Ol Man Blong Wok Blong God—Oli Hapi Mo Oli Wok Folem Plan
“!Ol man we Jeova i God blong olgeta, oli hapi!”—OL SAM 144:15, NW.
1, 2. (a) ?From wanem Jeova i gat raet blong putumap ol rul long ol man blong wok blong hem? (b) ?Wanem tufala fasin blong Jeova we yumi mas wantem tumas blong folem?
JEOVA i Hae Rula blong Heven mo Wol, God we i gat olgeta paoa, Hemia we i Wokem Olgeta Samting. (Jenesis 1:1; Ol Sam 100:3) From samting ya, hem i gat raet blong putumap ol rul we ol man blong hem oli mas folem, hem i save wanem i nambawan long olgeta. (Ol Sam 143:8) Mo hem i Bigfala Man blong Soem Eksampel we oli mas folem ol fasin blong hem. Wan aposol i raetem se: “From we yufala i pikinini blong God, we hem i laekem yufala tumas, yufala i mas traehad blong folem fasin blong hem.”—Efesas 5:1.
2 Wan fasin blong God we yumi mas folem, i joen long fasin blong wok wetem plan. Hem i no wan ‘God we i mekem ol samting oli olbaot nomo.’ (1 Korin 14:33) Taem yumi luklukgud long ol samting we God i bin wokem, ol samting ya oli pulum yumi blong talem se hem i wan Man we i wok wetem plan bitim ol narafala man long heven mo wol. Be wan narafala fasin blong God we hem i wantem ol man blong hem oli folem, hemia fasin glad blong hem, from we hem i “wan hapi God.” (1 Timote 1:11, NW) Taswe, fasin blong hem blong wok folem plan i skelgud wetem fasin glad. Wan long tufala fasin ya i no hae moa long narawan.
3. ?Olsem wanem skae we i fulapgud wetem ol sta i soem fasin blong God blong wok folem plan?
3 Olgeta samting we Jeova i bin mekem, stat long ol samting we oli bigbigfala kasem olgeta we oli smosmol, oli soemaot klia pruf se Jeova i wan God we i wok folem plan. Eksampel, traem tingbaot skae. Hem i fulap long plante taosen bilyan sta. Be ol sta ya oli no stap olbaot we oli no folem plan. No gat. George Greenstein, wan man blong stadi long ol samting we oli mekemap ol sta long skae, i talem se “ol sta oli stap long stret ples blong olgeta folem wan plan.” Oli stap long ol grup we oli kolem ol galaksi,a we sam long ol galaksi ya wanwan, oli gat plante handred bilyan sta. !Mo oli ting se i gat plante bilyan galaksi! Ol galaksi ya tu oli no stap olbaot, sam long olgeta (smol namba nomo kasem plante taosen) oli stap kolkolosap long olgeta long wan grup blong ol galaksi. Mo oli ting se ol grup blong ol galaksi oli haf blong ol grup we oli bigwan moa, oli kolem ol bigbigfala grup.—Ol Sam 19:1; Aesea 40:25, 26.
4, 5. Talem sam eksampel long saed blong ol laef samting long wol we oli stap folem wan plan.
4 Long evri ples, yumi save luk nambawan plan blong God blong wokem ol samting, long ol samting we yumi luk long skae, mo tu long wol ya, we i gat plante taosen samting we oli gat laef. Long saed blong ol samting ya, Paul Davies, wan tija long saed blong ol samting we oli mekemap laef, i raetem se ol man we oli lukluk “oli sapraes tumas” long “plan blong ol laef samting long wol ya we ol smosmol haf blong olgeta oli joengud mo oli nambawan tumas.”—Ol Sam 104:24.
