Bigfala Tempel Blong Jeova Long Saed Blong Speret
“Yumi gat wan hae pris blong yumi, . . . Hem i no mekem wok blong hem insaed long wan haos tapolen blong prea we ol man nomo oli stanemap. Hem i stap mekem wok blong hae pris insaed long tabu ples, insaed olgeta long prapa haos tapolen blong prea, we Hae God nomo i stanemap long heven.”—HIBRUS 8:1, 2.
1. ?Wanem samting God i mekem long ol sinman from lav blong hem?
FROM we Jeova God i laekem tumas ol man, hem i givim wan sakrifaes blong tekemaot sin blong olgeta man long wol. (Jon 1:29; 3:16) Blong mekem samting ya, hem i tekem laef blong fasbon Pikinini blong hem long heven, nao i putum i go insaed long bel blong wan yangfala gel Jyu, nem blong hem Meri. Wan enjel blong Jeova i eksplenem klia long Meri se pikinini we bambae hem i bonem, i “tabu, i blong God, mo ol man bambae oli save singaot hem se Pikinini blong God.” (Luk 1:34, 35) Wan enjel i talem long Josef, we i promes finis blong mared wetem Meri, se Meri i gat bel tru long wan merikel. Mo hem i talem long Josef tu se, bambae Jisas i “sevem ol man blong hem, i tekemaot ol sin blong olgeta.”—Matyu 1:20, 21.
2. ?Jisas i mekem wanem taem hem i gat 30 yia, mo from wanem?
2 Taem Jisas i stap gruap, hem i mas kasem save long merikel we i hapen long hem taem hem i bon. Hem i save se Papa blong hem long heven i givim wan wok long hem blong sevem laef blong ol man long wol ya. Taswe, taem Jisas i kam wan bigman, we hem i gat samwe long 30 yia, hem i kam luk profet blong God, Jon, blong Jon i baptaesem hem long Jodan Reva.—Mak 1:9; Luk 3:23.
3. (a) ?Jisas i minim wanem taem hem i talem se, ‘Yu no wantem we ol man oli mekem sakrifaes mo givim presen i go long yu’? (b) ?Jisas i soem wanem nambawan eksampel long olgeta we oli wantem kam disaepol blong hem?
3 Jisas i stap prea long taem ya we hem i baptaes. (Luk 3:21) I klia se, stat long taem ya, hem i mekem tok blong Ol Sam 40:6-8 i kamtru long laef blong hem. Samtaem biaen, aposol Pol i soemaot samting ya tu, i se: “Yu yu no wantem we ol man oli stap kilim anamol, mo we oli stap tekem presen i kam blong givim long yu. Be yu yu mekem wan bodi i stap rere blong mi.” (Hibrus 10:5) Taswe, Jisas i soemaot se hem i savegud we God i “no wantem” ol man blong gohed blong givim anamol olsem sakrifaes long tempel blong Jerusalem. Hem i save se God i mekemrere wan bodi blong hem we i stretgud olgeta, blong hem i givim olsem wan sakrifaes. Samting ya i mekem se ol man oli no moa nidim blong bonem anamol blong mekem sakrifaes. Jisas i soem se hem i wantem wetem ful hat blong hem, blong mekem ol samting we God i wantem. Taswe, hem i gohed blong prea se: “God, mi mi kam blong mekem ol samting we yu yu wantem, stret olsem ol tok ya we i tokbaot mi, we oli raetem finis long buk blong Loa.” (Hibrus 10:7) !Long dei ya, Jisas i soem nambawan eksampel long olgeta we bambae oli kam disaepol blong hem! !Hem i soem strong tingting blong wosip long God long fasin we i no tingbaot hem wan fastaem!—Mak 8:34.
4. ?Olsem wanem God i soem se hem i agri taem Jisas i givim laef blong hem i go long God?
4 ?Olsem wanem? ?God i soem se hem i agri long prea we Jisas i mekem taem hem i baptaes? Wan long ol aposol we Jisas i jusumaot, i givim ansa long yumi, i se: “Taem Jisas i baptaes finis, hem i kamaot long wora, nao wantaem nomo skae i open long hem, mo hem i luk speret blong God i stap kamdaon olsem we wan sotleg i kamdaon, i kam kasem hem. Nao God i talem se ‘Hemia pikinini blong mi, we mi laekem hem tumas. Tingting blong mi i haremgud tumas long hem.’ ”—Matyu 3:16, 17; Luk 3:21, 22.
