!Nating Se i Gat Traem, Holemtaet Bilif Blong Yu!

“Ol brata mo sista, taem plante samting oli stap kam blong traem yufala, bambae yufala i save luk olgeta olsem samting blong harem gud from.”​—JEMES 1:​2.

1. Ol man blong Jeova oli wosip long hem wetem bilif mo “glad long hat,” ?nating se oli kasem wanem?

OL MAN blong Jeova oli ol Wetnes blong hem we oli gat bilif mo oli “glad long hat.” (Dutronome 28:47; Aesea 43:10) Oli gohed olsem, nating se oli kasem plante traem. Taem oli gat hadtaem, tok ya i leftemap tingting blong olgeta: ‘Ol brata mo sista, taem plante samting oli stap kam blong traem yufala, bambae yufala i save luk olgeta olsem samting blong harem gud from. From we yufala i save, taem bilif blong yufala i naf blong winim ol traem ya, bambae yufala i save kam strong moa blong stanap longtaem.’​—Jemes 1:​2, 3.

2. ?Yumi save wanem long saed blong man we i raetem leta blong Jemes?

² Disaepol Jemes, wan haf brata blong Jisas Kraes, i raetem tok ya samwe long 62 K.T.a (Mak 6:3) Jemes i wan elda long kongregesenb blong Jerusalem. Yes, i luk olsem se Jemes, Sefas (Pita), mo Jon, trifala “i olsem ol pos blong kongregesen”​—trifala i stanap strong mo sapotemgud kongregesen ya. (Galesia 2:9, NW) Long 49 K.T., taem “ol aposol mo elda” blong kongregesen oli stap tokbaot fasin blong mekem sakomsaes, Jemes i talem sam tok we i stanap long Baebol, mo hed kampani blong faswan handred yia oli folem tok ya blong hem.​—Ol Wok 15:​6-​29.

3. ?Wanem sam problem we ol Kristin long faswan handred yia oli kasem, mo wanem samting we yumi save mekem blong leta blong Jemes i givhan moa long yumi?

³ Jemes i man blong lukaot long ol sipsip blong God we i keagud long olgeta, taswe ‘hem i savegud laef blong ol sipsip ya.’ (Proveb 27:23) Hem i save se ol Kristin long taem ya oli stap kasem plante bigfala traem. Sam Kristin oli nidim blong stretem tingting blong olgeta, from we oli stap mekem i moagud long ol rijman i bitim ol narafala. Sam Kristin oli stap folem fasin blong wosip long God, be laef blong olgeta i no laenapgud wetem fasin ya. Samfala oli stap tok nogud blong spolem ol narafala. Tingting blong wol i stap gat paoa long samfala, plante oli no gat longfala tingting mo oli no stap prea oltaem. Long fasin we i leftemap tingting, Jemes i tokbaot ol samting ya long leta blong hem, mo advaes blong hem i stret yet long yumi tede, olsem we i stret long ol man blong faswan handred yia K.T. Sipos yumi tingbaot leta ya olsem wan leta we Jemes i raetem long yumi wanwan, bambae hem i givhan bigwan long yumi.c

Taem Yumi Kasem Traem

4. ?Wanem tingting we yumi mas gat long saed blong ol traem?

⁴ Jemes i soemaot wanem tingting yumi mas gat long saed blong ol traem. (Jemes 1:​1-4) Jemes i no talem se hem i famle wetem Pikinini blong God. Hem i gat tingting daon, taswe hem i talem se hem i “man blong wok blong God, mo blong Jisas Kraes, Masta blong yumi.” Jemes i raet i go long “twelef laen” blong Isrel long saed blong speret, we oli “stap wanwan olbaot long wol.” Ating bigfala risen from wanem oli stap olbaot long wol, hemia from we ol man oli ronem mo agensem olgeta. (Ol Wok 8:1; 11:19; Galesia 6:​16; 1 Pita 1:1) Yes, ol man oli ronem mo mekem nogud long yumi tu from we yumi Kristin, mo “plante samting oli stap kam blong traem” yumi. Be, sipos yumi tingbaot se, taem yumi stanap strong mo winim ol traem ya bambae bilif blong yumi i save kam strong moa, ale nao yumi save luk ol traem ya olsem “samting blong harem gud from.” Sipos yumi holemstrong long God tru long ol traem ya, fasin ya bambae i karem glad blong olwe i kam long yumi.