5 Traem tingbaot sam eksampel long saed blong “plan blong ol samting we ol smosmol haf blong olgeta oli joengud” we yumi faenem long ol laef samting. Joseph Evans, wan dokta long saed blong ol nev,b i tokbaot bren mo string we i folem bigfala bun blong baksaed se: “Pruf ya se i gat bigfala oda i plante tumas.” Long saed blong ol laef sel we man i save luk long maekroskopc nomo, H. J. Shaughnessy, wan man blong stadi long ol smosmol jem we oli sapotem laef, i talem se: “Ol defdefren haf mo naesfala plan blong ol smosmol laef samting, oli nambawan tumas, from samting ya, i luk olsem se hemia i wan plan we God nao i putumap.” Mo, Michael Denton, wan man blong stadi long ol laef samting we oli smosmol olgeta, i tokbaot plan blong bodi blong man we i stap insaed long ol sel (DNA) se: “Plan ya i gud tumas mekem se olgeta save . . . we man i nidim blong eksplenemgud olgeta defren kaen laef samting we oli bin stap long wol ya . . . oli save stap long wan tispun mo i gat ples i stap yet blong putum olgeta save long evri buk we man i bin raetem.”—Lukluk Ol Sam 139:16.
6, 7. ?Ol speret man oli soem wanem fasin blong wok folem plan, mo olsem wanem oli soem fasin tangkyu long Man we i Wokem Olgeta?
6 Jeova i mekem se olgeta samting we hem i wokem long wol i stap wok folem wan plan, be i no hemia nomo, ol speret man long heven tu, hem i mekem se olgeta oli folem wan plan. Daniel 7:10 i mekem yumi save se ol enjel we namba blong olgeta i kasem ‘wan handred milyan oli stap stanap stret long fored blong Jeova.’ !Wan handred milyan strongfala speret man oli stap long fes blong God, wanwan long olgeta i gat prapa wok blong hem! I strong tumas blong kasem save long waes we God i mas gat blong mekem bigfala namba blong ol man olsem i wok folem plan. I stret nomo we Baebol i talem se: “Yufala ol enjel, yufala i strong, yufala i gat paoa. Yufala i stap obei long ol tok blong Hae God, yufala i stap lesin long ol samting we hem i talem. !Yufala i mas presem hem! Yufala olgeta [enjel] long heven, yufala i gat paoa, yufala ol man blong wok blong Hae God, yufala i stap mekem ol samting we hem i wantem. !Yufala i mas presem hem!”—Ol Sam 103:20, 21; Revelesen 5:11.
7 !Ol wok blong Man we i Wokem Olgeta Samting oli gud tumas mo oli nambawan long fasin blong folem plan! Yumi no sapraes se, wetem ona mo fasin fraetgud long God, ol strongfala speret man long heven oli talem se: “Yu yu God blong mifala. Yu yu mekem olgeta samting blong wol fastaem, mo from we yu yu wantem olsem, yu holem olgeta samting ya oli stap, mo yu givim laef long olgeta. From samting ya, i stret nomo blong ol man oli leftemap nem blong yu, mo blong oli foldaon, oli ona long yu, mo blong oli stap aninit long paoa blong yu oltaem.”—Revelesen 4:11.
8. ?Wanem ol eksampel we oli soem se Jeova i mekem ol man blong wok blong hem long wol oli wok folem plan?
8 Jeova i stap mekem ol man blong hem long wol ya tu oli folem plan. Taem hem i mekem Bigfala Wora i kam long wol long taem blong Noa long yia 2370 B.K.T., Noa mo seven narafala man oli laef tru long Bigfala Wora olsem wan famle we i folem plan. Long taem blong Eksodas long yia 1513 B.K.T., Jeova i mekem sam milyan man blong hem oli fri long kalabus long Ijip, mo i givim ol klia loa long olgeta blong mekem ol samting blong evri dei laef mo wosip blong olgeta oli rongud. Mo biaen, long Promes Lan, plante taosen long olgeta oli folem wan plan blong mekem spesel wok long haos prea. (1 Kronikel 23:4, 5) Long faswan handred yia, ol Kristin kongregesen oli folem wan plan we God i givim se: ‘Long sam man, hem i givim paoa blong oli aposol. Long sam narafala man, hem i givim paoa blong oli profet. Long sam narafala man, hem i givim paoa blong oli talemaot gud nyus blong Kraes. Mo long sam narafala man bakegen, hem i givim paoa blong oli elda mo tija insaed long kongregesen. Kraes i mekem olsem blong bambae ol man blong hem oli rere blong mekem ol wok blong hem.’—Efesas 4:11, 12.
