Mi Glad Tumas Blong Letem Jeova i Lidim Mi

ULYSSES V. GLASS I TALEM STORI YA

Hemia wan taem we i spesel. I gat 127 studen nomo long klas ya we bambae oli kasem stefeket. Be, namba blong ol man we oli kam joen long spesel taem ya i kasem 126,387 man blong ol defren kantri blong wol. Spesel taem ya hemia miting blong givimaot stefeket long ol studen blong klas namba 21 blong Wajtaoa Baebol Skul Blong Gilead. Oli mekem miting ya long Yanki Stadium, Niu Yok, long Julae 19, 1953. ?From wanem hemia wan spesel taem long laef blong mi? Fastaem i gud mi talemaot long yufala sam samting long saed blong laef blong mi.

MI MI bon long Vinsens, Indiana, Yunaeted Stet, long Febuwari 17, 1912. Hemia klosap tu yia bifo we Rul blong Kingdom blong Mesaea i stat, olsem Revelesen 12:​1-5 i talem. Wan yia bifo we mi mi bon, papa mama blong mi oli stat stadi Baebol wetem ol buk ya Studies in the Scriptures. Evri Sande long moning, Papa i ridimaot wan haf blong buk ya long famle, mo mifala i storebaot samting ya tugeta.

Mama i yusum evri samting we hem i lanem blong putum gudfala tingting long ol pikinini blong hem. Hem i wan woman we fasin blong hem i naes tumas​—hem i kaengud mo oltaem hem i wantem givhan long narafala. Long haos i gat fo blong mifala ol pikinini, be mama i givim lav blong hem i go long plante narafala pikinini tu we oli stap raonabaot long mifala. Hem i spenem taem wetem mifala. Hem i laekem tumas blong talem ol stori blong Baebol, mo singsing wetem mifala.

Be tu, mama i singaot plante defren brata we oli wok fultaem long minista wok oli kam long haos blong mifala. Olgeta ya oli stap wan no tu dei nomo, oli mekem miting mo oli givim pablik tok long haos blong mifala. Mifala i laekem tumas ol brata we oli yusum pijatok mo we oli talem stori long mifala. Wan dei long 1919, klosap wan yia afta we faswan bigfala faet blong wol i finis, brata we i kam visitim mifala i givim wan spesel tok long mifala ol pikinini. Hem i tokbaot fasin blong givim laef blong mifala i go long Jeova, mo hem i eksplenem olsem wanem samting ya i save jenisim ful laef blong mifala. Let long naet ya, bifo we mi go slip, mi prea long Papa blong mi long heven, mi talem long hem se mi wantem mekem wok blong hem blong olwe.

Be afta long 1922, sam narafala wari long laef oli mekem se mak ya i no moa stap long faswan ples long laef blong mi. Mifala i stap muf i go long plante ples, mekem se mifala i no moa stap joen wetem wan kongregesen blong ol man blong Jeova. Papa i wok long kampani blong ol tren, taswe hem i stap farawe long mifala. Mifala i no moa mekem stadi long Baebol oltaem. Long skul mi stap stadi blong kam wan man blong wokem pija blong mekem advetaesmen, mo mi stap mekem plan blong go long wan bigfala yunivesiti.

Mi Jenisim Mak Long Laef Blong Mi

Long medel blong ol yia 1930, fulwol i stat rere bakegen blong joen long bigfala faet. Mifala i stap laef long Klivlan, Ohaio, taem wan Witnes blong Jeova i kam prij long haos blong mifala. Naoia, mifala i rili stat tingbaot ol samting we mifala i bin lanem taem mifala i pikinini yet. Bigfala brata blong mi, Russell, hem i tinghevi long trutok, mo hem i tekem baptaes fastaem. Mi mi no olsem hem, tingting blong mi i olbaot lelebet. Be, long Febuwari 3, 1936, mi tu mi tekem baptaes. Mining blong fasin ya blong givim laef i go long Jeova, i kam klia moa long mi. Mi lan blong letem Jeova i lidim mi. Long sem yia ya, tufala sista blong mi, Kathryn mo Gertrude, tufala i tekem baptaes tu. Mifala evriwan i stat wok long fultaem minista wok.

