Ol Kristin Wetnes Blong Leftemap Hae Rul Blong God
“ ‘Yufala i save talemaot ol gudfala fasin’ blong hemia we i singaot yufala i aot long tudak, i kam long nambawan laet blong hem.”—1 PITA 2:9, NW.
1. ?Wanem gudfala wetnes i kamaot long saed blong Jeova bifo Kristin taem?
BIFO Kristin taem, i gat plante wetnes we oli talemaot klia se Jeova nomo i trufala God. (Hibrus 11:4 kasem 12:1) Wetem strong bilif, oli no fraet blong obei long ol loa blong Jeova, mo oli no save joen long enikaen narafala wosip. Oli givim wan strongfala wetnes long saed blong hae rul blong Jeova antap long heven mo wol.—Ol Sam 18:21-23; 47:1, 2.
2. (a) ?Hu ya nambawan Wetnes blong Jeova? (b) ?Hu ya i karem ples blong nesen blong Isrel olsem ol wetnes blong Jeova? ?Olsem wanem yumi save samting ya?
2 Laswan man bifo Kristin taem blong givim wetnes we i bigwan moa bitim ol narafala long taem ya, hemia Jon Baptaes. (Matyu 11:11) Hem i gat blesing ya blong talemaot se Hemia we God i jusum bambae i kam. Mo hem i talemaot long olgeta man se Jisas i Mesaea we God i promes blong sanem. (Jon 1:29-34) Jisas i nambawan Wetnes blong Jeova. “Hem i tru wetnes ya we i no save tanem tok blong hem.” (Revelesen 3:14) Ol man Isrel bifo oli sakemaot Jisas. Taswe, Jeova i sakemaot olgeta mo i stanemap wan nyufala nesen, hemia Isrel blong God long saed blong speret, blong i stap olsem wetnes blong hem. (Aesea 42:8-12; Jon 1:11, 12; Galesia 6:16) Pita i talem bakegen wan profet tok long saed blong Isrel, mo hem i soem se tok ya i stret long “Isrel blong God,” hemia Kristin kongregesen. Hem i talem se: “Yufala i ‘wan laen we God i jusumaot, wan kampani blong pris we i king, wan tabu nesen, wan pipol we i blong God nomo, blong yufala i save talemaot ol gudfala fasin’ blong hemia we i singaot yufala i aot long tudak, i kam long nambawan laet blong hem.”—1 Pita 2:9, NW; Eksodas 19:5, 6; Aesea 43:21; 60:2.
3. ?Wanem bigfala wok blong Isrel blong God mo “bigfala hif blong man”?
3 Ol tok blong Pita oli soemaot se bigfala wok blong Isrel blong God, i blong givim wetnes long fored blong ol man long saed blong paoa blong Jeova. Long taem blong yumi, “wan bigfala hif” blong ol wetnes we olgeta tu oli presem God long fored blong ol man, oli joen wetem nesen ya long saed blong speret. Oli singaot wetem bigfala voes, blong olgeta man oli save harem, oli talem se: “God ya blong yumi, we i stap sidaon long bigfala jea blong hem, wetem Smol Sipsip ya, tufala ya nao i wokem rod blong sevem mifala.” (Revelesen 7:9, 10; Aesea 60:8-10) ?Olsem wanem Isrel blong God mo ol narafala we oli joen wetem hem, oli stap givim wetnes ya? From bilif mo fasin obei blong olgeta.
Ol Gyaman Wetnes
4. ?From wanem ol man Jyu long taem blong Jisas oli ol gyaman wetnes?
4 Blong soem bilif mo fasin obei, wan man i mas folem ol loa blong God long laef blong hem. Yumi luksave se samting ya i impoten tumas, from ol tok we Jisas i talem long saed blong ol lida blong skul blong ol man Jyu long taem blong hem. I olsem we olgeta ya oli ‘sidaon long jea blong Moses’ taem oli tijim ol man long Loa ya. Mo tu, oli sanem sam misinari oli go long ol narafala ples, blong pulum ol man we oli no bilif oli kam. Be, Jisas i talem long olgeta se: ‘Yufala i glad blong wokbaot long sip, mo blong go olbaot long ol narafala kantri blong pulum ol man oli biaen long yufala. Be taem yufala i pulum man i biaen long yufala, yufala i mekem hem i man blong go long Gehena nomo, i man nogud moa, i winim yufala tutaem.’ Olgeta man blong jyos ya oli ol gyaman wetnes. Oli flas, oli gat tu fes, mo oli no gat lav nating. (Matyu 23:1-12, 15) Wan taem, Jisas i bin talem long samfala man Jyu se: “Yufala i gat sem fasin nomo we papa blong yufala Setan, hem i gat. Mo oltaem yufala i wantem mekem ol samting ya we hem i wantem.” ?From wanem hem i talem ol tok olsem long ol memba blong nesen ya we God i jusumaot? From we oli no wantem harem ol tok blong Hemia we i nambawan Wetnes blong Jeova.—Jon 8:41, 44, 47.
