Ripot Long Wok Blong Kingdom
God i Stap Mekem Sid i Gru Long Alaska
ANINIT long ol sno mo aes, wan smol sid i stap wet long jans blong gru. !Long tri sotfala manis blong hot taem long Alaska, wan sid blong kabej we i smol olsem 3 milimita, i save gru gogo i kam wan kabej we i hevi olsem 40 kilo! Yes, kantri ya we bifo ol man oli ting se graon blong hem i no save karem kakae from we ples i kolkol tumas, hem i save karem fulap kakae.
Samting ya i tru moa long ol Kristin wok long Alaska. Long ples ya, we kolosap oltaem i kolkol nomo, ol Wetnes blong Jeova oli gohed blong sakem sid blong Kingdom. God i mekem sid ya i gru long ol man we hat blong olgeta i stret, long sem fasin we hem i stap mekem long ol narafala ples blong wol.—1 Korin 3:6, 7.
● Wan yangfala Wetnes we nem blong hem Vanessa, i stap ron long wan skul bas. Hem i luksave se wan studen, Ann, i stap sidaon hem wan oltaem. I luk olsem se Ann i harem nogud, ale, Vanessa i singaot hem blong kam sidaon kolosap long hem. !Nao hem i kasem save from wanem Ann i harem nogud tumas! Mama blong Ann i ded from wan hat atak, mo smoltaem biaen, papa blong hem i ded from kansa. Ale, Ann i kam stap wetem sam famle blong hem long Alaska.
Wan Sarede moning, taem Vanessa i stap prij, hem i go long haos blong nyufala fren ya blong hem, mo i givim wan smol buk long hem, nem blong buk ya se, ?God i Rili Kea Long Yumi? Long Mande, Ann i lukaot yangfala Wetnes ya olbaot long skul. Hem i askem plante kwestin long saed blong Baebol, mo Vanessa i givim ansa long olgeta. Ann i askem se: “?Yufala i stap mekem miting weples?” Long semfala naet ya, Ann i kam long faswan miting blong hem long Haos Kingdom.
Gel ya we i gat 17 yia mo i no moa gat stret papa mama blong hem, i no tekem longtaem blong faenem plante narafala ‘papa’ mo ‘mama,’ olsem Jisas i bin promes. (Matyu 19:29) !Mo i wan taem blong bigfala glad long Distrik Asembli ya “Ol Man blong Talemaot Pis blong God!” blong luk we Ann i hapi mo i smaelgud, from we hem i tekem baptaes long wora blong soemaot se i givim laef blong hem i go long Jeova.
● Long ol ples farawe long bus long bigfala graon ya long not blong Alaska, ol wanwan velej oli stap plante handred kilomita longwe long narawan. Ale, Wajtaoa Sosaeti i yusum wan smol plen blong sakem sid blong Kingdom i go long bitim 150 velej. Be, i gat wan rod nomo blong givhan long ol man ya blong oli gru moa long ol save blong Baebol, hemia blong mekem Baebol stadi long leta. From we i hadwok long plante man blong raetem leta, ol wanwan tija blong Baebol oli mas faenem rod blong pulum tingting blong Baebol studen blong i no lusum intres. ?Olsem wanem oli mekem samting ya?
!Kathy i mekem wan gudfala Baebol stadi wetem wan woman we nem blong hem Edna, nating se hem i stap 600 kilomita longwe! Kathy i no jes raetem ol kwestin we oli stap finis long buk blong stadi. Hem i raetem ol kwestin ya oli go long wan pepa mo i livim smol spes i stap blong Edna i save raetem ol ansa. Afta we Edna i fulumap olgeta ansa, Kathy i raet i gobak long hem blong eksplenem sam moa poen we oli no kliagud. Kathy i talem se: “Mi mi makemaot taem evri Wenesde naet blong mekem ‘stadi ya,’ mo mi traehad blong holemtaet taem ya olsem mi stap mekem wetem ol narafala Baebol stadi. Mo tu, oltaem mi sanem envlop i go long Edna, we i gat adres blong mi mo wan stam i stap finis long hem. I tekem tu wik blong wan leta i go kasem hem, taswe stadi blong mitufala i gohed sloslou nomo.”
!Tingbaot glad we Kathy mo Edna i kasem afta we tufala i bin stadi ten manis long leta, nao tufala i mitim tufala long wan distrik asembli long Ankorej! Mo ol Wetnes oli glad tu we plante narafala Baebol studen mo man we oli intres, oli aot long plante velej long bus long Alaska, oli kam long asembli ya.
Nating se samtaem i luk olsem we man i gohed sloslou nomo, be taem laet blong trutok i kasem ol “smosmol sid,” oli save gru kwiktaem. !Raonabaot wan handred man oli tekem baptaes evri yia long Alaska blong kam ol man blong presem Jeova! !Yumi talem, “Tangkyu, Jeova,” from we hem nao i mekem sid ya i gru!