‘Yufala i No Luk Hem Samtaem, Be Yufala i Laekem Hem Tumas’
“Yufala i no luk Jisas Kraes samtaem, be yufala i laekem hem tumas. Yufala i no luk hem naoia, be yufala i stap bilif long hem, nao yufala i stap harem i gud tumas.”—1 PITA 1:8.
1. Nating se i no gat man long wol ya tede we i luk Jisas samtaem, ?olsem wanem sam man blong skul oli traem soemaot se oli onagud long hem?
I NO gat wan man we i laef tede we i bin luk Jisas Kraes samtaem. Be, plante milyan man oli talem se oli laekem hem tumas. Evri yia long Janewari 9, long Manila, Filipin, ol man oli wokbaot long ol rod long taon, mo oli pulum wan pija blong Jisas Kraes we i stap hang long kros, i go wetem olgeta. Pija ya i bigwan olsem saes blong wan trufala man. Ol man oli talem se, spesel wokbaot ya i bigfala moa, mo i mekem bigfala toktok moa, i bitim olgeta narafala wokbaot long saed blong jyos long kantri ya. Bigfala hif blong man we oli joen long samting ya, oli fasfas mo oli stap puspusum olgeta. Samfala oli klaem antap long ol narafala, blong traem tajem pija ya. Plante man we oli kam blong lukluk samting ya, oli kam nomo from gladtaem we i joen wetem wokbaot ya. Be, i klia se sam long olgeta oli rili laekem Jisas tumas. Blong pruvum samting ya, maet oli werem wan kros, no oli go long jyos oltaem. Be, ?yumi save talem se fasin ya blong wosipim aedol, hem i trufala wosip?
2, 3. (a) ?Hu ya ol man blong Jisas we oli rili bin luk mo harem hem? (b) ?Hu ya sam narafala man long faswan handred yia we oli laekem Jisas tumas mo oli bilif long hem, nating se oli no luk hem samtaem?
2 Long faswan handred yia, i gat plante taosen man long ol ples we Rom i rul long olgeta, olsem Judia, Sameria, Perea, mo Galili, we oli rili luk mo harem Jisas Kraes. Olgeta ya oli lesin taem hem i eksplenem ol trutok long saed blong Kingdom blong God, long fasin we i mekem olgeta oli haremgud. Wetem prapa ae blong olgeta, oli luk ol merikel we hem i mekem. Sam long olgeta ya oli kam ol disaepol blong hem, mo oli fasgud long hem from we oli bilif strong se hem i ‘Mesaea, Pikinini blong God ya we i laef we i no save ded.’ (Matyu 16:16) Be, ol man ya we tabu speret i pusum aposol Pita blong raetem faswan leta blong hem i go long olgeta, oli no bin luk Jisas.
3 Ol man ya we Pita i raetem leta i go long olgeta, oli stap long ol ples we Rom i rul long olgeta, olsem Pontas, Galesia, Kapadosia, Esia, mo Bitinia—hemia long kantri we tede oli kolem Teki. Pita i raet long olgeta ya se: “Yufala i no luk Jisas Kraes samtaem, be yufala i laekem hem tumas. Yufala i no luk hem naoia, be yufala i stap bilif long hem, nao yufala i stap harem i gud tumas, we tingting blong yufala i fulap long glad we yufala i no save talem, i fulap long ol gudgudfala samting blong God.” (1 Pita 1:1, 8) ?Olsem wanem olgeta ya oli kasem save long saed blong Jisas Kraes go kasem mak we oli laekem hem tumas mo oli bilif long hem?
4, 5. ?Olsem wanem olgeta ya we oli neva luk Jisas, oli kasem naf save blong mekem se oli save laekem hem tumas mo bilif long hem?
4 I klia se, sam long olgeta ya oli stap long Jerusalem taem aposol Pita i prij long bigfala hif blong man we oli kam long lafet blong Pentekos long yia 33 K.T. Afta long lafet ya, plante disaepol oli stap long Jerusalem blong kasem moa tijing long ol aposol. (Ol Wok 2:9, 41, 42; skelem wetem 1 Pita 1:1.) Mo tu, long ol narafala misinari trep we aposol Pol i mekem, hem i prij long plante man long ol ples we biaen, Pita i sanem faswan leta blong hem long Baebol i go long olgeta.—Ol Wok 18:23; 19:10; Galesia 1:1, 2.
