Wan Kwestin

Fas Jon 4:18 i talem se: “Man we i laekem God tumas, hem i no save fraet long hem. Taem fasin blong God blong laekem yumi tumas i kam fulap long yumi, hemia i ronemaot ol fraet.” Be Pita i raetem se: “Yufala i mas ona long olkaen man, yufala i mas laekem olgeta evriwan long kampani blong ol brata, yufala i mas fraetgud long God.” (1 Pita 2:17, NW) ?Olsem wanem yumi save mekem tufala vas ya oli laenap?

Tufala aposol ya Pita mo Jon, tufala i karem tijing stret long Jisas Kraes hem wan. Taswe yumi save sua se tok blong tufala ya i laenap. Long saed blong tufala vas ya antap, ansa, hemia se tufala aposol ya oli stap tokbaot tu defren kaen fasin fraet.

Fastaem, yumi save tingbaot advaes blong Pita. Olsem ol vas raonabaot oli soemaot, Pita i stap givim long ol narafala Kristin, advaes we i kamaot long God, long saed blong fasin we oli mas gat long olgeta we oli hae moa long olgeta. Blong talem long defren tok, hem i stap tokbaot stret tingting long fasin blong stap daon aninit long narafala, long sam haf blong laef. Taswe, hem i givim advaes long ol Kristin blong obei long ol haeman long ol gavman blong man, olsem ol king no ol rula. (1 Pita 2:​13, 14) Pita i gohed blong raetem se: “Yufala i mas ona long olkaen man, yufala i mas laekem olgeta evriwan long kampani blong ol brata, yufala i mas fraetgud long God, mo yufala i mas ona long king.”​—1 Pita 2:17, NW.

From ol vas raonabaot, i klia se taem Pita i talem long ol Kristin se oli mas “fraetgud long God,” hem i minim se yumi mas gat dip ona mo respek long God. Hemia se, yumi fraet blong mekem samting we Man ya we i Hae Olgeta i harem nogud long hem.​—Skelem Hibrus 11:7.

?Olsem wanem long tok blong aposol Jon? Long stat blong 1 Jon japta 4, aposol ya i tokbaot nid blong traem ol tok blong ol profet “we oli stap talem se ‘Speret blong God i stap long mi,’ ” olsem ol gyaman profet oli stap talem. Ol tok blong olgeta ya oli no kamaot long Jeova God nating. Oli kamaot long rabis wol ya no oli soem ol tingting blong hem.

Defren olgeta, ol Kristin we tabu speret i makemaot olgeta, oli “man blong God.” (1 Jon 4:​1-6) From samting ya, Jon i pusum olgeta blong mekem olsemia: “Ol fren. Yumi mas laeklaekem yumi, from we fasin ya blong laekem tumas ol man, hem i kamaot long God.” God i soemaot lav fastaem​—hem i “sanem Pikinini blong hem blong i ded blong mekem rod blong God i tekemaot ol sin blong yumi.” (1 Jon 4:​7-10) ?From samting ya, yumi mas soemaot wanem fasin?

I klia se, yumi mas stap joengud wetem God blong yumi we i gat lav. Yumi no mas seksek from fraet taem yumi wantem kam kolosap long hem long prea. Bifo finis, Jon i givim advaes ya se: “Sipos tingting blong yumi i no save jajem yumi, yumi save kam long fes blong God we tingting blong yumi i strong. Nao sipos yumi askem sam samting long hem, bambae yumi save kasem, from we yumi stap folem ol loa blong hem.” (1 Jon 3:​21, 22) Yes, wan tingting we i no jajem yumi, i save mekem we yumi harem se yumi fri blong kam kolosap long God. Yumi no gat nogud fraet ya we i mekem yumi slak, mo i blokem yumi blong mekem samting we yumi wantem mekem. From lav, yumi harem se yumi fri blong toktok wetem no kam kolosap long Jeova long prea. Olsem nao, “man we i laekem God tumas, hem i no save fraet long hem.”

Ale, naoia yumi joenem tufala poen ya. Oltaem wan Kristin i mas fraet long Jeova long fasin we hem i givim dip ona long Hem. Samting ya i kamaot long dip respek we hem i gat long haenem, paoa, mo stret fasin blong Hem. Be tu, yumi laekem God tumas, olsem Papa blong yumi. Mo yumi harem se yumi stap kolosap long hem mo yumi no fraet blong toktok wetem hem. I no gat wan nogud fraet we i blokem yumi blong kam long hem. Yumi gat strong tingting se yumi save toktok long hem, olsem wan pikinini i harem se hem i save kam kolosap mo toktok long papa no mama blong hem, we i laekem hem tumas.​—Jemes 4:8.