Fandamentalism i Kasem Plante Ples

FANDAMENTALISM​—sam yia nomo i pas, tok ya i jes minim wan smol grup blong man nomo we oli stap insaed long Protestan skul. !Be, ol samting oli jenis bigwan! Bruce B. Lawrence, wan man we i raet blong tokbaot ol skul, i talem se, 30 yia bifo, i gat smol man nomo we oli naf blong lukluk i go long fyuja kasem en blong ol yia 1900, mo we oli naf blong talem se long taem ya, fandamentalisma bambae i kam wan samting we i impoten tumas, samting we i mekem bigfala toktok long ol nyuspepa mo radyo, mo wan bigfala stadi long ol yunivesiti tu.

Be, hemia nao samting we i hapen. Plante nyuspepa oli tokbaot ol bigfala hif blong man we oli wokbaot long rod mo mekem raf fasin, ol man we oli kilim narafala man i ded, ol grup we oli agensem fasin blong kilim pikinini long bel, ol grup blong skul we oli yusum strong fasin blong fosem ol man blong politik blong mekem samting we oli wantem, mo ol bigfala faea we samfala oli mekem long pablik ples blong bonem ol buk we oli ting se oli stap tok nogud long God. Olgeta samting ya oli soemaot fasin blong olgeta we oli joen long fandamentalism. Wan buk blong ol man Itali, Mondo Economico, we i kamaot evri wik, i talem se long evri ples, fandamentalism i stap “mekem bigfala faet long nem blong God.”

Plante taem, ol man oli tingbaot olgeta we oli joen long fandamentalism se oli bitim mak long fasin blong olgeta, oli krangke tumas long saed blong bilif, oli stampa blong plante fasin rebel mo plante faet blong ol teroris. Ol man oli sapraes blong luk we ol grup olsem Comunione e Liberazione long Katolik skul, Gush Emunim long skul blong ol man Jyu, mo Kristin Koalisen long Presbiterian skul blong Not Amerika, oli stap kam antap bigwan. ?From wanem fandamentalism i stap kam antap bigwan olsemia? ?Wanem samting i stap pusum hem? ?I tru se, hemia wan “rod blong God blong givimbak,” olsem Gilles Kepel, wan Franisman blong stadi long olgeta grup mo ogenaesesen blong man, i talem?

[Futnot]

[Foto Credit Line long pej 3]

Nina Berman/Sipa Press