5 ?From wanem ol man ya, we oli no luk Jisas samtaem, oli laekem hem tumas? Long taem blong yumi, ?from wanem plante milyan man, long olgeta ples blong wol, oli laekem hem tumas?
Ol Samting We Oli Bin Harem
6. (a) ?Sipos yu bin harem Pita taem hem i givim wetnes long saed blong Jisas long Pentekos 33 K.T., yu save lanem wanem samting from? (b) ?Olsem wanem samting ya i gat paoa long kolosap 3,000 man we oli stap long taem ya?
6 Sipos yu yu stap long Jerusalem taem Pita i toktok long bigfala hif man ya we oli mekem lafet long yia 33 K.T., ?wanem samting yu save lanem long saed blong Jisas? Ol merikel we hem i bin mekem, oli soemaot klia se God i sanem hem i kam. Mo tu, yu save lanem se, nating we ol rabis man oli bin kilim Jisas i ded, hem i no moa stap long beregraon long taem ya, from we hem i laef bakegen finis, i go antap long heven finis, mo i stap sidaon long raet saed blong God. Ating yu lanem tu se, Jisas hem i trufala Kraes, no Mesaea, we ol profet oli bin tokbaot bifo. Mo bakegen, yu lanem se, tru long Jisas Kraes, tabu speret i bin kamdaon long ol man blong hem, nao wantaem nomo, oli naf blong prij long ol man blong plante nesen, long saed blong ol nambawan samting we God i stap mekem tru long Pikinini blong hem. Ol tok blong Pita i gat bigfala paoa long plante man we oli harem hem long taem ya. Samwe long 3,000 man oli baptaes blong kam ol disaepol blong Kraes. (Ol Wok 2:14-42) ?Sipos yu bin stap long taem ya, bambae yu yu tekem wan strong disisen olsem?
7. (a) ?Sipos yu bin stap long Antiok taem aposol Pol i prij long ples ya, maet yu lanem wanem? (b) ?From wanem samfala man we oli lesin long taem ya, oli bilif mo talemaot gud nyus long ol narafala?
7 ?Sipos yu yu stap wetem ol man taem aposol Pol i stap tijim olgeta long Antiok, hemia long Galesia, wan ples we ol man Rom oli rul long hem, wanem sam narafala samting we maet yu lanem long taem ya long saed blong Jisas? Ating yu harem Pol i eksplenem we ol profet oli bin talemaot bifo se ol rula blong Jerusalem bambae oli jajem Jisas se hem i mas ded. Mo tu, maet yu harem tok blong sam man we oli luk wetem prapa ae blong olgeta taem Jisas i laef bakegen long ded. Ating yu sapraes bigwan long ol tok blong Pol we i eksplenem se, taem Jeova i mekem Jisas i laef bakegen long ded, Hem i pruvum se Jisas i rili Pikinini blong Hem. Mo tu, taem yu lanem se fogif blong ol sin we yumi kasem tru long bilif long Jisas, i save lidim yumi blong kasem laef blong olwe, ating samting ya i mekem strong filing i kamaot long hat blong yu ?no? (Ol Wok 13:16-41, 46, 47; Rom 1:4) Samfala long Antiok we oli luksave bigfala mining blong samting we oli harem, oli kam disaepol. Oli joen fulwan long wok blong talemaot gud nyus long ol narafala, nating se plante man oli ronem olgeta mo mekem bigfala trabol long olgeta.—Ol Wok 13:42, 43, 48-52; 14:1-7, 21-23.
8. ?Sipos yu bin stap long miting blong kongregesen blong Efesas taem leta blong Pol i kasem olgeta, ating yu lanem wanem?
8 ?Olsem wanem sipos yu bin stap long Kristin kongregesena long Efesas, long eria blong Esia we i stap aninit long rul blong Rom, taem ol disaepol oli kasem leta we tabu speret i pusum Pol blong raetem? ?Leta ya i save tijim yu long wanem samting long saed blong wok blong Jisas blong mekem stampa tingting blong God i kamtru? Long leta ya, Pol i eksplenem se tru long Kraes, olgeta samting long heven mo wol bambae oli joen bakegen wetem God, mo se presen we God i givim tru long Jisas Kraes hem i go long ol man blong olgeta nesen. Hem i eksplenem tu se, samfala man we God i luk olgeta olsem we oli ded finis from ol bigfala sin blong olgeta, oli stap kam olsem we oli laef bakegen from bilif long Kraes. From samting ya, i gat rod blong ol man oli save kam ol pikinini blong God bakegen, we God i laekem olgeta tumas.—Efesas 1:1, 5-10; 2:4, 5, 11-13.
