“Tijim Ol Man Long Trutok Long Stret Fasin Nomo”

BAEBOL i gat plante rul insaed long hem, we oli impoten blong givim wan gudfala laef. Buk ya i save givhan long ol Kristin minista blong tijim ol man, blokem ol krangke tok, mo blong stretem ol krangke fasin. (2 Timote 3:​16, 17) Be, blong kasem fulwan blesing long buk ya we God i givim blong lidim yumi, yumi mas folem advaes we aposol Pol i givim long Timote, se: “Yu mas traehad long evri rod blong kam we yu wan man blong wok we God i stap haremgud long yu. Long fes blong hem, yu mas kam we yu no gat sem long ol wok blong yu, we yu wan man we yu stap tijim ol man long trutok blong God, long stret fasin nomo.”​—2 Timote 2:15.

Antap long ol narafala samting, Tok blong God i olsem gudfala melek, strongfala kakae, wora we i mekem yumi haremgud mo we i klin, wan glas blong lukluk fes, mo naef blong faet we i sap. Sipos wan Kristin minista i kasem save long mining blong ol tok ya, samting ya i save givhan long hem blong yusumgud Baebol.

Givimaot Melek Blong Tok Blong God

Melek, hemia kakae we ol bebi we oli jes bon oli nidim. Taem bebi i gru, sloslou hem i kam naf blong kakae ol strongfala kakae. Be fastaem bel blong hem i naf blong tantanem melek nomo. Long plante rod, olgeta ya we oli gat smol save long Tok blong God oli olsem ol bebi. Nating sipos wan man i jes stat blong soem intres long Tok blong God no hem i bin save long hem longtaem finis, be sipos hem i kasem save long ol stampa trutok blong Baebol nomo, hem i olsem wan bebi yet long saed blong speret. Hem i nidim kakae we i isi nomo blong kakae​—“melek” long saed blong speret. Hem i no naf yet blong kakae ol “strongfala kakae,” ol dip samting long Tok blong God.​—Hibrus 5:12.

Samting ya i bin hapen long kongregesena blong Korin taem i jes stanap. Nao Pol i raet long olgeta se: “Taem we mi stap tijim yufala, i olsem we mi stap givim melek nomo long yufala. Mi no save givim strongfala kakae long yufala, from we yufala i no naf blong kasem.” (1 Korin 3:2) Fastaem, ol man Korin oli mas lanem “stampa blong ol tok ya.” (Hibrus 5:12) Long fasin we oli stap gru long hem, oli no naf yet blong tekem ‘ol dip save blong God we i haed.’​—1 Korin 2:10.

Olsem Pol, ol Kristin minista tede oli soemaot se oli tingbaot ol bebi long saed blong speret, taem oli givim “melek” long olgeta. Hemia taem oli givhan long olgeta blong kasemgud ol stampa Kristin tijing. Oli leftemap tingting blong ol nyuwan no olgeta ya we oli olsem pikinini yet, blong ‘wantem melek ya we i klin gud we i kamaot long tok blong God.’ (1 Pita 2:2) Aposol Pol i soem se hem i luksave spesel kea we ol nyuwan oli nidim, taem hem i raetem se: “Nao olgeta we oli stap dring melek nomo, oli smosmol pikinini, oli no save kasem ol tok blong stret fasin.” (Hibrus 5:13) Ol Kristin minista blong God oli mas soemaot longfala tingting, tingbaot ol narafala, kasem save long filing blong ol narafala, mo gat kaengud fasin, taem oli serem melek blong Tok blong God we i klingud wetem ol nyuwan. Oli mekem olsem, taem oli givhan long olgeta ya we oli no gat plante save, tru long ol Baebol stadi long haos blong ol man mo insaed long kongregesen.

Yusumgud Strongfala Kakae Long Tok Blong God

Blong kam bigman long saed blong speret we i save mekem se wan Kristin i kasem laef, hem i nidim moa bitim we hem i dring “melek nomo.” Taem hem i kasem klia save long ol stampa trutok blong Baebol mo hem i agri long olgeta, ale hem i rere nao blong kakae ‘strong kakae we i blong olgeta we oli kam bigman finis.’ (Hibrus 5:14) ?Olsem wanem hem i save mekem samting ya? Bigfala samting se, hem i mas gat prapa program blong hem wan, blong stadi oltaem long Baebol mo joen long ol Kristin miting. Ol gudfala fasin olsem bambae oli givhan long Kristin ya blong kam strong mo kam bigman long saed blong speret, mo blong kamgud moa long wok blong talemaot gud nyus. (2 Pita 1:8) Yumi no mas fogetem tu se antap long save, kakae long saed blong speret i minim se man i mas mekem ol samting we Jeova i wantem.​—Jon 4:34.