Be samting ya i no minim se tingting blong mifala i stap long minista wok nomo. Mi lesingud taem waef blong brata blong mi i tokbaot wan naesfala gel we nem blong hem Ann. Hem i talem se gel ya i “glad tumas” taem hem i harem trutok, mo bambae hem i kam long ol miting long haos blong mifala. Long taem ya, Ann i wok olsem wan sekretari long wan ofis blong gavman, mo bifo we wan yia i pas, hem i tekem baptaes. Mi no mekem plan blong mared, be mi luksave se Ann i laekem trutok tumas. Hem i wantem mekem wok blong Jeova fultaem. Hem i no wan woman we i talem se “?Maet mi save mekem samting ya?” nogat. Oltaem hem i askem se: “?Wanem beswan rod blong mi save mekem samting ya?” Nao hem i traehad blong folem rod ya. Gudfala tingting ya we hem i gat long saed blong wok, i pulum mi. Antap long samting ya, hem i naes tumas, mo tede yet, hem i naes tumas long ae blong mi. Hem i kam waef blong mi, mo long semtaem hem i kam fren blong mi long fultaem wok blong prij.

Fultaem Minista Wok i Trenemgud Mifala

Long wok blong paenia, mifala i lanem olsem wanem blong haremgud nomata sipos mifala i sot long sam samting no mifala i gat plante samting. (Filipae 4:​11-​13) Wan dei, klosap tudak i kam mo mifala i no gat samting blong kakae. Mifala i gat faef selen nomo. Mifala i go long stoa blong man we i salem mit, mo mi askem long man ya se: “?Mitufala i save gat sam mit we mi pem long faef selen nomo?” Hem i lukluk mitufala, nao hem i katem fo pis mit blong givim long mitufala. Mi sua se fo pis mit ya i sas moa i bitim faef selen. Be, from samting ya mitufala i gat smol kakae.

Plante taem, ol man oli agensem mifala taem mifala i mekem wok blong prij. Long wan taon klosap long Sirakus, Niu Yok, mifala i stap long rod blong seremaot ol smol pepa. Mifala i werem ol kaen notisbod olsem klos, blong talemaot se bambae i gat wan spesel pablik tok. Nao i gat tu bigfala man oli holem mi. Wan blong tufala i talem se hem i wan polisman, be hem i no werem yunifom mo i no wantem soem baj blong hem long mi taem mi askem long hem. Long semtaem ya, Grant Suiter we i wok long Betel long Bruklin, i kamtru mo i talem se bambae mifala i go long polis stesen blong stretem bisnes ya. Biaen, hem i telefon i go long Sosaeti long Bruklin, mo long sem dei ya, oli talem long mi mo waef blong mi, blong go prij long rod bakegen, wetem notisbod mo ol smol pepa. Mifala i mekem olsem blong luk wanem bambae i hapen. Stret olsem mifala i tingbaot, polis i kam holem mifala bakegen. Be taem mifala i talem long olgeta se bambae oli go long kot from we oli no gat raet blong holem mifala, ale, oli letem mifala i go fri.

Nekis dei, wan pris i pulum plante stronghed yangfala blong kam mekem trabol long ples ya we mifala i stap mekem asembli long hem. Polis i no stap. Ol stronghed yangfala ya oli stat kilkilim ol plang long floa wetem ol bat blong besbol, mo oli pusumaot sam long ol man we oli stap lesin, oli godaon long ol stul blong olgeta. Ol yangfala ya oli go antap long platfom wetem wan flag blong Amerika, mo oli singaot se: “!Salut long flag! !Salut long flag!” Ale, oli stat sing long wan sing we nem blong hem “Beer Barrel Polka,” wan singsing we plante man Amerika oli save long hem. From samting ya, mifala i mas stopem asembli. Mifala i luksave klia mining blong ol tok blong Jisas taem hem i talem se: “Be yufala i no man blong wol ya, mi mi jusumaot yufala finis, mo mi tekemaot yufala long ol man blong wol ya. Taswe ol man blong wol ya oli no laekem yufala, oli agens long yufala.”​—Jon 15:19.