5. ?Wanem sam traem we oli save kasem yumi, mo wanem i kamaot taem yumi stanap strong tru long ol traem ya?

⁵ Sam traem we oli kasem yumi, oli ol hadtaem we olgeta man evriwan oli kasem. Eksampel, maet yumi stap siksik oltaem. Long taem blong yumi, God i no stap mekem ol merikel blong tekemaot sik. Be hem i save ansa long prea blong yumi, blong askem waes mo paoa we yumi nidim blong stanap strong tru long hadtaem we sik ya i mekem long yumi. (Ol Sam 41:​1-3) Mo tu, ol man oli mekem nogud long ol Wetnes blong Jeova from we oli folem stret fasin. (2 Timote 3:​12; 1 Pita 3:​14) Taem yumi stanap strong tru long ol traem ya, yumi pruvum se yumi gat strong bilif, mo se bilif ya i ‘naf blong winim ol traem ya.’ Taem bilif blong yumi i strong i naf blong winim traem, ale yumi “kam strong moa blong stanap longtaem.” Yes, taem ol traem oli mekem bilif blong yumi i kam strong moa, yumi kam naf blong stanap strong tru long ol narafala traem we bambae oli kasem yumi yet.

6. ?Olsem wanem ‘fasin blong stanap strong i save mekem wok blong hem gogo kasem en blong rod,’ mo wanem sam samting we yumi save mekem taem ol traem oli kasem yumi?

⁶ Be Jemes i talem se: ‘Yufala i mas letem fasin blong stanap strong olwe i mekem wok blong hem, gogo kasem en blong rod.’ Sipos yumi letem traem ya i go kasem en blong hem mo yumi no brekem wan loa blong Baebol blong traem finisim traem ya kwiktaem, ale fasin ya blong stanap strong bambae i mekem ‘wok’ blong hem. Nao bambae yumi kam stretgud long ol Kristin fasin, we yumi no sot long bilif nating. I tru se, sipos wan traem i mekem yumi luksave se yumi gat wan slak fasin, yumi mas askem long Jeova blong givhan long yumi blong winim fasin ya. ?Olsem wanem sipos traem ya i pulum yumi blong mekem rabis fasin long saed blong seks? Yumi mas prea long saed blong problem ya, mo folem rod we i laenap wetem prea blong yumi. Maet yumi mas jenisim wok blong yumi, no mekem wan narafala samting olsem, blong yumi save holemstrong long God.​—Jenesis 39:​7-9; 1 Korin 10:13.

Lukaotem Waes

7. ?Wanem sam samting we oli save givhan long yumi taem ol traem oli kasem yumi?

⁷ Jemes i soem wanem we yumi mas mekem sipos yumi no save rod blong winim wan traem. (Jemes 1:​5-8) Jeova bambae i no daonem yumi from we yumi sot long fasin waes mo from we yumi prea long hem wetem bilif blong askem waes ya. Bambae hem i givhan long yumi blong gat stret tingting long saed blong traem ya, mo blong stanap strong. Maet sam Kristin brata, no prapa Baebol stadi blong yumi, oli givhan long yumi blong luksave sam vas blong Baebol we oli stret long traem ya. God i save lidim ol samting we oli kamaot long laef blong yumi, blong mekem yumi luksave wanem rod yumi mas folem. Tabu speret blong God i save givhan long yumi. (Luk 11:13) Be, blong kasem ol help ya, i klia se yumi mas stap kolosap long God mo ol man blong hem.​—Proveb 18:1.

8. ?From wanem Jeova i no save givim wan samting long man we bilif blong hem i hafhaf?

⁸ Jeova bambae i givim waes long yumi blong winim ol traem, sipos yumi ‘bilif tru, we tingting blong yumi i no hafhaf.’ Man we bilif blong hem i hafhaf, i ‘olsem solwora we i save go olbaot, taem win i blu mo i pusum hem.’ Sipos yumi gat fasin we yumi olbaot long saed blong speret, ‘yumi no save ting se bambae yumi kasem sam samting long Jeova.’ Yumi no mas gat ‘tingting we i hafhaf’ mo ‘olbaot’ long saed blong prea mo ol narafala samting. Be, yumi mas bilif long Jeova we hem i Stampa blong waes.​—Proveb 3:​5, 6.

Ol Rijman Mo Puaman Tugeta Oli Save Haremgud

9. ?From wanem olgeta man blong Jeova evriwan oli save haremgud?