5. ?Olsem wanem yumi save se Krisendom i bin givim wan gyaman wetnes long saed blong God?
5 Long sem fasin, long ol handred yia biaen long taem blong Jisas, plante handred milyan man long Krisendoma oli talem se oli ol disaepol blong Jisas. Be, oli no mekem ol samting we God i wantem, taswe Jisas i no luksave olgeta. (Matyu 7:21-23; 1 Korin 13:1-3) Krisendom i sanem sam misinari oli go long ol narafala ples, mo i klia se plante long olgeta oli gat gudhat. Be oli tijim ol man blong wosipim wan god we hem i wan Triniti, we i stap bonem ol man we oli mekem sin long helfaea. Mo plante blong ol man we oli pulum olgeta blong joen long jyos, oli no soem plante pruf se oli Kristin. Wan eksampel, kantri blong Ruwanda long Afrika, hem i wan ples we ol misinari blong Katolik skul oli pulum plante manples blong joen long skul blong olgeta. Be, ol man Ruwanda we oli Katolik, oli bin joen fulwan long faet we i kamaot i no longtaem bitwin ol man blong ol defren laen long kantri ya. Frut ya we i kamaot from wok blong ol misinari long ples ya, i soemaot se Krisendom i no bin givim wan trufala Kristin wetnes long ol man ya.—Matyu 7:15-20.
Laef Folem Ol Loa Blong God
6. ?Long wanem rod ol fasin we oli stret oli impoten blong givim wetnes?
6 Taem ol man we oli talem se oli Kristin, oli mekem ol fasin we oli no stret, samting ya i mekem se ol narafala man oli tok agensem “Rod blong Trutok.” (2 Pita 2:2) Wan trufala Kristin i stap folem ol loa blong God long laef blong hem. Hem i no stil, gyaman, mekem ol fasin we oli no stret blong trikim narafala man, mo mekem ol rabis fasin long saed blong seks. (Rom 2:22) Hem i no kilim i ded wan narafala man. Ol Kristin hasban oli lukaotgud long famle blong olgeta wetem lav. Ol waef oli soem respek mo sapotem hasban we i lukaot long olgeta olsem. Ol papa mama oli trenem ol pikinini blong olgeta, nao taem oli gruap, oli save kam ol Kristin we oli waes mo oli naf blong mekem ol bigfala wok. (Efesas 5:21 kasem 6:4) I tru, yumi evriwan i no stretgud olgeta, mo yumi mekem mastik samtaem. Be wan trufala Kristin i gat respek long ol loa blong Baebol, mo hem i rili traehad blong folem olgeta long laef blong hem. Ol man raonabaot oli stap luk samting ya, mo hem i givim wan gudfala wetnes long olgeta. Samtaem, olgeta we oli bin agensem trutok, oli luk ol gudfala fasin blong wan Kristin, nao samting ya i pulum olgeta blong kam wan Kristin tu.—1 Pita 2:12, 15; 3:1.
7. ?Fasin blong ol Kristin blong laeklaekem olgeta i impoten olsem wanem?