5. ?Olta long tempel i pija blong wanem?
5 God i agri long bodi we bambae Jisas i givim olsem wan sakrifaes. Samting ya i minim se, i gat wan olta long saed blong speret i kam long klia ples, we i moa impoten i bitim olta long tempel blong Jerusalem. Prapa olta we ol man oli yusum blong bonem ol anamol olsem sakrifaes, i pija blong olta ya long saed blong speret. Taswe, olta ya long saed blong speret i minim, ‘samting we God i wantem,’ no plan blong Hem, blong agri long laef blong Jisas long wol olsem wan sakrifaes. (Hibrus 10:10) From samting ya, aposol Pol i save raet i go long ol Kristin brata blong hem se: “Yumi gat olta blong yumi i stap. Mo ol pris blong ol man Isrel we oli stap mekem wok blong olgeta insaed long haos tapolen blong wosip blong olgeta [tempel], oli no gat raet blong kasem kakae blong olgeta long olta ya blong yumi.” (Hibrus 13:10) Blong talem long ol narafala tok, ol trufala Kristin oli kasem blesing from wan sakrifaes blong tekemaot sin we i moa gud, we bighaf blong ol pris blong ol man Jyu oli no wantem.
6. (a) ?Wanem samting i kam long klia ples taem Jisas i baptaes? (b) ?Nem ya Mesaea, no Kraes, i minim wanem?
6 Taem God i makemaot Jisas wetem tabu speret, hem i stanemap olgeta haf blong tempel blong hem long saed blong speret, wetem Jisas olsem Hae Pris. (Ol Wok 10:38; Hibrus 5:5) Tabu speret i pusum disaepol Luk blong talemaot yia we impoten samting ya i hapen, hemia long ‘namba feftin yia blong rul blong Taebirias Sisa.’ (Luk 3:1-3) Hemia yia 29 K.T. Yia ya i makem en blong 69 wik blong yia, no 483 yia stret, stat long taem ya we King Atakseses i givim oda blong bildim bakegen stonwol blong Jerusalem. (Nehemaea 2:1, 5-8) Folem profet tok, “Lida ya, Mesaea,” bambae i kamtru long sem yia ya, we profet tok i bin makemaot. (Daniel 9:25) I klia se plante man Jyu oli save samting ya. Luk i talem se ‘ol man oli stap wet’ blong luk Mesaea, no Kraes, tufala nem long lanwis Hibru mo Grik we oli minim se, ‘hemia we God i jusumaot.’—Luk 3:15.
7. (a) ?Wetaem God i makemaot ‘Tabu Ples we i Tabu Tumas,’ mo samting ya i minim wanem? (b) ?Wanem narafala samting i hapen long Jisas taem hem i tekem baptaes?
7 Taem Jisas i baptaes, God i makemaot no jusumaot prapa ples blong Hem wan long heven, olsem “Tabu Ples We i Tabu Tumas,” long bigfala tempel long saed blong speret. (Daniel 9:24) Hemia nao taem we “prapa haos tapolen blong prea [tempel], we Hae God nomo i stanemap long heven” i stat wok. (Hibrus 8:2) Mo tu, taem Jisas Kraes i baptaes long wora mo long tabu speret, hem i bon bakegen olsem wan Pikinini blong God long saed blong speret. (Skelem wetem Jon 3:3.) Hemia i min se biaen, bambae God i mekem Pikinini blong hem i gobak long heven. Nao long ples ya, bambae hem i wok long raet saed blong Papa blong hem olsem King mo Hae Pris ya, folem fasin blong “Melkisedek bifo, mo bambae hem i holem wok ya oltaem gogo i no save finis.”—Hibrus 6:20; Ol Sam 110:1, 4.
Tabu Ples We i Tabu Tumas Long Heven
8. ?Naoia jea blong God long heven i gat wanem nyufala mining?
