!Yu No Mas Lego Resis Blong Kasem Laef!

“Yumi mas mekem tingting blong yumi i strong, blong yumi resis long rod ya we i stap long fes blong yumi.”​—HIBRUS 12:1.

1, 2. ?Wanem sam bigfala samting we oli hapen finis long ol las dei we oli mekem ol man blong Jeova oli haremgud tumas?

YUMI laef long wan taem we i mekem yumi haremgud tumas, be hem i strong tumas tu. Bitim 80 yia finis, hemia long 1914, Jisas i kam King long Kingdom blong God long heven. Mo tu, yia ya i makem stat blong ‘Dei blong Masta’ mo “taem blong en” blong wol ya. (Revelesen 1:​10; Daniel 12:9) Stat long taem ya, resis blong ol Kristin blong kasem laef i kam impoten moa i bitim bifo. Ol man blong God oli traehad bigwan mo wok strong blong stap kolosap long kat blong Jeova, hemia ogenaesesen blong hem long heven. Kat ya i stap ron i go fored oltaem, we i no gat samting i save stopem hem blong mekem olgeta stampa tingting blong Jeova oli kamtru.​—Esikel 1:​4-​28; 1 Korin 9:​24.

² ?Ol man blong God oli faenem glad taem oli stap ‘ron long resis ya’ blong kasem laef we i no save finis? !Yes, oli glad! Oli glad tumas we oli bin luk ol laswan brata blong Jisas oli hivap. Mo oli glad bigwan tu, blong luksave se wok blong putum mak we i stap blong olwe long ol laswan memba blong 144,000, kolosap i finis nao. (Revelesen 7:​3, 4) Mo tu, oli glad tumas blong luksave se King ya we Jeova i putumap i stap yusum huknaef blong hem ‘long wol ya we i olsem wan garen,’ blong hivimap plante man we oli olsem ‘kakae blong garen we i rere finis.’ (Revelesen 14:15, 16) !Tru tumas, garen ya i givim fulap kakae! (Matyu 9:​37) Kam kasem tede, bitim faef milyan man oli hivap​—hemia ‘wan bigfala hif blong man, we oli plante tumas, i no gat man i save kaontem olgeta, mo oli kamaot long olgeta kala, laen, kantri, mo lanwis.’ (Revelesen 7:9) Yumi no save talem se bigfala kampani ya bambae i kam bigwan olsem wanem, from i no gat wan man we i naf blong kaontem olgeta.

3. ?Yumi mas traehad blong gat tingting we i glad oltaem nating se yumi kasem wanem trabol?

³ Tru tumas, Setan i stap traem blong mekem yumi foldaon, no slodaon, long resis ya we yumi stap spid i go long hem. (Revelesen 12:17) Mo i no isi tu blong gohed long resis ya, taem i gat ol faet, hanggri, strong sik, mo plante narafala hadtaem we oli makem taem blong en ya. (Matyu 24:​3-9; Luk 21:11; 2 Timote 3:​1-5) Nating se i olsem, hat blong yumi i glad tumas taem yumi luk we en blong resis ya i stap kam kolosap moa. Yumi traehad blong soemaot semfala tingting we Pol i pulum ol Kristin long taem blong hem blong kasem, hemia se: “Yufala we i joen long Masta blong yumi, oltaem yufala i mas glad. Mi talem bakegen, yufala i mas glad.”​—Filipae 4:4.

4. ?Ol Kristin blong Filipae oli bin soemaot wanem fasin?

⁴ Yumi save se ol Kristin we Pol i bin talem tok ya long olgeta, oli stap faenem bigfala glad long bilif blong olgeta, from we Pol i talem long olgeta se: “Yufala i mas gohed blong stap glad long Masta blong yumi.” (Filipae 3:​1, NW) Ol Kristin long kongregesena ya blong Filipae bifo, oli gat fasin blong givim presen wetem gladhat. Oli gat lav mo oli wok wetem strong tingting mo glad. (Filipae 1:​3-5; 4:​10, 14-​20) Be i no olgeta Kristin evriwan long faswan handred yia we oli gat semfala tingting ya. Sam long ol Kristin man Jyu we Pol i raetem buk blong Hibrus i go long olgeta, oli mekem hem i wari.

