Ripot Long Wok Blong Kingdom

Wok Blong Prij i Karem Frut Long Haos Mo Long Skul

FASIN blong mekem i gud long ol narafala, antap moa blong serem gud nyus blong Kingdom blong God wetem olgeta, i wan haf long laef blong evri Kristin. Proveb 3:27 i talem se: “Yu no holembak samting we i gud long olgeta we oli nidim, taem han blong yu i gat paoa blong mekem olsem.” Long Ajentina, wan yangfala Wetnes we i stap long namba tri yia long haeskul blong hem, i wantem serem gud nyus blong Kingdom wetem wan fren blong hem long skul. Hem i kasem gudfala frut from.

Wan dei, yangfala Wetnes ya i talem long fren blong hem se i no olgeta skul we oli gud. Taem yangfala man i ansa se hem i no bin mekem wan samting we i nogud, Wetnes ya i talem se: “Yes, be yu no stap mekem wan samting blong leftemap nem blong God tu.” Samting ya i mekem yangfala ya i tingting. Biaen, yangfala Wetnes i eksplenem se yumi stap long ol las dei, mo sipos wan man i wantem se God i agri long hem, hem i mas kasem stret save blong Baebol mo mekem save ya i wok long laef blong hem. Fren we i skul wetem hem i agri. ?Be bambae famle blong hem i letem hem blong mekem wan Baebol stadi? Blong pulum tingting blong fren blong hem, Wetnes ya i askem hem blong ridim buk ya Yu Save Laef Foreva Long Paradaes Long Wol.

Taem i pas, mo fren ya i aot long skul. Wan yia i pas mo i no gat nyus nating long hem. Wan dei, yangfala Wetnes i sapraes we fren blong hem i telefon long hem blong talem se, hem i luksave we ol profet tok blong Baebol oli rili stap kamaot. Kwiktaem Wetnes ya i mekem plan blong stadi Baebol wetem hem.

Taem hem i go long haos blong fren we hem i skul wetem hem bifo, hem i luk se papa mama blong fren blong hem tufala i wari lelebet from we boe blong tufala i stap stadi Baebol. Smol brata blong boe ya tu i ting se hem i kam krangke. Taswe papa mo mama oli mekem se smol brata ya i joen long nekis stadi. Afta long taem ya, wetem wora we i ron long ae blong hem, boe ya i talem long papa mama blong hem, se bigfala brata blong hem i no krangke. Nao mama i talem se, “!Naoia, mi no moa gat wan trabol, mi gat tu trabol!”

Taswe, hem tu i joen long nekis stadi, mo hem i agri we tufala boe blong hem oli no krangke. Biaen, ol Wetnes oli mekem plan blong stadi Baebol wetem hem mo hasban blong hem. I no longtaem, ful famle i stat blong joen long ol miting blong kongregesena long Haos Kingdom. Biaen, tufala olfala bubu oli stat blong stadi Baebol tu, mo blong go long ol miting. Afta long taem ya, faswan yangfala man i tekem baptaes. Hem i mared, mo hem wetem waef blong hem tufala i pablisa we oli wok strong.

Mo tu, from we yangfala Wetnes ya i tekem jans blong prij long skul, hem i givhan long tu narafala fren blong hem long skul mo long mama mo sista blong wan long tufala ya, blong oli stat stadi Baebol. Leven man evriwan oli lanem trutok blong Baebol from we yangfala Wetnes ya i no holembak samting we i gud long ol fren blong hem long skul. !Hemia ol gudfala frut we oli karem glad! !I tru, “ol man we Jeova i God blong olgeta, oli hapi!”​—Ol Sam 144:15, NW.

[Futnot]