Pablik tok ya we mifala i bin kam wanples blong harem, i wan tok we J. F. Rutherford i bin givim. Long taem ya, hem i presiden blong Watch Tower Sosaeti. Mi wetem Ann, mitufala i stap sam dei moa long taon ya blong givim jans long ol man blong harem tok ya. Smol man oli agri blong lesin.

Rere Blong Prij Long Ol Narafala Kantri

Taem i pas, mo mifala i gat jans blong mekem wok blong God long sam defren rod. Sosaeti i singaot brata blong mi, Russell, wetem waef blong hem, Dorothy, tufala i go long faswan klas blong Skul blong Gilead. Biaen Sosaeti i sanem tufala i go prij olsem misinari long Kuba. Kathryn, sista blong mi, hem i stap long namba fo klas blong Gilead skul. Hem tu i go long Kuba. Biaen, hem i aot long ples ya blong go long Dominikan Ripablik, mo biaen bakegen, long Poto Riko. ?Be mi mo Ann, mitufala i mekem wanem?

Taem mitufala i harem nius long saed blong Skul blong Gilead, mo se Sosaeti i wantem sanem sam misinari i go long ol narafala kantri, mitufala i wantem tumas blong prij long ol narafala kantri. Fastaem, mitufala i ting se mitufala nomo bambae i mekem plan blong mitufala i go long Meksiko. Be biaen, mitufala i ting se i moa gud blong go long Skul blong Gilead, mo letem Sosaeti i sanem mitufala i go sam ples. Mitufala i luksave se hemia plan we Jeova i yusum.

Sosaeti i singaot mitufala blong go long namba fo klas blong Skul blong Gilead. Be smol taem bifo we kos ya i stat, N. H. Knorr, we i presiden blong Watch Tower Sosaeti long taem ya, i luksave se maet bambae Ann i faenem i had from we hem i bin kasem sik ya polio taem hem i pikinini yet. Brata Knorr i tokbaot samting ya wetem mi, mo hem i talem se i no waes blong sanem mitufala i go prij long wan narafala kantri.

Klosap tu yia biaen, taem mi stap wok blong mekemrere wan asembli, Brata Knorr i kam storeyan wetem mi bakegen. Hem i askem long mi sipos mitufala i intres yet blong joen long Skul blong Gilead. Hem i talem long mi se bambae oli no sanem mitufala i go long wan narafala kantri. Be, i gat narafala plan i stap blong mitufala. Ale, mitufala i joen blong namba naen klas we i stat long Febuwari 26, 1947.

Bambae mi neva fogetem taem ya. Ol kos oli rij tumas long saed blong spirit. Mifala i frengud wetem plante brata mo sista. Be hemia i no lastaem we mi joen wetem skul ya.

Long Wasington Mo Long Gilead Tu

Long taem ya, Skul blong Gilead i wan niufala skul. Gavman blong Yunaeted Stet i no savegud ol mak blong skul ya, taswe plante kwestin oli kamaot. Sosaeti i wantem se wan brata i mekem sam wok blong hem long Wasington. Ale, sam manis afta we mifala i kasem stefeket long Gilead, Sosaeti i sanem mitufala i go long ples ya. Wok blong mi i blong halpem ol brata mo sista we oli kam long narafala kantri blong stretem visa blong olgeta blong kam long Gilead. Mo tu, taem oli kasem stefeket blong skul finis, mi mas mekem ol pepa blong olgeta blong oli save go long narafala kantri blong mekem misinari wok. I gat sam haeman blong gavman we oli kaengud, mo oli wantem givhan long mifala. Be i gat sam we oli no laekem nating ol Witnes. Mo i gat sam we oli strong long saed blong politik, oli talem se mifala i stap wok haed wetem sam ogenaesesen we oli wantem sakemaot.

