?From Wanem Ol Man Long Wol Ya Oli Fraet?

?HU I wantem laef wetem fraet? Ol man oli wantem stap sefgud, we i no gat samting blong spolem laef blong olgeta wetem ol samting we oli gat. From samting ya, plante oli aot long ol ples we i gat plante fasin blong kilim man long hem. Be, ol samting we oli mekem man i fraet oli stap kamaot long evri ples.

Ol denja blong ol nyuklia tul blong faet mo ol akseden we oli kamaot long ol faktri blong nyuklia paoa, i mekem ol man oli fraet bigwan se bambae ol man oli lus olgeta. Fasin blong kilim man we i stap kam antap bigwan mo kwiktaem, i mekem man i fraet. Plante oli fraet tumas se AIDS bambae i kam nambawan samting blong kilim man i ded long handred yia ya. Fasin ya blong spolem ol samting we oli stap raon long yumi olsem win mo wora i wan long ol narafala samting we i stap mekem man i fraet. ?Ol fraet ya oli gat spesel mining? ?Mo bambae yumi save hop blong laef long wan wol we i no gat fraet olsem long fyuja?

Fraet Long Ful Wol i Gat Mining

Fasin fraet we i bigwan tede i gat mining from ol profet tok we Baebol i talem. Long profet tok blong Jisas Kraes long saed blong ol las dei, hem i tokbaot ol samting we bambae oli mekem man i fraet. Hem i talem se: “Ol man bambae oli save mekem faet long ol narafala man. Mo ol kantri bambae oli save mekem faet long ol narafala kantri. Ol man bambae oli gat hadtaem blong kasem kakae. Mo olbaot long wol, bambae graon i seksek.” Jisas i tokbaot tu se “bambae ol fasin nogud oli kam bigfala moa.” Stat long 1914, i gat ol defren faet, kakae i sot, graon i seksek, mo ol fasin nogud we oli bigwan moa bitim ol taem bifo, oli stampa blong bigfala fraet mo fasin blong lusum laef.​—Matyu 24:​7-14.

Tede fasin blong ol man tu i mekem fraet i kam antap. Long 2 Timote 3:​1-4, yumi ridim ol profet tok blong aposol Pol se: “Long taem blong Lasdei blong wol, laef long wol ya bambae i kam strong tumas. Bambae ol man oli save tingbaot olgeta nomo, mo bambae oli wantem mane tumas. Bambae oli man blong tok flas, we tingting blong olgeta i go antap tumas, mo oli save tok nogud long ol man. Bambae oli no save ona long papa mo mama blong olgeta, oli no man blong talem tangkyu, mo oli no save tingbaot God. Bambae oli no man blong sore, oli man blong mekem i strong tumas oltaem long ol narafala man. Bambae oli man blong spolem nem blong narafala man, mo oli man blong lusum hed, mo oli wael olgeta. Bambae oli no wantem ol fasin ya we i gud nomo, oli agens long hem. Bambae oli man blong spolem ol fren blong olgeta, oli man we oli no kea, we flas i mekem tingting blong olgeta i lus. Bambae oli man we oli wantem tumas ol samting we oli stap harem gud long hem, i winim we oli stap laekem God.” !Naoia we ol man olsem oli stap raon long yumi long ol las dei ya, yumi no sapraes we fasin fraet i kam bigwan tumas!

Wanem We Wol Ya i Save Hop Long Hem

Jisas i skelem taem ya wetem ol las dei blong wol long taem blong Noa. I tru, store blong histri long Baebol i talem se i gat bigfala fraet long taem ya, i se: ‘Nao long lukluk blong trufala God, ol man oli spolem wol ya, mo raf fasin i kam fulap long wol.’ Taswe ‘God i talem long Noa, i se: “Mi mi tingbaot blong finisim olgeta samting we i gat bodi long wol, from we wol i fulap long raf fasin.”’ (Jenesis 6:​11, 13) Rabis wol long taem ya i fulap tumas long raf fasin mekem se God i finisim, taem i mekem bigfala wora i ron we i kavremap ful wol. Be, from lav blong hem, Jeova God i sevem Noa we i mekem stret fasin mo famle blong hem.​—2 Pita 2:5.

?Wanem hop blong rabis wol blong naoia we i fulap long raf fasin? Yes, God i no laekem nating raf fasin blong ol man we i soemaot se oli no kea nating blong mekem i stret long ol narafala. Ol tok blong Ol Sam oli soemaot samting ya se: ‘Jeova i stap skelem laef blong olgeta man, ol gudfala man wetem mo ol man nogud. Mo hem i no laekem nating olgeta we oli laekem tumas blong mekem faet.’ (Ol Sam 11:5) Jeova i finisim wol we i fulap long raf fasin long taem blong Noa. Taswe, ?yumi save bilif se God bambae i finisim wol ya we i fulap long raf fasin we i mekem ol man oli fraet?