9. (a) ?Wanem samting i save halpem yu blong luksave sipos yu kasem mining blong samting we Pol i raetem i go long ol man Efesas, no no gat? (b) ?Taem ol brata long ol ples aninit long gavman blong Rom we Pita i tokbaot, oli lanem ol samting long saed blong Kraes, olsem wanem save ya i gat paoa long laef blong olgeta?
9 Sipos yu bin stap long taem ya, ?yu ting se fasin tangkyu we yu gat from olgeta samting ya, bambae i mekem lav blong yu long Pikinini blong God i kam dip moa? ?Yu ting se bambae lav ya i gat paoa long laef blong yu evri dei, olsem aposol Pol i pulum olgeta blong gat, long japta 4 kasem japta 6 blong Efesas? ?Yu ting se fasin tangkyu olsemia bambae i pusum yu blong skelemgud ol samting we oli mas impoten moa long laef blong yu? From we yu laekem God tumas mo yu gat tangkyu long Pikinini blong hem, ?bambae yu jenisim sam samting blong mekem wok blong God i kam nambawan samting long laef blong yu? (Efesas 5:15-17) Aposol Pita i raet i go long ol Kristin long Esia, Galesia, mo sam narafala ples we Rom i rul long olgeta, long saed blong fasin we oli soemaot from ol samting we oli bin lanem. Hem i se: “Yufala i no luk Jisas Kraes samtaem, be yufala i laekem hem tumas. . . . Yufala i stap bilif long hem, nao yufala i stap harem i gud tumas, we tingting blong yufala i fulap long glad we yufala i no save talem, i fulap long ol gudgudfala samting blong God.”—1 Pita 1:8.
10. (a) ?I sua se wanem samting i givhan long ol faswan Kristin blong laekem Jisas tumas? (b) ?Olsem wanem samting ya i save givhan long yumi tu?
10 I klia se i gat wan narafala samting tu we i mekem ol faswan Kristin ya we Pita i raet long olgeta, oli harem se oli laekem Pikinini blong God tumas. ?Wanem samting ya? Long taem ya we Pita i raetem faswan leta blong hem, Matyu mo Luk tufala i raetemdaon finis Gospel blong tufala, blong ol man oli save ridim. Ol Kristin long faswan handred yia we oli no bin luk Jisas, oli save ridim ol store long ol Gospel ya. Yumi save ridim olgeta tu. Ol Gospel oli no ol naesfala store we man nomo i mekemap, be i gat plante samting long saed blong olgeta we i pruvum se oli rili ol trufala store blong bifo. Long ol store ya we God i pusum ol man ya blong raetem, yumi faenem plante samting we oli mekem lav blong yumi long Pikinini blong God i kam dip moa.
Gudfala Tingting We Hem i Soemaot
11, 12. ?Wanem samting long saed blong gudfala tingting we Jisas i soemaot long ol man, we i pulum yu blong laekem hem?
11 Long ol store ya blong laef blong Jisas we oli raetemdaon, yumi lanem wanem fasin we hem i mekem long ol narafala man. Gudfala tingting we hem i soemaot, i gat paoa yet long filing blong plante man tede, bitim 1,960 yia afta we hem i ded. Olgeta man we oli laef naoia, oli stap harem nogud from ol frut blong sin. Plante milyan man oli stap harem nogud mo tingting blong olgeta i foldaon bigwan, from we narafala i mekem i no stret long olgeta, oli kasem hadtaem from sik, no sam narafala risen. Jisas i talem long ol man olsem, se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel. From we yok ya we bambae mi putum long yufala, wok blong hem i isi. Mo ol samting we mi givim long yufala blong yufala i karem, oli no hevi.”—Matyu 11:28-30.
