Ripot Long Wok Blong Kingdom
Winim Ol Traem Long “Kantri We Ol Samting Oli Hapen We Yu No Tingbaot”
LONG faswan handred yia, aposol Pol i talem long ol Kristin long Korin se: “Sipos bubu i krae we i no klia gud, bambae i no gat man we i save se i taem blong faet. Be long yufala i olsem nomo. Sipos tok blong yufala i paspas from we yufala i stap tok long ol narafala lanwis ya, bambae i no gat man we i save wanem samting we yufala i stap talem.”—1 Korin 14:8, 9.
Long Papua Nyu Gini, we samtaem oli kolem ‘Kantri we ol samting oli hapen we yu no tingbaot,’ ol Wetnes blong Jeova oli mas winim plante bigfala trabol blong talemaot mesej blong Baebol i klia nomo. Ol Wetnes oli prij long ol man we oli toktok moa long 700 defren lanwis, mo oli gat plante defren kastom. I had long Ol Wetnes tu from we ples ya i gat plante hil, i no gat plante rod, mo raf fasin i stap kam antap moa. Antap long olgeta trabol ya, sam jyos mo sam bos blong skul blong ol pikinini tu, oli agensem ol Wetnes.
Nating se i olsem, ol Wetnes oli stap kasem gudfala tijing long saed blong speret, mo oli stap tanem plante moa buk we oli givhan long ol man blong stadi Baebol oli go long ol defren lanwis blong ol manples. Olgeta samting ya oli stap mekem ol Wetnes oli nafgud blong talemaot gud nyus i klia nomo, olsem krae blong bubu we i klia gud. Plante man oli stap lesin long gud nyus, olsem ol store ya oli soem:
• Long stat blong yia, wan tija long skul i wantem save from wanem ol pikinini blong ol Wetnes blong Jeova oli no salut long flag mo singim sing blong kantri. Hem i askem kwestin ya long Maiola, wan yangfala Wetnes we i gat 13 yia, mo we i baptaes finis. Maiola i yusum Baebol blong eksplenem poen ya long fasin we i klia. Tija i glad long ansa blong hem from we i kamaot long Baebol. Hem i eksplenem ansa ya long olgeta narafala man we oli wok long skul ya tu.
Biaen, taem tija i askem long ol studen blong raetem wan store, Maiola i jusum blong tokbaot Triniti. Store blong hem i kasem nambawan mak long klas, mo tija i askem long hem weples i faenem save ya. Hem i soem buk ya Yu Save Laef Foreva Long Paradaes Long Wol long Engglis. Tija i soemaot buk ya long olgeta yangfala long klas, mo plante oli wantem wan buk olsem. Long nekis dei, Maiola i givimaot 14 buk mo 7 magasin long ol fren blong hem long skul, mo hem i statem Baebol stadi wetem tri long olgeta. Mak we Maiola i stap traehad blong kasem, hemia blong prij fultaem.
• Wan grup blong ol Wetnes blong Jeova i stap longwe long ol narafala grup, long wan velej kolosap long solwora, i no longwe long Pot Mosbi. Stat long ol yia biaen long 1970 kam kasem naoia, plante man oli stap agensem olgeta. Be, i no longtaem i pas, oli kasem help from wan man we neva oli ting se bambae hem i halpem olgeta. Bisop blong Yunaeted Jyos long ples ya i wan manples we i bin skul long wan narafala kantri. Wan dei, hem i talem long ol man long jyos blong hem blong askem eni kwestin we oli wantem askem. Wan man i talem se: “I gat tu skul long velej blong mifala—Yunaeted Jyos mo ol Wetnes blong Jeova. ?Mifala i mas mekem wanem taem ol Wetnes blong Jeova oli kam long haos blong mifala?” Longtaem lelebet bisop ya i no toktok, nao i ansa se: “Yu luk, mi talem tru, mi no save wanem blong talem long yu. I no longtaem i pas, tu yangfala Wetnes oli kam long haos blong mi. Oli askem wan kwestin long mi mo mi no save ansa, nating se mi bin stadi long yunivesiti. Be oli yusum Baebol blong ansarem kwestin ya, i isi nomo. Taswe, bambae mi no talem long yu wanem samting yu mas mekem. Bambae mi letem yu yu tekem disisen ya. Yu no nid blong lesin long olgeta sipos yu no wantem, be yu no mas mekem i nogud long olgeta.”
Biaen, wan elda we Wajtaoa Sosaeti i sanem hem blong visitim grup ya blong ol Wetnes, i talem se: “Kolosap olgeta man long velej ya oli lesin long ol Wetnes taem oli prij. Samfala oli singaot ol Wetnes oli kam insaed long haos blong olgeta. Naoia, ples ya i olsem wan paradaes long saed blong wok blong prij.”