7 Jisas i soem wan impoten fasin we ol Kristin oli mas gat, taem hem i talem se: “From we yufala i stap laeklaekem yufala, bambae olgeta man oli luksave se yufala i man blong mi.” (Jon 13:35) Wol blong Setan i fulap long ol man we oli “stap mekem ol narnarafala rabis fasin. Oli stap mekem nogud, oli stap wantem evri samting, mo oli stap lukaot rod blong spolem man. Oltaem oli fulap jelas, oli stap kilim man i ded, mo oli stap faetem man. Oli stap gyaman, mo oli stap mekem i nogud long ol man. Oli stap store long ol gyaman toktok, mo oli stap gyaman blong spolem nem blong man. Oli agens long God, oli jiki, oli flas, mo oli stap tok flas oltaem. Oltaem oli stap traem lukaot sam narafala rod blong mekem nogud. Oli no save obei long papa mo mama blong olgeta.” (Rom 1:29, 30) Long wol ya we i fulap long ol fasin olsem, i gat wan ogenaesesen nomo we i stap long olgeta ples blong wol, we ol memba blong hem oli stap soemaot lav. Samting ya i givim wan strong pruf se speret blong God i stap wok long olgeta—hemia i olsem wan gudfala wetnes. Ol Wetnes blong Jeova nao, oli ogenaesesen ya.—1 Pita 2:17.
Ol Wetnes Oli Stadi Baebol
8, 9. (a) ?Olsem wanem man blong raetem Sam i kam strong moa taem hem i stadi long Loa blong God mo tingting dip long hem? (b) ?Olsem wanem stadi blong Baebol mo tingting dip long hem i save mekem yumi strong moa blong gohed blong givim wetnes?
8 Blong givim wan gudfala wetnes, wan Kristin i mas save mo i mas laekem ol stret loa blong Jeova, mo i mas no laekem nating ol kruked fasin blong wol ya. (Ol Sam 97:10) Wol ya i save pulum ol man blong agri long tingting blong hem, mo samtaem i hadwok blong agensem speret blong hem. (Efesas 2:1-3; 1 Jon 2:15, 16) ?Wanem samting i save givhan long yumi blong holemtaet stret tingting? Stadi oltaem long Baebol blong kasem ol dip mining blong hem. Man blong raetem Ol Sam 119 i talem bakegen plante taem se hem i laekem tumas Loa blong Jeova. Hem i ridim mo tingting dip long hem oltaem, “i stat long moning, gogo kasem long sapa.” (Ol Sam 119:92, 93, 97-105) From samting ya, hem i save raetem se: “Mi mi no laekem nating ol fasin blong gyaman, mi agens long olgeta, be mi laekem Loa blong yu tumas.” Antap moa, dip lav i pulum hem blong tekem aksin. Hem i talem se: “Mi mi stap leftemap nem blong yu seven taem long wan dei, from we ol tingting blong yu i stret.”—Ol Sam 119:163, 164.
9 Long sem fasin, stadi we yumi mekem oltaem long Tok blong God mo fasin blong tingting dip long hem, bambae i tajem hat blong yumi mo pusum yumi blong ‘leftemap nem blong hem’—givim wetnes long saed blong Jeova—plante taem, go kasem “seven taem long wan dei.” (Rom 10:10) Man we i raetem faswan Sam i agri long samting ya. Hem i talem se ol man we oli tingting dip long tok blong Jeova oltaem, bambae oli “olsem ol tri we oli gru long saed blong wora we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.” (Ol Sam 1:3) Aposol Pol tu i soemaot paoa blong Tok blong God, taem hem i raetem se: “Olgeta tok ya blong Baebol oli kamaot long God fastaem. Hem i putum long tingting blong ol man ya bifo blong oli raetem long buk. Nao ol tok ya i stret gud blong tijim ol man long ol trutok, mo blong blokem ol krangke tok. Mo i stretgud blong stretem ol krangke fasin, mo blong tijim ol man long ol stret fasin. Ol tok ya, God i givim blong bambae ol man blong hem oli save kam waes long olgeta samting, bambae oli gat evri samting blong mekem ol gudfala wok we i stap.”—2 Timote 3:16, 17.
10. ?Wanem samting i klia long saed blong ol man blong Jeova long ol las dei ya?
10 Namba blong ol man we oli stap mekem trufala wosip, i kam antap bigwan long ol yia 1900. Samting ya i soemaot klia se Jeova i stap blesem olgeta. I klia nomo se, olsem wan kampani, olgeta ya we oli stap givim wetnes long saed blong hae rul blong God tede, oli laekem tumas olgeta loa blong Jeova long hat blong olgeta. Olsem man blong raetem Sam ya antap, samting ya i pusum olgeta blong obei long loa blong Hem, mo blong givim wetnes wetem strong bilif, long “dei mo long naet,” long saed blong paoa blong Jeova.—Revelesen 7:15.
