Folem Loa Blong Kraes Long Laef Blong Yumi

“Yufala i mas stap givgivhan long yufala long ol trabol blong yufala. Long fasin ya, bambae yufala i save mekem ol samting we loa blong Kraes i talem.”​—GALESIA 6:2.

1. ?From wanem yumi save talem se loa blong Kraes i wan strongfala paoa we i pusum man blong mekem i gud tede?

TAEM wan faet bitwin ol laen i kamaot long Rwanda i no longtaem i pas, ol Wetnes blong Jeova we oli blong laen blong Hutu mo Tutsi, oli putum laef blong olgeta long denja, blong givgivhan long olgeta. Ol Wetnes blong Jeova long Kobe, Japan, oli harem nogud tumas taem oli lusum sam memba blong famle blong olgeta long wan bigfala etkwek. Nating se i olsem, oli wok kwik blong sevem ol narafala man we oli kasem kil long etkwek ya. Yes, raon long wol, ol eksampel olsem we oli mekem yumi haremgud, oli soem se tede, loa blong Kraes i stap wokgud. Hem i wan strongfala paoa we i pusum man blong mekem gudfala wok.

2. ?Olsem wanem Krisendom i mestem risen blong loa blong Kraes? ?Yumi save mekem wanem blong fulumap loa ya?

² Long semtaem, profet tok blong Baebol long saed blong ol “lasdei” we laef i strong tumas, i stap kamtru. Plante man oli ‘soem long fes blong ol man se oli stap folem Kristin fasin,’ be “oli no wantem paoa blong God nating long laef blong olgeta.” (2 Timote 3:​1, 5) Long Krisendom, fasin ya i kamaot moa. Plante taem ol man oli jes tekem nem blong skul nomo, oli no folem wetem fulhat blong olgeta. ?From wanem i olsem? ?From we i had tumas blong folem loa blong Kraes? No gat. Jisas i no save givim wan loa we ol man oli no naf blong folem. Krisendom i no kasem save long mining blong loa ya. Hem i no folem tok ya we i kamaot long God se: “Yufala i mas gohed blong givgivhan long yufala, blong karem ol baden blong yufala. Long fasin ya, bambae yufala i save mekem ol samting we loa blong Kraes i talem.” (Galesia 6:​2, NW) Yumi “mekem ol samting we loa blong Kraes i talem” taem yumi karem baden blong narafala, be i no blong folem eksampel blong ol Farisi, we yumi ademap moa samting long baden blong ol brata blong yumi.

3. (a) ?Wanem sam oda we oli stap insaed long loa blong Kraes? (b) ?From wanem i rong blong ting se Kristin kongregesen i mas gat ol loa we Kraes i givim nomo, be i no ol narafala rul?

³ Loa blong Kraes i minim olgeta oda we Kraes Jisas i givim​—⁠oda blong prij mo tij, blong gat wan ae we i kliagud mo i lukluk nomo i go long fored, wok blong mekem pis wetem ol man raonabaot long yumi, mo blong tekemaot ol doti fasin long kongregesen. (Matyu 5:​27-​30; 18:15-​17; 28:19, 20; Revelesen 2:​14-​16) I tru, ol Kristin oli mas folem olgeta loa blong Baebol we oli go long ol man blong Kraes. Mo i gat sam samting bakegen. Ogenaesesen blong Jeova mo ol wanwan kongregesen, oli mas putumap sam rul mo plan blong holem gudfala oda. (1 Korin 14:33, 40) !Yes, ol Kristin oli no save holem ol miting sipos i no gat rul we i talem weples, wetaem, mo olsem wanem blong mekem ol miting ya! (Hibrus 10:24, 25) Taem yumi rere blong folem ol stret advaes we i kamaot long olgeta we ogenaesesen i putumap, i olsem we yumi stap folem loa blong Kraes.​—Hibrus 13:17.

4. ?Wanem samting i pusum man blong mekem klin wosip?