“Strong Moa Blong Holem Ol Trutok Ya”

5. (a) ?Ol Hibru Kristin oli soemaot wanem fasin taem faswan Kristin kongregesen i stanap? (b) Tokbaot fasin blong samfala Hibru Kristin long yia 60 K.T.

⁵ Faswan Kristin kongregesen bifo, i fulap long ol man Jyu mo ol hiten man we oli joen long skul blong ol man Jyu. Kongregesen ya i stanap long Jerusalem long 33 K.T.b ?Ol Kristin long kongregesen ya oli gat wanem fasin? Taem yumi ridim ol faswan japta long buk blong Ol Wok, yumi luksave se olgeta ya oli glad mo oli gat strong tingting blong wok, nating se ol man oli stap ronem olgeta. (Ol Wok 2:​44-​47; 4:​32-​34; 5:​41; 6:7) Be, taem ol yia oli pas, ol samting oli stap jenis, mo plante Kristin man Jyu oli stat slodaon long resis blong kasem laef. Wan buk i tokbaot fasin blong olgeta raonabaot long yia 60 K.T., i se: “Oli lego strong tingting we oli gat fastaem mo oli stap les. Oli harem nogud from we ol samting we oli hop blong luk, oli no kamtru kwik olsem oli bin tingting fastaem. Oli wantem nomo blong stap slakslak, mo long laef blong olgeta evri dei, oli mekem olsem man we i no gat bilif nating. Oli ol Kristin, be oli gat smol tangkyu nomo long nambawan hop ya blong go long heven.” ?Olsem wanem ol Kristin we tabu speret i makemaot olgeta oli save kasem fasin olsemia? Sipos yumi lukluk moa long leta we Pol i sanem i go long ol Hibru man ya (we hem i raetem raonabaot long yia 61 K.T.), bambae yumi save ansarem kwestin ya. Leta ya bambae i halpem yumi evriwan blong no kasem semkaen slak fasin long saed blong speret.

6. ?Wanem sam samting we oli defren long saed blong wosip folem Loa blong Moses mo wosip we i stanap long bilif long Jisas Kraes?

⁶ Ol Hibru man ya we oli kam Kristin, oli stap fastaem long skul blong ol man Jyu. Skul ya i talem se hem i stap obei long Loa we Jeova i givim long Moses. I luk olsem se, Loa ya i gohed blong gat paoa long plante man Jyu afta we oli kam Kristin. Ating samting ya i kamaot from we, blong plante handred yia finis, Loa ya i stap olsem wan rod nomo we ol man Jyu oli save folem blong kam kolosap long Jeova. Mo tu, hem i wan fasin blong wosip we i pulum ae blong ol man, from we i gat ol pris, ol sakrifaes, mo haos prea long Jerusalem, we plante man long wol oli save long hem. Be, Kristin skul i defren. Ol man blong hem oli mas gat tingting long saed blong speret. Hemia semfala tingting we Moses i gat, taem hem i “stap luk oltaem long pei we bambae God i givim long hem [long fyuja].” Mo hem “i stap gohed olwe nomo, olsem we i stap luk God ya we man i no save luk long ae blong hem.” (Hibrus 11:26, 27) Ating plante Kristin man Jyu oli no gat tingting ya long saed blong speret. Oli stap wokbaot sloslou nomo i go, i bitim we oli ron wetem strong tingting long resis blong kasem laef.

7. ?Olsem wanem wol ya we yumi aot long hem finis, i save gat paoa long yumi taem yumi stap ron long resis blong kasem laef?

