Skul Blong Gilead—!50 Yia Finis Mo i Stap Gohed Gud!

“I GAT plante ples we wok ya blong talemaot Kingdom i no bin goaot plante long hem.” Hemia tok we N. H. Knorr i talem long faswan klas blong Gilead long Febuwari 1, 1943, dei we oli openem skul ya. Hem i gohed i se: “I gat plante handred taosen man yet we yumi save kasem sipos plante moa man oli joen long wok blong prij. From gladhat blong Masta, bambae i gat moa.”

Mo i bin gat plante moa man blong wok​—!plante milyan moa! !Namba blong ol man blong talemaot Kingdom i bin go antap long 129,070 long 54 kantri long 1943 kasem 4,472,787 long 229 kantri long 1992! Gilead skul i bin givhan bigwan long wok blong prij we i mekem se i gat bigfala namba ya. Afta long 50 yia, hem i gohed long wok ya blong trenem ol man blong wok olsem misinari long eni ples long wol we i gat nid long olgeta.

Long Maj 7, 1993, oli singaot 4,798 brata sista mo ol memba blong Betel long Amerika blong oli hivap long Haos Asembli long taon blong Jesi long Nyu Jesi, blong talemaot weples olgeta we oli tren long klas namba 94 bambae oli go long hem. Mo tu spesel taem ya i givim jans long olgeta blong tingtingbak long ol 50 yia blong skul ya blong Gilead. ?Yu yu wantem save smol long saed blong program ya?

Afta long faswan singsing, George D. Gangas we hem i memba blong Hed Kampani i mekem wan prea wetem filing. Ale, afta long tok blong jeaman, hemia Carey W. Barber, ol misinari​—mo olgeta man we oli stap​—oli lesingud long ol haf blong ol sotfala tok.

Robert W. Wallen i givim tok fastaem, long stampa tok ya “Neva Yufala i Stap Yufala Nomo.” Long gudfala fasin blong toktok, hem i talem se: ‘Long ol dei we oli kam, bambae i gat ol taem we oli kamaot long laef blong yufala we bambae yufala i harem se yufala i stap yufala nomo, longwe tumas long famle mo ol fren.’ ?From samting ya, olsem wanem yumi save talem se, “Neva Yufala i Stap Yufala Nomo?” Hem i eksplenem se: ‘From we i no gat samting i blokem yufala evriwan blong toktok plante wetem Jeova God long enitaem.’ Hem i leftemap tingting blong ol misinari blong holemtaet fasin blong prea mo blong mekem evri dei. Ale, olsem Jisas, oli save talem se, “Mi no stap mi wan nomo.” (Jon 16:32) !Ol tok ya oli leftemap tingting blong ol misinari ya!

Wan narafala stampa tok we stampa blong hem se “Holemstrong Long Hop Blong Yu” (i stanap long vas blong dei long Maj 7), Lyman A. Swingle we hem i memba blong Hed Kampani i givim tok ya, i tokbaot tufala impoten fasin​—fasin blong stanap strong mo hop. Hem i talem se, ‘Ol Kristin oli nidim fasin blong stanap strong from ol man oli save agensem olgeta, holem olgeta from wok we oli stap mekem, oli kasem hadtaem, oli go long kalabus, ating oli kasem ded. I no gat mak long paoa ya we i antap moa bitim samting we i stret, we ol Wetnes blong Jeova we oli gat strong bilif oli save kasem long taem blong trabol. Tru ya samting ya i leftemap tingting blong yumi, antap moa, yufala ol misinari.’ ?Olsem wanem long hop? Hem i eksplenem se, ‘Yumi nidim hop. Olsem hat we i blokem hed blong man we i putum, ale hop we wan Kristin i gat long God blong sevem hem i lidim mo i blokem tingting blong hem, mekem se hem i save holemtaet fasin blong stanap strong.’​—1 Tesalonaeka 5:8.