12 Jisas i soem se hem i tingbaot mo kea long ol puaman, olgeta we oli hanggri, mo olgeta we oli stap krae from we oli harem nogud tumas. Hem i mekem merikel blong givim kakae long ol bigfala hif blong man, taem hem i luk se oli nidim. (Luk 9:12-17) Hem i mekem olgeta oli fri long kastom we i holem olgeta oli kalabus. Mo tu, hem i mekem bilif blong olgeta i kam strong moa long saed blong rod we bambae God i yusum, blong finisim olgeta trabol we politik mo mane i mekem long ol man. Jisas i no mekem ol man we tingting blong olgeta i foldaon finis, oli harem nogud moa. Wetem kaen fasin mo lav, hem i gat gudhan blong mekem ol man we oli gat tingting daon, oli haremgud. Olgeta we oli olsem waelken we i bendaon finis, mo olsem laet we kolosap i ded finis, Jisas i leftemap tingting blong olgeta bakegen. Kam kasem tede, nem blong hem i givim hop long ol man, nating se oli no luk hem samtaem.—Matyu 12:15-21; 15:3-10.
13. ?From wanem fasin we Jisas i soemaot long ol man nogud i pulum ol man blong oli kam long hem?
13 Jisas i no agri long ol fasin nogud. Be hem i soem kaen fasin long ol man we oli bin mekem sam mastik long laef blong olgeta, nao oli soemaot se oli tanem tingting blong olgeta from ol sin ya, mo oli kam long hem blong i givhan long olgeta. (Luk 7:36-50) Hem i sidaon blong kakae wetem sam man we ol narafala long velej oli no laekem olgeta nating, taem hem i luksave se samting ya i wan jans blong halpem olgeta long saed blong speret. (Matyu 9:9-13) From gudfala tingting ya we hem i soemaot, plante milyan man we oli kasem semkaen trabol tede, mo we oli no bin luk Jisas samtaem, oli wantem save moa long saed blong hem, mo oli bilif long hem.
14. ?Wanem samting we yu yu laekem long fasin blong Jisas blong halpem ol man we oli sik, handikap, mo we oli krae from ded?
14 Fasin we Jisas i mekem long ol man we oli sik mo handikap, i pruvum se hem i kaengud mo i gat sore, mo se hem i naf blong mekem ol man ya oli haremgud bakegen. Taswe, taem wan man we i sik bigwan from leprosi i kam mo i plis long Jisas blong halpem hem, Jisas i no ronwe long hem from rabis sik ya we hem i gat. Mo hem i no talem long man ya se, hem i sore long hem, be hem i no save givhan long hem from we sik ya i bitim mak finis. Man ya i kraeaot se: “Plis, Masta, sipos yu yu wantem, yu save mekem mi mi gud bakegen.” Jisas i no wet, hem i pusum han blong hem, i tajem man ya we i gat leprosi, mo i talem se: “Mi mi wantem. Bodi blong yu i klin.” (Matyu 8:2, 3) Long wan narafala taem, wan woman i tajem en blong klos blong Jisas long fasin haed, blong kamgud bakegen long sik blong hem. Jisas i soem kaengud fasin long woman ya, mo i mekem se woman ya i no fraet. (Luk 8:43-48) Mo tu, taem hem i mitim wan grup blong man we oli stap wokbaot i go blong berem wan dedman, hem i sore tumas long wido woman we i stap krae, from we pikinini ya blong hem i jes ded, wan nomo we hem i gat. Nating se Jisas i no bin wantem blong yusum paoa we God i givim long hem blong mekem merikel blong kasem kakae taem hem wan i hanggri, be hem i glad blong yusum paoa ya blong mekem dedman ya i laef bakegen mo blong mekem hem i joen bakegen wetem mama blong hem.—Luk 4:2-4; 7:11-16.
15. ?Olsem wanem ol store long saed blong Jisas oli gat paoa long yu, taem yu ridim mo tingting dip long olgeta?
15 Taem yumi ridim ol store ya mo tingting dip long gudfala tingting we Jisas i bin soemaot, lav blong yumi i kam dip moa long hemia we i givim laef blong hem, blong yumi save kasem laef blong olwe. Nating se yumi no bin luk hem samtaem, yumi harem se yumi laekem hem tumas, mo yumi wantem folem hem.—1 Pita 2:21.
