Ripot Long Wok Blong Kingdom

Mekem Olgeta We Oli Hanggri Long Saed Blong Speret Oli Haremgud​—Long Skul

LONG bigfala toktok blong Jisas antap long wan hil, hem i talem se, “Olgeta we oli luksave se oli nidim ol samting long saed blong speret, oli save harem gud.” (Matyu 5:3, NW) Plante skul pikinini oli tosta from save blong God mo nambawan plan blong hem. Oli wantem kasem ol ansa long ol kwestin blong laef mo oli wantem save olsem wanem blong gat laef we God i glad long olgeta mo oli glad. I gat pruf blong samting ya long wan skul long Britis Vejin Aelan. Wan long ol Wetnes blong Jeova long ples ya i talem se:

◻ “Mi mi joen long wan miting blong tija mo ol papa mama long wan skul long ples ya, mo oli toktok plante long saed blong ol drag, fasin blong dring alkol, fasin blong boe mo gel blong fren tugeta, fasin blong lukluk televisin, ol mak we ol pikinini oli kasem long skul, mo ol narafala bisnes, ale mi mekem disisin blong tekem buk ya Questions Young People Ask​—Answers That Work mo mi givim long woman tija we i lukaot long skul ya. Afta we hem i lukluk tru long buk ya, hem i talem se hemia nao samting we oli nidim mo hem i askem sipos skul ya i save kasem wanwan kopi blong ol 120 studen. Ol elda long kongregesen oli tokbaot bisnes ya, mo oli mekem disisin blong givim ol buk ya i go long skul. Taem mifala i talem samting ya, ol tija oli askem mifala nomo blong givim ol buk ya long olgeta studen long skul ya. Tufala Wetnes i go, mo haos i fulapgud wetem ol studen we oli stap wet long tufala. Tufala brata ya i toktok blong haf haoa, mo oli talem ol ekspiryens blong ol olfala mo ol yangfala we buk ya i bin givhan finis long olgeta we store blong olgeta i stap long ol magasin blong ‘Watch Tower’ Sosaeti. Ale tufala i givimaot ol buk ya long ol studen we oli hanggri from.”

I wan bigfala glad blong save se skul ya i bin mekem disisin blong yusum buk ya blong tijim ol klas we oli bin skul finis fo mo faef yia. I tru se bambae buk ya i givim ansa long plante kwestin blong ol studen ya long saed blong laef mo fyuja.

Mekem Olgeta We Oli Hanggri Long Saed Blong Speret Oli Haremgud​—Long Papua Nyu Gini

Store we i kam biaen i soemaot ekspiryens blong wan distrik elda. Hem i soemaot olsem wanem ol man long kantri ya oli hanggri long saed blong speret mo olsem wanem ol buk blong yumi we oli stanap long Baebol i mekem se oli haremgud.

◻ Distrik elda ya i talem se, “From we mi no save visitim velej ya blong Kamberatoro, mi spenem taem blong mi blong wok nomo long smol kongregesen long Vanimo. I gat plante man long ples ya we oli intres. Sam man long Bewani oli agri blong karem buk. Wan man i askem mi blong mi kam visitim velej ya, mo hem bambae i givim ol ples blong slip long mi. Plante man oli savegud ol buk blong yumi. Evri taem we mifala i go long taon blong Vanimo, ol buk oli finis nating se mifala i tekem tri katon. Oli tingbaot buk ya My Book of Bible Stories olsem gol we i sas. Ol man oli stap lukaot buk ya. Kwiktaem nomo mi givimaot ol buk we mi karem wetem mi. Taem mifala i soemaot buk blong yumi long olgeta man, samfala oli askem se: ‘?Wehem yala buk?’ Wan man i odarem sikis. Hem i givim nem mo adres blong hem long mi mo i askem mi se sipos mi kasem ol buk ya mi mas mekem wan mesej long radyo. Nao bambae hem i aot long velej blong hem blong kam karem ol buk ya.” Distrik elda ya i gohed i se: “Mi faenemaot se plante man long Vanimo oli laekem ol buk ya Mankind’s Search for God mo Questions Young People Ask​—Answers That Work.”

Store ya i soemaot olsem wanem olgeta we oli gat gudhat oli hanggri long kakae long saed blong speret we i stap long Baebol mo long ol buk we Jeova i yusum “slef ya we i stret mo waes,” (NW) blong givimaot. (Matyu 24:​45-47) !Ol Wetnes blong Jeova oli glad tumas we oli save givhan long ol man ya we oli hanggri long trutok!

[Tok Blong Pija Long Pej 19]

Wok blong prij long Papua Nyu Gini