⁴ Nating se i olsem, ol trufala Kristin oli no letem wosip blong olgeta i kam olsem ol loa we oli no gat mining. Oli no mekem wok blong Jeova from we wan man no ogenaesesen i talem long olgeta blong mekem. Be lav i stampa blong wosip blong olgeta. Pol i raetem se: “Lav blong Kraes i pusum mifala.” (2 Korin 5:​14, NW, futnot) Jisas i talem long ol man blong hem blong laeklaekem olgeta. (Jon 15:12, 13) Lav we man i lego sam samting we hem i laekem, i stampa blong loa blong Kraes. Mo lav ya i pusum ol trufala Kristin long evri ples, long famle mo long kongregesen. Yumi luk olsem wanem.

Long Famle

5. (a) ?Olsem wanem papa mo mama i save fulumap loa blong Kraes long famle? (b) ?Wanem faswan samting we ol pikinini oli nidim se papa mama i givim long olgeta? ?Wanem sam problem we sam papa mo mama oli mas winim blong givim nid ya?

⁵ Aposol Pol i raetem se: ‘Yufala man we i mared, yufala i mas laekem woman blong yufala tumas, olsem we Kraes i laekem kongregesen ya tumas. Taswe hem i letem laef blong hem, blong sevem kongregesen ya.’ (Efesas 5:​25) Taem wan hasban i folem eksampel blong Kraes mo i mekem long waef blong hem ol fasin we oli soem lav mo oli soem se hem i kasem save long filing blong hem, hem i fulumap wan impoten haf blong loa blong Kraes. Mo tu, Jisas i soemaot klia se hem i laekem ol pikinini. Hem i putum han blong hem i goraon long olgeta, i putum han blong hem long olgeta, mo i blesem olgeta. (Mak 10:16) Ol papa mo mama we oli folem loa blong Kraes, olgeta tu oli soem lav long ol pikinini blong olgeta. I tru, i gat sam papa mo mama we oli faenem se i hadwok blong folem eksampel blong Jisas long saed ya. Samfala oli faenem i had blong soemaot filing blong olgeta. !Ol papa mo mama, yufala i no mas letem fasin ya i blokem yufala blong no soem lav we yufala i gat long ol pikinini blong yufala! I no naf we yu yu save se yu laekem ol pikinini blong yu. Olgeta tu oli mas save samting ya. Blong mekem se oli kasem save, yu mas faenem ol rod blong soem lav long olgeta.​—Skelem wetem Mak 1:​11.

6. (a) ?Ol pikinini oli nidim ol rul blong papa mo mama? ?From wanem yu ansa olsem? (b) ?Wanem bigfala risen blong putumap ol loa long famle we ol pikinini oli mas kasem save long hem? (c) ?Taem loa blong Kraes i rul long famle, i blokem wanem denja?

⁶ Long semtaem, ol pikinini oli nidim ol rul blong folem. Samting ya i min se, papa mo mama blong olgeta oli mas putumap sam rul, mo samtaem oli mas yusum fasin stretem blong mekem oli folem ol rul ya. (Hibrus 12:7, 9, 11) Nating se i olsem, papa mo mama i mas halpem ol pikinini blong save from wanem tufala i putumap ol rul ya: from we papa mo mama oli laekem tumas ol pikinini ya. Mo oli mas lanem se lav i faswan samting we i mas pusum olgeta blong obei long papa mo mama. (Efesas 6:1; Kolosi 3:​20; 1 Jon 5:3) Mak blong papa mo mama we oli gat fasin luksave, i blong tijim ol pikinini blong yusum ‘paoa blong tingting’ blong olgeta. Olsem nao, bambae olgeta wanwan oli save mekem ol gudfala disisen. (Rom 12:1; skelem wetem 1 Korin 13:11.) Be, oli no mas putumap tumas rul, mo tu, oli no mas stretem pikinini long fasin we i strong tumas. Pol i talem se: “Yufala papa mo mama, bambae yufala i no agensem ol pikinini blong yufala oltaem. From we sipos yufala i stap mekem olsem, bambae tingting blong olgeta i foldaon.” (Kolosi 3:​21; Efesas 6:4) Taem loa blong Kraes i lidim famle, papa mo mama bambae oli no stretem pikinini long fasin kros we i strong tumas no wetem tok we i blong daonem mo spolem hem. Ol pikinini we oli stap long wan famle olsem, oli harem se oli sef mo i leftemap tingting blong olgeta, i no givim baden long olgeta no i mekem tingting blong olgeta i foldaon.​—Skelem wetem Ol Sam 36:7.