⁹ Maet fasin pua i wan traem we i kasem yumi. Be, yumi mas tingbaot se ol Kristin we oli rij wetem ol Kristin we oli pua tu, oli save haremgud. (Jemes 1:​9-​11) Bighaf blong ol faswan tabu Kristin oli no gat plante rij samting bifo we oli folem Jisas, mo ol man blong wol oli bin luk olgeta olsem we oli man nating nomo. (1 Korin 1:​26) Be oli haremgud, from we oli save tingbaot se bambae “God i leftemap olgeta” blong oli rul long Kingdom blong hem. (Rom 8:​16, 17) Long saed blong ol rijman, bifo, ol man oli ona long olgeta, be taem oli folem Kraes, “oli stap daon” from ol man blong wol oli no moa laekem olgeta nating. (Jon 7:​47-​52; 12:42, 43) Nating se i olsem, olgeta man blong Jeova evriwan oli save haremgud, from we ol rij samting mo haenem blong wol ya oli nating nomo, taem yumi skelem wetem ol rij samting long saed blong speret we yumi gat. !Mo yumi glad tumas se i no gat ol man long medel blong yumi we oli stap mekem flas from haenem blong olgeta!​—Proveb 10:22; Ol Wok 10:34, 35.

10. ?Wanem tingting we wan Kristin i mas gat long saed blong ol rij samting?

¹⁰ Jemes i givhan long yumi blong luksave se ol rij samting mo haenem blong wol i no save mekem laef blong yumi i longfala moa. Ol flaoa oli naes tumas, be naes fasin blong olgeta i no save blokem olgeta blong kam drae mo foldaon taem san i “hot tumas.” Long sem fasin, mane mo olting blong wan rijman oli no save ademap sam moa yia long laef blong hem. (Ol Sam 49:​6-9; Matyu 6:​27) Maet hem i ded taem hem i stap ronem ‘fasin blong laef’ blong hem, maet long wan bisnes blong winim moa mane. Taswe, impoten samting se, yumi mas ‘rij long fes blong God,’ mo mekem evri samting we yumi save mekem blong givhan long wok blong Kingdom.​—Luk 12:13-21; Matyu 6:​33; 1 Timote 6:​17-​19.

Olgeta We Oli Stanap Strong Oli Save Haremgud

11. ?Wanem fyuja blong olgeta we oli holemtaet bilif blong olgeta taem oli kasem traem?

¹¹ Nating se yumi rij no yumi pua, yumi save haremgud nomo sipos yumi stanap strong tru long ol traem we yumi kasem. (Jemes 1:​12-​15) Sipos bilif blong yumi i stap strong tru long ol traem, yumi save haremgud, from we taem yumi mekem samting we i stret long ae blong God, yumi kasem glad from. Sipos ol Kristin we tabu speret i makemaot olgeta oli holem strong bilif gogo oli ded, bambae oli kasem ‘laef, olsem wan hat we oli putum long man we i win long resis blong flasem hem,’ hemia laef long heven we i no save kam nogud samtaem. (Revelesen 2:​10; 1 Korin 15:50) Sipos yumi gat hop blong laef long wol ya long fyuja, mo bilif blong yumi long God i stap strong oltaem, yumi save tingbaot blong kasem laef we i no save finis long paradaes long wol ya. (Luk 23:43; Rom 6:​23) !Jeova i mekem i gud tumas long olgeta we oli bilif long hem!

12. ?Taem yumi kasem hadtaem, from wanem yumi no mas talem se: “Ol samting ya blong traem mi oli kamaot long God”?

¹² ?I stret blong ting se, maet Jeova nao i mekem ol samting oli kamaot blong traem yumi? No gat, yumi no mas talem se: “Ol samting ya blong traem mi oli kamaot long God.” Jeova i no stap pulum yumi blong mekem sin. Be, i sua se, sipos yumi stap strong long bilif blong yumi, bambae hem i givhan long yumi mo givim naf paoa long yumi blong stanap strong tru long ol traem. (Filipae 4:​13) God i tabu, taswe hem i no save mekem wan samting i kamaot long laef blong yumi blong pulum yumi blong mekem i no stret. Maet yumi nomo i letem wan samting i kamaot long laef blong yumi we i no laenap wetem Baebol, nao biaen yumi mekem wan bigfala sin from. Be, yumi no mas putum i go long God, “from we i no gat samting nogud we i save kam traem God. Mo i no fasin blong God blong traem man.” Maet Jeova i letem wan traem i stretem yumi from we samting ya i save givhan long yumi, be hem i no stap traem yumi blong mekem yumi foldaon. (Hibrus 12:​7-​11) Setan i save traehad blong pulum yumi blong mekem nogud, be God i save sevem yumi i aot long han blong rabis man ya.​—Matyu 6:​13.