⁷ ?Ol samting ya oli sem mak long taem blong yumi? I tru se, oli no sem mak evriwan. Be, ol man we oli kam Kristin tede, olgeta tu oli mas lego ol fasin blong wol ya we i flas. Wol ya i givim plante nambawan jans long ol man, be, long semtaem, hem i askem plante samting we i olsem wan baden long olgeta. Mo tu, plante long yumi i laef long ol kantri we ol man oli no moa trastem narafala man, oli tingbaot olgeta nomo, mo oli mekem i gud long olgeta fastaem. Sipos yumi letem ol fasin ya blong wol oli pulum yumi, bambae yumi no moa save lukluk klia wetem ‘ae blong hat blong yumi.’ (Efesas 1:​18) ?Yu ting se yumi save ron strong long resis blong kasem laef sipos yumi no moa save luklukgud rod blong yumi?

8. ?Olsem wanem Kristin skul i gud moa i bitim fasin blong wosip folem Loa?

⁸ Blong wekemap tingting blong ol Kristin man Jyu, Pol i mekem olgeta oli tingbaot se Kristin fasin blong wosip i moagud i bitim Loa blong Moses. Yes i tru se, taem Jeova i jusum nesen blong Isrel bifo, blong oli kam man blong hem mo oli folem Loa, Hem i yusum ol profet blong toktok long nesen ya. Be, Pol i talem se, tede Jeova i “yusum Pikinini blong hem blong tok long yumi. Pikinini ya, hem i wok blong God fastaem, taem God i mekem olgeta samting we i stap long wol. Mo God i jusumaot hem finis, blong bambae, taem wol ya i finis, be olgeta samting ya blong wol oli blong hem nomo.” (Hibrus 1:2) Mo tu, Jisas i hae moa long olgeta king long laen blong Deved, hemia ol ‘man raonabaot long hem.’ Hem i hae moa long ol enjel tu.​—Hibrus 1:5, 6, 9.

9. ?From wanem yumi mas mekem sem mak olsem ol Kristin man Jyu long taem blong Pol, we oli “strong moa blong holem ol trutok ya” we Jeova i talemaot?

⁹ Taswe, Pol i givim advaes ya long ol Kristin man Jyu, se: “Yumi mas strong moa blong holem ol trutok ya we yumi harem finis, blong bambae yumi no lusum rod blong yumi.” (Hibrus 2:1) Save long saed blong Kraes i wan bigfala blesing, be hemia nomo i no naf. Oli mas strong moa blong holem ol Tok blong God, nao bambae oli naf blong winim paoa blong wol blong ol man Jyu raonabaot long olgeta. Hemia i sem mak long yumi. Yumi mas “strong moa” blong lesin long ol samting we Jeova i talem, from we oltaem yumi stap harem ol waes mo tingting blong ol man blong wol raonabaot long yumi. Samting ya i minim se yumi mas gat gudfala fasin blong stadi Baebol oltaem, mo folem wan gudfala program blong ridim Baebol. Long wan narafala vas long semfala leta ya we Pol i raetem i go long ol Hibru Kristin, hem i soemaot se yumi mas go oltaem long ol miting tu, mo talemaot bilif blong yumi long ol man. (Hibrus 10:23-​25) Ol wok ya bambae oli halpem yumi blong stap wekapgud long saed blong speret, olsem nao, tingting blong yumi bambae i stap oltaem long nambawan hop blong yumi. Sipos yumi fulumap hed blong yumi wetem ol tingting blong Jeova, bambae wol ya i no save winim yumi mo mekem se yumi no moa tingting stret.​—Ol Sam 1:​1-3; Proveb 3:​1-6.

‘Yufala i Mas Stap Leftemap Tingting Blong Yufala’

10. (a) ?Wanem i save hapen long wan man we i no strong moa blong harem Tok blong Jeova? (b) ?Olsem wanem yumi save gohed blong “givgivhan long yumi blong mekem yumi strong”?