Hem i Dipen Long God Wetem Tingting Daon
16. ?Oltaem Jisas i putum tingting blong hem i strong long hu, mo hem i leftemap tingting blong yumi blong mekem wanem?
16 Moa impoten long ol narafala samting, Jisas i putum tingting blong hem i go oltaem long Papa blong hem long heven, Jeova God, mo i pulum tingting blong yumi i go long Jeova oltaem tu. Hem i makemaot klia wanem ya nambawan Loa, i se: “Yu mas laekem Hae God ya we i God blong yu long olgeta tingting blong yu, mo long olgeta laef blong yu, mo long olgeta maen blong yu.” (Matyu 22:36, 37) Hem i givim advaes ya long ol disaepol blong hem, se: “Yufala i mas bilif long God.” (Mak 11:22) Taem oli kasem wan bigfala traem long bilif blong olgeta, hem i talem long olgeta se: ‘Yufala i mas prea oltaem.’—Matyu 26:41.
17, 18. (a) ?Olsem wanem Jisas i soemaot se hem i dipen long Papa blong hem wetem tingting daon? (b) ?From wanem samting we hem i mekem i impoten tumas long yumi?
17 Jisas hem wan i soem wan nambawan eksampel long saed ya. Prea i impoten tumas long laef blong hem. (Matyu 14:23; Luk 9:28; 18:1) Taem Jisas i jusum ol aposol blong hem, hem i no jes dipen long prapa tingting blong hem blong skelem olgeta, nating se bifo, olgeta enjel long heven oli stap aninit long han blong hem. Wetem tingting daon, hem i prea long Papa blong hem blong wan fulnaet. (Luk 6:12, 13) Taem ol man oli holem Jisas mo taem hem i ded long fasin we bodi blong hem i soa tumas, bakegen hem i lukluk i go long Papa blong hem, mo i prea strong. Hem i no gat tingting ya se hem i savegud Setan, mo se hem i naf blong winim enikaen traem we rabis man ya i save mekem long hem. No gat. Jisas i luksave se i impoten tumas we hem i no foldaon. !Sipos Jisas i no winim traem ya, samting ya bambae i daonem nem blong Papa blong hem bitim mak! !Mo tu, olgeta man bambae oli lusum wan bigfala samting tumas, from we fyuja laef blong olgeta i dipen long sakrifaes we Jisas i mas mekem!
18 Jisas i prea bakegen mo bakegen—taem hem i stap wetem ol disaepol blong hem long wan rum antap long wan haos long Jerusalem, mo long fasin we i dip moa, long garen blong Getsemane. (Matyu 26:36-44; Jon 17:1-26; Hibrus 5:7) Taem hem i stap harem nogud long pos, hem i no tok nogud long olgeta we oli stap jikim hem. Defren olgeta, hem i prea from olgeta we oli no luksave se oli stap mekem wan samting we i nogud tumas. Hem i se: “Papa, plis yu fogivim olgeta ya, from we oli no save samting ya we oli stap mekem.” (Luk 23:34) Hem i tingting long Papa blong hem oltaem. “Hem i putum tingting blong hem i stap strong long God, we i stap jajem ol man long stret fasin.” Lastok we hem i talem taem hem i stap hang long pos, hemia wan prea we i go long Papa blong hem. (1 Pita 2:23; Luk 23:46) !Yumi tangkyu tumas se, Jisas i dipen fulwan long Jeova, nao hem i fasgud long wok we Papa blong hem i putum long han blong hem, gogo hem i finisim wok ya olgeta! !Nating se yumi no luk Jisas Kraes samtaem, yumi laekem hem tumas from ol samting we hem i bin mekem!
Soemaot Lav Blong Yumi Long Hem
19. Taem yumi soemaot se yumi laekem Jisas, ?wanem ol fasin we oli no stret nating we bambae yumi stap longwe long olgeta?
