Ol Wetnes Blong Jeova Long Olgeta Ples Long Wol—Kolombia

KOLOMBIA i wan kantri blong Saot Amerika we i defren long ol narafala ples. Sol-wora blong Atlantik mo Pasifik tugeta i stap kolosap long kantri ya we i gat plante volkeno long hem. Ol flat ples blong hem mo ol ples kolosap long solwora oli hot tumas, be ol hae ples, olsem ol Hil blong Andes we oli gat sno antap long olgeta, oli kolkol tumas.a

Nating se ol man oli savegud Kolombia from gol mo ol sas ston blong hem we oli gat grin kala, be ol man blong hem nao i samting we i gudfala moa long ples ya. Tede, Jeova i stap fulumap haos blong hem long saed blong speret wetem ol gudgudfala samting. Ol gudfala man we oli wantem wosip oli stap kam kwiktaem long haos ya long olgeta ples blong wol, mo long Kolombia tu.​—Hagae 2:7.

Ol Maneja Blong Ol Bisnes Oli Sapraes

Sande, Novemba 1, 1992, i makem dedikesen blong nyufala branj ofis mo haos blong prentem ol buk blong Watch Tower Society long Fakatativa, 42 kilomita longwe long Bogota long saed i go long not-wes. Ol visita we oli kam blong lukluk ples ya oli sapraes tumas. Taem wan man we i visitim ples ya i gobak long faktri we hem i wok long hem, hem i glad tumas, i talem long ol maneja blong hem blong go mo luk wan ogenaesesen we i ‘gat nambawan fasin blong wokgud, oda, mo ol man oli glad blong mekem wok blong olgeta.’ Biaen, taem ol maneja ya oli go visitim, oli intres tumas mo oli askem plante kwestin.

Ol maneja ya oli wantem sanem ol nambawan man blong olgeta, ol man we oli lukaot long ol man blong wok, mo ol bos blong wok​—yes, olgeta wokman blong olgeta—​blong oli mekem visit. Evri wik, oli mekem plan blong 15 kasem 25 man we oli wok blong olgeta blong kam visitim branj ofis gogo olgeta 1,300 man we oli wok blong kampani ya oli luk wan nambawan ogenaesesen we i wokgud olsem.

Plante handred blong ol wokman blong olgeta oli bin visitim ol haos blong branj mo oli bin luk video ya Jehovah’s Witnesses​—The Organization Behind the Name. Oli sapraes we ogenaesesen ya i bigwan tumas mo we wok blong talemaot Kingdom i kavremap ful wol, oli sapraes long ol teknik mo waes blong sayens we Sosaeti i yusum long ol wok blong hem. Taem oli aot, plante oli talem se oli harem olsem we oli stap lego Paradaes blong gobak long wan wol we i no gat plan blong hem.

Trutok i Kasem Ol Defren Kaen Man

Gud nyus i stap kasem ol defren kaen man. (1 Timote 2:3, 4) Wan eksampel, wan man we fastaem i stap mekem ol singsing mo i lida blong wan grup blong plei hevi metal rok myusek i akseptem trutok blong Baebol, i jenisim fasin blong laef blong hem, mo i no longtaem hem i kam wan fultaem paenia. Biaen i kam wan man blong givhan. Sam we fastaem oli memba blong ol grup we oli wok agensem mo traem jenisim ol samting we i stap, naoia oli lanem blong putum tras mo hop blong olgeta long Kingdom blong Jeova. Naoia oli strong blong talemaot mesej long saed blong pis long wan nyufala wol.

Sam man we oli tekem drag mo sam man we oli salem drag, olgeta tu oli kam long trutok. Wan yangfala man we naoia hem i Wetnes, hem i bin lukaotem wan plantesin blong drag mo wan faktri blong koken long bus blong faef yia, nao biaen hem i finis long laef olsem. Hem i faenem glad, taem i stap lanem mo mekem ol loa blong Baebol i wok long laef blong hem. Long wan kalabus, stadi long Baebol we oli mekem wetem stret tingting i tajem hat blong ol man we oli kilim man i ded, mo naoia oli stap prea wetem fulhat blong olgeta blong Jeova i fogivim sin blong olgeta mo blong hem i agri long olgeta olsem ol man blong hem.

Olsemia nao, ol kaen man oli stap akseptem mesej blong Kingdom. Long Kolombia, olsem ol narafala ples, Jeova i stap fulumap haos blong hem wetem ol gudgudfala samting.

[Futnot]

[Bokis blong pija long pej 8]

LUKLUK LONG OL NAMBA BLONG KANTRI YA

1993 sevis yia

BIGFALA NAMBA BLONG OLGETA WE OLI STAP PRIJ: 60,854

SKELEM: 1 Wetnes blong 558

NAMBA BLONG OL MAN WE OLI KAM LONG MEMORIOL: 249,271

MEDEL NAMBA BLONG OL PAENIA: 8,487

MEDEL NAMBA BLONG OL BAEBOL STADI: 100,927

NAMBA BLONG OL MAN WE OLI TEKEM BAPTAES: 5,183

NAMBA BLONG OL KONGREGESEN: 751

BRANJ OFIS: FAKATATIVA

[Tok blong pija long pej 9]

Olgeta we oli wok long branj ofis mo ol misinari long 1956

[Tok blong pija long pej 9]

Branj ofis olsem yu lukluk taem yu stap long plen