¹⁰ Sipos yumi no strong blong holem ol samting long saed blong speret, maet bambae yumi no moa bilif se ol promes blong God oli tru. Samting ya i bin hapen long faswan handred yia. Long taem ya, olgeta man long kongregesen oli ol Kristin we tabu speret i makemaot olgeta, mo sam long ol aposol oli laef yet i stap. Pol i givim woning long ol Hibru Kristin ya se: “Ol brata mo sista. Yufala i mas lukaot gud blong bambae i no gat wan long yufala we tingting blong hem i kam fulap long ol fasin nogud, nao hem i no save bilif long God ya we i laef we i no save ded samtaem, nao bambae i girap, i gowe long hem. Yufala i no mekem olsem. Evri dei, taem tok ya we i talem se ‘Tede’ i stap long yumi yet, yufala i mas stap toktok long yufala blong leftemap tingting blong yufala. Long fasin ya, sin bambae i no save pulum wan long yufala, blong mekem hed blong hem i strong.” (Hibrus 3:​12, 13) Tok ya blong Pol se “lukaot gud” i soem se yumi nidim blong stap wekapgud. !Denja i stap raonabaot long yumi oltaem! Yes, maet yumi kam sot long bilif long hat blong yumi. Hemia i wan sin ya. Fasin ya i save pulum yumi i go longwe long God, i bitim we yumi kam kolosap moa long hem. (Jemes 4:8) Pol i mekem yumi tingbaot se yumi mas ‘stap toktok long yumi blong leftemap tingting blong yumi.’ Yumi nidim gudfala kampani blong ol Kristin brata mo sista blong yumi we oli gat lav. “Hemia we i stap hem wan oltaem bambae i tingbaot hem wan nomo, bambae hem i agens long ol waes ya we i save givhan long hem.” (Proveb 18:1) From we ol Kristin oli nidim kampani olsemia, oli glad blong joen oltaem long ol miting blong kongregesen mo long ol asembli.

11, 12. ?From wanem i no naf we yumi save ol stampa Kristin tijing nomo?

¹¹ Pol i givim moa gudfala advaes long leta blong hem, i se: ‘Longtaem finis nao, yufala i harem ol tok we God i talem, taswe naoia yufala i mas naf blong tijim ol man. Be yufala i no save, nao i mas gat sam man yet blong tijim yufala long stampa blong ol tok ya. I olsem we yufala i gobak bakegen, we yufala i no save kakae strong kakae, yufala i stap dring melek nomo. . . . Strong kakae i blong olgeta we oli kam bigman finis, we oli stap traehad longtaem finis, nao oli kam we oli naf blong jusumaot wanem fasin i gud mo wanem fasin i nogud.’ (Hibrus 5:​12-​14) Tru tumas, samfala Kristin man Jyu ya oli no stap traehad blong kasem ol save we i dip moa. Oli stap sloslou nomo blong luksave laet we i saenaot long saed blong Loa mo fasin blong sakomsaes. (Ol Wok 15:27-​29; Galesia 2:​11-​14; 6:​12, 13) Maet samfala oli stap tinghae yet long ol kastom olsem Sabat dei we bifo oli bin kipim evri wik, mo bigfala Dei blong Tekemaot ol Sin we oli bin mekem lafet blong hem evri yia.​—Kolosi 2:​16, 17; Hibrus 9:​1-​14.

¹² Taswe, Pol i talem se: “I gud yumi livim ol tok ya blong stampa blong bisnes blong Kraes i stap fastaem, nao yumi go stret long ol tok we i blong mekem yumi kam bigman long Kraes.” (Hibrus 6:1) Man we i ron long wan resis, i mas lukaotgud long wanem we hem i kakae, blong mekem se hem i naf blong finisim longfala resis ya we i had tumas. Long sem fasin, wan Kristin we i lukaotgud long ol kakae blong hem long saed blong speret​—we i no jes kasem save long ol stampa, ‘faswan tijing’ nomo​—bambae hem i naf moa blong folemgud rod blong resis ya gogo kasem en blong hem. (Skelem wetem 2 Timote 4:7.) Samting ya i minim se yumi mas wokem fasin ya we yumi wantem save se trutok i “big olsem wanem, hem i long olsem wanem, hem i hae olsem wanem mo hem i dip olsem wanem.” Long rod ya, yumi save kam bigman long saed blong speret.​—Efesas 3:​18.