Ralph E. Walls i givim narafala tok, hem i tokbaot wan stampa tok we i pulum intres se, “?Olsem Wanem Yumi Save Ronwe i Go Long Wan Sefples We i ‘Bigfala Ples’?” ?Wanem ya “sefples we i bigfala ples”? (Ol Sam 18:19) Brata we i givim tok ya i eksplenem se, “wan fasin fri we i mekem se hem i kasem pis long tingting mo i harem sef long hat blong hem.” ?Yumi nidim blong kam fri long wanem? ‘Yu wan​—ol slak fasin blong yu.’ Hem i gohed se: ‘Mo tu, ol trabol we Setan i save mekem long yumi.’ (Ol Sam 118:5) ?Olsem wanem yumi save ronwe i go long wan sefples we i gat bigfala ples? ‘Taem yumi stap lukaot ol samting we Jeova i wantem, long olgeta samting we yumi mekem mo taem yu prea wetem bilif long saed blong ol wari blong yumi.’

“?Wanem i Stap Fored Long Yufala?” i stampa tok ya we Don A. Adams i jusum. ?Yes wanem i stap fored long ol nyufala misinari? Hem i eksplenem, wan taem we oli mas mekem plante jenis long laef blong olgeta. “Mo tu i gat plante blesing oli stap fored long yufala.” Olsem wan eksampel, hem i tokbaot wan brata mo sista we tufala i mekem wok blong misinari, afta we tufala i kasem ples we tufala i mas wok long hem, tufala i raetem se: “Tingbaot nambawan dei we yu bin gat long wok blong prij, mo evridei oli sem mak olsem. Mitufala i no naf blong karem olgeta buk wetem mitufala, mo ol man oli stap gohed blong askem mitufala blong mekem stadi wetem olgeta.” Brata ya i givim advaes long famle mo ol fren blong ol misinari se: ‘I no gat nid blong yufala i wari long ol misinari ya. Yu save givhan long olgeta taem yu raetem leta i go blong leftemap tingting blong olgeta.’​—Proveb 25:25.

Jack D. Redford, brata we i lidim skul ya i givim narafala tok. Hem i jusum stampa tok ya se “Yu No Mas Tingting Blong Kasem Wan Samting Long Wan Man.” Hem i eksplenem se wan long ol traem we bambae ol misinari ya oli fesem, hemia blong joengud wetem ol man. ?Wanem i save givhan? “No tingbaot ol poen blong olgeta. Yu no mas ting se ol narafala man oli no save mestem. Yu no mas tingting blong kasem olgeta samting we yu ting se yu gat raet blong kasem. Tingbaot narafala se oli no stretgud olgeta, mo kaengud fasin ya bambae i givhan long yu blong joengud wetem olgeta. Gudfala fasin blong yu blong joengud wetem olgeta bambae i soemaot se yu wan bigman long saed blong speret.” (Proveb 17:9) !Tru ya, ol waes advaes ya bambae oli givhan long ol misinari blong wokgud long wan narafala kantri!

Seken Korin 4: 7 i talem se: “Mifala ya, we mifala i stap holem ol gudgudfala samting we God i givim, mifala i olsem ol graonpot nomo.” Ulysses V. Glass, brata we i lukaot long program blong skul blong Gilead, i tokbaot vas ya taem hem i tokbaot stampa tok ya se “Trastem Ol Brata Blong Yufala We Oli Stanap Strong Longtaem Mo Oli Stap Holemstrong Long God.” ?Wanem ya “ol graonpot”? Hem i mekem i klia se: “Hemia i mas tokbaot yumi olgeta man we yumi no stretgud olgeta.” ?Wanem ya “ol gudgudfala samting”? Hem i eksplenem se: “Hemia Kristin minista wok blong yumi.” (2 Korin 4:1) ?Mo yumi save mekem wanem wetem ol gudgudfala samting ya? “Ol gudgudfala samting ya we Jeova i putum long han blong yumi, i no blong yumi no yusum. Taswe, yufala we bambae yufala i wok olsem ol misinari, givimaot ol gudgudfala samting ya long olgeta ples we yufala i go long hem, mo tijim plante narafala man olsem wanem blong talemaot samting ya.”

