Wan Kwestin

Disaepol Jemes i talem se: “Ol brata mo sista. I nogud plante man long yufala bambae oli kam tija blong [kongregesen]. Yufala i save, taem God bambae i jajem mifala tija, bambae hem i save mekem i strong moa long mifala, i winim fasin we bambae i mekem blong jajem ol narafala man.” (Jemes 3:1.) ?Wanem mining blong samting ya?

Jemes i no stap talem long ol Kristin se oli no mas tijim trutok long ol narafala. Long Matyu 28:​19, 20, Jisas i givim oda ya long ol disaepol blong hem, blong ‘mekem disaepol blong ol man blong olgeta nesen, mo tijim olgeta blong oli folem olgeta loa we mi mi givim finis long yufala.’ Taswe, olgeta Kristin oli mas kam tija. Aposol Pol i stretem ol Hibru Kristin from we oli no kam tija yet. Hem i raetem se: “Longtaem finis nao, yufala i harem ol tok we God i talem, i naf nao blong yufala i tij long hem. Be yufala i no save, nao i mas gat sam man yet blong tijim yufala long stampa blong ol tok ya. I olsem we yufala i gobak bakegen, we yufala i no save kakae strong kakae, yufala i stap dring melek nomo.”​—Hibrus 5:12.

Oraet, ?wanem samting we Jemes i stap tokbaot? Hem i stap tokbaot olgeta we oli kasem spesel wok blong tij insaed long kongregesen. Long Efesas 4:​11, yumi ridim se: ‘Long sam man, hem [Jisas Kraes, we i hed blong kongregesen] i givim paoa blong oli aposol. Long sam narafala man, hem i givim paoa blong oli profet. Long sam narafala man, hem i givim paoa blong oli talemaot gud nyus blong Kraes. Mo long sam narafala man bakegen, hem i givim paoa blong oli lukaot long ol sipsip mo oli tija.’ I gat ol spesel wok insaed long kongregesen long faswan handred yia, olsem i gat long taem blong yumi tede. Eksampel, Hed Kampani we i wok long nem blong ‘slef we i stret mo waes,’ i gat spesel wok blong lukaot long wok blong tijim ol kongregesen long olgeta ples long wol. (Matyu 24:45) Ol elda we oli stap visitim ol kongregesen mo ol elda long kongregesen, oli gat ol spesel wok blong tij tu.

?Olsem wanem? ?Jemes i stap talem se, ol Kristin man we oli naf long saed blong speret, oli no mas tekem wok blong ol tija, from we maet God i jajem olgeta long fasin we i strong moa? No gat. Wok blong elda i wan bigfala blesing, olsem 1 Timote 3:​1 (NW) i soemaot, taem i talem se: “Sipos wan man i wantem mekem wok blong elda long kongregesen, man ya i wantem wan gudfala wok.” Wan long ol mak we wan man i mas kasem blong kam wan elda long kongregesen, se hem “i mas savegud fasin blong tij.” (1 Timote 3:2) Jemes i no tok agensem ol tok blong Pol we oli kamaot long God.

Be, i luk olsem we bifo long 100 K.T., samfala oli stap putumap olgeta nomo olsem ol tija, be oli no kasem ol stret mak, mo kongregesen i no putumap olgeta tu. Ating oli ting se wok ya i mekem olgeta oli hae moa long ol narafala, mo oli wantem leftemap olgeta nomo. (Skelem Mak 12:​38-40; 1 Timote 5:17.) Aposol Jon i tokbaot Diotrefes, we ‘hem i laekem tumas blong i lida blong olgeta, nao hem i no save lesin long tok blong Jon wetem fasin respek.’ (3 Jon 9) Fas Timote 1:7 i tokbaot samfala we ‘oli wantem kam ol tija blong loa blong God, be oli no save gud mining blong ol tok we oli stap talem, mo ol poen we oli stap tok strong tumas blong talemaot.’ Ol tok blong Jemes 3:1 oli stret moa long ol man we oli wantem tij, be tingting we i pusum olgeta i no stret. Oli save spolem bigwan ol sipsip, mo from samting ya, bambae God i jajem olgeta long fasin we i strong moa.​—Rom 2:​17-21; 14:12.

Mo tu, i gud we olgeta we oli kasem finis ol mak we oli naf blong tij, mo oli stap wok olsem ol tija, oli tingbaot bakegen advaes blong Jemes 3:1. God i putum plante wok long han blong olgeta, taswe bambae hem i askem plante samting moa long olgeta bakegen. (Luk 12:48) Jisas i talem se: “Mi mi talem long yufala, long Lasdei ya we God bambae i jajem olgeta man, ol man oli mas talemaot long hem, from wanem oli bin talem ol tok olbaot.” (Matyu 12:36) Samting ya i tru moa long olgeta we ol tok blong olgeta i gat moa paoa, olgeta we kongregesen i putumap olgeta olsem ol elda.

Ol elda bambae oli mas talemaot long Jeova olsem wanem oli lukaot long ol sipsip blong hem. (Hibrus 13:17) Ol tok blong olgeta i gat paoa long laef blong ol man. Taswe, wan elda i mas lukaot we hem i no pulum ol narafala blong folem prapa tingting blong hem, mo no mekem raf fasin long ol sipsip olsem ol Farisi oli bin mekem. Hem i mas traehad blong soemaot dip lav olsem Jisas i bin soem. Long evri fasin blong tij, antap moa taem hem i sidaon long wan kot komiti, hem i mas skelemgud ol tok blong hem. Wan elda i no mas toktok long fasin we hem i no tingtinggud fastaem, no talemaot ol prapa tingting blong hem nomo. Sipos hem i dipen fulwan long Jeova, long Tok blong Hem, mo long ol tok we Hem i talem tru long ogenaesesen blong hem blong lidim yumi, bambae man ya blong lukaot long ol sipsip i save kasem bigfala blesing long God, i no wan ‘jajmen we i strong moa.’