Ol Man Blong Gilead Skul—“!Ol Trufala Misinari!”
“?WANEM ya wan misinari?” Kwestin ya i kamaot long wan nyuspepa, kolosap fote yia bifo finis. Man we i raetem tok ya, hem i talem se ol trufala misinari, oli ol man we oli save stretem ol trabol long laef blong ol man, mo ol trabol long saed blong mane. Be, long Sande, Maj 5, 1995, long Haos Asembli blong ol Wetnes blong Jeova long Jese Siti, wan ansa we i defren i kamaot klia. ?Wanem spesel dei ya? !Hem i taem we ol nyufala misinari blong namba 98 klas blong Wajtaoa Baebol Skul blong Gilead—wan skul we i sanem plante misinari i go long olgeta ples blong wol finis—oli kasem stefeket blong olgeta!
Afta long faswan prea mo singsing, Albert D. Schroeder blong Hed Kampani, i welkamem gud olgeta 6,430 man we oli stap long taem ya. Long ol faswan tok blong hem, Brata Schroeder i eksplenem klia, from wanem ol nyufala misinari blong Gilead oli defren long ol narafala man we oli talem se oli misinari. Hem i talem se: “Baebol, hem i stampa buk we oli stadi long hem, long skul blong Gilead.” Ol nyufala misinari blong Gilead oli kasem trening, i no blong mekem wok blong givim evri samting we man i nidim long saed blong bodi, be blong tijim ol man long Tok blong God. Taswe oli wan spesel grup, we oli gat evri samting blong mekem olgeta oli naf, blong givim ol samting long saed blong speret, we ol man long ol narafala kantri oli nidim.
Ol tok we ol brata oli mekem biaen, oli tokbaot sam narafala samting we oli soemaot klia se, ol nyufala misinari blong skul blong Gilead, oli ol “trufala” misinari. Charles Molohan i mekem wan tok se, “Gohed Blong Karem Ol Gudfala Frut Olsem Ol Misinari.” Brata Molohan i yusum ol tok blong aposol Pol long Kolosi 1:9, 10. Hem i mekem ol nyufala misinari ya oli tingbaot se ol faef manis we oli spenem long Gilead, i bin halpem olgeta blong kasem plante moa ‘stret save long saed blong God.’ Samting ya i save halpem olgeta blong karem frut long tu rod: oli save soemaot ol frut blong tabu speret blong God, mo oli save serem ol trutok blong Baebol wetem ol narafala.
Daniel Sydlik blong Hed Kampani, i mekem nekiswan tok we nem blong hem, “No Mekem Sam Disisen We Oli Save Karem Denja Long Laef Blong Yu.” Hem i tokbaot kwestin blong Jisas se: ‘?Bambae wan man i save givim wanem samting olsem jenis blong laef blong hem?’ (Matyu 16:26) Brata Sydlik i talem se: “Sam man oli bin lusum laef blong olgeta, blong traem kasem wan fasin blong laef we i isi, we oli no nidim blong wok had.” Be, olgeta we oli gat wan bilif we i laef, oli no save folem isi rod, taem oli fesem ol traem mo hadtaem long laef blong olgeta. Ol tok blong Jisas oli soemaot se, wanwan man i mas rere blong ‘givim’ sam samting, olsem wan sakrifaes, blong bambae hem i kasem laef. !Ol nyufala misinari ya oli kasem ol tok we i pusum olgeta blong givim ful laef blong olgeta long Jeova, blong givim bes blong olgeta long wok blong Hem!
Biaen, William Van de Wall blong Sevis Dipatmen Komiti i tokbaot, “Aposol Pol—Wan Gudfala Eksampel Blong Folem.” Brata Van de Wall i eksplenem se: “Pol i lidim wok blong ol misinari long faswan handred yia.” Taswe, i stret we hem i tokbaot fo defren fasin blong aposol Pol, we oli olsem gudfala eksampel long ol misinari tede: (1) Trufala lav mo fasin blong tingbaot narafala we aposol Pol i gat, (2) fasin blong hem blong gat gudhan blong mekem minista wok blong hem, (3) tingting daon we i mekem se hem i neva leftemap hem wan, (4) fasin blong hem blong trastem Jeova fulwan.