Wan taem mi go long ofis blong wan long ol man ya blong politik, nao hem i tok agensem mifala se mifala i no salut long flag, mo mifala i no joen long faet. Hem i tok strong long mi gogo, mi talem long hem se: “Ating yu save finis, be mi wantem talem long yu se, long ful wol i no gat wan faet we ol Witnes blong Jeova oli joen long hem. Mifala i no joen long ol bisnes blong wol. Mifala i no joen long ol faet mo politik blong wol. Mifala i no joen nating long ol bisnes ya. Mifala i stretem finis ol problem we yufala i stap traehad yet blong winim; mifala i gat fasin joengud long ogenaesesen blong mifala. . . . Naoia, ?yu yu wantem mifala blong mekem wanem? ?Yu wantem se mifala i gobak i folem rod blong yu, mo lego fasin joengud blong mifala?” Biaen, man ya i no moa talem wan samting.

Mi jusum tu dei long wan wik blong mekem olgeta pepa long ol ofis blong gavman. Mo antap long samting ya, mi mo waef blong mi, mitufala i wok olsem spesel paenia. Long taem ya, wok blong spesel paenia i minim se evri manis, mitufala i mas mekem 175 aoa long minista wok (biaen oli jenisim aoa i kamdaon long 140). Taswe, plante taem mitufala i stap prij let long naet. Mitufala i gat gudtaem. Mitufala i mekem stadi wetem plante famle, mo oli gohedgud long trutok. Mi mo Ann, mitufala i mekem disisen se bambae mitufala i no gat pikinini, be long saed blong spirit, mitufala i gat plante pikinini, mo smol bubu wetem pikinini blong olgeta tu. !Olgeta oli mekem mifala i glad tumas!

Let long 1948, mi kasem wan niufala wok. Brata Knorr i eksplenem long mi se Brata Schroeder, we hem i sekretari mo wan long ol tija blong Skul blong Gilead, bambae hem i bisi tumas wetem wan narafala wok. Taswe, Brata Knorr i askem long mi sipos mi wantem tij long klas blong Gilead taem oli nidim. Long Desemba 18, mi fraet lelebet taem mi kamtru long Gilead bakegen, long Saot Lansing, Niu Yok, wetem Ann. Fastaem, mitufala i stap sam wik nomo long Gilead, ale mitufala i gobak long Wasington. Be, sloslou, mitufala i stat spenem moa taem long Gilead, i bitim long Wasington.

Hem i long taem ya we, olsem mi talem antap, ol studen blong namba twanti wan klas blong Gilead oli kasem stefeket blong olgeta long Yanki Stadium, Niu Yok. From we mi mi wan long ol tija blong skul ya, mi gat jans blong joen long miting ya blong givimaot stefeket.

Wok Long Hedkwota Blong Wol

Long Febuwari 12, 1955, Sosaeti i putum mitufala long wan narafala wok. Mitufala i kam memba blong Betel famle long hedkwota blong ogenaesesen blong Jeova long wol. ?Samting ya i minim wanem long mitufala? Bigfala samting hemia se, bambae mitufala i mas rere blong mekem evri samting we oli askem long mitufala blong mekem, mo wokgud wetem ol narafala. I tru se mitufala i bin mekem samting ya bifo, be naoia, mitufala i haf blong wan bigfala kampani​—Betel famle long hedkwota blong ol Witnes blong Jeova. Mitufala i glad tumas blong akseptem niufala wok ya, olsem wan pruf se Jeova i lidim mitufala.

Bigfala haf blong wok blong mi, i blong traem stretem olkaen giaman toktok we ol man oli prentem long niuspepa. Plante niuspepa oli bin raetem giaman tok agensem ol Witnes, from we oli wantem tumas blong givim nius we i mekem man i sapraes. Mo tu, oli kasem ol stori ya from sam man we oli no laekem mifala. Taswe, mifala i traehad blong daonem ol giaman tok ya.