13. ?Wanem i save kamaot sipos yumi no blokem tingting we i pulum yumi blong mekem samting we i nogud?

¹³ Yumi mas prea oltaem, from we maet wan samting i kamaot long laef blong yumi we i save lidim yumi blong wantem samting we i no stret, ale maet yumi mekem sin from. Jemes i talem se: “Ol samting blong traem man oli save kam strong long hem taem hem i wantem ol samting nogud.” Yumi no save putum sin blong yumi long God sipos yumi bin stap wantem samting nogud long hat blong yumi. Sipos yumi no sakemaot samting nogud ya we yumi wantem, tingting blong wantem samting ya “bambae i kam bigfala moa,” i min se bambae i gru long hat blong yumi, nao bambae yumi “mekem ol samting nogud from.” Taem wan man i gohed blong mekem ol samting nogud, ale “bambae man ya i ded from.” I klia se, yumi mas lukaotgud long hat blong yumi mo blokem ol tingting we oli save pulum yumi blong mekem sin. (Proveb 4:​23) Ken i kasem woning se sin bambae i winim hem, be hem i no blokem sin ya. (Jenesis 4:​4-8) Taswe, ?olsem wanem sipos yumi jes stat blong folem wan rod we i no laenap wetem Baebol? Yumi mas gat bigfala tangkyu sipos ol Kristin elda oli traem stretem yumi blong mekem se yumi no sin agensem God.​—Galesia 6:1.

God​—Stampa Blong Ol Gudfala Samting

14. ?From wanem yumi save talem se ol presen we God i givim oli “nambawan”?

¹⁴ Yumi no mas fogetem se Jeova i Stampa blong ol gudfala samting, hem i no stampa blong ol traem. (Jemes 1:​16-​18) Jemes i kolem ol Kristin se “ol brata mo sista long Kraes,” mo hem i soem se God nao i stap givim “evri samting we oli gud mo evri presen we oli nambawan.” Ol presen we Jeova i givim long saed blong speret mo ol samting blong laef we hem i givim tu, oli “nambawan” no oli stretgud, oli no hafhaf. “Oli aot long heven,” ples we God i stap long hem, oli kam long yumi. (1 King 8:​39) Jeova i “mekem olgeta laet blong skae”​—san, mun, mo ol sta. Hem i stap givim laet mo trutok long saed blong speret tu. (Ol Sam 43:3; Jeremaea 31:35; 2 Korin 4:6) San i mekem ol sado oli jenis taem hem i muf i gokros long skae, mo hem i saen fulwan long medel dei nomo. Be God i no olsem, fasin blong hem blong givim ol gudfala presen i fulwan oltaem. I sua se bambae hem i givim ol samting we yumi nidim blong fesem ol traem, sipos yumi yusum fulwan ol samting we hem i givim long saed blong speret, long Tok blong hem, mo tru long “slef we i stret mo waes.”​—Matyu 24:​45, NW.

15. ?Wanem wan nambawan presen we Jeova i givim?

¹⁵ ?Wanem wan nambawan presen we God i givim? Hemia fasin blong hem blong makemaot sam man wetem tabu speret we i joen wetem gud nyus no “trutok,” blong oli kam ol speret pikinini blong hem. Olgeta ya we oli kam ol speret pikinini blong God, oli ‘sam long ol fas kakae blong garen.’ Hem i jusumaot olgeta long wol ya, blong oli kam ‘ol king mo pris’ long heven. (Revelesen 5:​10; Efesas 1:​13, 14) Maet Jemes i stap tingbaot fas kakae blong bale, we ol man oli givim i go long God long dei we Jisas i laef bakegen long ded, Naesan 16. Mo tu, maet hem i stap tingbaot tufala bred we oli wokem long wit, mo we oli givim i go long God long dei blong Pentekos, taem tabu speret i kamdaon long ol man. (Levitikas 23:​4-​11, 15-​17) Sipos i olsem, Jisas nao i faswan kakae blong garen, mo ol man we bambae oli rul wetem hem, oli ‘sam long ol fas kakae blong garen.’ Be, ?olsem wanem sipos yumi gat hop blong laef long wol ya nomo? Sipos yumi holem hop ya i stap strong long tingting blong yumi, samting ya bambae i givhan long yumi blong gat strong bilif oltaem long Man ya we i stampa blong ‘evri gudfala samting,’ mo we i mekem rod blong man i save gat laef blong olwe aninit long rul blong Kingdom.