“Letem Jeova i Lukluk Dip Insaed Long Yu Long Nyufala Ples We Bambae Yu Go Wok Long Hem.” Hemia nem blong nekis tok we Lyman A. Swingle blong Hed Kampani i mekem. Brata Swingle i yusum vas blong dei, long Ol Sam 139:16. Hem i talem long ol nyufala misinari se, bambae oli fesem sam problem long ol ples we bambae oli go wok long hem, mo se Jeova i save rod blong winim ol trabol ya. Hem i talem se, “Kam kolosap long hem, toktok wetem hem, taem yu gat wan problem. Traem faenemaot wanem samting we hem i wantem yu blong mekem.”
John E. Barr blong Hed Kampani i tokbaot, “Bilif Blong Yufala i Stap Kam Strong Moa.” (2 Tesalonaeka 1:3) Long Luk 17:1, yumi ridim tok blong Jisas we i talem se: “I no gat rod blong blokem ol samting blong traem man.” Samfala oli foldaon from fasin blong sam narafala misinari. Be Brata Barr i leftemap tingting blong ol misinari blong kasem moa bilif, we i save mekem olgeta oli naf blong fogivim ol narafala. Yes, jes afta we Jisas i talem samting ya long ol disaepol blong hem, oli askem long Jisas se: “Plis yu mekem bilif blong mifala i kam strong moa.” (Luk 17:2-5) Wan narafala samting we i save traem bilif blong ol misinari, hemia taem ogenaesesen i gat sam nyufala tingting long sam poen. Brata Barr i askem se, “?Yumi gat naf bilif blong agri long ol jenis ya, no bambae ol jenis ya oli kam olsem ol bigfala hil we oli blokem yumi?”
Nekis samting, hemia advaes we tufala tija blong Gilead skul oli givim. Jack Redford i pulum ol nyufala misinari blong holem wan stret mo gudfala tingting oltaem. Hem i tokbaot wan misinari we i livim wok blong hem, from we sam narafala misinari oli bin jikim hem smol from wan fasin blong hem. Be, Baebol i givim woning long yumi blong no kam kros from wan smol samting nomo. (Eklesiastis 7:9) Hem i talem se, “Yu mas gat stret tingting mo fasin. Yu mas fogivim ol mastik mo rong blong ol narafala raonabaot long yu.”
U. V. Glass, brata we i rejistarem ol studen blong Gilead skul, i askem se: “?Yu yu rere blong fesem mo stanap strong tru long ol ‘taem mo ol samting we oli hapen we yu no bin tingbaot’? ” (Eklesiastis 9:11) Brata Glass i makem se, “Oltaem long laef blong yumi, ol samting oli stap jenis. Mo sam jenis oli save mekem yumi harem nogud tumas.” Sam misinari oli bin fesem sam trabol we oli no bin tingbaot, long saed blong helt, wan strong sik, mo sam problem long famle. Ol trabol ya oli fosem samfala blong lego wok blong olgeta. Brata Glass i talem se, “Nating se yumi no save luk wanem samting we bambae i hapen, yumi save se Jeova i save ol samting ya mo hem i tingbaot yumi from. Sipos yumi trastem hem, yumi save se bambae yumi save stanap strong tru long olgeta trabol.”
