Kasem Moa Man Yet Wetem Gud Nyus

I STAP tingbaot ol manples blong mi, nao mi luksave se olgeta save we oli gat long saed blong ol Wetnes blong Jeova, oli bin kasem long ol ripot long televisen mo nyuspepa nomo. Ale, mi tingbaot se, ol man ya oli nidim blong toktok wetem ol Wetnes blong Jeova stret, blong kasem save se oli hu, mo wanem ol bilif blong olgeta. ?Be olsem wanem mi save givhan? Hasban blong mi i wan Kristin elda, mo hem i givim waes advaes we i lidimgud mi.

Mitufala i faenem wan nambawan poen long Wekap! blong Janewari 8, 1995, long haf ya, “Ol Buk We Oli Givhan Long Ol Man Mo Mekem Olgeta Oli Haremgud.” Wekap! ya i talem store blong wan Wetnes, i se: “Woman ya i hivimap ol olfala Wekap! we ol narafala Wetnes oli letem olgeta oli slip nomo long haos blong olgeta. Nao hem i go luk ol man we hem i ting se oli save gat spesel intres long ol store insaed long ol Wekap! ya.”

Hasban blong mi i givhan long mi blong hivimap plante handred Wekap! Nao mi jusumaot ol store we mi ting se oli stret long ol man we bambae mi go luk olgeta.

Nao mi karem buk blong telefon mo sam narafala buk we oli gat nem blong ol man oli stap long olgeta. Mi raetem wan lis blong ol hospital, ol rum we ol yangfala oli slip long olgeta taem oli stap wokbaot olbaot, mo ol spesel hospital blong ol olfala. Mi mekem wan lis tu blong ol man we oli mekem bisnes blong berem dedman, ol man blong lukaot mo givim advaes long ol pikinini long skul, ol dokta, mo ol man we oli wok long ol presin mo kot. Long lis ya tu, i gat ol man blong lukaot long ol spesel hospital we oli givhan long ol alkolik mo ol narafala we oli tekem drag, ol grup we oli traehad blong blokem ol fasin blong spolem wol, ol grup blong givhan long ol handikap mo long ol man we oli kasem kil long ol bigfala faet, mo ol grup we oli stadi long saed blong kakae we i gud long bodi. Mo tu, mi no fogetem ol maneja blong ol ofis, we oli wok blong givhan long ol man we oli no gat mane, oli fesem hadtaem, no oli gat trabol long famle.

?Bambae Mi Talem Wanem?

Faswan samting we mi mekem taem mi go luk olgeta, hemia se mi talemaot klia se mi mi hu. Nao mi talem long olgeta se bambae mi storeyan sam menet nomo wetem olgeta.

Taem mi luk masta no maneja, mi talem se: “Mi mi wan Wetnes blong Jeova. Be, mi no kam blong storeyan long saed blong Baebol, from we maet i no stret blong mekem olsem long ol haoa blong wok.” Kolosap oltaem, mi luk we oli glad taem mi talem samting ya. Nao mi jenisim ol tok blong mi blong mekem i stret long man we mi stap toktok wetem hem. Maet mi talem olsem: “Mi kam luk yu from tu risen. Faswan se, mi wantem talem tangkyu long yu from wok we grup blong yufala i stap mekem long ofis ya. I wan bigfala samting we ol man oli rere blong givim taem mo paoa blong olgeta blong givhan long ol narafala man. Mi mi tinghae long yufala from.” Plante man oli sapraes taem mi talem samting ya.

Naoia, ating oli stap tingbaot namba tu risen blong visit blong mi. Ale, mi gohed olsem: “Namba tu risen blong visitim yu, hemia: Mi bin jusumaot sam store long Wekap! we mifala i wokem long olgeta ples blong wol. Oli tokbaot wok blong yufala mo ol problem we oli joen wetem wok ya. Mi sua se bambae yu glad blong save olsem wanem wan buk we i go long olgeta ples blong wol i tokbaot ol problem ya. Mi mi glad blong givim ol Wekap! ya long yu.” Plante man oli talem tangkyu long wok ya we mi mi mekem.