7. ?Long wanem rod, Betel i olsem eksampel long fasin blong putumap rul long famle?

⁷ Samfala we oli visitim ol Betel raon long wol, oli talem se Betel nao i gudfala eksampel long fasin blong skelemgud ol rul long famle. Nating se ol bigman nomo oli laef long Betel, ol rul we oli folem, kolosap oli sem mak long ol rul blong ol famle.a Long Betel i gat plante defren wok, taswe i nidim plante rul​—⁠i bitim ol rul long wan famle. Nating se i olsem, ol elda we oli lidim ol wok long Betel haos, ofis, mo faktri, oli traehad blong folem loa blong Kraes. Oli tingbaot se, wok blong olgeta i no jes blong mekem ol wok oli gohed, be blong givhan long olgeta we oli wok wetem olgeta, blong oli gru moa long saed blong speret mo blong oli kasem “glad blong Jeova.” (Nehemaea 8:​10) From samting ya, oli traehad blong mekem ol samting long rod we i gud mo i leftemap tingting, mo oli traehad blong gat fasin we i no strong tumas. (Efesas 4:​31, 32) !Yumi no sapraes se ol man oli savegud ol Betel famle from glad we oli gat!

Insaed Long Kongregesen

8. (a) ?Wanem samting we i mas stap oltaem olsem mak blong yumi long kongregesen? (b) ?Wanem ol samting we sam man oli askem narafala blong mekem rul long olgeta no olgeta nomo oli traem blong mekem rul?

⁸ Long kongregesen tu, mak blong yumi i blong leftemap tingting blong narafala wetem lav. (1 Tesalonaeka 5:​11) Taswe, olgeta Kristin oli mas lukaotgud blong no ademap sam moa baden long ol narafala, taem oli talem prapa tingting blong olgeta long ol bisnes blong wanwan man. Samtaem, sam man oli raet long Watch Tower Sosaeti blong askem sam rul long ol samting olsem ol sinema, ol buk, mo ol pleplei blong ol pikinini. Be, i no wok blong Sosaeti blong stadi long ol samting ya mo talem se i gud no i nogud. Plante long ol samting ya, wanwan man no hed blong famle nomo i mas jusum, folem lav we oli gat long ol rul blong Baebol. Sam narafala oli traem blong tanem ol tok mo advaes blong Sosaeti i kam ol rul. Eksampel, long Wajtaoa blong Maj 15, 1996, i gat wan nambawan haf we i pulum ol elda blong visitim oltaem ol memba blong kongregesen blong leftemap tingting blong olgeta. ?Hemia i wan rul? No gat. I gat sam elda oli naf blong folem advaes ya mo oli kasem plante blesing from, be samfala elda oli no naf blong mekem olsem. I sem mak, haf ya “Wan Kwestin” long Wajtaoa blong Epril 1, 1995, i givim woning agensem fasin blong no soem respek long taem blong baptaes. Maet samfala oli bitim mak, olsem taem oli mekem bigfala lafet no selebresen. Be sam narafala oli folem advaes ya long fasin we i strong tumas. !Oli putumap wan rul se i rong blong sanem wan leta we i talem ol gudfala toktok long taem ya!

9. ?From wanem i impoten we yumi no mas agensem narafala tumas mo jajem narafala?