Brata Knorr i wantem meksua se mifala evriwan i gat wok blong mekem, taswe hem i givim plante defren kaen wok long mifala. Sam long ol wok ya we mi mekem oli givim jans long mi blong yusum trening we mi bin kasem long skul olsem man blong wokem pija blong mekem advetaesmen. Mo tu, mi wok long radyo blong Sosaeti, we oli kolem WBBR. I gat wok tu blong mekem long saed blong ol sinema we Sosaeti i wokem. Bighaf blong ol kos blong Gilead oli tokbaot ol tiokratik wok we ol man blong Jeova oli bin mekem longtaem bifo. Be, naoia Sosaeti i gat plan blong mekem se ol man we oli wosipim Jeova oli savegud ol tiokratik wok we i bin gohed long taem blong yumi. Plan i stap se, biaen, ol man long wol tu bambae oli kasem save long saed ya. Wan narafala trening we i kamaot long Skul blong Gilead, hemia we ol brata oli mas lan blong givim pablik tok. Ol brata we oli stap givim tok long ol kongregesen,a oli gat plante samting blong lanem long saed ya. Taswe, i gat fulap wok i stap blong mekem.

Wok Long Gilead Nomo

Long 1961, Sosaeti i mekem plan blong trenem ol elda we oli visitim ol kongregesen, mo ol brata we oli wok long ol branj ofis. Taswe, oli muvum Skul blong Gilead i go long Bruklin, long ples ya we bighaf blong ol ofis blong Watch Tower Sosaeti oli stap long hem. Ale, mi kambak long wok blong tij long ol klas​—be naoia mi no kam blong tij sam samtaem nomo, mi wan fultaem tija blong klas ya. !Hemia wan nambawan blesing! Mi bilif fulwan se Skul blong Gilead i wan presen we i kamaot long Jeova, wan presen we i karem blesing long fulwan ogenaesesen blong Jeova long wol.

Ol studen we oli joen long Skul blong Gilead long Bruklin, oli gat bigfala blesing we ol narafala oli no gat bifo, taem skul i stap long Saot Lansing. Skul i givim moa jans long ol brata blong givim tok, oli frengud wetem Hed Kampani mo Betel famle long hedkwota. Oli gat jans tu blong kasem trening long ol wok blong ofis, ol wok long Betel, mo wok blong prentem ol buk.

Ol yia oli pas, mo namba blong studen i jenis, olsem namba blong tija tu. Ples we skul i stanap i jenis plante taem tu. Naoia skul ya i stap long naesfala ples ya Pateson, long Niu Yok.

Wok Wetem Ol Studen

!Mi bin glad tumas blong tijim ol klas ya! Olgeta we oli joen long ol klas ya oli ol yangfala we oli no wantem joen long ol bisnes blong olfala wol ya. Oli lego famle blong olgeta, ol fren, kantri blong olgeta, mo ol man we oli toktok lanwis blong olgeta. Bambae oli go long wan kantri we weta, kakae, mo evri samting long hem i defren. Oli no save long wanem kantri bambae Sosaeti i sanem olgeta i go long hem, be mak blong olgeta hemia: oli wantem wok olsem misinari. Ol man olsemia, yu no nidim blong traem pulum tingting blong olgeta.

Taem mi kam long klas, oltaem mi wantem se ol studen oli haremgud, oli no fraet long mi. Wan man i no save lanemgud ol samting sipos hem i fraet mo i wari. Tru ya, mi mi tija, be bifo mi tu mi wan studen, mi save oli filing blong olgeta. Mi bin sidaon long ol jea ya bifo. Yes, olgeta oli wokhad mo oli lanem plante samting long Gilead, be mi wantem tumas se oli haremgud taem oli stap long Gilead.

Mi save se taem Sosaeti i sanem olgeta i go long niufala wok blong olgeta, bambae oli nidim sam samting blong givhan long olgeta. Oli nidim wan strong bilif. Oli nidim tingting daon​—fasin ya i impoten tumas. Oli mas lan blong joengud wetem ol defren kaen man, bambae oli mas winim ol hadtaem, mo rere blong fogif wetem fulhat blong olgeta. Oli mas gohed blong wokem ol frut blong tabu spirit. Oli nidim tu blong lavem ol man we oli go prij long olgeta, mo lavem wok ya we Sosaeti i sanem olgeta blong mekem. Mi pulum ol studen blong tingbaot ol samting ya taem oli kam long Gilead.