8 Long dei we Jisas i baptaes, bigfala jea blong God long heven i kasem wan nyufala mining. Fasin blong God blong sanem wan man we i stretgud olgeta blong i ded blong tekemaot sin blong olgeta man long wol, i soem klia se God i tabu tumas, i defren olgeta long ol man we oli gat sin. Mo tu, long taem ya, God i soem se hem i rere blong letem ol man oli frengud bakegen wetem hem, mo samting ya i soem fasin sore blong hem. Taswe, bigfala jea blong God long heven i kam olsem rum we i stap insaed olgeta long tempel. Hemia rum ya we, wan taem evri yia, hae pris i go insaed long hem wetem blad blong anamol blong tekemaot sin blong ol man, we i olsem pija nomo.
9. (a) ?Kaliko we i stap bitwin long Tabu Ples mo Tabu Ples we i Tabu Tumas, i pija blong wanem? (b) ?Olsem wanem Jisas i go long narasaed blong kaliko blong tempel blong God long saed blong speret?
9 Kaliko we i seraotem Tabu Ples mo Tabu Ples we i Tabu Tumas, i pija blong bodi blong Jisas. (Hibrus 10:19, 20) Taem Jisas i stap long wol ya, bodi blong hem i olsem fenis we i blokem hem blong go insaed long ples we Papa blong hem i stap long hem long heven. (1 Korin 15:50) Taem Jisas i ded, “kaliko ya we i blokem Tabu Ples ya we i tabu tumas, insaed long haos blong God, hem i brok olwe long tu haf, i stat antap, i finis daon.” (Matyu 27:51) Samting ya i soemaot klia se fenis ya we i blokem Jisas blong go insaed long heven, naoia i lus. Tri dei biaen, Jeova God i mekem wan bigfala merikel. Hem i mekem Jisas i laef bakegen long ded, i no olsem wan man we i gat bodi blong mit mo blad, be olsem wan nambawan speret man we “i no save ded samtaem.” (Hibrus 7:24) Fote dei biaen, Jisas i go antap long heven mo i go insaed long prapa ‘Tabu Ples we i Tabu Tumas,’ blong “stanap long fes blong God blong talemaot ol poen blong yumi.”—Hibrus 9:24.
10. (a) ?Wanem i hapen afta we Jisas i givim praes blong sakrifaes blong hem i go long Papa blong hem long heven? (b) ?Taem tabu speret i kamdaon long ol disaepol blong Kraes, samting ya i mekem wanem long olgeta?
10 ?God i agri long blad blong Jisas olsem stret praes blong pemaot sin blong olgeta man long wol? Yes, hem i agri. Hem i pruvum samting ya long dei blong Pentekos, 50 dei afta we Jisas i laef bakegen long ded. Long dei ya, tabu speret blong God i kamdaon long 120 disaepol blong Jisas we oli hivap wanples long Jerusalem. (Ol Wok 2:1, 4, 33) Oli kam olsem Hae Pris blong olgeta, Jisas Kraes. Tabu speret i makemaot olgeta blong wok olsem ‘ol tabu pris blong God, blong givim sakrifaes long saed blong speret i go long hem,’ folem plan blong bigfala tempel blong God long saed blong speret. (1 Pita 2:5) Antap long samting ya, ol tabu man ya oli mekemap wan nyufala nesen, wan ‘tabu nesen’ blong God, hemia ol man Isrel long saed blong speret. Afta long taem ya, ol gudgudfala samting we ol profet tok oli talem long saed blong ol man Isrel, olsem promes blong “nyufala kontrak” we i stap long Jeremaea 31:31, oli kamtru long Kristin kongregesen we tabu speret i makemaot, ol prapa man “Isrel blong God.”—1 Pita 2:9; Galesia 6:16.
Sam Narafala Haf Blong Tempel Blong God Long Saed Blong Speret
11, 12. (a) ?Long saed blong Jisas, yad blong ol pris i pija blong wanem, mo long saed blong ol tabu Kristin, hem i pija blong wanem? (b) ?Besin wora i pija blong wanem, mo olsem wanem oli stap yusum wora ya?