Ol Man Blong Wok Blong Jeova Tede Tu Oli Wok Folem Plan
9, 10. ?Olsem wanem Jeova i mekem ol man blong hem oli wok folem plan long taem blong yumi?
9 I sem mak tede, Jeova i mekem ol man blong wok blong hem oli folem wan plan blong oli save mekemgud ol wok blong hem long taem blong yumi—blong talemaot gud nyus blong Kingdom blong hem bifo we hem i finisim ol fasin blong wol ya we i no givim ona long Hem. (Matyu 24:14) Tingbaot wok ya we i kavremap ful wol, mo from wanem i impoten tumas blong gat gudfala plan. Plante milyan man, woman, mo pikinini, oli stap kasem trening blong tijim trutok blong Baebol long ol narafala. Blong givhan long trening ya, oli prentem plante, plante Baebol mo buk we oli tokbaot Baebol. Tingbaot, evri namba blong Wajtaoa, naoia oli stap prentem bitim 16 milyan blong hem long 118 lanwis, mo long saed blong Wekap! oli stap prentem samwe long 13 milyan long 73 lanwis. Kolosap se oli prentem olgeta lanwis long semtaem, mekem se kolosap olgeta man blong Jeova oli kasem ol save we i sem mak long semtaem.
10 Antap long samting ya, bitim 73,000 kongregesen blong ol Wetnes blong Jeova raonabaot long wol, oli stap folem plan blong joen wanples oltaem blong kasem ol tijing blong Baebol. (Hibrus 10:24, 25) Mo tu, i gat plante taosen miting we oli bigwan moa—ol seket mo distrik asembli—evri yia. Raonabaot long wol, i gat bigfala wok blong bildim ol nyufala Haos Kingdom, ol Haos Asembli, ol Betel, mo ol faktri blong prentem ol buk we oli tokbaot Baebol, no blong mekem ol olfala bilding i kam moa gud. I gat sam skul we oli givim moa trening long fasin blong tijim Baebol, olsem Wajtaoa Baebol Skul Blong Gilead, wan skul blong ol misinari, mo Paenia Skul, we oli mekem long plante kantri raonabaot long wol.
11. ?Wanem blesing bambae man i kasem long fyuja sipos hem i lanem blong folemgud plan naoia?
11 !Jeova, wetem help blong ol enjel blong hem, hem i mekem ol man blong hem long wol oli reregud blong ‘finisim olgeta wok we God i givim long olgeta blong mekem’! (2 Timote 4:5; Hibrus 1:13, 14; Revelesen 14:6) Taem God i stap tijim ol man blong hem long fasin blong wok folem wan plan naoia, hem i stap mekem wan narafala samting bakegen. Hem i stap mekem reregud ol man blong hem blong mekem se taem oli pastru long en blong ol rabis fasin blong wol ya, oli reregud finis blong laef long nyufala wol. Long taem ya, folem wan plan we Jeova i lidim, bambae oli stat blong mekem ful wol i kam Paradaes. Bambae oli reregud tu blong tijim plante bilyan man we bambae oli laef bakegen long ded, long olgeta samting we oli mas mekem blong gohed blong stap laef.—Aesea 11:9; 54:13; Ol Wok 24:15; Revelesen 20:12, 13.
Oli Hapi Nating Se Oli Wok Folem Plan
12, 13. ?From wanem yumi save talem se Jeova i wantem we ol man blong hem oli hapi?
12 Jeova i wan God we i save wokem ol samting blong sapraes mo hem i nambawan long fasin blong wok folem plan, be tu, hem i gat filing, i no stap mekem i strong tumas, mo i no olsem wan mesin nomo. Hem i wan hapi Man we i gat lav mo i tingbaot ol samting blong mekem yumi hapi. 1 Pita 5:7 i talem se: “Hem i stap tingbaot yufala.” Long ol samting we hem i bin mekem long olgeta man, yumi save luk fasin blong hem blong tingbaot olgeta mo blong wantem se ol man blong hem oli hapi. Eksampel, taem God i wokem faswan man mo woman we tufala i stretgud olgeta, hem i putum tufala long wan paradaes we ol samting blong hem i mekem tufala i haremgud. (Jenesis 1:26-31; 2:8, 9) Hem i givim evri samting we tufala i nidim blong haremgud tumas. Be from fasin rebol, tufala i lusum olgeta samting ya. Frut blong sin blong tufala se, yumi bon we yumi gat sin mo yumi ded.—Rom 3:23; 5:12.