⁹ Tingbaot tu se, blong mekem se ‘loa we i stret olgeta, we i mekem man i fri’ i stap long medel blong yumi, yumi mas agri se olgeta Kristin oli no sem mak evriwan long saed blong samting we tingting blong olgeta i jajem olgeta from. (Jemes 1:​25) ?Bambae yumi kros long narafala from we yumi no agri long prapa disisen we hem i mekem, nating se disisen ya i no brekem ol rul blong Baebol? No gat. Sipos yumi mekem olsem, bambae i gat fasin seraot. (1 Korin 1:​10) Taem Pol i givim woning agensem fasin blong jajem wan narafala Kristin, hem i talem se: “Masta blong olgeta nomo i save talem we oli mekem i gud no oli mekem i nogud. Be olgeta ya bambae oli save mekem i gud, from we Masta ya blong yumi i save givim paoa long olgeta blong oli mekem olsem.” (Rom 14:4) Bambae yumi stap long denja blong mekem God i harem nogud, sipos yumi tok agens long narafala long saed blong ol bisnes we oli prapa disisen blong ol wanwan man.​—Jemes 4:​10-​12.

10. ?Hu ya olgeta we oli gat wok blong lukaot long kongregesen? ?Mo olsem wanem yumi save sapotem olgeta?

¹⁰ Yumi mas tingbaot tu se, wok blong ol elda i blong lukaot long ol sipsip blong God. (Ol Wok 20:28) Oli stap blong givhan long yumi. Yumi no mas fraet blong go askem advaes long olgeta, from we oli ol man blong stadi long Baebol, mo oli savegud ol samting we ol buk blong Watch Tower Sosaeti oli tokbaot. Taem ol elda oli luk we wan man i mekem fasin we i save lidim hem blong brekem ol rul blong Baebol, oli no fraet blong givim advaes we hem i nidim. (Galesia 6:1) Ol memba blong kongregesen oli folem loa blong Kraes taem oli wok tugeta wetem ol gudfala man ya blong lukaot long ol sipsip, we oli stap lidim olgeta.​—Hibrus 13:7.

Ol Elda Oli Folem Loa Blong Kraes

11. ?Olsem wanem ol elda oli folem loa blong Kraes insaed long kongregesen?

¹¹ Ol elda oli wantem folem loa blong Kraes insaed long kongregesen. Oli lidim wok blong talemaot gud nyus, oli yusum Baebol blong tij mo kasem hat blong man, mo, olsem ol gudfala man blong lukaot long sipsip we oli gat kaen fasin, oli “toktok gud blong leftemap tingting blong olgeta we oli harem nogud.” (1 Tesalonaeka 5:​14, NW) Oli blokem ol tingting we oli no Kristin we plante skul blong Krisendom oli gat. I tru, wol ya i stap godaon kwiktaem, mo olsem Pol, ol elda oli wari long ol sipsip. Be oli holem stret tingting taem oli givhan long saed ya.​—2 Korin 11:28.

12. ?Taem wan Kristin i go luk wan elda blong askem help, olsem wanem elda ya i save givhan long hem?

¹² Eksampel, maet wan Kristin i go luk wan elda from wan impoten bisnes we Baebol i no givim wan stret advaes long hem, no wan bisnes we hem i nidim blong skelemgud ol defren Kristin rul. Maet kampani we Kristin ya i wok blong hem i wantem givim wan wok we i hae moa long hem, we i givim moa mane long hem, be wok ya i hevi moa tu. No maet wan papa we i no bilif, i askem tumas samting long boe blong hem, we i mekem se boe ya i no save gohedgud long wok blong prij. Long ol samting olsem, elda ya i no save talem prapa tingting blong hem. Be, hem i save openem Baebol mo givhan long Kristin ya blong tingtinggud long ol rul we oli stret long bisnes ya. Maet hem i yusum Watch Tower Publications Index, sipos i gat, blong faenem wanem we “slef ya we i stret mo waes” i talem long saed ya, insaed long Wajtaoa mo ol narafala buk. (Matyu 24:​45, NW) ?Olsem wanem sipos, biaen, Kristin ya i mekem wan disisen we elda ya i ting se i no waes? Sipos disisen ya i no agensem ol rul no loa blong Baebol, bambae Kristin ya i faenem se elda i luksave raet blong hem blong mekem prapa disisen blong hem, from we hem i save se “evri man i gat basket blong hem blong karem.” Be Kristin ya i mas tingbaot se, “wanem sid we man i planem fastaem long garen blong hem, be frut blong hem nomo, man ya i mas kakae.”​—Galesia 6: 5, 7.