“Yufala i Mas Strong Blong Stanap Longtaem”

13. Long ol yia we oli pas bifo finis, ?olsem wanem ol Hibru Kristin oli bin soemaot bilif blong olgeta?

¹³ Jes afta long Pentekos long yia 33 K.T., ol Kristin man Jyu oli stanap strong nating se plante man oli agensem olgeta bigwan. (Ol Wok 8:1) Ating Pol i stap tingbaot samting ya taem hem i raetem se: “I gud yufala i stap tingbaot ol samting ya we yufala i kasem bifo. Taem we laet blong God i kamtru long yufala, yufala i harem nogud long plante samting, be ol samting ya oli no winim yufala.” (Hibrus 10:32) Fasin blong olgeta blong stanap strong long bilif, i soemaot se oli laekem God, mo fasin ya i mekem se oli no fraet blong toktok wetem hem long evri samting. (1 Jon 4:17) Pol i talem long olgeta blong no kam slak long bilif blong olgeta, from we fasin ya i save mekem se oli no moa toktokgud wetem God. Pol i talem long olgeta se: “Yufala i mas strong blong stanap longtaem, mo yufala i mas mekem ol samting we God i wantem. Nao bambae yufala i kasem ol samting ya we hem i promes blong givim long yufala. Hemia i olsem we Baebol i talem, we God i talem se ‘Smoltaem nomo, nao hemia we i stap kam, bambae i kamtru. Hem i no save tektaem tumas.’”​—Hibrus 10:35-​37.

14. ?Wanem sam samting we oli mas halpem yumi blong gohed blong stanap strong nating se yumi mekem wok blong Jeova blong plante yia finis?

¹⁴ ?Olsem wanem long yumi tede? Bighaf blong yumi i wok wetem strong tingting taem yumi jes lanem Kristin trutok. ?Be yumi gat strong tingting ya yet? no ?Yumi ‘no moa laekem trutok tumas, olsem we yumi laekem hem fastaem’? (Revelesen 2:4) ?Yumi kam kolkol, we maet yumi harem nogud lelebet no yumi les blong wet, from se Amageden i no kam kwik? Be, traem tingbaot samting ya. Trutok i nambawan yet, hem i no defren naoia i bitim bifo. Jisas i stap yet olsem King blong yumi long heven. Hop blong yumi blong laef olwe long wan paradaes long wol i stap sem mak, mo yumi gat jans yet blong stap frengud wetem Jeova. Mo yu no mas fogetem se: “Hemia we i stap kam, bambae i kamtru. Hem i no save tektaem tumas.”

15. Sem mak long Jisas, ?olsem wanem samfala Kristin oli bin stanap strong tru long ol traem we oli strong bitim mak?

¹⁵ Taswe, tok blong Pol long Hibrus 12:​1, 2, i stretgud, i se: “Yumi mas lego ol samting we oli stap blokem yumi, mo ol sin [hemia fasin blong sot long bilif] we oli stap holemtaet yumi, nao yumi mas mekem tingting blong yumi i strong, blong yumi resis long rod ya we i stap long fes blong yumi. Mo oltaem yumi mas stap luk long Jisas we fasin ya blong bilif blong yumi i stap kamaot long hem nomo, i stat long stat blong hem gogo i kasem en blong hem. Taem hem i go blong i ded long [pos], hem i no lego rod blong hem, no gat. Hem i luksave we bambae i save harem gud, nao from samting ya, hem i no moa tingbaot se [pos] ya bambae i mekem bigfala sem long hem, hem i gohed nomo. Mo naoia, hem i stap sidaon long raet saed blong God we hem i king, i stap sidaon long bigfala jea blong hem long heven.” Ol man blong God oli bin stanap strong tru long plante hadtaem long ol las dei ya. Olsem Jisas, we i holemtaet bilif blong hem go kasem we hem i ded long fasin we i safa tumas, samfala Kristin brata mo sista blong yumi oli bin holemtaet bilif mo stanap strong tru long ol traem we oli nogud olgeta​—oli stap long ol rabis kalabus, man i kilim olgeta no mekem olgeta oli harem nogud tumas long bodi blong olgeta, samfala oli repem ol woman, mo oli kilim sam long olgeta i ded tu. (1 Pita 2:​21) Taem yumi tingbaot fasin fasgud blong olgeta, ating hat blong yumi i fulap wetem lav long olgeta ya, ?i tru no?