God i givim save long aposol Pita blong tokbaot taem we bambae Jisas i stap bakegen mo blong talemaot trabol we bambae i spolem rabis wol blong naoia. Hem i raetem se: “Long taem blong Lasdei, bambae sam man oli save kamtru, we fasin blong olgeta blong wantem ol samting nogud, hem i bos long olgeta. Olgeta ya bambae oli laf long yufala, oli askem se: ‘?Olsem wanem nao? ?Hem i promes finis blong kam, be hem i stap wea? Ol olfala blong yumi, ol man oli berem olgeta finis, be i no gat wan samting i jenis, i stat bifo olgeta, taem we God i mekem wol ya fastaem, i kam kasem tede. Evri samting oli stap olsem nomo.’” Biaen Pita i yusum tok ya “skae” blong minim fasin blong rul antap long ol man we i no stretgud olgeta mo tok ya “graon” i minim sosaeti blong ol rabis man. Hem i talem se, “Olgeta we oli stap tok olsem be oli satem ae blong olgeta long wan samting. Bifo longtaem, God i tok, nao skae mo graon tufala i kamaot. Hem i mekem graon ya i kamaot long medel blong ol wora, mo hem i yusum wora ya blong wokem olgeta ples long wol. Mo long sem fasin, hem i yusum wora bakegen blong spolem, taem i spolem wol ya we i stap bifo [long taem blong Noa], long wora ya we i ron bigfala. Be skae mo graon we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei we God bambae i jajem ol man we oli no obei long hem, nao oli lus.”​—2 Pita 3:​3-7.

Long semfala tingting ya, Pol i poenemaot se Kraes mo ol strongfala enjel blong hem bambae oli givim “panis long olgeta we oli no save ona long God, mo long olgeta we oli no save obei long gud nyus blong Jisas, Masta blong yumi. Panis we olgeta bambae oli kasem long Dei ya, hemia i olsem ded we i no save finis.” (2 Tesalonaeka 1:​6-9) Laswan buk blong Baebol i tokbaot olgeta nesen we bambae oli kam wanples blong “mekem faet long bigfala Dei blong God ya we i gat olgeta paoa” mo hem i promes long yumi se bambae God i “spolem ol man ya we oli stap spolem wol.”​—Revelesen 11:18; 16:​14-16.

Wan Taem Blong Glad, i No Blong Fraet

Ol man we oli stap mekem stret fasin oli no fraet long wanem we Baebol i talem long saed blong fyuja blong wol ya, be defren nao oli gat risen blong glad. I no longtaem, Jeova bambae i spolem rabis wol ya, be hem i mekem samting ya blong mekem i gud long ol man we oli laekem stret fasin. ?Wanem bambae i folem en blong ol fasin blong naoia? !Yes, wan nyufala fasin blong laef aninit long Kingdom blong God long heven, we Jisas i tijim ol disaepol blong hem blong prea from! Hem i talem se: “From samting ya, i stret blong yufala i prea olsem hemia. ‘Papa blong mifala we yu stap long heven, nem blong yu i tabu. Mifala i wantem we olgeta man oli ona long yu, mo we yu yu kam king blong olgeta man, mo we olgeta man long wol oli mekem olsem we yu yu wantem, olsem we olgeta long heven oli stap mekem.’” (Matyu 6:​9, 10) ?Wanem ol jenis we yumi save tingbaot blong luk taem wil blong God i kamaot long wol?

Faet mo ol fraet blong hem bambae oli finis. Ol Sam 46:9 i talem se: “Hem i stap mekem ol faet oli finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.” Biaen ol man “bambae oli sidaon, wanwan, aninit long rop blong frut we oli wokem waen long hem mo aninit long figtri blong olgeta. Bambae i no gat wan samting we i mekem olgeta oli seksek.”​—Maeka 4:4.

Ol sik we oli kilim man i ded bambae oli no moa save mekem man i fraet mo tekemaot laef blong ol man. God i promes se: “Bambae i no gat wan man ples we i save talem se: ‘Mi mi sik.’” (Aesea 33:24) !Wan bigfala risen blong glad!

Mo tu ol fraet we oli joen wetem ol fasin blong brekem loa mo ol fasin blong kilim man bambae oli ol samting blong bifo. Ol Sam 37:​10, 11 i promes se: “Bambae i no longtaem, ol man nogud oli lus. Bambae yu save lukaot olgeta, be bambae yu no save faenem olgeta. Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.”

