Ripot Long Wok Blong Kingdom
“Mekem Wok Blong Wan Man Blong Talemaot Gud Nyus”
?I MINIM wanem blong stap olsem wan man blong talemaot gud nyus? Tok ya i kamaot long Grik tok eu·ag·ge·li·stes. Hem i kolosap sem mak long wod ya eu·ag·geʹli·on, we i minim “gud nyus.” Olsem nao, wan man blong talemaot gud nyus i wan man we i stap prij, no karem mesej blong gud nyus.
Olgeta trufala Kristin oli ol man blong talemaot gud nyus, from we oli stap talemaot gud nyus long saed long Kingdom blong God. Taswe i stret we aposol Pol i talem long Timote blong “mekem wok ya blong talemaot gud nyus blong Kraes.” Timote i mas tinghevi long wok ya. Pol i talem long hem blong ‘lukaotgud blong tekem stret rod’ mo blong ‘finisim olgeta wok ya we God i givim long hem blong mekem.’—2 Timote 4:5.
Olsem ol man blong talemaot gud nyus, yumi mas tinghevi long wok we God i givim long yumi tu. Yumi mas ‘lukaot blong tekem stret rod,’ hemia i min se yumi mas rere oltaem blong talemaot gud nyus long evri jans we yumi gat. Plante man oli bin kasem save long Jeova mo ol promes blong hem, taem ol Wetnes blong Jeova oli tekem jans blong prij long olgeta. Samting ya i hapen long Seymore, wan man long Babados.
Seymore i wan tija long pablik skul. Charles, we i stap tij haftaem long semfala skul mo we i wan Wetnes blong Jeova, i rere oltaem blong talemaot gud nyus. Hem i wan paenia no wan man we i prij oltaem, mo hem i yusum evri jans blong talemaot gud nyus long ol narafala man. Fastaem we Seymore i harem gud nyus, hemia taem we Charles i tekem jans blong prij long hem.
I no longtaem, Seymore tu i gat strong tingting blong talemaot ol trutok blong Baebol long olgeta man. Ale, hem i stat tekem jans blong prij long ol man long ples we hem i stap wok long hem, antap moa long ol studen blong hem. Long sam kantri i tabu blong tokbaot bilif blong jyos long ol pablik skul, be skul ya i putumap Seymore blong tijim ol pikinini long ol gudfala bilif long saed long skul mo ol gudfala fasin. Be naoia, nyufala save blong Baebol we Seymore i jes kasem, i tekem ples blong ol tingting we hem i gat bifo. Long taem blong kakae long skul, hem i storeyan wetem ol studen blong hem long saed long promes blong God blong wan nyufala wol mo hop ya blong laef blong olwe.
?Wanem tingting blong ol yangfala ya? Plante oli soemaot trufala intres long gud nyus blong Kingdom blong Jeova. Biaen, Seymore i stat stadi Baebol wetem 13 long ol studen blong hem. Oli laekem stadi tumas, oli mekem plan blong stadi long Baebol tu taem long wan wik. Biaen, bighaf long olgeta oli joen long ol Kristin miting long Haos Kingdom blong ol Wetnes blong Jeova. Kasem naoia, naen blong olgeta oli givim laef blong olgeta long Jeova mo oli tekem baptaes olsem ol Wetnes blong Jeova. Seymore i stap gohed blong finisim wok we God i givim long hem, olsem wan fultaem paenia mo wan elda long wan kongregesen blong ol Wetnes blong Jeova long Babados.
Store ya i wan eksampel nomo blong soem olsem wanem ol Wetnes blong Jeova long olgeta ples long wol ‘oli mekem wok blong talemaot gud nyus.’ Wan rod blong mekem wok ya i blong tekem evri jans blong givim wetnes. Oli folem advaes blong Kolosi 4:5, 6, we i talem se: “Long ol fasin ya we yufala i stap mekem long fes blong ol man we oli no bilif long Kraes, yufala i mas waes gud. Mo yufala i mas yusumgud ol jans we bambae yufala i gat, blong yufala i tok long olgeta. Yufala i mas tok gud wetem olgeta, long ol tok ya nomo we olgeta oli harem i gud. Mo yufala i mas save rod blong givim ansa long evri man, we i stretgud long olgeta evriwan.”