Mi Sapraes Mo Mi Haremgud Long Frut We i Kamaot

Taem mi storeyan wetem ol man long fasin ya, bighaf blong olgeta oli lesin mo oli kaengud. Long 17 man we mi toktok wetem olgeta, wan nomo i no wantem karem ol Wekap! Plante taem, mi mi sapraes mo mi haremgud long samting we i kamaot.

Eksampel, fo taem, mi wet wetem longfala tingting long ofis blong wan tija we i stap goraon blong jekem ol pikinini long ol skul. Ale, wan dei mi gat jans blong luk hem. Hem i bisi tumas. Be, hem i kaengud mo i toktok wetem mi blong smoltaem. Taem mi rere blong aot, hem i talem se: “Mi mi wantem talem tangkyu tumas, mo bambae mi ridimgud olgeta buk we yu givim long mi.”

Wan narafala taem, mi go long kot, mo mi luk jif jaj we hem i wan medel man finis. Taem mi go insaed long ofis blong hem, hem i stap ridim sam pepa. Ale, hem i leftemap hed blong hem mo i luk olsem se i kros.

Hem i talem long strong voes se: “Ofis ya i open long Tusde moning nomo. Long taem ya, yu save kam askem ol kwestin long mi.”

Kwiktaem nomo, mi ansa long hem se: “Mi sore tumas we mi kam long wan taem we i no stret long yu. Mi mi glad blong kambak long wan narafala taem. Be, mi no kam blong tokbaot bisnes, mi kam blong toktok wetem yu wan.”

Nao, jaj ya i wantem save moa. Ale, hem i askem long voes we i kaengud lelebet se, wanem samting nao mi wantem. Mi talem long hem bakegen se bambae mi kambak long Tusde.

Mi mi sapraes we hem i wantem tumas blong toktok wetem mi, ale, hem i se: “Plis, sidaon. ?Yu wantem wanem?”

Ale, mitufala i storeyangud, mo hem i talem sore we hem i bin tok strong long mi fastaem from we hem i bisi tumas.

Afta we mitufala i storeyan longtaem lelebet, hem i askem se: “?Yu save wanem samting mi laekem long saed blong ol Wetnes blong Jeova? Oli folem ol gudfala rul mo oli holemstrong long ol rul ya oltaem. Hitler i mekem evri samting we hem i save mekem blong fosem ol Wetnes blong joen long faet, be hem i no winim olgeta.”

Wan narafala taem, mi wetem wan Kristin sista i go insaed long wan ofis, ale ol sekretari oli luksave mitufala. Nao jif sekretari i toktok fastaem long strong voes, i se: “Presiden i neva toktok wetem eni grup we i kam long ples ya.”

Mi ansa long kwaet fasin se: “Be bambae hem i toktok wetem mitufala, from we mitufala i Wetnes blong Jeova. Mitufala i no kam blong askem hem blong givim wan samting long mitufala, mo bambae mitufala i no stap longtaem, ating tri menet nomo.” Long hat blong mi, mi stap prea strong se: “!Jeova, plis mekem gudfala frut i kamaot!”

Sekretari i ansa long flas fasin se: “Bambae mi askem long hem.” Ale hem i aot. Afta we tu menet i pas, we i olsem wan longfala taem long tingting blong mi, hem i kambak, mo presiden i biaen long hem. Man ya i no talem wan samting, i soem rod nomo blong mitufala i pas long tu rum blong go long ofis blong hem.

Taem mitrifala i stap storeyan, hem i soem intres mo kaengud fasin. Hem i glad blong karem spesel Wekap! Mitufala i talem tangkyu long Jeova from jans ya blong givim wan gudfala wetnes long saed blong risen blong wok blong mifala.

Taem mi tingtingbak long ol nambawan samting we i kamaot, mi kasem save moa long mining blong tok blong aposol Pita, se: ‘Mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i kamaot long wanem laen.’ (Ol Wok 10:34, 35) God i wantem se ol man blong ol defren kaen fasin blong laef, ples, lanwis, mo wok, oli gat jans blong save stampa tingting blong hem long saed blong wol ya.​—Oli sanem store ya i kam.