Wan Kwestin

?Wanem fasin yumi mas soemaot taem ol Kristin oli tekem baptaes?

Hem i wan kwestin we plante blong ol man we oli ridim magasin ya oli intres long hem. Nating sipos oli baptaes finis, oli joen long taem ya wetem ol man we oli go blong tekem baptaes. Fastaem i gud yumi tokbaot olgeta ya we oli tekem baptaes, no we oli draon fulwan long wora. ?Wanem fasin oli mas soemaot?

Long Matyu 28:​19, 20, Jisas i talem long ol man blong hem blong go mekem ol man oli kam disaepol, mo blong tijim mo baptaesem olgeta. Hem i no talem se baptaes i olsem wan bigfala ekspiryens long saed long filing, wan samting we yu mekem from wan strong filing we i kasem yu wantaem nomo. Baptaes i wan impoten samting, olsem yumi luk long eksampel blong Jisas. Luk 3:21 i talem se: “Jisas tu i baptaes. Mo taem hem i stap prea, heven i open.” Yes, Man ya we i givim Eksampel long yumi, i tinghevi long baptaes mo hem i stap prea long taem ya. Yumi no save tingbaot we taem hem i kamaot long wora, hem i mekem saen long han blong hem blong soem se hem i win, no hem i singaot strong, no saksakem ol han blong hem olbaot antap. Be long ol yia we oli jes pas, sam oli bin mekem ol fasin olsem long ol Kristin baptaes. Jisas, we i stap wetem Jon Baptaes nomo long taem ya, i kam kolosap long Papa blong hem long prea.

Baebol i no talem se baptaes i wan samting we yu no save glad long hem, mo se yu mas folem spesel fasin blong stanap no sidaon, no talem bakegen sam tok taem yu stap tekem baptaes, olsem sam jyos blong Krisendom tede oli mekem. Tingbaot dei blong Pentekos, taem plante taosen man Jyu mo ol narafala man we oli joen long skul blong ol man Jyu oli tekem Kristin baptaes. Oli stadi finis long Loa blong God mo oli fren wetem Hem finis. Ale oli nidim nomo blong kasem save long saed blong Mesaea, Jisas, mo bilif long hem. Taem oli mekem samting ya finis, oli save tekem baptaes.

Ol Wok 2:41 i talem se: “Olgeta we oli bilif long tok blong hem, oli tekem baptaes.” Baebol blong Weymouth i talem se: “From samting ya, olgeta we oli glad blong folem tok blong hem oli baptaes.” Oli faenem glad long gud nyus long saed long Mesaea, mo i tru tumas we glad ya i mas stap wetem olgeta, taem oli tekem baptaes long fored blong plante handred man we oli glad tu. Ol enjel long heven tu, oli stap lukluk mo oli stap glad. Tingbaot tok blong Jisas: “Mo mi talem long yufala, long ol enjel blong God i olsem nomo. Olgeta oli glad tumas long wan man nomo we i man nogud, be i tanem tingting blong hem from sin blong hem.”​—Luk 15:10.

I gat ol defren rod we yumi wanwan i save folem blong soemaot we yumi tinghevi long baptaes ya we yumi stap luk, mo yumi glad long hem. Long sam jyos, ol man we oli tekem baptaes, oli werem waet klos no blak klos. Baebol i no talem wanem kaen klos yumi mas werem. Nating se i olsem, i no stret sipos wan man no woman i werem ol klos we yumi save luk tru no we oli no kavremap bodi. Mo olsem yumi makem finis, taem wan nyufala Kristin i kamaot long wora, hem i no mas muvmufum bodi blong hem no saksakem ol han blong hem, olsem we hem i winim wan bigfala faet. Ol narafala Kristin brata mo sista oli glad we nyufala Kristin ya i tekem baptaes. Hem i mas save se fasin blong tekem baptaes we i soem bilif blong hem, i olsem faswan samting nomo long wan longfala rod blong holemstrong long God mo mekem Hem i glad.​—Matyu 16:24.

Yumi, olsem ol man we oli luk baptaes ya long open ples, yumi joen long fasin glad we i kamaot long taem ya. Yumi glad moa sipos hemia we i tekem baptaes i wan famle blong yumi no wan we yumi bin stadi Baebol wetem hem. Be blong joen fulwan, yumi mas lesin long fulwan tok blong baptaes wetem olgeta we oli tekem baptaes, yumi mas harem tok blong olgeta taem oli ansa long ol kwestin long fored blong ol man, mo yumi mas joen long prea. Sipos yumi mekem olsem, bambae samting ya i givhan long yumi blong gat stret tingting long saed blong baptaes. Bambae yumi tingbaot baptaes olsem God i tingbaot. Afta long baptaes, blong soemaot glad blong yumi, i no nidim we yumi mekem wan selebresen, givim wan hif blong ol flaoa, no mekem wan lafet, blong ona long hemia we i tekem baptaes. Be yumi save kam toktok wetem nyufala brata no sista blong yumi, blong talemaot glad we yumi gat from nambawan disisen we hem i tekem mo blong welkamem hem wetem kaen fasin long kampani blong ol Kristin.

Blong talem klia, yumi evriwan wetem olgeta we oli tekem baptaes tu, yumi mas gat stret tingting mo tinghevi long baptaes. Hem i no wan taem blong singaot bigwan, mekem lafet, no laf krangke. Be tu, hem i no wan taem we yu no save glad olsem we yu harem nogud. I stret nomo we yumi glad se ol nyufala Kristin oli joen wetem yumi long rod blong kasem laef we i no save finis. Mo yumi save welkamem ol nyufala brata mo sista blong yumi wetem glad.