13 Nating se naoia yumi no moa stretgud olgeta, yumi save faenem glad yet long ol samting we God i bin mekem. I gat plante samting we oli save mekem yumi glad—ol bigbigfala hil, ol naesfala wora, ol reva, solwora mo sanbij; ol flaoa we oli gat naes kala mo smel mo plante narafala tri we oli defdefren; fulap kakae we oli gat gudfala tes; nambawan kala taem san i godaon we yumi neva kam taed blong luk; skae we i fulapgud long ol sta we yumi haremgud blong lukluk mo tingting dip long olgeta long naet; ol anamol we God i wokem long plante defren kaen mo fasin blong pleplei blong ol smosmol wan we i pulum yumi; ol gudfala myusek we i gat paoa long yumi; ol gudfala wok we i gat mining mo yumi glad blong mekem; mo ol gudfala fren. I klia nomo se Hemia we i mekem plan blong ol samting ya, hem i wan man we i hapi, mo i glad blong mekem ol narafala tu oli hapi.
14. ?Wanem fasin blong Jeova blong skelemgud glad mo fasin blong wok folem plan, we hem i askem yumi blong folem?
14 Olsem nao, Jeova i wantem se olgeta samting oli folem wan gudfala plan, be i no hemia nomo. Hem i wantem tu se ol man blong wok blong hem oli hapi olsem hem. Hem i no wantem se oli kam krangke long fasin ya blong wok folem wan plan, gogo i save spolem glad blong olgeta. Ol man blong wok blong God oli mas skelem fasin blong wok folem gudfala plan wetem fasin glad, olsem Hem i stap mekem, from we long ples we strongfala tabu speret blong hem i stap, ples ya nao i gat glad. Tru ya, Galesia 5:22 i soem se namba tu frut blong tabu speret blong God we i stap wok long ol man blong hem, hemia fasin “glad.”
Lav i Wokem Fasin Glad
15. ?From wanem lav i impoten fasin blong mekem yumi hapi?
15 Yumi intres tumas blong makem we Baebol i talem se: “God i lav.” (1 Jon 4:8, 16, NW) Baebol i neva talem se: “God i fasin ya we olgeta samting oli wok folem plan.” Lav i nambawan fasin blong God, mo ol man blong hem oli mas folem fasin ya. Hemia nao from wanem faswan frut blong tabu speret blong God we i stap long Galesia 5:22, hem ya ‘lav,’ mo biaen, fasin “glad.” Lav i wokem fasin glad. Sipos yumi folem fasin blong Jeova blong laekem tumas ol man long olgeta samting we yumi mekem long ol narafala, bambae yumi glad, from we ol man we oli gat lav, oli ol hapi man.
16. ?Olsem wanem Jisas i soemaot se lav i impoten tumas?
16 Long ol tijing blong Jisas, hem i makemgud from wanem i impoten blong folem fasin blong God blong laekem tumas ol man. Hem i talem se: “Mi stap talemaot ol samting ya nomo we Papa blong mi i tijim mi finis long hem.” (Jon 8:28) ?Wanem bigfala samting we God i bin tijim Jisas long hem, we biaen, Jisas i tijim long ol narafala man? Hemia tufala loa ya we i hae moa long ol narafala loa, fasin blong laekem God tumas mo blong laekem tumas ol man we oli stap raonabaot long yumi. (Matyu 22:36-39) Jisas i soem eksampel long lav olsem. Hem i talem se: “Mi laekem Papa blong mi tumas,” mo long fasin ya we hem i mekem wil blong God gogo kasem we hem i ded, hem i pruvum se hem i laekem Papa blong hem tumas. Mo hem i soem se hem i laekem tumas olgeta man taem hem i ded from olgeta. Aposol Pol i talem long ol Kristin long Efesas se: ‘Kraes i laekem yufala tumas, mo i letem laef blong hem blong sevem yufala.’ (Jon 14:31; Efesas 5:2) From samting ya, Jisas i talem long ol man blong hem se: “Hemia loa blong mi se, ‘Yufala i mas laeklaekem yufala, olsem we mi mi laekem yufala.’ ”—Jon 15:12, 13.