?Olsem wanem trufala pis mo seftaem bambae i tekem ples blong ol fraet blong naoia? Tru long wan stret gavman​—Kingdom blong God. Long saed blong taem blong yumi, Daniel 2:44 i talem se: “Long taem blong ol king ya, God blong heven bambae i stanemap wan kingdom we neva i save brokdaon. Mo bambae kingdom ya i no save go long han blong narafala nesen. Bambae hem i smasem mo i finisim olgeta kingdom ya, mo hem nomo bambae i stanap olwe.” King we Jeova i putumap, Jisas Kraes, “i mas stap king fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes.” (1 Korin 15:25) Wan Taosen Yia Rul blong Jisas bambae i mekem stampa tingting blong God i kamtru blong gat wan paradaes long ful wol ya, blong ol man we oli glad oli stap long hem blong olwe.​—Luk 23:43; Revelesen 20:6; 21:​1-5.

Long Paradaes long wol ya, bambae i gat wan gudfala fasin fraet i stap. Hemia “fraet long Jeova.” (Proveb 1:7) I tru, yumi mas gat fraet ya naoia, we i minim bigfala ona mo respek we i joen wetem fraet blong mekem samting we God i no glad long hem, mo fraet ya i kamaot from we yumi gat bigfala tangkyu from nambawan fasin blong hem blong laekem ol man tumas mo from gudfala fasin blong hem. Blong gat fraet ya yumi mas trastem Jeova fulwan mo obei long hem wetem ful bilif.​—Ol Sam 2:11; 115:11.

Ol samting blong mekem man i fraet oli makem ol las dei ya. Be sipos yumi soemaot we yumi laekem God, yumi save glad tumas, yumi no fraet. Ol profet tok blong Baebol oli soemaot se en blong wol ya long han blong God i kolosap nomo. Nyufala wol we stret fasin nomo i stap long hem we Jeova i promes finis long hem, bambae i tekem ples blong wol ya. (2 Pita 3:13) I tru, i no longtaem aninit long rul blong Kingdom bambae i no moa gat nogud fasin fraet ya.

[Bokis blong pija long pej 6]

PAOA BLONG WAN MAGASIN NOMO

TOMASZ, wan yangfala man blong Polan, i kasem trabol long saed blong loa we i mekem hem i ronwe long kantri blong hem. Long sikis manis hem i wokbaot krosem Yurop, i stap slip long haos tapolen mo i stap wok long ol defren wok. Long taem ya, hem i gat wan kwestin oltaem long tingting blong hem: ?Wanem i stampa risen blong laef?

Tomasz i kasem ansa blong kwestin blong hem taem hem i kasem wan Wajtaoa long lanwis blong Polan. Hem i ridim plante taem, mo i luksave se magasin ya i karem trutok we hem i stap lukaotem. Tomasz i wokbaot 200 kilomita i go long branj ofis blong Watch Tower long Seltes/Taunus, Jemani. I kasem ples ya long Mande aftenun, ale hem i karemaot Wajtaoa magasin blong hem mo i talem se: “Mi wantem wan man i eksplenem moa long mi long saed blong ol samting we i stap long magasin ya. ?Mi nidim blong mekem wanem?”

Long aftenun ya, tu Wetnes blong Jeova i toktok long Tomasz long saed blong stampa risen blong laef, oli yusum Baebol olsem stampa blong toktok blong olgeta. Tomasz i wantem blong lanem moa, ale hem i gobak long branj ofis evri dei long wik ya, i stap stadi long Baebol mo buk ya Yu Yu Save Laef Foreva Long Paradaes Long Wol.

Tomasz i mekem disisen blong gobak long Polan, nating se hem i save fesem ol problem longwe. Taswe, long Fraede, fo dei nomo afta we hem i kamaot long branj ofis blong Seltes, Tomasz i aot blong gobak long ples blong hem. Kwiktaem nomo, hem i stat stadi wetem ol Wetnes blong Jeova long Polan. Tomasz i gohed gud kwiktaem nomo, mo i stap toktok oltaem long ol narafala long saed blong ol samting we hem i stap lanem. Long Oktoba 1993, fo manis nomo afta we hem i mekem visit long Seltes, hem i baptaes olsem wan Wetnes blong Jeova.

!Wan Wajtaoa nomo i halpem yangfala man ya blong faenemaot stampa risen blong laef!

[Tok blong pija long pej 7]

Aninit long Kingdom we Jisas Kraes i rulum, neva bambae ol man long wol ya oli fraet bakegen