?Yu Yu Rimemba?

?Yu bin tingting dip long save we yu ridim long ol Wajtaoa we oli jes kamaot i no longtaem? Sipos yes, maet yu glad blong tingbaot ol poen ya bakegen:

◻ ?Olsem wanem plante hasban mo waef tede oli folem nambawan eksampel blong Akwila mo Prisila?

Akwila mo Prisila, tufala i givhan long plante defren kongregesen. Plante Kristin tede oli folem eksampel blong tufala. Oli stretem ol samting long laef blong olgeta, blong oli save go long ples we i gat bigfala nid blong talemaot gud nyus. Mo tu, oli kasem glad mo haremgud, taem oli luk se wok blong talemaot Kingdom i stap kasem plante moa ples, mo taem oli faenem ol nambawan Kristin fren.​—12/15, pej 24.

◻ ?Baebol i talem wanem long saed blong alkol?

Tingting we Baebol i givim long saed blong alkol i stret nomo. Fastaem, Baebol i talem se waen i wan presen we God i givim. (Ol Sam 104:​1, 15) Be tu, Baebol i agensem fasin blong dring bitim mak. (Luk 21:34; 1 Timote 3:8; Taetas 2:3; 1 Pita 4⁠:3)​—12/15, pej 27.

◻ ?Wanem wan impoten samting long saed blong buk blong Hagae long Baebol?

Nating se buk blong Hagae i gat 38 vas nomo long hem, nem blong God i stap 35 taem. Ol profet tok olsem oli no moa gat bigfala paoa, taem ol man oli karemaot nem blong Jeova, mo putum taetel ya “Masta” long ples blong hem.​—1/1, pej 6.

◻ ?Yumi lanem wanem samting from ol sin blong Deved mo Manase?

Nating se Jeova i fogivim Deved mo Manase, be tufala man ya wetem olgeta man Isrel tu, oli mas laef wetem ol frut we i kamaot from sin blong tufala. (2 Samuel 12:11, 12; Jeremaea 15:​3-5) Sem mak tede, Jeova i save fogivim ol sinman we oli tanem tingting blong olgeta, be maet oli kasem ol nogud frut we oli no save blokem, from sin we oli bin mekem.​—1/1, pej 27.

◻ ?Olsem wanem i tru se ‘leg’ blong ol man we oli wokbaot blong talemaot gud nyus i ‘naes tumas’? (Aesea 52:7)

Leg nao i stap karem man i go blong talemaot gud nyus long ol narafala. Ol leg ya oli rili minim man ya. Taswe, long lukluk blong plante man we oli harem mo laekem gud nyus blong Kingdom, leg blong ol man ya we oli karem nyus ya i kam, oli naes tumas.​—1/15, pej 13.

◻ ?Wanem ya tufala haf blong wok blong “talemaot gud nyus”? (1 Korin 9:​16)

Faswan haf se, yumi mas talemaot gud nyus blong Kingdom blong God. Namba tu haf blong wok ya se, yumi mas tijim ol man we oli glad blong harem mesej blong Kingdom.​—1/15, pej 23.

◻ ?Yumi wanwan i save kasem wanem blesing taem yumi singim ol singsing blong Kingdom long ol miting blong kongregesen?

Singsing i wan jans blong yumi soem filing we yumi gat long Man we i wokem yumi. (Ol Sam 149:​1, 3) Taem yumi singsing long kongregesen wetem fulhat blong yumi, samting ya i save mekem se tingting mo hat blong yumi i rere blong harem ol tok we i kamaot biaen, mo i save pulum yumi blong mekem moa long wosip blong Jeova.​—2/1, pej 28.

◻ ?Olsem wanem dei we man i ded i moagud bitim dei we hem i bon? (Eklesiastis 7:1)

Dei we man i ded i moagud bitim dei we hem i bon, sipos hem i bin traehad blong kasem gudnem long fored blong Jeova, Hemia we i naf blong mekem ol man blong bilif we oli ded, oli laef bakegen. (Jon 11:25)​—2/15, pej 12.

◻ ?Olsem wanem buk blong Eklesiastis i save givhan long yumi wanwan?

Buk ya i save halpem yumi wanwan blong stretem tingting blong yumi long saed blong laef, mo long saed blong ol mak we yumi stap go from. (Eklesiastis 7:2; 2 Timote 3:​16, 17)​—2/15, pej 16.

◻ ?Ol Wetnes blong Jeova oli folem fandamentalism?

No gat. I tru se oli bilif strong long skul blong olgeta, be oli no olsem ol man blong fandamentalism, folem mining blong tok ya we yumi tingbaot tede. Oli no mekem ol bigfala wokbaot long rod mo yusum raf fasin blong agensem ol man we oli no agri wetem tingting blong olgeta. Oli folem fasin blong Lida blong olgeta, Jisas Kraes.​—3/1, pej 6.

◻ From we yumi no save stret dei we bambae Jisas i kam blong mekem jajmen blong God i kamtru, ?samting ya i save pulum yumi blong mekem wanem?

Samting ya i save mekem se ol Kristin oli stap wekapgud oltaem, mo tu, i givim jans long olgeta evri dei, blong pruvum se tingting we i pusum olgeta blong mekem wok blong Jeova, i no se olgeta oli wantem kasem wan gudfala samting blong olgeta nomo.​—3/1, pej 13.

◻ ?Wanem ol samting we yumi mas tingbaot bifo we yumi tekem aksin folem loa agensem wan brata we i bin mekem kruked fasin long yumi?

Yumi mas tingtinggud se, samting ya bambae i mekem wanem long yumi wan, long brata ya no ol brata ya we yumi putum olgeta long kot, long kongregesen, mo long ol man afsaed long kongregesen. (1 Korin 6:7)​—3/15, pej 22.

◻ ?Olsem wanem yumi save faenem trufala glad?

Trufala glad i wan fasin we i stap long hat, mo i stanap long trufala bilif mo gudfala fasin fren wetem Jeova. (Matyu 5:3)​—3/15, pej 23.

◻ ?Wan Kristin i mas mekem wanem sipos oli singaotem hem blong joen long grup ya we bambae i jajem wan man long kot (juri)?

Ol wanwan Kristin oli mas mekem prapa disisen blong olgeta long saed blong wok blong juri. Disisen ya i mas stanap long save blong olgeta long saed blong Baebol, mo oli no mas mekem disisen we tingting blong olgeta bambae i stikim olgeta from. (Galesia 6:5)​—4/1, pej 29.