan poen nomo agens long mi, hemia se kad we mi pinim long klos blong mi i agensem skul blong hem.

Gobak Long Wes

Long ol yia stat long 1940, wok blong paenia i mekem se mi gobak long ol taon long bus long Wes Ostrelya. Long ples ya, mi gohed blong gat ol ekspiryens we mi no save fogetem mo ol blesing long saed blong speret. Samwe long 11 kilomita afsaed long Notam, ples we mi stap wok long hem, mi mitim Flo Timmins, wan waef we i bisi long wok blong hem long haos. Hem i karem buk ya Reconciliation, mo i no longtaem biaen hem i givim laef blong hem long Jeova God olsem wan Wetnes. Hem i stap wok strong yet long wok blong Kingdom, mo dota blong hem, we i gat fo yia nomo long taem ya, i gruap mo i kam wan spesel paenia.

I gat sam narafala ekspiryens we mi no save fogetem tu. Wan dei, mi mo fren blong mi we mitufala i stap mekem wok blong paenia, mitufala i krosem wan brij long Notam long kat we hos i pulum, ale wantaem nomo hos ya i stat blong spid, i mekem se mitufala i fraet tumas taem mitufala i krosem brij long Avon Reva, we bigfala wora blong hem i ron strong longwe aninit long mitufala. Afta we hos ya i spid blong bitim 1 kilomita, hem i ron slou bakegen.

Mared Mo Wan Famle

Long 1950, mi maredem Arthur Willis, we hem tu i bin mekem wok blong paenia blong plante yia. Mitufala i stap long Pinjeli, wan taon long bus blong Wes Ostrelya, we long ples ya, mitufala i gat wan pikinini boe, Bentley, mo wan pikinini gel, Eunice. Kolosap long taem we tufala pikinini ya oli finis long skul, Arthur i mekem disisen blong joenem wok blong paenia bakegen. Gudfala eksampel blong papa blong tufala i leftemap tingting blong tufala pikinini ya blong mitufala blong statem wok blong fultaem paenia, taem tufala i kasem ol mak we oli naf blong mekem.

Plante taem, Arthur i tekem tufala pikinini ya mo oli go prij long ol eria longwe afsaed long taon. Wanwan taem, hem i tekem tufala mo oli aot long haos blong wan wik no bitim wan wik, we evri naet oli slip afsaed long haos tapolen nomo. Long ol taem ya we trifala i no stap, mi mi stap long haos blong lukaot long bisnes blong mifala, bisnes blong salem ol samting olsem jea mo tebel, blong mekem i isi long trifala blong mekem wok blong paenia.

Prij Long Ol Aborijinis

Wan moning, jes afta we famle i kamhom long wan long ol trep blong olgeta long ol ples afsaed long taon, wan man we mifala i sek long hem i kam long haos. Man ya we i kam, hem i wan Aborijinis, mo i askem se: “?Mi mas mekem wanem blong kambak?” Fastaem, mifala i no kasem save long hem. Biaen, Arthur i luksave se hem i wan man we plante yia bifo, oli bin putumaot hem long Kristin kongregesen from fasin blong drong. Stat long taem ya, ol man raonabaot oli savegud hem from fasin blong dring tumas mo from hem i gat ol bigfala kaon.

Arthur i eksplenem samting we hem i mas mekem blong kambak insaed long klin ogenaesesen blong Jeova. Hem i aot, we i no talem wan samting, mo mifala i stap tingting se bambae hem i mekem wanem. Mifala evriwan i sapraes long samting we i hapen long ol manis we oli kam biaen. !I strong blong bilivim ol bigfala jenis we man ya i mekem! !Hem i stap kamgud bakegen long problem blong drong mo antap long samting ya, hem i stap visitim ol man long eria ya, i mekem oli tingbaot kaon blong hem, mo i pem ol kaon ya! Tede hem i wan Kristin brata bakegen, mo hem i bin mekem wok blong paenia blong sam taem.

I gat plante Aborijinis long Pinjeli, mo mifala i haremgud long Kristin minista wok blong mifala, blong halpem ol man ya we oli gat tingting daon blong lanem mo akseptem trutok long Tok blong God. !Fasin ya blong joen long wok blong givhan long plante Aborijinis blong Ostrelya blong lanem trutok i mekem bilif blong mi i strong!

Wan kongregesen i stanap long Pinjeli, mo long stat, bighaf blong ol memba blong hem, oli ol Aborijinis. Mifala i mas tijim plante long olgeta blong rid mo raet. I gat plante man we oli tok agens long olgeta long ol faswan yia ya, be sloslou ol man long taon oli respektem ol Aborijinis we oli Wetnes from ol klin fasin long laef blong olgeta mo from we ol man oli save trastem olgeta.

Help Blong Jeova We i No Save Mestem

Gudfala hasban blong mi, Arthur, we i wok strong long wok blong God blong 57 yia, i ded long stat blong 1986. Olgeta bisnesman long Pinjeli mo ol man blong ples ya, oli gat bigfala respek long hem. Wan taem bakegen, Jeova i givhan long mi, i givim paoa long mi long taem ya we hasban blong mi i ded kwiktaem.

Boe blong mi, Bentley, i stap wok olsem wan elda long not blong Wes Ostrelya, we long ples ya, hem mo waef blong hem, Lorna, tufala i tijim famle blong tufala blong oli gruap long trutok. Wan narafala samting we i mekem mi mi glad tumas se, dota blong mi, Eunice, i bin gohed long fultaem Kristin minista wok kam kasem naoia. Hem mo hasban blong hem, Jeff, tufala i stap wok olsem paenia. Naoia mi mi stap wetem tufala mo mi kasem blesing se mi save gohed blong mekem wok blong haftaem paenia.

Bitim 60 yia, mi bin luk we Jeova i mekem nambawan promes blong hem i kamtru, blong givim paoa mo blong halpem ol man blong hem blong winim eni trabol we maet oli save fesem long laef blong olgeta. Hem i save givim evri samting we yumi nidim sipos yumi trastem hem oltaem mo soem fasin tangkyu blong yumi long hem from ol samting we hem i stap mekem long yumi. Bilif blong mi i kam strong moa, taem mi harem se God i stap halpem mi, mo mi bin luk olsem wanem hem i givim blesing blong hem we i bitim save blong yumi. (Malakae 3:10) !Tru ya, God i no save gyaman!

[Tok blong pija long pej 27]

Mary long 1933

[Tok blong pija long pej 29]

Mary mo Arthur taem tufala i kam olfala