Wan Rod We i Gud Moa

OL WETNES BLONG JEOVA oli wari taem oli luk se ol tingting long saed blong wol ya oli stap spolem ol gudfala tingting long saed blong speret. Mo tu, oli wari taem oli luk se ol rabis fasin long saed blong seks mo tingting we i hafhaf long saed blong skul, i stap kam antap long plante ples blong wol. From samting ya, samtaem ol man oli talem se ol Wetnes tu oli folem fandamentalism. ?Samting ya i tru? No gat. I tru se oli bilif strong long skul blong olgeta, be oli no olsem ol man blong fandamentalism, folem mining blong tok ya we yumi tingbaot tede. Oli no fosem ol lida blong politik blong sapotem wan tingting we oli gat, mo oli no mekem ol bigfala wokbaot long rod mo yusum raf fasin blong agensem ol man we oli no agri wetem tingting blong olgeta. Oli faenem wan rod we i moagud. Oli folem fasin blong Lida blong olgeta, Jisas Kraes.

Ol Wetnes blong Jeova oli sua se i gat trutok long saed blong ol bilif i stap, mo se hem i stap long Baebol nomo. (Jon 8:​32; 17:17) Baebol i tijim se ol Kristin oli mas gat kaen fasin, gudfala fasin, kwaet fasin, mo oli no mas mekem i strong tumas long narafala​—ol samting ya i mekem se oli no save krangke long saed blong bilif. (Galesia 5:​22, 23; Filipae 4:5) Long buk blong Jemes long Baebol, hem i leftemap tingting blong ol Kristin blong kasem “waes long heven.” Hem i talem se waes ya bambae i mekem laef blong man i ‘klingud, i gat pis, man i gat kwaet fasin, i joengud wetem ol narafala man, i gat sore, mo i gat plante gudfala frut long laef blong hem.’ Jemes i gohed se: “Taem ol man blong mekem pis oli wok long kwaet fasin, i olsem we oli planem sid we frut blong hem, laef we i stret gud.”​—Jemes 3:17, 18.

Ol Wetnes blong Jeova oli rimemba se Jisas i tingting plante long saed blong trutok. Hem i talem long Ponjes Paelet se: “Mi mi bon, mi kam long wol ya blong wan samting nomo, blong mi talemaot ol tok blong leftemap trutok.” (Jon 18:37) Jisas i no fraet blong talemaot trutok, be hem i no traem blong fosem ol narafala blong agri wetem ol tingting blong hem. Long defren fasin, hem i traem kasem tingting mo hat blong ol man wetem ol toktok blong hem. Hem i save se Papa blong hem long heven, God ya we i “stret mo i gud,” bambae hem nao i mekem disisen olsem wanem mo long wetaem i stret blong finisim ol gyaman mo kruked fasin long wol ya. (Ol Sam 25:8) Taswe, hem i no traem faenem rod blong blokem ol man we oli no agri wetem hem. Defren olgeta, ol lida blong skul oli traem blokem hem.​—Jon 19:5, 6.

Ol Wetnes blong Jeova oli suagud long olgeta tijing blong skul blong olgeta, mo oli soemaot se oli folem ol klin mo gudfala fasin. Olsem aposol Pol, oli sua se i gat ‘wan Masta nomo, wan bilif nomo, mo wan baptaes nomo.’ (Efesas 4:5) Mo tu, oli savegud ol tok blong Jisas se: “Get ya we i smol nomo, mo rod we i strong, hemia i blong go kasem laef. Mo smol man nomo oli faenem.” (Matyu 7:​13, 14) Nating se i olsem, oli no traem fosem ol narafala blong folem bilif blong olgeta. Defren nao, oli folem eksampel blong Pol mo oli “singaot” ol man blong oli ‘kam fren blong God,’ sipos oli wantem mekem olsem. (2 Korin 5:​20) Hemia nao beswan rod. Hem i rod blong God.