Hem i wan taem blong tingtingbak taem Albert D. Schroeder i stat blong toktok, from hem i lukaot long program blong Gilead Skul taem Gilead Skul i stat. Stampa tok blong hem se, “50 Yia Blong Tiokratik Trening.” Hem i talem se, “Jeova i save olsem wanem blong givim trening we i gat paoa, mo hem i bin mekem samting ya.” ?Olsem wanem? Brata Schroeder i tokbaot trening we yumi kasem from tufala skul we i bin stanap 50 yia bifo​—Tiokratik Skul mo Skul blong Gilead. Hem i soemaot se New World Translation i bin stap olsem wan impoten tul we i givim stret save. Hem i talem klia long ol misinari ya se: “Yufala i save go wok long ol narafala kantri wetem strong tingting se bambae Sosaeti i gohed blong givim ol samting we yufala i nidim long saed blong stret save long plan blong Jeova.”

Milton G. Henschel, presiden blong ‘Watch Tower Bible mo Tract Society blong Pennsylvania,’ i tokbaot stampa tok ya, “Yumi Bigwan Moa Bitim Olgeta Samting We Yumi Mas Winim.” Stampa tok blong Brata Henschel i stanap long vas blong yia 1943 se: “Yumi bigwan moa bitim olgeta samting we yumi mas winim, from hemia we i laekem yumi tumas.” (Rom 8:​37, King James Version) Hem i eksplenem se, hemia i wan stret vas blong yia, from long taem ya Namba Tu Bigfala Faet Blong Wol i stap gohed, mo, long plante kantri, ol man oli ronem mo oli mekem nogud long ol brata blong yumi. Brata Henschel i ridim sam haf long Wajtaoa we oli tokbaot vas blong yia ya mo biaen i eksplenem se: “Mifala i stadi long haf blong Wajtaoa ya [Janewari 15, 1943] long faswan klas blong Gilead long manis blong Febuwari, mo hem i mekem se oli rere long samting we i stap long fored blong olgeta.” Hem i eksplenem se, plante long ol misinari ya long ol 50 yia we oli pas, oli bin pruvum olgeta finis se oli win. ?Olsem wanem long klas namba 94? “Stap kolosap long Jeova, stap kolosap long lav blong hem, mo bambae yu winim faet blong yu.”

Biaen long ol tok blong moning, jeaman i talemaot lav we sam brata long ol defren kantri oli sanem i kam. Ale oli kasem stret taem we longtaem finis ol 24 hasban mo waef we bambae oli wok olsem misinari oli bin wet from​—oli kasem leta we i talem weples bambae oli go wok long hem. !Naoia ol studen ya blong Gilead oli kam ol misinari blong Gilead! Oli kam long 5 kantri, be wok blong olgeta i mekem se oli mas go long 17 kantri, yumi kaontem wetem Hong Kong, Taiwan, Mosambik, mo ol ples long Is Yurop.

Afta wan smol spel, program blong aftenun i stat wetem Wajtaoa Stadi we Robert L. Butler i lidim. Biaen ol misinari oli mekem sam pleplei blong soem sam long ol ekspiryens we oli haremgud long hem taem oli stap prij kolosap long Wolkil, Nyu Yok. Program ya i soemaot wan long ol samting we i mekem se oli go long Gilead​—bigfala lav blong olgeta long wok blong prij.

Biaen long ol tok blong ol studen, plante brata mo sista oli stap ting se program ya bambae i soemaot samting we i spesel blong tingbaot 50 yia blong Gilead Skul. !Tingting blong olgeta i no foldaon!​—Lukluk long bokis, “Tingtingbak Long 50 Yia Blong Gilead Skul.”

Fefte yia bifo, Brata Knorr i soemaot se hem i wan man blong bilif mo blong plan from samting we i no kamtru yet. Ol fas tok blong hem blong openem faswan klas i soemaot tingting blong hem se Skul blong Gilead i mas gohed, taem hem i talem se: “Yumi bilif se, stret long nem blong hem, wan ‘hif blong ol wetnes’ bambae oli kamaot long ples ya mo oli go long olgeta ples long wol mo se wetnes olsem bambae i stanap olsem wan pija blong paoa blong God we neva bambae i lus samtaem. Yufala olsem ol tabu minista bambae yufala i putum tras blong yufala long Hemia we i Hae Olgeta, yufala i save se bambae hem i lidim mo i soem stret rod long yufala long evri taem we yufala i nidim help, mo bambae yufala i save tu se hem i God blong ol blesing.”a

!Fefte yia biaen, Gilead Skul i stap gohed gud yet! Naoia ol misinari blong klas namba 94 oli gat jans blong folem ol misinari bifo long olgeta we namba blong olgeta i bitim 6,500. I gud oli putum ful tras blong olgeta long Hemia we i Hae Olgeta taem oli go blong mekem wan “hif blong wetnes” we bambae i stanap olsem wan pija blong paoa blong Jeova God.