“Mekem Ol Samting We Tok Ya i Talem”

16. ?From wanem yumi mas ‘rere oltaem blong lesin, be no hareap blong tok mo blong kros’?

¹⁶ Nating sipos plante samting i stap traem bilif blong yumi naoia no nogat, yumi mas “mekem ol samting we tok ya i talem.” (Jemes 1:​19-​25) Yumi mas “rere oltaem blong lesin” long tok blong God, mo mekem ol samting we tok ya i talem, wetem fasin obei. (Jon 8:​47) Be, yumi mas “no hareap blong tok.” Yumi mas lukaotgud long ol samting we yumi stap talem. (Proveb 15:28; 16:23) Maet Jemes i stap talem long yumi blong no hareap blong talem se ol traem blong yumi oli kamaot long God. Hem i talem tu se yumi mas “no hareap blong kros, from we fasin blong man we i kros i no save mekem stret fasin blong God bambae i kamtru.” Sipos tok blong wan man i mekem yumi kros, yumi mas “no hareap” blong ansa. Long rod ya, bambae yumi no givimbak ol tok blong daonem hem. (Efesas 4:​26, 27) Fasin kros i save mekem trabol long yumi mo kam wan traem long ol narafala. Fasin ya i no save givhan long yumi blong gat ol fasin we oli stret long man we i bilif long wan God blong stret fasin. Mo tu, sipos yumi “fulap long fasin blong luksave,” bambae yumi no “hareap blong kros,” ale, ol Kristin brata mo sista blong yumi bambae oli glad blong joen oltaem wetem yumi.​—Proveb 14:29.

17. ?Wanem samting i save kamaot taem yumi tekemaot ol rabis samting long tingting mo hat blong yumi?

¹⁷ Tru ya, yumi no mas mekem ol “rabis fasin”​—ol fasin we God i no laekem nating mo we oli mekem narafala man i kros. Mo tu, yumi mas ‘tekemaot olgeta bisnes we i nogud, oli finis long laef blong yumi.’ Yumi evriwan i mas tekemaot enikaen doti fasin mo tingting long laef blong yumi. (2 Korin 7:1; 1 Pita 1:​14-​16; 1 Jon 1:9) Taem yumi tekemaot ol rabis samting long hat mo tingting blong yumi, yumi save ‘mekem tingting blong yumi i stap daon, blong harem tok ya we God i putum finis long tingting blong yumi,’ hemia trutok. (Ol Wok 17:11, 12) Nating sipos yumi stap folem Kristin fasin longtaem finis, be yumi mas gohed blong letem God i putum moa trutok blong Baebol i stap long tingting blong yumi. ?From wanem? From we tabu speret blong God i save mekem se tok ya i wokem wan ‘nyufala fasin blong laef’ long yumi, we bambae i sevem yumi.​—Efesas 4:​20-​24.

18. ?Olsem wanem man we i lesin nomo long tok ya i defren long hemia we i mekem ol samting we tok ya i talem?

¹⁸ ?Olsem wanem yumi soem se tok ya blong God i stap lidim yumi? Yumi mekem olsem taem ‘yumi no jes lesin nomo long tok ya, be yumi mekem ol samting we tok ya i talem tu.’ (Luk 11:28) Ol man we oli “mekem ol samting we tok ya i talem,” oli gat bilif we i pusum olgeta blong wok strong long Kristin wok blong prij, mo blong joen oltaem long ol miting blong ol man blong God. (Rom 10:14, 15; Hibrus 10:24, 25) Man we i lesin nomo long tok ya, “hem i olsem man we i stap lukluk fes blong hem long glas.” Hem i lukluk fes blong hem, be taem hem i gowe, hem i fogetem wanem samting we hem i mas mekem, blong fes blong hem i kamgud moa. Sipos yumi stap “mekem ol samting we tok ya i talem,” bambae yumi stadigud mo obeigud long ‘loa blong God we i stret olgeta.’ Loa ya i talem olgeta samting we God i wantem yumi blong mekem. Olsem nao, fasin fri we yumi kasem bambae i defren olgeta long fasin slef long sin mo ded, from we fasin fri ya bambae i lidim yumi blong kasem laef. Taswe, yumi mas ‘stap luklukgud mo tingbaot loa ya we i stret olgeta.’ Oltaem yumi mas stadi mo obei long hem. !Tingbaot! Taem yumi ‘mekem ol samting we loa ya i talem bitim we yumi jes lesin nomo, mo biaen, fogetem ol tok ya,’ yumi save haremgud, from we God i glad long yumi.​—Ol Sam 19:​7-​11.