11 I tru se Tabu Ples we i Tabu Tumas i pija blong “heven,” ples ya we God i stap sidaon long bigfala jea blong hem. Be ol narafala haf blong tempel blong God long saed blong speret, oli joen wetem ol samting long wol. (Hibrus 9:24) Insaed long tempel long Jerusalem, i gat wan yad blong ol pris. Long yad ya, i gat wan olta blong mekem sakrifaes mo wan bigfala besin wora, we ol pris oli yusum blong wasem han mo leg blong olgeta bifo we oli mekem ol tabu wok. ?Ol samting ya oli pija blong wanem long tempel blong God long saed blong speret?
12 Long saed blong Jisas Kraes, yad blong ol pris we i stap insaed long tempel, i minim se hem i no gat sin, hem i Pikinini blong God we i stretgud olgeta taem hem i stap long wol ya. Taem ol tabu man blong Kraes oli bilif long sakrifaes blong hem, oli kam stret man long fes blong God. Olsem nao, God i save luk olgeta olsem we oli no gat sin. (Rom 5:1; 8:1, 33) Taswe, yad ya i pija tu blong fasin ya we God i luk ol wanwan tabu pris long wol ya olsem we oli stret man long fes blong Hem. Be, ol tabu Kristin ya oli no kam stretgud olgeta yet, mo oli stap yet aninit long paoa blong sin. Besin wora we i stap long yad i pija blong Tok blong God, we Hae Pris Jisas i yusum, blong klinim ol tabu pris sloslou. Taem ol tabu Kristin ya oli letem hem i klinim olgeta, oli kam ol nambawan man we lukluk blong olgeta i givim ona long God, mo i pulum plante narafala man blong joen long klin wosip blong Hem.—Efesas 5:25, 26; skelem wetem Malakae 3:1-3.
Tabu Ples
13, 14. (a) ?Long saed blong Jisas mo ol tabu Kristin, Tabu Ples i pija blong wanem? (b) ?Samting blong putum laet i stanap long hem we oli wokem long gol, i pija blong wanem?
13 Faswan rum blong tempel i pija blong wan fasin we i hae moa, i bitim fasin we yad blong tempel i pija blong hem. Long saed blong man ya Jisas Kraes we i stretgud olgeta, faswan rum i pija blong fasin ya we hem i bon bakegen olsem speret Pikinini blong God we bambae i gobak bakegen long heven. Afta we ol tabu man blong hem oli kam stret man long fes blong God from we oli bilif long blad blong Kraes we i ron, olgeta tu oli kasem speret blong God long spesel fasin ya. (Rom 8:14-17) Tru long ‘wora [hemia taem oli baptaes] mo tabu speret,’ oli “bon bakegen” olsem ol speret pikinini blong God. From samting ya, sipos oli stap tru long God go kasem ded, oli gat hop ya blong laef bakegen long heven olsem ol speret pikinini blong God.—Jon 3:5, 7; Revelesen 2:10.
14 Ol man we oli stap wosip afsaed long tempel long Jerusalem, oli no save luk ol pris we oli stap wok insaed long Tabu Ples. Long sem fasin, ol tabu Kristin oli gat wan fasin long saed blong speret, we bighaf blong ol man blong wosip long God we oli gat hop blong laef foreva long paradaes long wol, oli no gat, mo oli no kasem save fulwan long hem. Samting blong putum laet i stanap long hem we oli wokem long gol, we i stap insaed long haos tapolen, i pija blong bigfala save we ol tabu Kristin oli gat, we i olsem laet. Olsem oel insaed long ol laet, tabu speret blong God i wok, nao i mekem se Baebol i kam klia moa. Save ya we ol Kristin oli kasem from samting ya, oli no holem i blong olgeta nomo. Oli obei long Jisas, we i talem se: “Yufala i olsem laet long ol man long wol. . . . Yufala i mas letem laet blong yufala i saenaot i kasem ol man, blong oli save luk ol gudgudfala wok we yufala i stap mekem. Nao bambae ol man ya oli save leftemap nem blong Papa blong yufala, we i stap long heven.”—Matyu 5:14, 16.
15. ?Bred we i stap long tebel blong bred ya, i pija blong wanem?