Ol Bigbigfala Wok Blong Jeova
11, 12. ?Wanem samting i kamaot from ol merikel we Jisas mo ol man blong hem oli bin mekem?
11 Long faswan handred yia, tabu speret i givim paoa long ol trufala Kristin wetnes blong oli save mekem merikel, mo samting ya i givim strong pruf se wetnes blong olgeta i tru. Taem Jon Baptaes i stap long kalabus, hem i sanem sam disaepol i go long Jisas blong askem long hem, se: “?Olsem wanem? ?Yu yu man ya we bifo oli bin talem se ‘Wan man bambae i kam,’ no mifala i mas stap wet long wan narafala man bakegen?” Jisas i no ansa stret se yes no no gat. Be, hem i talem se: “Yufala i gobak long Jon, yufala i talemaot long hem, olgeta samting ya we yufala i stap luk mo we yufala i stap harem. Ol blaenman, naoia oli save lukluk. Ol man we leg blong olgeta i nogud, naoia oli save wokbaot gud. Ol man we oli gat leprosi, naoia bodi blong olgeta i klin. Ol man we sora blong olgeta i fas, naoia sora blong olgeta i open. Ol dedman, naoia oli laef bakegen. Mo ol puaman, naoia i gat man i stap talemaot gud nyus long olgeta. Mo man we bilif blong hem i no foldaon from mi, hem i save harem gud.” (Matyu 11:3-6) Olgeta bigbigfala wok ya oli givim wetnes long Jon se Jisas nao i trufala ‘Man ya we God i sanem hem.’—Ol Wok 2:22.
12 Long sem fasin, sam long ol man blong Jisas tu oli mekem ol sik man oli kamgud bakegen mo mekem ol dedman oli laef bakegen. (Ol Wok 5:15, 16; 20:9-12) Olgeta merikel ya oli olsem wan wetnes we God hem wan i givim, blong halpem olgeta. (Hibrus 2:4) Mo ol wok olsem oli soemaot se paoa blong Jeova i antap olgeta. Wan eksampel: I tru se Setan, “masta blong wol ya,” hem i naf blong tekemaot laef blong man. (Jon 14:30; Hibrus 2:14) Be taem Pita i mekem woman blong bilif, Dokas, i laef bakegen long ded, hem i mekem olsem tru long paoa blong Jeova, from we Hem nomo i naf blong givimbak laef long man.—Ol Sam 16:10; 36:9; Ol Wok 2:25-27; 9:36-43.
13. (a) ?Olsem wanem ol merikel long Baebol oli gohed yet blong talemaot paoa blong Jeova? (b) ?Olsem wanem ol profet tok we oli kamtru oli mekem wan impoten wok blong pruvum se Jeova i trufala God?
13 Tede, ol merikel ya oli no moa kamaot. Oli mekem wok blong olgeta finis. (1 Korin 13:8) Nating se i olsem, yumi gat store blong olgeta i stap yet long Baebol, wetem tok blong plante man we oli bin luk, mo oli talem se oli tru. Taem ol Kristin tede oli pulum tingting blong ol man i go long ol store ya we oli kamaot bifo, ol merikel ya oli gohed yet blong givim wan gudfala wetnes long saed blong paoa blong Jeova. (1 Korin 15:3-6) Antap bakegen, long taem blong Aesea, Jeova i talem se ol profet tok we oli kamtru, oli olsem wan nambawan pruf se Hem i trufala God. (Aesea 46:8-11) Plante profet tok we tabu speret blong God i pulum man blong raetem long Baebol, oli stap kamtru tede. Plante blong olgeta oli kamtru insaed long Kristin kongregesen. (Aesea 60:8-10; Daniel 12:6-12; Malakae 3:17, 18; Matyu 24:9; Revelesen 11:1-13) Taem ol profet tok ya oli kamtru, oli soemaotgud se yumi stap long ‘ol las dei.’ Be antap long hemia, oli pruvum se Jeova i trufala God.—2 Timote 3:1.
14. ?Olsem wanem store blong ol Wetnes blong Jeova tede i givim wan strongfala wetnes se Jeova i King mo Masta?