17. ?Olsem wanem Pol i soem se i impoten tumas blong soem lav long ol narafala?
17 Pol i soem from wanem lav ya we i kamaot long God i impoten, taem hem i talem se: “Sipos mi gat paoa blong tok long ol lanwis blong ol man mo blong ol enjel tu, be mi no laekem ol man, tok ya bambae i olsem noes nomo. Bambae mi olsem wan bigfala tamtam we i stap krae nomo, mi olsem wan bel we i stap singaot blong nating. Sipos mi gat paoa blong talemaot ol tok we God i givim, be mi no laekem ol man, bambae mi olsem nating. Mo sipos mi kasem ol save blong man, mo mi save mining blong ol tok ya tu we God i haedem, be mi no laekem ol man, bambae mi olsem samting nating. Mo sipos mi bilif strong long God we i naf blong mi save seftem ol bigfala hil, be mi no laekem ol man, bambae mi olsem nating nomo. Sipos mi givim olting blong mi oli go nating long ol puaman, mo mi letem ol enemi blong mi oli bonem mi long faea from we mi man blong Kraes, be mi no laekem ol man, bambae mi no winim wan samting nating. I gat trifala fasin oli stap we oli no save lus. Man i stap bilif long God. Man i stap putum tingting blong hem i strong long God. Mo man i stap laekem God mo man tumas. Be nambawan long trifala fasin ya, hemia we man i laekem God mo man tumas.”—1 Korin 13:1-3, 13.
18. ?Yumi save se bambae yumi kasem wanem long Jeova, we bambae i mekem yumi glad moa?
18 Taem yumi folem fasin blong Jeova blong laekem tumas ol man, yumi save sua se bambae hem i stap soem lav long yumi, nating se samtaem yumi mekem mastik, from we hem i ‘wan God we i gat sore long man, mo hem i stap givhan long man long gladhat blong hem. Hem i no save kros kwik. Oltaem hem i stap laekem man tumas, mo oltaem hem i stap holemstrong promes blong hem.’ (Eksodas 34:6) Sipos yumi mekem sam mastik mo yumi rili tanem tingting blong yumi from, bambae God i no tingbaot ol mastik ya, be wetem lav, bambae hem i fogivim yumi. (Ol Sam 103:1-3) Yes, “Jeova i kaen tumas, mo hem i gat sore long man.” (Jemes 5:11, NW) Taem yumi kasem save long samting ya, yumi glad.
Glad We Yumi Save Gat Naoia
19, 20. (a) ?From wanem yumi no save hapi fulwan naoia? (b) ?Olsem wanem Baebol i soem se yumi save glad go kasem wan mak naoia?
19 ?Be tede we yumi stap long ol lasdei blong wol blong Setan we i fulap long fasin blong brekem loa, faet, nogud fasin blong seks, mo yumi kasem sik mo yumi ded, yumi save hapi? I tru se, naoia yumi no save kasem bigfala glad we bambae i kamaot long nyufala wol blong God, olsem profet tok blong hem i talem, se: “Mi mi wokem nyufala heven mo nyufala wol. Mo bambae yufala i no moa tingtingbak long ol olfala samting, mo bambae oli no moa girap long hat blong yufala. Be yufala i mas haremgud, yufala i mas glad blong olwe from ol samting we mi mi stap wokem.”—Aesea 65:17, 18.
20 Samting we ol man blong wok blong God oli save gat naoia, i no glad fulwan olsemia, be glad ya we oli gat from we oli save wil blong hem mo oli kasem stret save long ol nambawan blesing we i no longtaem, bambae oli kamtru long nyufala paradaes wol blong hem. (Jon 17:3; Revelesen 21:4) Hemia nao from wanem Baebol i save talem se: ‘Jeova, yu yu Gat Olgeta Paoa. Olgeta we oli stap trastem yu bambae oli save haremgud,’ ‘olgeta we oli stap obei long Jeova, mo we oli stap folem ol tok we hem i putum, bambae oli haremgud,’ “ol kwaet man, oli save haremgud, from we bambae oli kasem wol ya i blong olgeta.” (Ol Sam 84:12; 128:1; Matyu 5:5, NW) Taswe, nating se tede yumi mas fesem ol hadtaem long laef, yumi save glad go kasem wan mak we i bigwan lelebet. Nating se yumi kasem ol nogud samting, yumi no harem nogud tumas olsem olgeta ya we oli no save Jeova mo we oli no gat hop blong laef ya we i no save finis.—1 Tesalonaeka 4:13.
