Yumi Nidim Ol Trufala Fren
JENNY mo Sue, tufala i stap storeyangud. Tufala i stap smael mo openem ae blong tufala bigwan. Ol aksin blong tufala oli soemaot se tufala i intres long wanem we tufala i stap taltalem long tufala. Nating se tufala i gruap long ol defdefren fasin blong laef, i klia se plante samting we tufala i laekem oli sem mak mo tufala i gat respek long tufala.
Long wan narafala ples, Eric mo Dennis oli stap wok tugeta long wan bisnes. Tufala i wok long bisnes ya plante taem finis. Tufala i stap storeyangud, mo plante taem oli laf. Taem tufala i storeyan long ol samting we oli impoten, tufala i taltalemaot prapa tingting blong tufala. Tufala i gat respek long tufala. Olsem Jenny mo Sue, Eric mo Dennis oli ol trufala fren.
Maet tufala store ya oli mekem yu haremgud tumas, oli mekem yu yu tingbaot ol prapa fren blong yu. No maet oli mekem yu yu wantem tumas blong gat ol fren olsem. !Yu tu yu save gat ol fren olsem!
From Wanem Yumi Nidim Ol Trufala Fren
Gudfala fasin fren i impoten tumas. Hem i mekem i gud long tingting mo bodi blong yumi. Be, taem yumi harem se yumi no gat fren, hemia i no minim se i gat wan samting we i rong wetem yumi. Sam man blong stadi oli talem se, taem yumi harem se yumi no gat fren, i olsem we yumi hanggri. Fasin ya i soemaot se yumi nidim blong kampani wetem ol man. Olsem we kakae i save mekem se hanggri i finis, wan fasin fren we i stret i save mekem filing ya se yu no gat fren, i godaon no i lus. Mo tu, i no had tumas blong gat ol gudfala fren we oli tinghae long yumi.
God i wokem ol man long fasin we oli nidim ol fren. (Jenesis 2:18) Baebol i talem se wan trufala fren “i rere blong givhan long taem blong trabol.” (Proveb 17:17) Taswe, ol trufala fren oli save askem long wanwan long olgeta blong givhan taem oli nidim help. Be fasin fren i minim moa i bitim we man i gat wan fren we hem i save askem help long hem no i joen wetem hem long wok no pleplei nomo. Wan gudfala fren i mekem narafala i soemaot gudfala fasin. Proveb 27:17 i talem se: “Aean i sapenem aean. Long sem fasin, wan man i sapenem fes blong narawan.” Yumi yusum wan pis aean blong sapenem wan naef we oli wokem long sem kaen aean. Long sem fasin, wan fren i save sapenem fasin blong narafala fren long saed blong save mo speret. Sipos tingting we i foldaon i mekem yumi harem nogud, fes blong wan fren we i soem sore mo ol tok blong Baebol we hem i talem blong leftemap tingting, oli save givhan bigwan.
Long Baebol, fasin fren i minim se yu laekem tumas wan man, savegud hem, trastem hem, mo kampani wetem hem. Maet yu save fren wetem ol man we oli stap raonabaot long yu, ol man we oli wok wetem yu, no sam narafala bakegen. Samfala oli luk sam memba blong famle blong olgeta olsem ol gudfala fren blong olgeta. Be, i hadwok long plante man tede blong faenem mo holem trufala fasin fren we i stap longtaem. ?From wanem i olsem? ?Yu save gat trufala fasin fren we i stap longtaem?