Paoa Blong Ol Fren Mo Janis We Yu Gat Blong Prij
1 Ol fren oli save gat bigfala paoa—oli save givhan long yu no oli save spolem yu. Ol man we oli wok blong Jeova oli gat paoa blong pulum yumi blong mekem ol gudfala Kristin wok. (Hib. 10:24) Be, ol memba blong famle we oli no Witnes blong Jeova, olgeta long ples blong wok, ol fren blong skul, ol man raonabaot yumi, no ol narafala fren oli save pulum yumi blong folem wan rod we i go agensem ol Kristin rul. Maet oli save tok ‘nogud long yumi, oli talem se ol fasin ya we yumi stap mekem oli no stret, from we [yumi] joen long Kraes.’ (1 Pita 3:16) ?Olsem wanem yumi save holem strong tingting blong gohed blong prij nating se ol nogud fren oli traem gat paoa long yumi?
2 Ol Memba Blong Famle: Samtaem, maet wan hasban no papa we i no Witnes blong Jeova, i no wantem se waef no ol pikinini blong hem oli stap joen long wok blong talemaot gud nius. Hemia samting we i bin hapen long wan famle long Meksiko. Waef blong wan man, wetem ol seven pikinini blong hem oli kam long trutok. Fastaem, man ya i agensem samting ya from we hem i no wantem se famle blong hem i go long ol haos wanwan blong prij mo serem ol buk blong Baebol. Hem i harem olsem se wok ya i daonem olgeta. Be waef mo ol pikinini blong hem, oli stanap strong long disisen blong olgeta blong mekem wok blong Jeova mo blong talemaot gud nius oltaem. Biaen, man ya i stat blong luksave se i impoten blong agri long plan we God i stanemap long wok blong prij, mo hem tu i givim laef blong hem i go long Jeova. I tekem 15 yia blong hem i agri long trutok, be hem i neva save mekem olsem sipos famle blong hem i no gohed long nambawan janis ya we oli gat blong prij.—Luk 1:74; 1 Kor. 7:16.
3 Ol Fren Long Wok: Maet yu traehad blong prij long sam long olgeta we oli stap long ples blong wok, be oli no laekem blong yu prij long olgeta. Wan sista i talem se, wan taem olgeta long ofis oli storian long saed blong lasdei, nao oli laf long hem from we hem i talem long olgeta blong ridim Matiu japta 24. Be sam dei biaen, wan long ol fren ya blong wok i talem se hem i bin ridim japta ya mo hem i sapraes tumas. Sista ya i livim wan buk wetem woman ya mo i mekem plan blong statem Baebol stadi wetem hem mo hasban blong hem. Faswan stadi we oli mekem i go kasem 2 klok long moning. Taem oli mekem namba tri stadi, tufala i stat blong kam long ol miting, mo i no longtaem biaen tufala i lego tabak mo stat blong joen long wok blong talemaot gud nius. Samting ya i no save kamaot sipos sista blong yumi i no traehad blong tokbaot hop blong hem long ol narafala.
4 Ol Fren Blong Skul: Yumi save finis we plante yangfala Witnes oli fesem hadtaem from ol fren long skul mo oli fraet se ol narafala yangfala bambae oli jikim olgeta sipos oli prij. Wan yangfala Kristin long Yunaeted Stet i talem se: “Mi fraet blong prij long ol narafala yangfala from we mi fraet se bambae oli laf long mi.” Taswe yangfala ya i no tekem ol janis we hem i gat blong prij long ol fren blong hem long skul mo long ol haos wanwan. ?Olsem wanem yu save naf blong stanap strong taem ol fren oli traem blong gat paoa long yu? Trastem Jeova, lukaot ol janis blong mekem hem i glad. (Prov. 29:25) Tinghae long gudhan we yu gat blong yusum Tok blong God long wok blong prij. (2 Tim. 2:15) Yangfala ya we yumi jes tokbaot antap, i stat blong prea long Jeova, i askem blong Jeova i halpem hem blong hem i wantem tokbaot gud nius long ol fren blong hem long skul. Hem i stat blong tekem janis blong prij long skul, ol gudfala frut oli kamaot, mo i no longtaem hem i no fraet blong toktok long evriwan we hem i save. Biaen hem i talem se: “Ol yangfala ya oli nidim mo oli wantem wan hop long fiuja, mo Jeova i stap yusum yumi blong givhan long olgeta.”
5 Ol Man Raonabaot Long Yumi: Maet i gat sam man we oli stap raonabaot yumi no ol fren blong yumi, we oli soemaot se oli no laekem yumi mo ol bilif blong yumi. Sipos yu fraet long samting we oli stap tingbaot, askem yu wan se: ‘?Olgeta ya oli save trutok we i lidim man blong kasem laef we i no save finis? ?Mi save mekem wanem blong kasem hat blong olgeta?’ Wan seket elda i luksave samting ya mo i talem se ol gudfala frut oli kamaot taem yumi tekem smol taem oltaem blong prij long ol man we oli stap raonabaot yumi. Askem Jeova blong givim paoa mo waes we yu nidim blong gohed blong lukaot olgeta we hat blong olgeta i stret.—Fil. 4:13.
6 Sipos yumi letem ol nogud fren oli pulum yumi, maet samting ya i save mekem olgeta oli glad. ?Be samting ya i bambae i givhan long hu? ?Long olgeta no yumi nomo? Ol man long ples we Jisas i laef long hem oli agensem hem. Mo hem i stanap strong nating we ol haf brata blong hem oli sakem ol strong tok long hem. Hem i save se bambae hem i halpem olgeta nomo sipos hem i stap tru long rod ya we God i wantem hem blong folem. Taswe, Jisas i stanap strong long “ol hadtaem ya we hem i kasem, we ol man nogud oli girap oli agensem hem tumas.” (Hib. 12:2, 3) Yumi mas mekem sem mak. Yu mas wantem blong yusum olgeta janis we yu gat blong talemaot mesej blong Kingdom. Taem yu mekem olsem, “bambae yu save sevem yu, wetem ol man we oli stap lesin long yu.”—1 Tim. 4:16.