21. ?Olsem wanem fasin blong givim taem, paoa, mo mane, i givim glad long ol man blong wok blong Jeova?
21 Ol man blong wok blong Jeova oli kasem glad tu from we oli spenem taem, paoa, mo mane blong olgeta blong tijim trutok blong Baebol long ol narafala, antap moa long olgeta we ‘oli sore mo oli krae from olgeta rabis fasin’ we ol man oli stap mekem long wol blong Setan. (Esikel 9:4) Baebol i talem se: “Olgeta we oli stap tingbaot ol puaman oli save haremgud. Sipos oli stap long trabol, Hae God bambae i givhan long olgeta. Hae God bambae i blokem olgeta, i lukaotgud long laef blong olgeta. Hem bambae i mekem olgeta oli stap long graon ya, oli haremgud.” (Ol Sam 41:1, 2) Olsem Jisas i talem, “man we i stap givim presen i go, hem i save haremgud moa, i winim man we i stap kasem presen blong hem.”—Ol Wok 20:35.
22. (a) Soemaot olsem wanem fasin glad blong ol man blong wok blong Jeova i no sem mak long olgeta we oli no mekem wok blong hem. (b) ?Yumi mas hapi from wanem spesel risen?
22 Taswe, nating se ol man blong wok blong God oli save se bambae oli no glad fulwan naoia, oli save kasem glad ya we ol man we oli no mekem wok blong God oli no save kasem. Jeova i talem se: “!Yu luk! Ol man blong wok blong mi bambae oli singaot bigwan from we oli harem gud long hat blong olgeta, be bambae yufala i singaot bigwan from we hat blong yufala i trabol tumas mo bambae yufala i krae from we tingting blong yufala i foldaon olgeta.” (Aesea 65:14) Mo tu, ol man we oli stap mekem wok blong God oli gat wan spesel risen blong glad naoia—oli gat tabu speret blong God we hem “i givim finis long ol man we oli obei long hem olsem rula.” (Ol Wok 5:32, NW) Mo tingbaot, ples we tabu speret blong God i stap, hemia nao ples we i gat glad.—Galesia 5:22.
23. ?Bambae yumi tokbaot wanem long nekis stadi blong yumi?
23 Long ogenaesesen blong ol man blong God tede, ol olfala, “ol elda,” oli mekem impoten wok, oli lidim ol kongregesen, mo samting ya tu i mekem ol man blong Jeova oli glad. (Taetas 1:5) ?Olsem wanem oli mas tingbaot ol responsabiliti blong olgeta mo fasin fren blong olgeta wetem ol brata mo sista blong olgeta long saed blong speret? Nekis haf bambae i tokbaot poen ya.
[Ol futnot]
a Wan bigfala grup blong sta.
b Ol smosmol string long bodi we oli sanem ol mesej i go long bren blong man.
c Strong glas we oli yusum blong luk ol samting we yumi no save luk wetem prapa ae blong yumi.
?Bambae Yu Yu Ansa Olsem Wanem?
◻ ?Olsem wanem ol samting we Jeova i wokem oli soemaot se hem i wok folem plan?
◻ ?Olsem wanem Jeova i mekem ol man blong wok blong hem bifo mo naoia oli wok folem plan?
◻ ?Wanem fasin blong Jeova blong skelemgud glad mo fasin blong wok folem plan, we hem i askem yumi blong folem?
◻ ?Olsem wanem lav i bigfala samting we i mekem yumi hapi?
◻ ?Yumi save kasem wanem glad long taem blong yumi?
[Foto Credit Line blong pija long pej 10]
Top: Courtesy of ROE/Anglo-Australian Observatory, photograph by David Malin