?Yu Yu Rimemba?

?Yu faenem se ol Wajtaoa we oli jes kamaot i no longtaem oli bin givhan long yu? Ale, traem luk sipos yu save ansa long ol kwestin ya.

◻ ?Bambae Amageden i olsem wanem? (Revelesen 16:14, 16)

Bambae hem i no wan nyuklia faet no wan bigfala trabol we ol man nomo oli mekem i kamaot. No gat. Hem i wan faet we God bambae i mekem blong finisim ol faet blong man, mo blong spolem olgeta we oli wantem mekem ol faet olsem. Hemia wan faet we God bambae i mekem blong karem trufala pis i kam long olgeta we oli laekem pis. Bambae hem i no let. (Habakuk 2:3)​—4/15, pej 17.

◻ ?Wanem kaen lafet blong mared i givim ona long Jeova?

Wan lafet blong mared we i soemaot ol fasin long saed blong speret i bitim ol fasin blong wol, i givim trufala ona long Jeova. Bambae ol Kristin oli haremgud long mared ya sipos oli lukaotgud blong no folem ol nogud kastom mo gyaman bilif blong wol, sipos oli no dring mo kakae bitim mak, sipos oli no letem mared ya i blokem ol wok long saed blong speret we oli mekem oltaem, mo sipos oli no flas tumas long ol samting we oli gat.​—4/15, pej 26.

◻ ?Wanem samting i makem man we i gat stret fasin?

Ol man oli save trastem wan man we i gat stret fasin, be samting we i moa impoten, God i save trastem hem. Yumi luk long ol fasin blong hem se hat blong hem i klin, hem i no wan man blong gyaman. Hem i no traem trikim narafala man mo hem i no mekem kruked fasin. (2 Korin 4:2)​—5/1, pej 6.

◻ ?From wanem Jeremaea i talem se: “I gud long wan man sipos hem i karem yok blong hem taem hem i yangfala”? (Lamentesin 3:​27)

Sipos yu lanem blong winim ol traem taem yu yang yet, samting ya bambae i halpem yu blong fesem ol narafala problem we bambae yu kasem taem yu bigwan. (2 Timote 3:​12) Ol blesing we yu kasem taem yu stanap strong long bilif, oli moagud i bitim fasin blong haremgud blong smoltaem we yu save kasem taem yu lego stret fasin.​—5/1, pej 32.

◻ ?Long taem ya we Moses mo Elaeja i stanap wetem Jisas we bodi blong hem i jenis, tufala i pija blong hu ya?

Long vison ya, tufala i pija blong ol brata blong Jisas we tabu speret i makemaot olgeta. From we “i gat bigfala laet i saen raon long tufala” mo Jisas tu, samting ya i soem se ol tabu Kristin ya bambae oli “joen long Kraes” blong “kasem gudfala laef” wetem hem long Kingdom blong heven. (Luk 9⁠:​30, 31; Rom 8⁠:17; 2 Tesalonaeka 1⁠:10)​—⁠5/15, pej 12, 14.

◻ ?Wanem ya ‘tabu tokhaed’ blong God? (1 Korin 2:⁠7)

‘Tabu tokhaed’ blong God i stanap long Jisas Kraes. (Efesas 1:​9, 10) Be, hem i no jes minim se Jisas nao hem i Mesaea we God i promes blong sanem. Hem i joen wetem wan gavman long heven, hemia Kingdom blong God mo Mesaea blong hem, mo i minim tu, wok we Jisas i mekem folem stampa tingting blong God.​—6/1, pej 13.

◻ ?Wanem tingting we wan Kristin i mas gat long saed blong fasin blong kam olfala mo ol sik?

Hem i no mas tingbaot ol traem ya olsem ol samting we oli daonem wok blong hem long Jeova. Hem i mas luk ol samting ya olsem ol jans blong dipen moa long Jeova. Hem i mas tingbaot tu se, yumi no save skelem wan Kristin from hamas taem we hem i spenem long wok blong prij nomo, be from strong bilif mo bigfala lav we hem i gat tu. (Mak 12:41-​44)​—6/1, pej 26.

◻ ?Olsem wanem fasin blong Jeova blong yusum ol man blong raetem Baebol i bitim ol enjel, i soemaot bigfala waes blong hem?

Sipos i no gat wan man nating we i putum tok insaed long Baebol, maet i hadwok long yumi blong kasem save long mesej blong hem. Mo tu, from we Baebol i tokbaot ol man, samting ya i mekem se hem i gat filing, hem i tokbaot plante defren samting, mo hem i pulum intres blong yumi.​—6/15, pej 8.

◻ ?Wanem ya rod blong mekem famle i hapi?

Rod blong mekem famle i hapi i stap long ol pej blong Tok blong God, Baebol, mo long fasin blong folem ol rul blong hem olsem: bos long tingting, luksave se hasban i hed blong famle, toktokgud tugeta, mo lav.​—6/15, pej 23, 24.

◻ ?Olsem wanem ol merikel we Jisas i mekem oli defren long ol merikel we yumi luk tede?

Ol man we oli kamgud bakegen long taem bifo oli no soem ol strong filing mo ol narafala fasin olsem. Jisas tu i no folem ol wael, krangke fasin, blong mekem sikman i kamgud bakegen. Mo tu, Jisas i neva talem se hem i no save mekem ol sikman oli gud bakegen from we oli no givim naf mane no from we oli sot long bilif.​—7/1, pej 5.

◻ ?Wanem rod we Jeova i yusum blong halpem ol man blong hem blong joen long stampa tingting blong hem long saed blong nem mo Kingdom blong hem?

Fastaem, Jeova i givim trutok long ol man blong hem. Namba tu rod, hem i givim tabu speret blong hem long olgeta. Mo namba tri rod, hemia olgeta Kristin brata mo sista blong yumi raon long wol mo nambawan plan blong wosip we Jeova i putumap tru long ogenaesesen blong hem.​—7/1, pej 19, 20.

◻ ?Wanem ya ol nambawan fasin?

Ol nambawan fasin hemia ol fasin we oli stretgud, fasin blong mekem i gud long narafala, mo ol wok mo tingting we oli stret. Yumi no mas letem ol nambawan fasin ya oli slip nomo, yumi mas girap mo soemaot olgeta long ol wok blong yumi. Ol nambawan fasin oli minim moa i bitim we yumi stap longwe long sin. Oli minim tu, se yumi traehad blong mekem ol fasin we oli gud. (1 Timote 6:​11)​—7/15, pej 14.

◻ ?Wanem presen we i sas moa i bitim ol narafala presen, we ol papa mama oli save givim long ol pikinini blong olgeta?

Presen we i sas moa i bitim ol narafala presen we ol papa mama oli save givim long ol pikinini blong olgeta, hemia eksampel blong olgeta blong soem lav long ol narafala. Ol pikinini oli nidim tumas blong luk mo harem we papa mama blong olgeta oli talemaot mo soemaot trufala lav long God long evri samting we oli mekem.​—7/15, pej 21.

◻ ?Wanem sam impoten rod blong mekem famle stadi i karem gudfala frut?

Yumi mas mekem stadi ya oltaem. Yumi mas ‘pemaot taem’ blong stadi. (Efesas 5:​15-​17) Sipos yumi mekem Baebol i laef, ol stadi wetem pikinini bambae oli laef tu. Ol pikinini oli nidim blong toktok mo joen long stadi, blong mekem se oli laekem hem.​—8/1, pej 26, 28.