14 Laswan samting se, Jeova i stap gohed yet blong mekem sam bigbigfala wok, sam samting blong sapraes, long ol man blong hem. Tabu speret blong Jeova i stap mekem trutok blong Baebol i kam klia moa oltaem. (Ol Sam 86:10; Revelesen 4:5, 6) Namba blong ol man we oli joen long tru wosip i stap kam antap long olgeta ples blong wol, mo samting ya i soemaot se Jeova i ‘stap mekem wok ya i spid moa long stret taem blong hem.’ (Aesea 60:22) Taem ol man blong Jeova oli kasem strong fasin agens long plante kantri long ol las dei ya, oli naf blong stanap longtaem wetem fasin no fraet, from we tabu speret i sapotem mo givim paoa long olgeta. (Ol Sam 18:1, 2, 17, 18; 2 Korin 1:8-10) Yes, store blong ol Wetnes blong Jeova tede i givim wan bigfala wetnes se Jeova i Hae King mo Masta.—Sekaraea 4:6.
Oli Mas Talemaot Gud Nyus
15. ?Wanem bigfala wetnes i mas goaot tru long Kristin kongregesen?
15 Jeova i putumap Isrel olsem wetnes blong hem long fored blong ol narafala nesen. (Aesea 43:10) Be, i gat samfala man Isrel nomo we oli kasem oda long God blong go prij long ol man we oli no man Isrel, mo plante taem hemia blong talemaot ol jajmen blong Jeova nomo. (Jeremaea 1:5; Jona 1:1, 2) Nating se i olsem, ol profet tok long Hibru haf blong Baebol, oli soemaot se wan dei, Jeova bambae i tanem tingting blong hem i go long olgeta nesen long wan bigfala fasin. Mo hem i mekem samting ya tru long Isrel blong God long saed blong speret. (Aesea 2:2-4; 62:2) Bifo we Jisas i go long heven, hem i givim oda long ol man blong hem se: “Yufala i mas go long ol man long olgeta ples long wol, blong pulum olgeta oli kam man blong mi.” (Matyu 28:19) Jisas i wok blong givhan long ‘ol man Isrel nomo we oli olsem sipsip we oli lus.’ Be hem i sanem ol man blong hem oli go “long Jerusalem, mo long olgeta ples long Judia mo Sameria,” go kasem “olgeta ples long wol.” (Matyu 15:24; Ol Wok 1:8) Olgeta man long wol oli mas harem Kristin wetnes.
16. ?Wanem oda we Kristin kongregesen long faswan handred yia i bin folemgud, mo go kasem wanem mak?
16 Pol i soem se hem i kasem save gud long samting ya. Long yia 61 K.T., hem i save talem se gud nyus i stap ‘karem frut mo goaot moa yet long olgeta ples long wol.’ Gud nyus ya i no go kasem ol man long wan nesen no wan kaen skul nomo, olsem skul ya we ol man blong hem oli stap mekem “wosip long ol enjel.” Be, hem i goaot “long olgeta man we oli laef aninit long heven.” (Kolosi 1:6, 23, NW; 2:13, 14, 16-18) Taswe, Isrel blong God long faswan handred yia, oli folemgud oda ya we oli kasem blong “ ‘talemaot ol gudfala fasin’ blong hemia we i singaot [olgeta] i aot long tudak, i kam long nambawan laet blong hem.”
17. ?Olsem wanem Matyu 24:14 i stap kamtru yet long bigfala fasin?
17 Be wok blong prij long faswan handred yia i jes wan smol samting nomo, blong soem wanem we bambae i kamaot long ol las dei. Jisas i tokbaot fyuja, mo tu, taem blong yumi, i se: “Gud nyus ya blong kingdom, bambae oli talemaot long olgeta ples long wol we i gat man long hem, blong oli wetnes long olgeta nesen. Nao biaen, en bambae i kam.” (Matyu 24:14, NW; Mak 13:10) ?Profet tok ya i kamtru? Yes, hem i kamtru. Wok blong talemaot gud nyus we i stat long smol fasin long 1919, naoia i go kasem bitim 230 kantri. Stat long ol ples we oli kolkol tumas long Not go kasem ol ples we oli hot tumas, wetnes i stap goaot. Ol bigbigfala kantri oli kasem wetnes, mo oli faenem ol smosmol aelan tu blong mekem se wetnes ya i save kasem olgeta man we oli stap long olgeta. Nating se i gat bigfala trabol long sam ples, olsem faet long Bosnia mo Hersegovina, wok blong talemaot gud nyus i stap gohed long ol ples ya tu. Olsem long faswan handred yia, wetnes ya i stap karem frut long “olgeta ples long wol.” Gud nyus i stap goaot klia nomo long “olgeta man we oli laef aninit long heven.” ?Wanem samting i kamaot from? Fastaem, samting ya i hivimap ol laswan man long Isrel blong God. Olgeta ya oli kamaot “long olgeta laen, mo long olgeta lanwis, mo long olgeta kantri, mo long olgeta kala.” Seken samting, olgeta milyan man insaed long “bigfala hif blong man” oli stap kamaot long “olgeta kala mo long olgeta laen, mo long olgeta kantri, mo long olgeta lanwis.” (Revelesen 5:9; 7:9) Matyu 24:14 i stap kamtru long bigfala fasin.