15 Blong stap fulap long laet ya, oltaem ol tabu Kristin oli mas kakae samting we i olsem spesel bred we i stap long tebel blong bred insaed long tempel. Stampa ples we oli kasem kakae ya long saed blong speret, hemia Tok blong God. Olgeta oli traehad blong ridim Baebol mo tingting dip long hem evri dei. Jisas i promes tu se, bambae hem i yusum “slef ya we i stret mo waes” blong givim ‘kakae long olgeta long stret taem blong hem.’ (Matyu 24:45, NW) “Slef ya” i minim fulwan grup blong ol tabu Kristin we oli laef yet long wol. Kraes i yusum grup blong ol tabu man ya blong prentem ol buk long ol profet tok blong Baebol we oli kamtru, mo blong givim advaes long stret taem, blong halpem ol man blong folem ol rul blong Baebol long laef blong olgeta tede. Taswe, ol tabu Kristin oli glad blong tekem olgeta kakae ya long saed blong speret. Be, blong stap strong oltaem long saed blong speret, oli mas mekem sam moa samting bitim we oli jes fulumap maen mo hat blong olgeta wetem save blong God. Jisas i talem se: “Kakae ya blong mi hemia, we bambae mi mekem ol samting we hemia we i sanem mi i wantem, mo mi finisim ol wok we hem i givim.” (Jon 4:34) Long sem fasin, ol tabu Kristin oli haremgud taem oli stap gohed evri dei blong mekem samting we God i soemaot se hem i wantem.
16. ?Wok we i joen wetem olta blong insens i pija blong wanem?
16 Long moning mo long naet, pris i bonem insens i go long God, antap long olta blong insens insaed long Tabu Ples. Long taem ya, ol man blong wosip we oli stap stanap afsaed long ol yad blong tempel, oli prea long God. (Luk 1:8-10) Baebol i eksplenem se, “insens ya” i minim ‘ol prea blong ol tabu man.’ (Revelesen 5:8) Man ya blong raetem Ol Sam, Deved, i talem se: “Plis yu tekem prea blong mi olsem smok blong insens we man i bonem i go long yu.” (Ol Sam 141:2) Ol tabu Kristin tu, oli tinghae long blesing ya blong prea long Jeova tru long Jisas Kraes. Ol prea wetem filing we oli kamaot long hat, oli olsem insens we i gat gudfala smel. Ol tabu Kristin oli presem God long sam narafala rod tu. Oli yusum maot blong olgeta blong tijim ol narafala. Oli stanap strong taem oli kasem hadtaem, mo oli holemstrong long God taem oli kasem traem. Fasin ya blong olgeta i rili mekem God i glad.—1 Pita 2:20, 21.
17. ?Faswan taem we hae pris i go insaed long Tabu Ples we i Tabu Tumas long Dei blong Stretem ol sin, i pija blong wanem?
17 Long Dei blong Stretem ol sin, hae pris long Isrel i mas go insaed long Tabu Ples we i Tabu Tumas, mo bonem insens long wan besin blong insens we oli wokem long gol, we i gat hot jakol insaed long hem. Hem i mas mekem samting ya bifo we hem i karem blad blong sakrifaes blong sin i go insaed. Jisas i mekem samting we i sem mak. Hem i holemstrong fulwan long Jeova God bifo we hem i givim laef blong hem olsem wan sakrifaes blong tekemaot sin blong yumi blong olwe. Olsem nao, hem i soemaot se wan man we i stretgud olgeta i save holemstrong long God, nomata wanem traem Setan i mekem long hem. (Proveb 27:11) Taem Jisas i kasem traem, hem i prea we ‘i stap krae bigfala, we wora i stap kamaot long ae blong hem, mo from we tingting blong Kraes i stap daon, God i harem hem.’ (Hibrus 5:7) Long rod ya, hem i givim ona long Jeova, hemia we i gat raet blong rul long heven mo wol, mo we i rul long stret fasin. God i givim pei long Jisas, i mekem hem i laef bakegen long ded, mo i kasem wan laef long heven we i no save ded bakegen samtaem. Taem Jisas i kasem hae ples ya, hem i mekem namba tu wok we i joen wetem risen blong hem blong kam long wol. Hemia, blong mekem se ol sinman we oli tanem tingting blong olgeta, oli save frengud bakegen wetem God.—Hibrus 4:14-16.
Tempel Blong God Long Saed Blong Speret i Moa Gud
18. ?Olsem wanem Jeova i karem wan nambawan samting i kam long tempel blong hem long saed blong speret?