Fandamentalism blong ol skul, folem mining blong tok ya tede, i defren olgeta. Ol man we oli folem fandamentalism oli yusum plante defdefren kaen rod​—olsem raf fasin​—blong fosem ol man blong folem ol rul blong olgeta. Taem oli mekem olsem, oli joen bigwan long politik. Be, Jisas i talem se ol man blong hem oli “no man blong wol ya.” (Jon 15:19; 17:16; Jemes 4:4) Folem tok ya blong Jisas, ol Wetnes blong Jeova oli holemtaet fasin blong no joen nating long ol bisnes blong politik. Mo tu, olsem nyuspepa blong Itali, Fuoripagina, i talem, oli “no fosem ol man blong mekem wan samting. Ol man wanwan oli fri blong agri no blong sakemaot ol samting we oli talem.” ?Wanem risal blong samting ya? Mesej blong pis long Baebol we ol Wetnes oli talemaot, i pulum olkaen man, wetem olgeta ya tu we bifo oli folem fandamentalism.​—Aesea 2:​2, 3.

Wan Wol We Ol Man Oli Strong Long Ol Gudfala Fasin

Ol Wetnes oli luksave se ol man oli no naf blong fiksimap olgeta problem we ol fandamentalis oli wari from. Yu no save fosem wan man blong bilif long God no blong agri wetem prapa bilif blong yu. Samfala we oli ting se oli save mekem olsemia, oli bin mekem bigfala trabol i kamaot long ol yia we oli pas. Hemia ol trabol olsem ol Krused, ol Inkwisisin blong Medel Ejes,a mo fasin blong fosem ol Amerikan Indian blong “jenisim” laef blong olgeta. Be, sipos yu trastem God, bambae yu livim ol bisnes ya i stap long han blong hem blong i stretem.

Olsem Baebol i talem, God i makemaot finis en blong taem ya we hem i letem ol man oli brekem ol loa blong hem, we i mekem se oli bin safa mo harem i soa. Kolosap nao taem ya bambae i finis. Jisas i stap rul finis olsem King long Kingdom blong God long heven. I no longtaem, Kingdom ya bambae i tekem aksin blong karemaot olgeta gavman blong man, mo blong tekem wok ya blong rulum ol man evri dei. (Matyu 24:​3-​14; Revelesen 11:15, 18) Risal blong samting ya, hemia se wol bambae i kam wan paradaes we i fulapgud long pis mo stret fasin. Long taem ya, bambae olgeta man evriwan oli suagud long stret rod blong mekem wosip long trufala God. “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.” (Ol Sam 37:29) Ol fasin ya we oli gud tumas mo we oli stap sem mak olwe, olsem lav we i joen wetem kaengud fasin, trutok, stret fasin, mo gudfala fasin, bambae oli kam antap, mo samting ya bambae i mekem olgeta man we oli obei long God, oli haremgud.

Man blong raetem Ol Sam i stap tingbaot taem ya, nao hem i talem ol naesfala tok ya se: “God bambae i stap laekem man tumas oltaem, nao man bambae i putum tingting blong hem i stap strong long God. God bambae i soemaot stret fasin blong hem, nao man bambae i kasem pis long hem. Fasin ya we man i stap strong long God bambae i go antap, i kasem heven, mo stret fasin ya blong God bambae i kamdaon, i kasem graon. Hae God bambae i mekem we yumi gat plante samting, mo graon blong yumi bambae i karem plante kakae.”​—Ol Sam 85:​10-13.

I tru se yumi no save jenisim wol ya, be naoia yumi wanwan i save wokem ol gudfala fasin we God i glad long olgeta. Taswe, yumi save traehad blong folem fasin we God i wantem se ol man we bambae oli wosipim hem long nyufala wol, oli gat. Long taem ya, bambae yumi stap wetem ol man we oli gat tingting daon. Man blong raetem Sam ya i tokbaot olgeta, i se: “Ol man we tingting blong olgeta i stap daon, bambae oli tekem graon ya i blong olgeta. Bambae oli harem gud, from we oli stap long pis, mo oli gat plante samting.” (Ol Sam 37:11) God i givhan mo i blesem olgeta man we oli mekem samting we hem i wantem, mo hem i promes blong givim ol nambawan samting long olgeta long fyuja. Aposol Jon i talem se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem i stap we bambae i no save lus samtaem.”​—1 Jon 2:17.

[Futnot]

[Tok blong pija long pej 7]

Ol Wetnes blong Jeova oli singaot olgeta man blong kasem save long gud nyus blong Kingdom blong God

[Foto Credit Line long pej 6]

Lamp on pages 3, 4, 5, and 6: Printer’s Ornaments/by Carol Belanger Grafton/Dover Publications, Inc.