13. Bitim we ol elda oli givim wan stret ansa long wan kwestin no talem prapa tingting blong olgeta, ?from wanem oli givhan long narafala blong tingtinggud long bisnes ya?

¹³ ?From wanem elda ya i mekem olsem? From tu risen. Faswan samting, Pol i talem long wan kongregesen se hem i no ‘bos long bilif blong olgeta.’ (2 Korin 1:​24) Taem elda ya i givhan long brata blong tingtinggud long Baebol mo i letem hem blong mekem prapa disisen blong hem, elda ya i folem eksampel blong Pol. Hem i luksave se i gat sam samting we hem i no gat raet blong mekem disisen long olgeta, olsem we Jisas i luksave se i gat sam samting we hem i no gat raet blong jajem. (Luk 12:13, 14; Jud 9) Long semtaem, ol elda oli save givim advaes we i stanap long Baebol blong givhan long narafala, mo samtaem hem i save givim strong advaes tu, taem i nidim. Namba tu samting, elda ya i stap trenem Kristin brata blong hem. Aposol Pol i talem se: “Strong kakae i blong olgeta we oli kam bigman finis, we oli stap traehad longtaem finis, nao oli kam we oli naf blong jusumaot wanem fasin i gud mo wanem fasin i nogud.” ( Hibrus 5:​14) Taswe, blong kam olsem olgeta we oli bigman finis, yumi mas yusum paoa blong tingting blong yumi. Yumi no mas dipen oltaem long narawan blong mekem disisen blong yumi. Taem elda ya i soem long Kristin brata blong hem olsem wanem blong tingtinggud long Baebol, hem i stap givhan long hem blong gru long saed blong speret.

14. ?Olsem wanem olgeta we oli strong long saed blong speret oli soem se oli trastem Jeova?

¹⁴ Yumi save bilif se Jeova God bambae i yusum tabu speret blong hem blong pusum hat blong ol trufala man blong wosip long hem. Taswe, ol Kristin we oli bigman long saed blong speret, oli traem kasem hat blong ol brata blong olgeta, oli toktokgud long olgeta olsem aposol Pol i mekem. (2 Korin 8:8; 10:1; Faelimon 8, 9) Pol i save se, i no ol stret man, be ol man we oli no stret, we oli nidim plante loa blong mekem olgeta oli folem stret rod. (1 Timote 1:9) Hem i soem se hem i bilif fulwan long ol brata blong hem, i no tingting nogud long olgeta olsem we i no trastem olgeta. Hem i raet long wan kongregesen, i se: “Masta ya blong yumi, hem i stap mekem mifala i bilif strong long yufala.” (2 Tesalonaeka 3:4) Fasin ya we Pol i bilif mo i trastem ol brata blong hem, i rili mekem se ol Kristin ya oli wantem wok strong. Tede, ol elda blong kongregesen mo ol elda we oli stap goraon blong visitim ol kongregesen, oli gat sem plan. !Yumi haremgud tumas long ol man ya we oli gat strong bilif, mo oli lukaot long ol sipsip blong God wetem lav!​—Aesea 32:​1, 2; 1 Pita 5⁠:​1-3.

?Yu Yu Stap Folem Loa Blong Kraes?

15. ?Wanem sam kwestin we yumi save askem long yumi wanwan blong luk sipos yumi stap folem loa blong Kraes long fasin fren blong yumi wetem ol brata?