Tede, Kraes i stanemap wan “slef we i stret mo waes” blong givim kakae long ol man blong God long stret taem blong hem, mo blong givhan long olgeta blong kasem save long ‘waes blong God we i bigfala tumas mo we i gat plante rod blong hem.’ Jeova i yusum tabu speret blong hem blong talem mining blong ol dip trutok blong Baebol long slef ya we i stap tru long hem. Biaen, slef ya i wokem ol buk long saed blong speret blong givimaot kakae long ‘stret taem blong hem.’ (Matyu 24:​45-47; Efesas 3:​10, 11; skelem wetem Revelesen 1:​1, 2.) I stap long olgeta Kristin wanwan blong yusum fulwan olgeta buk ya we slef we i stret mo waes i stap prentem.​—Revelesen 1:3.

I tru, sam samting long Baebol oli “strong blong save.” Mo samtaem ol Kristin we oli bigman finis long saed blong speret, oli no kasem save long olgeta tu. (2 Pita 3:16) I gat ol tok we mining blong hem i no klia, ol profet tok, mo ol pijatok we yumi mas stadi mo tingting dip long olgeta. Taswe, stadi wanwan i minim blong go dip long Tok blong God. (Proveb 1:​5, 6; 2:​1-5) Ol elda oli nidim moa blong mekem samting ya taem oli stap tijim kongregesen. Nating sipos ol elda oli lidim Buk Stadi no Wajtaoa stadi long kongregesen, givim ol pablik tok, no mekem wan narafala wok blong tij, oli mas savegud ol samting we bambae oli tokbaot. Mo oli mas tingtinggud long “fasin blong tijimgud olgeta” man, taem oli givim strong kakae long saed blong speret long kongregesen.​—2 Timote 4:2.

Wora We i Mekem Yumi Haremgud Mo i Mekem Yumi Klin

Jisas i talem long woman Sameria kolosap long wan wel, se bambae hem i givim wan wora long hem blong dring. Wora ya bambae i kam “springwora we i save ron oltaem insaed long hem, blong givim laef ya long hem we i no save finis.” (Jon 4:​13, 14; 17:3) Wora ya we i givim laef, i minim olgeta samting we God i givim long ol man, blong givhan long olgeta blong kasem laef tru long Smol Sipsip blong Hem. Mo Baebol i eksplenem ol samting ya. Yumi tosta from “wora ya,” ale yumi lesin long tok ya we tabu speret mo woman blong Kraes tufala i talem. Yumi “tekem wora ya blong laef, we i olsem presen.” (Revelesen 22:17) Man we i dring wora ya i save kasem laef we i no save finis.

Mo tu, Baebol i putum ol rul long saed blong speret mo fasin we ol trufala Kristin oli mas folem. Taem yumi folem ol rul ya, Tok blong Jeova i mekem yumi klin, i ‘wasemaot ol sin blong yumi blong mekem yumi klin’ long ol fasin we Jeova i no laekem nating. (1 Korin 6:​9-11) From samting ya, Baebol i kolem trutok we i stap insaed long Tok blong God se “wora.” (Efesas 5:26) Sipos yumi no letem trutok blong God i mekem yumi klin olsemia, bambae God i no glad long wosip blong yumi.

I gud blong save se ol elda we oli ‘tijim ol man long Tok blong God long stret fasin nomo’ oli olsem wora tu. Aesea i talem se oli “olsem ol wora we i ron long drae ples.” (Aesea 32:​1, 2) Wetem fasin lav, ol elda oli folem advaes ya taem oli visitim ol brata blong olgeta, olsem ol man blong lukaot long ol sipsip long saed blong speret. Oli yusum nambawan Tok blong God blong givim ol save long saed blong speret we i givhan long ol narafala, i mekem olgeta oli haremgud, mo we i givim paoa mo i mekem tingting i kam strong.​—Skelem Matyu 11:​28, 29.b

Ol memba blong kongregesen oli wantem tumas we ol elda oli visitim olgeta. Bonnie i talem se: “Mi save olsem wanem ol elda oli kaen, mo mi glad tumas we Jeova i putumap ol man olsem.” Lynda, wan mama we i no mared, i raetem se: “Wetem ol Tok blong Baebol we i leftemap tingting, ol elda oli givhan long mi blong winim ol trabol blong mi. Oli lesin mo oli soemaot fasin sore.” Michael i talem se: “Oli mekem mi mi harem se mi stap insaed long wan ogenaesesen we i stap tingbaot ol narafala.” Wan narafala woman i talem se: “Visit blong ol elda i givhan long mi blong winim ol taem ya we tingting blong mi i foldaon olgeta.” Taem wan elda i visitim wan man, blong leftemap tingting blong hem long saed blong speret, i olsem wan kol wora we man ya i dring, nao i mekem hem i haremgud. Ol sipsip ya oli haremgud taem ol elda we oli gat lav oli halpem olgeta blong luksave olsem wanem ol rul blong Baebol oli save givhan blong stretem trabol blong olgeta.​—Rom 1:​11, 12; Jemes 5:14.

