Ripot Long Wok Blong Kingdom

Kasem Olgeta Kaen Man Wetem Trutok

APOSOL Pol i wok strong blong talemaot Kingdom blong God. Hem i no letem ol man we oli agensem hem oli blokem hem long wok blong talemaot “gud nyus.” (1 Korin 9:​16; Ol Wok 13:50-​52) Pol i talem long ol narafala se oli mas folem eksampel blong hem.​—1 Korin 11:1.

Raon long wol, ol man oli savegud ol Wetnes blong Jeova from we oli strong blong prij. Yes, oli gohed long wok ya, “nating we ol man oli wantem harem tok ya no oli no wantem harem,” blong finisim wok we God i putum long olgeta blong ‘pulum ol man oli kam man blong Kraes.’ (2 Timote 4:2; Matyu 28:19, 20) Long ol kantri we ol Wetnes oli kasem fasin agens tu, oli stap faenem ol man we hat blong olgeta i gud, mo oli stap talemaot long olgeta, mesej we i impoten tumas long saed blong Kingdom blong God. Ol store we oli kam biaen oli soemaot samting ya.

◻ Long wan aelan blong Wes Pasifik we gavman i putum tabu long wok blong ol Wetnes blong Jeova, wan boe we i gat 12 yia i luk se hem i stap long medel blong ol rabis fren long skul. Plante fren blong hem long klas oli stap smok sigaret, ridim ol rabis buk long saed blong seks, mekem trabol long ol tija, mo faet. Samting ya i kam moa nogud, gogo boe ya i askem long papa blong hem sipos hem i save livim skul ya mo go long wan narafala skul. Be, papa i toktok wetem pikinini blong hem, hem i talem se hem i no agri wetem tingting ya, from we fasin blong ol studen long ol narafala skul i sem mak nomo. Be, ?olsem wanem hem i save givhan long pikinini blong hem?

Papa i tingbaot wan buk long haos we i tokbaot ol yangfala. Wan famle blong hem we i wan Wetnes blong Jeova, i bin givim buk ya long hem olsem wan presen. Ale, hem i lukaot buk ya, mo taem hem i faenem, hem i givim long pikinini blong hem. Nem blong buk ya, Questions Young People Ask​—Answers That Work.a Boe i faenem wan japta we i rili givhangud long hem: “?Olsem Wanem Mi Mi Save Winim Ol Trabol Blong Ol Rabis Fren?” Japta ya i tijim hem se i impoten blong gat respek long hem wan, mo antap long samting ya, i tijim hem blong talem ‘no’ long kaen fasin, taem ol narafala oli traem fosem hem blong folem wan rod we i no waes. Taem yangfala man ya i folem ol rul blong Baebol we hem i faenem long buk ya, hem i lanem olsem wanem blong winim trabol blong ol rabis fren long skul.

Papa i luk olsem wanem fasin blong boe blong hem i jenis, mo olsem wanem hem i kamgud long plante narafala rod, nao papa ya i mekem disisen blong ridim buk ya tu. Hem i laekem tumas ol gudfala advaes we hem i faenem long buk ya, nao hem i askem ol Wetnes blong Jeova blong stadi Baebol wetem hem. Biaen, ol narafala memba blong famle blong hem oli joen long stadi tu. ?Wanem i kamaot from? Boe ya, yangfala brata blong hem, papa blong hem, mo tufala olfala bubu blong hem, naoia oli Wetnes blong Jeova.

◻ Long semfala kantri ya, oli putum tu Wetnes blong Jeova long kalabus from we tufala i strong blong obei long ol rul blong Baebol. Be, tufala Wetnes ya i no letem samting ya i blokem tufala blong talemaot Kingdom blong God wetem strong tingting. Tufala i toktok wetem wan haeman blong kalabus, mo hem i letem tufala i mekem Lafet blong Lodsapa insaed long kalabus. !Tufala ya i glad tumas taem 14 man we oli stap long kalabus oli wantem save moa long saed blong Baebol, mo oli joen wetem tufala Wetnes ya blong mekem impoten lafet ya! Samfala oli gohed blong stadi Baebol mo joen wetem ol Wetnes blong Jeova afta we oli gofri long kalabus.

Long bitim 25 kantri, ol Wetnes blong Jeova oli stap kasem trabol, taem gavman i putum tabu long olgeta, taem oli kasem ol defren kaen fasin agens, mo taem ol man oli ronem olgeta. Be, olsem ol aposol, oli gohed nomo blong “tijim ol man, mo oli stap talemaot gud nyus ya blong Jisas, se hem i Mesaea.”​—Ol Wok 5:​42.

[Futnot]