[Futnot]

[Bokis blong pija long pej 25]

Oli Kaontem Klas

Total namba blong ol studen: 48

Namba blong ol kantri we oli kamaot long hem: 5

Namba blong ol kantri we bambae oli wok long olgeta: 17

Medel namba blong yia we oli gat: 32

Medel namba blong ol yia we oli stap long trutok: 15.3

Medel namba blong ol yia we oli stap long fultaem minista wok: 9.6

[Bokis Blong Pija Long Pej 26, 27]

TINGTINGBAK LONG OL 50 YIA BLONG GILEAD SKUL

?Wanem gudfala rod blong tingtingbak long histri blong Gilead bitim ol ekspiryens blong olgeta we oli bin stap long hem​—ol faswan misinari, ol brata we oli lidim, mo ol narafala we oli givhan blong mekem rere skul ya? Ol man oli haremgud tumas taem oli lesin long haf ya “Tingtingbak Long 50 Yia Blong Gilead Skul,” we Theodore Jaracz i lidim.

?Wanem samting i mekem se oli stanemap skul ya? Brata Schroeder i eksplenem se oli givim fo manis nomo long hem mo tufala brata we oli lidim wok blong mekemrere long skul ya. “Be long Mande, Febuwari 1, 1943, mifala i rere blong dediketem.”

?Olsem wanem long ol misinari we oli sanemaot olgeta fastaem? Brata Henschel i talem bakegen se: “Sosaeti i fulumap olgeta samting we ol misinari oli wantem karem wetem olgeta long ol bigfala bokis, ale oli sanem i go long sip. Taem ol bokis ya oli kasem ples we ol misinari oli stap long hem, oli openem sloslou mo oli tekem ol samting blong olgeta. Be afta oli yusum ol wud blong bokis ya blong mekem jea mo tebel.” Biaen, hem i makemgud, Sosaeti i faenem ol stret haos blong misinari.

Narafala samting long program ya se, sam misinari blong ol faswan klas blong Gilead we naoia oli memba blong Betel long Amerika oli tokbaot tingting blong olgeta, filing blong olgeta, mo ol ekspiryens blong olgeta. Ol tok blong olgeta oli tajem bigwan hat blong olgeta we oli stap long taem ya.

“Afta we oli askem mi blong joen long faswan klas, mi harem se mama blong mi i kasem kansa. Be from we hem i bin stat blong mekem wok blong paenia taem hem i gat 16 yia, hem i askem strong long mi blong go long Skul ya. Ale wetem ol filing we oli meksap mo tras blong mi long Jeova, mi go long Saot Lansing (wan taon long Nyu Yok we Gilead Skul i stap long hem). Mi haremgud tumas long hem mo mi gat bigfala tangkyu from trening we Gilead Skul i givim. Mama blong mi i ded afta we mi kamaot long Gilead.”​—Charlotte Schroeder, hem i bin wok long Meksiko mo El Salvado.

“From we Jeova i bin lukaotgud long mi finis long wol ya long ples we mi stap long hem, samting ya i soemaot se eniples we mi go long hem, hem i wol blong hem yet, mo bambae hem i lukaot long mi. Ale mi mi wantem blong go long faswan klas.”​—Julia Wildman, hem i wok long Meksiko mo El Salvado.

“!Wok blong misinari i nambawan tumas! Mifala i save toktok long olgeta doa. Long faswan manis, mi givimaot 107 buk mo mi mekem 19 Baebol stadi. Long namba tu manis mi gat 28 Baebol stadi. Tru ya, i gat sam samting we mifala i mas lan long hem​—bigfala san, ples i hot, plante bebet. Be hemia i wan nambawan jans blong stap long ples ya. Hemia samting we bambae mi no save lego.”​—Mary Adams blong namba 2 klas i tokbaot wok blong hem long Kuba.

“Weta i wan long ol bigfala trabol we mifala i gat long Alaska. Long Not, ol ples oli kolkol tumas, we tempraja i godaon kasem 60 digri aninit long siro mo i godaon moa. Mifala i mas yusum bot no plen blong kasem ol velej blong ol man India mo ol smosmol ples we oli stap olgeta nomo long saot is blong Alaska.”​—John Errichetti, blong namba 3 klas.