16, 17. (a) ?Bighaf blong ol Kristin oli mas faet agensem wanem samting we i traem bilif blong olgeta? (b) ?Yumi mas rimemba wanem samting we i save halpem yumi blong gohed blong ron long resis blong kasem laef?

¹⁶ Be, long saed blong bighaf blong ol Kristin, tok we Pol i gohed blong talem i stret nomo. Hem i se: “Long laef ya blong yufala we yufala i stap faet blong blokem sin, i no gat wan yet long yufala we i ded, we blad blong hem i ron from faet ya.” (Hibrus 12:4) Nating se i olsem, long wol ya, yumi evriwan i faenem i had blong wokbaot folem rod blong trutok. Samfala oli harem we tingting blong olgeta i foldaon from “ol man nogud oli girap, oli agensem” olgeta, long wok no long skul. Oli mas stanap strong agensem ol tok we narafala i sakem blong jikim olgeta, mo oli mas agensem sin we i traem olgeta. (Hibrus 12:3) Ol bigfala traem oli bin pulum samfala blong lego strong tingting we oli gat blong holemtaet ol stret rul blong God. (Hibrus 13:​4, 5) Ol man blong apostasic oli pulum samfala blong lesin long tok blong olgeta we i olsem posen, mekem se oli no moa gat stret tingting long saed blong speret. (Hibrus 13:9) Samfala Kristin bakegen, oli lusum glad blong olgeta from we oli no agri wetem fasin no tingting blong sam narafala Kristin. Samfala oli kam slak from we oli bitim mak long spel mo pleplei. Mo bighaf blong ol Kristin oli harem se laef i had long wol ya from we i gat plante tumas problem.

¹⁷ I tru se, olgeta problem ya oli no mekem se yumi ‘faet go kasem we blad blong yumi i ron.’ Mo, sipos yumi luklukgud long stampa blong sam problem blong yumi, maet yumi faenem se oli kamaot from we yumi nomo i no mekem ol gudfala disisen. Nating se i olsem, olgeta problem evriwan oli traem bilif blong yumi. From samting ya nao, yumi mas lukluk oltaem long nambawan eksampel blong Jisas blong stanap strong. Yumi no mas fogetem se hop blong yumi i nambawan tumas. Bilif blong yumi i mas strong oltaem se bambae Jeova i “mekem i gud long olgeta we oli stap traem faenem hem.” (Hibrus 11:6) Long rod ya, bambae yumi gat paoa long saed blong speret blong gohed blong ron long resis ya blong kasem laef.

Yumi Save Stanap Strong

18, 19. ?Wanem samting i hapen long taem bifo we i soemaot se ol Hibru Kristin long Jerusalem oli lesin long advaes blong Pol we i kamaot long God?