19 ?Olsem wanem yumi save pruvum se i no jes toktok nomo, taem yumi talem se yumi laekem Jisas tumas? Papa blong hem, we Jisas i laekem hem tumas, i agensem fasin blong wokem ol aedol mo blong yusum aedol blong wosip. Taswe, sipos yumi werem wan jen raon long nek blong yumi we i gat pija blong Jisas i hang long hem, no sipos yumi wokbaot long rod wetem wan aedol blong Jisas, yumi no stap soem ona long Jisas nating. (Eksodas 20:4, 5; Jon 4:24) Sipos yumi go long jyos oltaem, maet plante taem long wan wik, be yumi no mekem laef blong yumi i laenap wetem ol tijing blong Jisas long ol narafala dei blong wik, yumi no stap givim ona long hem. Jisas i talem se: “Man we i kasemgud ol loa blong mi, mo i stap obei long olgeta, hemia man we i laekem mi tumas. Mo man we i laekem mi tumas, Papa blong mi bambae i laekem hem tumas.”—Jon 14:21, 23; 15:10.
20. ?Wanem sam samting we oli soemaot se yumi rili laekem Jisas?
20 ?Wanem sam long ol loa we hem i givim long yumi? Faswan samting, i blong wosip long trufala God, Jeova, mo yumi no mas wosip long narafala. (Matyu 4:10; Jon 17:3) Jisas i gat wok blong mekem blong givhan long stampa tingting blong God blong kamtru. Taswe, hem i tijim yumi tu, se yumi mas bilif long hem olsem Pikinini blong God. Blong soemaot samting ya, yumi mas stap longwe long ol rabis wok, mo wokbaot long laet. (Jon 3:16-21) Hem i givim advaes long yumi blong lukaot Kingdom blong God mo stret fasin blong hem fastaem. Yumi mas putum samting ya long fasples, bifo long ol nid blong yumi long saed blong bodi. (Matyu 6:31-33) Hem i givim loa se yumi mas laeklaekem yumi, olsem we hem i laekem yumi. (Jon 13:34; 1 Pita 1:22) Mo hem i givim oda long yumi blong wetnes long saed blong stampa tingting blong God, olsem we hem i bin mekem. (Matyu 24:14; 28:19, 20; Revelesen 3:14) Samwe long faef milyan Wetnes blong Jeova tede oli obei long olgeta loa ya, from we oli gat trufala lav long Jisas, nating se oli no luk hem samtaem. Nomata we oli neva luk Jisas stret wetem ae blong olgeta, be samting ya i no mekem strong tingting blong olgeta blong obei i kam slak. Olgeta ya oli tingbaot tok we Masta blong olgeta i bin talem long aposol Tomas se: “Yu yu bilif long mi from we yu luk mi. Be olgeta ya we oli no luk mi, be oli bilif long mi, bambae oli save harem gud.”—Jon 20:29.
21. ?Wanem blesing we yumi save kasem sipos yumi kam long Memoriol blong ded blong Jisas Kraes, we long yia ya oli mekem long Sande, Maj 23?
21 Mifala i hop se bambae yu yu stap wetem ol man we oli joen long ol Haos Kingdom blong ol Wetnes blong Jeova long olgeta ples blong wol, afta we san i godaon long Sande, Maj 23, 1997. Bambae oli tingbaot bakegen nambawan samting bitim ol narafala samting we God i mekem, blong soemaot lav blong hem long olgeta man, mo blong rimemba ded blong Pikinini blong hem, Jisas Kraes, we i stap tru long hem oltaem. Ol tok we i kamaot long miting ya mo ol samting we yumi mekem long taem ya, oli mas mekem lav blong yumi long Jeova mo Pikinini blong hem i kam bigwan moa, mo mekem yumi wantem moa blong folem ol loa blong God.—1 Jon 5:3.
[Futnot]
a Wan grup blong man we oli joen wanples blong wosip.
?Bambae Yu Ansa Olsem Wanem?
◻ ?Olsem wanem ol man ya we faswan buk blong Pita i go long olgeta, oli kasem save long Jisas mo laekem hem?
◻ ?Wanem sam samting we ol faswan Kristin oli harem, we yu tu yu intres long olgeta?
◻ ?Wanem samting long saed blong gudfala tingting we Jisas i soem we i mekem lav blong yu long hem i kam dip moa?
◻ ?From wanem fasin blong Jisas blong dipen long God wetem tingting daon, i impoten tumas long yumi?
◻ ?Olsem wanem yumi save soemaot lav blong yumi long Jisas Kraes?
[Tok blong pija long pej 16 mo 17]
Yumi harem se yumi laekem Jisas tumas from gudfala tingting we hem i soemaot