Mi no save hamas studen we mi bin tijim. Be mi save se mi laekem olgeta evriwan. Mi spenem faef manis wetem olgeta wanwan klas ya, mo mi frengud wetem olgeta. Long dei blong givim stefeket, taem mi luk olgeta oli kam antap long platfom, oli tekem stefeket, mi save se oli winim kos ya, mo i no longtaem bambae oli lego mifala. Mi harem olsem se wan haf blong famle blong mi i go. Taem mi luk ol yangfala ya we oli givim beswan blong olgeta blong mekem wok ya, samting ya i pulum filing blong mi mo i mekem mi mi lavem olgeta tumas.

Plante yia biaen, taem oli kambak blong visitim mifala, mi harem we oli tokbaot gudfala frut we oli kasem long minista wok, mo mi save se oli gohed gud long wok ya we oli bin kasem trening from. ?Wanem kaen filing we mi gat long taem olsem? Mi save talem stret se, hem i wan nambawan filing.

Lukluk i Go Long Fiuja

Naoia, ae blong mi i no moa gud, mo samting ya i mekem se samtaem mi harem nogud. Mi no moa save tij long ol klas blong Gilead. Fastaem, i no isi blong lego wok ya. Be long laef blong mi, mi lan blong akseptem ol jenis mo gohed nomo long ol defren wok. Plante taem mi tingbaot aposol Pol mo trabol blong hem we hem i talem se i olsem “nil blong aranis.” Pol i prea tri taem blong askem Masta blong tekemaot trabol ya, be Masta i ansa long hem i se: “Mi mi save givhan long yu gladhat blong mi, mo hemia i naf blong holem yu. Taem we yu yu no gat paoa, paoa blong mi i save kam strong moa long yu.” (2 Korin 12:​7-​10) Pol i gohed long laef blong hem, wetem trabol ya. Sipos hem i naf blong mekem samting ya, mi mas traehad tu. Nating se mi no moa save tijim ol klas blong Gilead, be mi glad tumas from we mi stap wok long wan ofis klosap long skul ya. Samtaem, mi gat jans blong storeyan wetem ol studen, mo mi haremgud tumas blong luk gudfala tingting we oli gat.

I nambawan tumas blong tingbaot fiuja blong yumi. Tede, yumi stap wokem wan fandesen blong fiuja. Gilead i wan bigfala haf blong fandesen ya. Afta long bigfala trabol, taem oli openem ol buk we Revelesen 20:12 i tokbaot, bambae i gat wan bigfala wok blong tijim ol man long ol rod blong God. (Aesea 11:9) Be i no hemia nomo. Hemia i jes wan stat. Long laef we i no save finis, bambae i gat moa samting blong lanem long saed blong Jeova, mo i gat moa samting blong mekem taem God i talemaot ol stamba tingting blong hem long yumi. Mi trastem fulwan se Jeova i naf blong mekem olgeta promes blong hem oli kamtru, mo mi wantem stap laef long taem ya blong wok folem rod we bambae Jeova i lidim yumi long hem.

[Futnot]

[Tok Blong Pija Long Pej 26]

Miting blong givimaot stefeket blong Gilead Skul, long 1953, Yanki Stadium, Niu Yok

[Tok Blong Pija Long Pej 26]

Gertrude, mi, Kathryn, mo Russell

[Tok Blong Pija Long Pej 26]

Taem mi wok wetem N. H. Knorr (lefsaed) mo M. G. Henschel blong rerem ol asembli

[Tok Blong Pija Long Pej 26]

Long studio blong radyo ya WBBR

[Tok Blong Pija Long Pej 29]

Long klasrum blong Gilead

[Tok Blong Pija Long Pej 31]

Mi mo Ann