¹⁵ Yumi evriwan i mas luklukgud long laef blong yumi oltaem, blong luk sipos yumi stap folem mo sapotem loa blong Kraes no no gat. (2 Korin 13:5) Yes, i save givhan long yumi evriwan taem yumi askem se: ‘?Mi mi gat fasin blong leftemap tingting no mi gat fasin agens? ?Mi stap skelemgud ol samting no mi bitim mak? ?Mi mi tingbaot ol narafala no mi strong long ol prapa raet blong mi?’ Wan Kristin i no gat raet blong talem long brata blong hem wanem we hem i mas mekem mo wanem we hem i no mas mekem sipos Baebol i no klia long bisnes ya.​—Rom 12:1; 1 Korin 4:6.

16. ?Olsem wanem yumi save givhan long olgeta we oli no tinghae long olgeta bakegen, blong soem se yumi fulumap wan impoten haf blong loa blong Kraes?

¹⁶ Naoia, we laef i strong tumas, i impoten we yumi lukaot ol rod blong leftemap tingting blong ol narafala. (Hibrus 10:24, 25; skelem wetem Matyu 7:​1-5.) Taem yumi lukluk ol brata mo sista blong yumi, ?yumi stap makem ol gudfala fasin blong olgeta bitim ol slak fasin blong olgeta? Olgeta brata mo sista ya oli sas long lukluk blong Jeova. Sore tumas, i no evriwan we oli gat filing ya. Mo tu, plante oli no tinghae long olgeta wan. Oli luk nomo long ol mastik mo slak fasin blong olgeta bakegen. ?Olsem wanem blong leftemap tingting blong ol man olsem mo sam narafala bakegen? I gud yumi traem toktok long wan no tu man long evri miting. Yumi save talemaot long olgeta se yumi rili nidim olgeta mo se oli rili mekem wan impoten wok blong givhan long kongregesen. !Bigfala glad i kamaot taem yumi mekem se baden blong ol narafala i no moa hevi tumas, mo long rod ya, yumi fulumap loa blong Kraes!​—Galesia 6:2.

!Loa Blong Kraes i Stap Wok!

17. ?Wanem ol defren rod we yu luk se loa blong Kraes i stap wok insaed long kongregesen blong yu?

¹⁷ Loa blong Kraes i stap wok long Kristin kongregesen. Yumi luk samting ya evri dei​—taem ol Wetnes oli glad blong talemaot gud nyus, taem oli givhan mo leftemap tingting blong narafala, taem oli traehad blong mekem wok blong Jeova nating se oli fesem ol strong problem, taem ol papa mo mama oli traehad blong tijim ol pikinini blong olgeta blong laekem Jeova wetem hat we i glad, taem ol elda oli tijim Tok blong God wetem lav mo filing, mo oli givhan long ol sipsip blong wantem tumas blong wosip long Jeova blong olwe. (Matyu 28:19, 20; 1 Tesalonaeka 5:​11, 14) !Taem yumi wanwan i mekem loa blong Kraes i wok long prapa laef blong yumi, samting ya i mekem hat blong Jeova i glad tumas! (Proveb 23:15) Ol man we oli laekem loa blong God we i stret olgeta, God i wantem se bambae oli laef foreva. Long Paradaes we i stap kam, bambae yumi luk wan taem we ol man oli kam stret olgeta, wan taem we i no moa gat man blong brekem loa, mo wan taem we yumi save kontrolem evri samting we hat blong yumi i wantem. !Hemia bigfala blesing we i save kamaot sipos yumi folem loa blong Kraes!

[Futnot]

?Wanem Tingting Blong Yu?

◻ ?From wanem Krisendom i mestem risen blong loa blong Kraes?

◻ ?Olsem wanem yumi save folem loa blong Kraes insaed long famle?

◻ ?Blong folem loa blong Kraes insaed long kongregesen, yumi mas blokem wanem, mo yumi mas mekem wanem?

◻ ?Olsem wanem ol elda oli save folem loa blong Kraes taem oli givhan long ol memba blong kongregesen?

[Tok blong pija long pej 23]

Samting we pikinini blong yu i nidim moa, hemia lav

[Tok blong pija long pej 24]

!Yumi haremgud tumas long ol gudfala elda we oli gat lav!