Wan tok we nem blong hem se, “Wan Grup Blong Mekem Spesel Wok ya Blong Misinari,” i laswan tok long moning. Theodore Jaracz, wan memba blong Hed Kampani, i askem kwestin ya we yumi askem fastaem, se, “?Wanem ya wan misinari?” Blong givim ansa, hem i tokbaot Ol Wok japta 13 mo 14, long saed blong misinari wok blong Pol mo Banabas. I klia se, bigfala wok blong olgeta, i no blong stretem olgeta problem long laef blong ol man, be i blong ‘talemaot gud nyus.’ (Ol Wok 13:32) Brata Jaracz i askem se: “?Yu yu agri se Pol mo Banabas tufala i rili soemaot fasin we ol trufala misinari oli mas gat?” Biaen, oli singaot Robert Tracy blong Meksiko, we i bin mekem wok blong misinari longtaem finis. Hem i tokbaot sam long ol gudfala ekspiryens we hem i gat long wok blong talemaot gud nyus.
Program blong moning i kasem en blong hem, taem Brata Schroeder i givimaot ol stefeket blong ol 48 man mo woman long klas ya. Ol man we oli stap lesin long ol tok, oli glad tumas blong harem nem blong ol 21 defren kantri we ol misinari bambae oli go wok long olgeta: Babados, Benin, Bolivia, Côte d’Ivoire, Ekwado, Ekwetorial Gini, Estonia, Gini-Bisau, Honduras, Kosta Rika, Latvia, Liwad Aelan, Marisus, Mosambik, Nikaragwa, Paragwae, Peru, Ripablik blong Sentrol Afrika, Senegal, Taewan, mo Veneswela.
Afta we oli spel smol blong kakae long medel dei, ol man oli kam tugeta bakegen, mo oli haremgud long stadi blong Wajtaoa we i gat laef. Robert P. Johnson blong Sevis Dipatmen i mekem. Ol memba blong namba 98 klas oli ansarem ol kwestin. Afta long hemia, ol man we oli wok long Gilead, oli askem kwestin long ol nyufala misinari ya. Ol tok blong ol nyufala misinari ya i leftemap tingting blong ol man we oli stap lesin. Oli serem ol ekspiryens blong olgeta long saed blong wok blong prij, mo oli talemaot filing blong olgeta long saed blong nyufala kantri we bambae oli go wok long hem.
Long sikis yia haf, oli bin mekem Gilead Skul long ol haos blong Wajtaoa Sosaeti long Wolkil, Nyu Yok. Be, long Epril 1995, oli muvum skul ya i go long nyufala Wajtaoa Edukesen Senta, long Pateson, Nyu Yok. ?Wanem tingting blong Betel famle blong Wolkil, long saed blong jenis ya? Long spesel miting ya, oli askem kwestin ya long samfala blong Wolkil. Ol tok blong olgeta we i tajem hat blong ol man, i soemaot klia se oli bin haremgud tumas long kampani blong ol studen blong Gilead. I klia se, ol man mo woman ya oli rili ol tru misinari—oli gat tingting daon, oli rere blong lego olgeta samting blong mekem wok blong God, mo oli wantem tumas blong givhan long ol narafala man.
Taem program blong spesel dei ya i kasem en blong hem, olgeta we oli kam blong lesin, oli bilif strong se Skul Blong Gilead bambae i gohed blong mekem gudfala wok ya we hem i bin mekem blong bitim 50 yia finis—!hemia blong trenem ol trufala misinari!
[Bokis blong pija long pej 18]
Oli Kaontem Klas:
Namba blong ol kantri we oli kamaot long olgeta: 8
Namba blong ol kantri we bambae oli go wok long olgeta: 21
Namba blong ol studen: 48
Medel namba blong ol yia we oli gat: 32.72
Medel namba blong ol yia we oli stap long trutok: 15.48
Medel namba blong ol yia we oli stap long fultaem minista wok: 10.91
[Tok blong pija long pej 18]
Olgeta We Oli Kamaot Long Klas Namba 98 Blong Wajtaoa Baebol Skul Blong Gilead
Long ol nem aninit, yumi kaontem ol laen i stat long fored i gobak biaen, mo ol nem oli stat long lefsaed i go long raetsaed long wanwan laen.
1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.