18 Jeova i talem se: ‘Haos ya bambae i moa gud mo i moa naes bitim hemia blong fastaem.’ (Hagae 2:9) Taem Jeova i mekem Jisas i laef bakegen olsem wan King mo Hae pris we i no save ded bakegen samtaem, Hem i karem wan nambawan samting i kam long tempel blong hem long saed blong speret. Naoia, Jisas i naf blong “sevem olgeta we oli obei long hem, i save holemgud olgeta, gogo i no save finis.” (Hibrus 5:9) Ol faswan man we oli soemaot fasin obei ya, hemia ol 120 disaepol we oli kasem tabu speret long Pentekos long yia 33 K.T. Buk blong Revelesen i talemaot se ol man Isrel ya long saed blong speret, bambae namba blong olgeta i kasem 144,000. (Revelesen 7:4) Plante blong olgeta, afta we oli ded, oli slip nomo long beregraon blong wet long taem ya we Jisas i kambak olsem king. Long Daniel 4:10 kasem 17, mo 20 kasem 27, profet tok i poen i go long yia 1914, olsem taem ya we Jisas i stat blong rul long medel blong ol enemi blong hem. (Ol Sam 110:2) Plante yia bifo, ol tabu Kristin, oli bin wet long yia ya. Faswan Bigfala Faet blong Wol mo ol nara bigfala trabol we oli stat kamaot long taem ya, oli pruvum se Jisas i sidaon long jea blong hem olsem King long 1914. (Matyu 24:3, 7, 8) Smoltaem biaen, stret taem i kam blong ‘jajem haos blong God.’ Nao Jisas i fulumap promes we hem i bin mekem long ol tabu man blong hem we oli ded finis, se: “Bambae mi save kambak blong tekem yufala i kam stap wetem mi.”—1 Pita 4:17; Jon 14:3.
19. ?Olsem wanem smol haf blong ol 144,000 we oli stap yet long wol, bambae oli go long Tabu Ples we i Tabu Tumas long heven?
19 Sam long ol 144,000 tabu pris, oli no kasem laswan mak we God i putum long olgeta yet, mo oli no go yet long ples blong olgeta long heven. Smol haf blong olgeta i stap yet long wol. Oli gat wan fasin long saed blong speret we Tabu Ples i pija blong hem. Oli no stap long tabu ples blong God yet, from we “kaliko” we i minim bodi blong olgeta, i blokem olgeta. Sipos oli stap tru long God gogo oli ded, wantaem nomo, bambae oli kasem laef bakegen long heven, olsem speret man we i no save ded bakegen samtaem, nao oli joen wetem ol narafala memba blong ol 144,000 we oli stap finis long heven.—1 Korin 15:51-53.
20. ?Ol tabu pris we oli stap yet long wol oli stap mekem wanem impoten wok naoia, mo wanem frut i kamaot from?
20 From we i gat plante pris oli stap wok wetem bigfala Hae Pris long heven, tempel blong God long saed blong speret i kam moa naes. Long semtaem, ol tabu pris we oli stap yet long wol oli stap mekem wan impoten wok. Tru long wok blong olgeta blong prij, God i stap talemaot ol jajmen blong hem, blong ‘seksekem olgeta nesen,’ olsem Hagae 2:7 i talem. From samting ya, plante milyan man blong wosip long God, we Baebol i talem se oli olsem “ol gudgudfala samting blong olgeta nesen,” oli stap kam insaed long yad blong tempel blong Jeova. ?Olsem wanem olgeta ya oli joen long plan blong God long saed blong wosip? ?Mo wanem narafala gudfala samting bambae i kamaot long fyuja, long bigfala tempel blong Hem long saed blong speret? Bambae yumi tokbaot ol kwestin ya long nekis stadi.
Ol Kwestin Blong Tingtingbak
◻ ?Jisas i soem wanem nambawan eksampel long 29 K.T.?
◻ ?Wanem plan i stat wok long yia 29 K.T.?
◻ ?Tabu Ples mo Tabu Ples we i Tabu Tumas oli pija blong wanem?
◻ ?Olsem wanem bigfala tempel long saed blong speret i kam moa naes?
[Tok blong pija long pej 17]
Taem tabu speret i makemaot Jisas long yia 29 K.T., bigfala tempel blong God long saed blong speret i stat wok