Yusum Tok Blong God Olsem Wan Glas Blong Lukluk Fes

Taem wan man i tekem strongfala kakae, i no blong hem i haremgud long tes blong hem nomo. Hem i tekem kakae blong mekem bodi blong hem i naf blong wok. Sipos hem i wan pikinini, hem i save se kakae ya bambae i givhan long hem blong i gru blong kam wan bigman. I sem mak long kakae long saed blong speret. Taem yumi wanwan i stadi Baebol, samting ya i save mekem se yumi haremgud. Be yumi no stadi from risen ya nomo. Kakae long saed blong speret i mas jenisim fasin blong yumi. Hem i givhan long yumi blong luksave mo wokem ol frut blong speret. Mo i save givhan long yumi blong putum ‘nyufala laef ya blong yumi, olsem prapa klos blong yumi. Nyufala laef ya, God nomo i stampa blong hem. Mo oltaem, God i stap mekem laef ya i kam nyufala bakegen, blong mekem yumi save hem tru, mo blong mekem yumi kam moa olsem we yumi pija blong hem.’ (Kolosi 3:10; Galesia 5:​22-24) Kakae long saed blong speret i givhan long yumi blong kam bigman long saed blong speret tu. Yumi kam moagud long fasin blong folem ol rul blong Baebol blong winim ol trabol we yumi fesem, mo blong givhan long ol narafala blong winim trabol blong olgeta tu.

?Olsem wanem yumi save sipos Baebol i stap mekem samting ya long yumi? Yumi yusum Baebol olsem wan glas blong lukluk fes. Jemes i talem se: “I nogud . . . yufala i stap lesin long tok ya blong God, be yufala i no mekem. Yufala i mas mekem ol samting we tok ya i talem. Man we i stap lesin long tok ya be i no stap mekem ol samting we tok ya i talem, hem i olsem man we i stap lukluk fes blong hem long glas. Hem i stap lukluk fes blong hem, be taem hem i gowe, wantaem nomo hem i no moa save tingbaot we fes blong hem i olsem wanem. Be loa ya i stret olgeta, mo hem i save mekem man i fri. Mo man we i stap luklukgud long hem, i stap tingbaot hem oltaem, hem i no save fogetem ol samting blong loa ya. Hem i save mekem ol samting we loa ya i talem. Mo taem man i stap mekem olsem, God i stap mekem hem i haremgud long olgeta laef blong hem.”​—Jemes 1:​22-25.

Yumi stap ‘lukluk’ insaed long Tok blong God, taem yumi stadi dip long Baebol, mo taem yumi skelem yumi wetem ol rul blong God. Sipos yumi mekem samting ya, bambae yumi kam ol man blong ‘mekem ol samting we tok ya i talem, mo i no man blong lesin long tok blong God nomo.’ Baebol bambae i gat gudfala paoa long laef blong yumi.

Tok Blong God i Olsem Wan Naef Blong Faet

Laswan samting we aposol Pol i tokbaot, i givhan long yumi blong luk olsem wanem yumi save yusum Tok blong God olsem wan naef blong faet. Hem i givim woning long yumi agensem “ol haeman, agens long ol rula blong wol ya we i tudak, mo agens long paoa blong ol rabis speret we oli stap long ol ples long heven.” (NW) Nao hem i pulum yumi blong “holem ol tok blong God. Tok ya i olsem naef blong faet.” (Efesas 6:​12, 17) Tok blong God i wan impoten tul blong faet we yumi save yusum blong pulumdaon olgeta samting we ol man oli stap stanemap blong ‘blokem ol man blong oli no save God.’​—2 Korin 10:​3-5.

I sua se, “tok blong God i wan samting we i laef mo we i stap wok.” (Hibrus 4:12) Jeova i stap toktok long ol man tru long ol tok blong Hem insaed long Baebol. Yusumgud Tok ya blong tijim ol narafala mo blong soemaot klia ol gyaman tijing. Yusum Tok ya blong leftemap tingting blong ol narafala, blong givhan long olgeta, givim spel long tingting blong olgeta, mekem olgeta oli haremgud, pusum olgeta blong mekem wok, mo blong mekem oli kam strong moa. Bambae Jeova i ‘givim evri gudfala samting long yu blong yu yu naf blong wokem ol samting we hem i wantem,’ nao oltaem bambae yu “kam stret olsem we hem nomo i wantem.”​—Hibrus 13:21.

[Ol futnot]

[Tok Blong Pija Long Pej 31]

Ol elda oli yusum “trutok long stret fasin nomo,” blong leftemap tingting blong ol narafala