Moa Bitim Wan Fasin Blong Wosip

19, 20. (a) ?Jemes 1:​26, 27 i soem se yumi mas mekem wanem samting blong wosip long klin fasin? (b) ?Wanem sam eksampel blong wosip we i klin?

¹⁹ Blong mekem se God i glad long yumi, yumi mas rimemba se trufala wosip i no jes wan fasin blong wosip we yumi mekem long fored blong ol man. No gat. (Jemes 1:​26, 27) Maet yumi ting se Jeova i glad long yumi from we ‘yumi stap onagud’ long hem, be samting we i impoten moa, hemia tingting blong Jeova long saed blong yumi wanwan. (1 Korin 4:4) Maet yumi gat wan bigfala problem we yumi “no bos blong tang” blong yumi. Sipos yumi stap talem ol tok we i spolem narafala, gyaman, mo yusum tang blong yumi long sam narafala fasin we oli nogud, mo long semtaem yumi ting se God i glad long wosip blong yumi, be yumi stap gyaman long yumi nomo. (Levitikas 19:16; Efesas 4:​25) Tru ya, yumi no wantem we wan samting i mekem ‘fasin blong yumi blong ona long God i blong nating nomo,’ no i mekem we God i no agri long wosip blong yumi.

²⁰ Jemes i no talem evri samting we i joen wetem klin wosip. Be hem i talem se wan haf blong hem i ‘blong givhan long ol pikinini we oli no gat papa blong olgeta mo ol widowoman, long ol trabol we i kasem olgeta.’ (Galesia 2:​10; 6:​10; 1 Jon 3:​18) Kristin kongregesen i gat spesel intres long wok blong givhan long ol widowoman. (Ol Wok 6:​1-6; 1 Timote 5:​8-​10) God nao i Man blong lukaot long ol widowoman mo ol pikinini we oli no gat papa, taswe yumi stap wok wetem Hem taem yumi mekem evri samting we yumi save mekem, blong givhan long olgeta ya blong kasem ol samting long saed blong speret, mo ol samting blong laef tu. (Dutronome 10:17, 18) Klin wosip i joen wetem fasin blong ‘holem laef blong yumi i klin long ol rabis fasin blong wol.’ Wol ya, hemia ol man nogud we oli stap aninit long paoa blong Setan. (Jon 17:16; 1 Jon 5:​19) Taswe, yumi mas stap longwe long fasin blong ol man blong wol we oli no fraetgud long God, olsem nao, yumi save givim ona long Jeova, mo hem i save yusum yumi blong mekem wok blong hem.​—2 Timote 2:​20-​22.

21. Long saed blong leta blong Jemes, ?wanem sam narafala kwestin we yumi mas tokbaot?

²¹ Advaes blong Jemes we yumi tokbaot kam kasem naoia, i save givhan long yumi blong stanap strong tru long ol traem, mo blong holemtaet bilif blong yumi. Hem i save mekem se yumi gat moa tangkyu long Man ya we i givim ol gudfala presen long yumi wetem lav. Mo tu, ol tok blong Jemes oli givhan long yumi blong wosip long fasin we i klingud. ?Wanem narafala samting we Jemes i pulum yumi blong tingbaot? ?Wanem moa we yumi save mekem blong pruvum se yumi gat trufala bilif long Jeova?

[Ol futnot]

?Bambae Yu Yu Ansa Olsem Wanem?

◻ ?Wanem bambae i givhan long yumi blong stanap strong tru long ol traem?

◻ Nating se ol Kristin oli kasem ol traem, ?from wanem oli save haremgud?

◻ ?Olsem wanem yumi save mekem ol samting we tok blong God i talem?

◻ ?Wanem ol samting we oli joen wetem klin wosip?

[Tok Blong Pija Long Pej 9]

Taem yumi kasem wan traem, bilif strong long paoa blong Jeova blong ansa long prea

[Tok Blong Pija Long Pej 10]

Ol man we oli “mekem ol samting we tok ya i talem,” oli stap talemaot Kingdom blong God long olgeta ples blong wol