Ripot Long Wok Blong Kingdom
Oli Fri Blong Talemaot Gud Nyus Long Kolombia
I STAT long taem we ol man Spen oli holem ples ya, Katolik jyos i wan skul we i holemtaet plante man long Saot Amerika. Longtaem finis i kam, skul ya nomo gavman blong Kolombia i agri long hem. Long ol 105 yia we oli pas, kaonsel blong Vatikan i bin agri wetem gavman blong Kolombia blong gavman ya i protektem jyos ya mo i givim raet long hem blong mekem sam spesel wok long saed blong edukesen mo mared.
Long Desemba 1990 ol man long Kolombia oli elektem ol nyufala man we oli stanemap wan nyu konstitusen, we samting ya i kamaot long medel blong yia 1991. Nyufala konstitusen ya i jenisim loa long saed blong skul long Kolombia. Loa i agri se olgeta skul oli gat sem raet nomo, mo long ol pablik skul oli no save fosem ol pikinini blong lanem ol samting we i laenap wetem jyos. From we oli stanemap ol nyufala loa ya, bambae oli lukluk bakegen kontrak we oli bin agri long hem fastaem wetem Vatikan.
Bigfala fasin fri blong ol skul bambae i mekem se paoa blong Katolik Skul i godaon, i mekem se i isi long olgeta we oli gat gudhat blong kasem save long Baebol mo blong kam fri long saed blong speret.
Bifo we oli kam fri olsem, ol 51,000 Wetnes blong Jeova long kantri ya oli mekemrere blong lukaot long ol refuji long saed blong speret. Kolosap oli finisim nyufala branj blong olgeta mo i gat ol mesin blong prentem kwiktaem ol magasin long fo kala. Plante spesel paenia we oli mekem wok ya blong sam manis nomo, oli go long sam smosmol taon blong lukaot ol sipsip blong Jeova we oli lus mo oli stat blong mekem wan gudfala wok blong tijim ol man long saed blong Baebol. Long 63 taon we wanwan long ol taon ya i gat samwe long 10,000 man, i gat 47 nyufala kongregesen mo grup we oli stanap.
Taem speret blong Jeova i stap gohed blong soemaot stret rod blong olgeta we oli gat gudhat, plante yangfala tu oli stap kam joen. Buk ya Questions Young People Ask—Answers That Work hem i wan buk we i bin givhan plante long olgeta yangfala mo olgeta famle blong olgeta tu. Taem oli stap go blong talemaot gud nyus long ol doa blong ol haos wanwan, wan brata i faenem wan man we i bin ridim haf blong buk ya, we hem i kasem long wan man we i stap kolosap long hem. Hem i harem i gud tumas long olgeta waes fasin we hem i save folem taem famle i kasem trabol. Long japta 4 we i talem se “?From Wanem Papa Mo Mama Tufala i Seraot?” i tajem hat blong hem, from hem mo woman blong hem tufala i stap long wan rod we i save mekem se tufala i seraot. Hem i talem se buk ya i sevem hem long wan bigfala trabol. Naoia hem wetem famle blong hem oli stap stadi Baebol wetem ol Wetnes blong Jeova mo oli stap kam long evri miting blong kongregesen. Oli glad tumas long waes we Jeova i givim tru long Baebol mo ogenaesesen blong hem.
Ekspiryens ya i soemaot klia fasin fri we i kamaot long Kolombia taem ol Wetnes blong Jeova oli givhan long saed blong speret long plante man we oli hanggri blong lanem ol gudfala plan blong Jeova mo nyufala wol, we kolosap bambae i kamtru.—2 Pita 3:13.