¹⁸ ?Ol Kristin man Jyu oli mekem wanem taem oli ridim leta blong Pol? Samwe long sikis yia afta we Pol i raetem leta ya i go long ol Hibru Kristin, wan bigfala faet i kamaot long Judia. Long 66 K.T., ami blong Rom i raonem Jerusalem, stret olsem Jisas i bin talem, i se: “Taem we yufala i luk ol soldia oli stap kam plante raonabaot long Jerusalem, blong oli blokem ol man insaed, yufala i mas save we bambae i no longtaem oli save spolem ples ya olgeta.” (Luk 21:20) Be, blong givhan long ol Kristin we oli stap long Jerusalem long taem ya, Jisas i talem se: “Taem yufala i luk samting ya, yufala we i stap long Judia, yufala i mas ronwe blong go haed long ol hil. Mo yufala we i stap insaed long taon ya, yufala i mas aot. Mo yufala we i stap long ol ples raonabaot long taon ya, yufala i no save go insaed long hem bakegen.” (Luk 21:21) Taswe, faet we i gohed agensem ol ami blong Rom, i mekem wan traem i kamaot long ol Kristin man Jyu, hemia se: ?Bambae oli aot long Jerusalem, we i stampa ples blong wosip blong ol man Jyu mo ples we naesfala haos prea blong olgeta i stap long hem?

¹⁹ Wantaem nomo, ol ami blong Rom oli aot, we i no gat risen blong oli mekem olsem. Ating, ol man Jyu we oli strong long skul blong olgeta, oli ting se hemia wan saen blong pruvum se God i stap lukaot long tabu taon ya blong olgeta. ?Olsem wanem long ol Kristin? Ol store long saed blong taem ya bifo, oli soemaot se olgeta ya oli ronwe. Ale, long 70 K.T., ol man Rom oli kambak, oli spolem Jerusalem fulwan, mo plante man oli ded. Yes, “Dei blong Jeova” we Joel i bin tokbaot, i kamtru long Jerusalem. Be ol Kristin we oli gat strong bilif, oli no moa stap long taon ya. Oli ‘ronwe i go long sefples’ finis.​—Joel 2:​30-​32; Ol Wok 2:​16-​21.

20. From we yumi save se bigfala “dei blong Jeova” i kolosap, ?samting ya i mas pulum yumi blong mekem wanem?

²⁰ Yumi save se wan narafala bigfala “dei blong Jeova” bambae i kamtru i no longtaem, blong spolem ol rabis fasin blong wol ya. (Joel 3:​12-​14) Yumi no save stret taem we dei ya bambae i kamtru. !Be, Tok blong God i promes se bambae hem i kam! Jeova i talem se dei ya i no save tektaem tumas. (Habakuk 2:3; 2 Pita 3:​9, 10) Taswe, i gud we yumi “strong moa blong holem ol trutok ya we yumi harem finis.” Lukaot blong no kam sot long bilif, ‘sin ya we i save holemtaet yumi.’ Yumi mas gat strong tingting blong gohed blong stanap strong, nomata hamas yia oli pas. Rimemba se, ogenaesesen blong Jeova long heven we i olsem wan kat, i stap ron i go fored oltaem. Bambae hem i gohed blong mekem wok blong hem gogo i finisimgud. !Taswe, yumi evriwan i mas gohed blong ron strong mo no kam slak long resis ya blong kasem laef!

[Ol futnot]

?Yu Yu Rimemba?

◻ ?Wanem advaes we Pol i givim long ol man Filipae, i save halpem yumi blong stanap strong long resis blong kasem laef?

◻ ?Wanem i save halpem yumi blong agensem paoa blong wol ya we i save pulum yumi?

◻ ?Olsem wanem yumi save givgivhan long yumi blong stanap strong long resis ya?

◻ ?Wanem sam samting we oli save mekem wan Kristin i slodaon?

◻ ?Olsem wanem eksampel blong Jisas i save halpem yumi blong stanap strong?

[Pija long pej 8-9]

Olsem ol man blong resis, ol Kristin oli no mas letem wan samting i pulum tingting blong olgeta i go long narafala rod

[Pija long pej 10]

I no gat wan samting we i save blokem bigfala kat blong Jeova long heven blong i gohed blong mekem stampa tingting blong Hem i kamtru