18. ?Wanem sam samting we oli stap kamaot from wok blong talemaot gud nyus long olgeta ples long wol?
18 Wok blong talemaot gud nyus long olgeta ples long wol i givhan blong pruvum se Jisas i stat blong rul finis olsem king. (Matyu 24:3) Mo tu, hem i bigfala rod blong tekem ol kakae blong “garen” we i minim wol ya, i kam, taem hem i stap lidim ol man i go long trufala hop blong man, hemia Kingdom blong Jeova. (Revelesen 14:15, 16) Ol trufala Kristin nomo oli joen long wok ya blong talemaot gud nyus. Taswe, impoten wok ya i givhan long ol man, blong makemaot ol tru Kristin se oli defren olgeta long ol gyaman Kristin. (Malakae 3:18) Long rod ya, wok ya i sevem olgeta we oli stap prij wetem olgeta we oli lesin tu. (1 Timote 4:16) Samting we i moa impoten se, wok ya blong talemaot gud nyus i stap presem mo givim ona long Jeova God, hemia we i givim oda blong mekem wok ya, we i sapotem olgeta we oli mekem, mo we i mekem se wok ya i karem frut.—2 Korin 4:7.
19. ?Olgeta Kristin oli mas gat wanem strongfala tingting taem oli statem nyufala sevis yia?
19 From samting ya, yumi no sapraes we aposol Pol i talem se: “Sipos mi no moa talemaot gud nyus ya, hemia bigfala trabol blong mi ya, bambae mi harem nogud tumas.” (1 Korin 9:16) Ol Kristin tede oli gat semfala tingting ya. Hem i wan bigfala blesing mo wan bigfala responsabiliti blong “joen wetem God blong mekem wok blong hem,” blong mekem laet blong trutok i saenaot long wol ya we i fulap nomo long tudak. (1 Korin 3:9; Aesea 60:2, 3) Wok ya we i stat smol nomo long 1919, naoia i go antap bitim mak. Kolosap faef milyan Kristin oli stap givim wetnes long hae rul blong God. Oli stap spenem bitim wan bilyan haoa evri yia blong karem mesej we i save sevem man i go long olgeta man. !I rili wan bigfala glad blong joen long wok ya blong mekem nem blong Jeova i tabu! Taem yumi statem nyufala sevis yia blong 1996, yumi mas gat strong tingting blong no kam slak. Bambae yumi folem moa bitim bifo olgeta tok we Pol i raetem i go long Timote, se: “Yu mas talemaot tok blong hem . . . oltaem yu yu mas strong blong talemaot.” (2 Timote 4:2) Taem yumi mekem olsem, yumi prea wetem ful hat blong yumi se bambae Jeova i gohed blong blesem fasin traehad blong yumi.
[Futnot]
a Ol skul we oli gyaman se oli Kristin.
?Yu Yu Rimemba?
◻ ?Hu ya i karem ples blong Isrel olsem “wetnes” blong Jeova long olgeta nesen?
◻ ?Olsem wanem ol Kristin fasin oli save givim wetnes?
◻ ?From wanem stadi blong Baebol mo tingting dip long hem oli impoten long ol Kristin Wetnes?
◻ ?Olsem wanem ol store blong ol Wetnes blong Jeova tede oli givim pruf se Jeova i trufala God?
◻ ?Wanem samting i kamaot from wok blong talemaot gud nyus?
[Tok blong pija long pej 15]
I no gat wan samting we i save blokem gud nyus ya, naoia hem i go kasem “olgeta man we oli laef aninit long heven”