“Long mi, Gilead Skul i wan rod we Jeova i yusum ogenaesesen blong hem long wol blong singaot mifala blong givim paoa long mifala long saed blong speret mo blong soemaot wan nambawan rod blong laef.”​—Mildred Barr, blong namba 11 klas, hem i wok long Aerlan.

Moa nambawan store blong tingtingbak i gohed​—Lucille Henschel (blong namba 14 klas, hem i wok long Veneswela), Margareta Klein (blong klas namba 20, hem i wok long Bolivia), Lucille Coultrup (blong klas namba 24, hem i wok long Peru), Lorraine Wallen (blong klas namba 27, hem i wok long Brasil), William mo Sandra Malenfant (blong klas namba 34, oli wok long Moroko), Gerrit Lösch (blong klas namba 41, hem i wok long Ostria), mo David Splane (blong klas namba 42, hem i wok long Senegal).

?Olsem wanem long ol brata we oli wok olsem ol tija? Oli askem kwestin long sam long olgeta tu​—Russell Kurzen, Karl Adams, Harold Jackson, Fred Rusk, Harry Peloyan, Jack Redford, mo Ulysses Glass. Oli tokbaot nambawan jans we oli gat blong mekem wok ya, oli talem olsem wanem wok ya i bin gat paoa long olgeta kam kasem tede.

Lloyd Barry, we hem i wok long Japon i tokbaot ol nambawan ekspiryens we ol misinari oli kasem from trening we Gilead Skul i givim. Long 1949, taem oli sanem 15 misinari long Japon, fulnamba blong ol pablisa long Japon i no kasem 10. !Be 44 yia biaen, namba blong ol man blong talemaot Kingdom long ples ya i go antap kasem 175,000! Ale Robert Wallen i tokbaot sam nambawan rod we sam misinari oli yusum blong givhan long ol man blong kam long trutok, hemia wetem wan misinari sista we hem i bin stap bitim 45 yia long Panama mo hem i bin givhan long 125 man kasem we oli givim laef blong olgeta mo oli tekem baptaes.

Taem program ya i kasem en blong hem, oli askem ol misinari ya blong kam antap long platfom. I tru, hemia i wan taem we i tajem hat. Wan longfala laen blong ol brata mo sista​—89 brata mo sista blong Betel wetem ol misinari we oli kam blong visit​—oli wokbaot i kamdaon long smol rod long medel blong haos asembli mo oli folem ol step i go antap long platfom. !Ol brata we oli lidim skul ya blong sam yia bifo mo afta long klas namba 94, oli joenem olgeta​—!kolosap namba long evriwan i kasem 160!

Brata Jaracz i askem se, “?Wok blong Gilead Skul blong trenem ol misinari blong go long ol narafala ples i bin gat gudfala frut? !Pruf we i kamaot long ol 50 yia we oli pas finis i soemaot bigwan se yes!”

[Tok blong pija long pej 25]

Olgeta We Oli Kamaot Long Klas Namba 94 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo ol nem oli stat long lefsaed i go long raetsaed long wanwan laen.

(1) De La Garza, C.; Borg, E.; Arriaga, E.; Chooh, E.; Purves, D.; Fosberry, A.; Delgado, A.; Drescher, L. (2) Scott, V.; Fridlund, L.; Kettula, S.; Copeland, D.; Arriaga, J.; Thidé, J.; Olsson, E.; Widegren, S. (3) Delgado, F.; Keegan, S.; Leinonen, A.; Finnigan, E.; Fosberry, F.; Halbrook, J.; Berglund, A.; Jones, P. (4) Watson, B.; Frias, C.; Chooh, B.; Halbrook, J.; Purves, J.; Finnigan, S.; Jones, A.; Cuccia, M. (5) Scott, G.; Copeland, D.; Drescher, B.; De La Garza, R.; Leinonen, I.; Keegan, D.; Watson, T.; Kettula, M. (6) Widegren, J.; Borg, S.; Cuccia, L.; Berglund, A.; Olsson, B.; Frias, J.; Fridlund, T.; Thidé, P.