Mi Muf i Go Long Narafala Ples Taem Mi Gat 80 Yia

STORE BLONG GWENDOLINE MATTHEWS

Taem mi kasem 80 yia, mi mo hasban blong mi i tekem disisen blong aot long kantri blong mitufala. Mitufala i putum olgeta samting blong mitufala long wan trak we mitufala i rentem, mo mitufala i lego Engglan blong muf i go long Spen. Mitufala i no save toktok lanwis blong Spen, mo mitufala i go long saot blong Spen, wan ples we i longwe long ol narafala ples long Spen we ol Engglis turis oli go long hem. Plante fren blong mitufala oli ting se mitufala i krangke, be mi mi glad blong rimemba se Ebraham i gat 75 yia taem hem i aot long Uru.

TAEM mitufala i tingbaot ol yia we mitufala i stap long Spen stat long Epril 1992, mitufala i luk we oli ol nambawan yia long laef blong mitufala. Be bifo mi eksplenem long yufala from wanem mitufala i aot long Engglan blong go long Spen, bambae mi talem long yufala olsem wanem laef blong mitufala long wok blong Jeova i pusum mitufala blong tekem bigfala disisen ya.

Trutok Blong Baebol i Jenisim Laef Blong Mifala

Mi gruap long saotwes London, long Engglan, long wan famle we i gat skul finis. Mama blong mi i tekem mi mo sista blong mi i go long ol defren jyos, from we hem i hanggri long saed long speret. Papa blong mi hem i sik bigwan from tibi, taswe hem i no save kam wetem mifala. Be hem i laekem tumas blong ridim Baebol, mo hem i makem olgeta haf we oli givim moa save long hem. Wan sas samting we mi mi gat yet, hemia olfala Baebol ya blong hem.

Long yia 1925, taem mi gat 14 yia, mifala i faenem wan pepa we wan man i bin putum aninit long doa. Pepa ya i singaot mifala blong kam lesin long wan pablik tok, long taon hol blong Wes Ham. Mama blong mi mo wan woman we i stap kolosap long haos blong mifala, tufala ya oli go blong harem tok ya, mo mi wetem sista blong mi i joenem tufala ya. Tok ya “Plante Milyan Man We Oli Laef Naoia, Bambae Oli Neva Ded Samtaem,” i planem sid blong trutok blong Baebol, long hat blong mama blong mi.

Sam manis afta, Papa i ded taem hem i gat 38 yia. Mifala i harem nogud tumas from we hem i lus, mo from we mifala i no gat wan samting nating. Long sevis blong berem hem we oli mekem long Anglikan jyos long taon blong mifala, mama blong mi i sek. Hem i harem pris i talem se Papa i go long heven. Mama i bin ridim long Baebol se ol dedman oli stap slip long beregraon. Mo hem i bilif strong se wan dei, bambae Papa i save laef bakegen blong olwe long wol. (Ol Sam 37:​9-​11, 29; 146:​3, 4; Eklesiastis 9:5; Ol Wok 24:15; Revelesen 21:​3, 4) Nao hem i suagud se hem i mas joen wetem ol man we oli tijim Tok blong God. Ale hem i mekem tingting blong hem i strong se hem i mas save moa long saed blong ol Intenasnal Baebol Studen. Hemia nem blong ol Wetnes blong Jeova long taem bifo.

Mifala i no gat mane blong pem bas, taswe evri wik mifala i mas wokbaot 2 haoa blong go long ol miting blong ol Wetnes blong Jeova. Afta, mifala i spenem tu moa haoa blong gobak long haos. Be mifala i laekem tumas ol miting ya, mifala i neva mestem wan, nating se samtaem i gat tik klaod we i kavremap London. I no longtaem afta, Mama i givim laef blong hem i go long Jeova mo i tekem baptaes. Long 1927, mi tu mi tekem baptaes.

Nating se mifala i no gat plante mane, oltaem Mama i tijim mi se olgeta samting long saed long speret oli moa impoten. Matyu 6:​33 i wan vas we hem i laekem tumas, mo laef blong hem i rili soem se hem i ‘lukaot kingdom blong God fastaem.’ Long 1935, bifo we hem i ded kwiktaem from kansa, hem i stap mekem plan blong ansa long wan tok we i singaot moa fultaem paenia blong muf i go wok long Franis.

Ol Gudfala Eksampel We Oli Mekem Mifala i Kam Strong

Long taem bifo, sam man oli kam long ol miting long London blong talemaot tingting blong olgeta nomo, mo oli mekem plante strong rao i kamaot. Be oltaem Mama i talem se, sipos mifala i lego ogenaesesen blong Jeova mifala i no gat fasin blong stap tru, from we mifala i lanem plante samting finis long hem. Sam samtaem, Joseph F. Rutherford, presiden blong Watch Tower Bible and Tract Society long ol yia ya, hem i kam visitim mifala mo i pusum mifala blong stap tru mo gohed long wok blong mifala.

Mi rimemba we Brata Rutherford hem i kaen, mo i isi blong toktok wetem hem. Taem mi no kasem 20 yia yet, hem i kam wetem mifala long wan wokbaot we kongregesen blong London i mekem. Hem i luksave se, mi mi wan yangfala we i sem. From we mi mi gat wan kamera, hem i askem long mi sipos mi wantem tekem wan foto blong hem. Mi holem foto ya kam kasem naoia olsem wan samting we mi laekem tumas.

I no longtaem afta, wan samting i hapen we i soem long mi se ol man we oli lidim Kristin kongregesen, oli defren long ol lida blong wol ya. Mi stap wok olsem haosgel long wan bigfala haos long London. Wan dei, Franz von Papen, wan man we i wok wetem Hitler, hem i kam kakae long haos ya. Hem i werem wan spesel strap wetem wan naef blong faet long hem, mo hem i no wantem tekemaot strap ya taem hem i kakae. Mi foldaon long naef ya mo mi kafsaedem sup we mi stap karem. Hem i kros long mi, mo i talem se sipos mi stap long Jemani oli save sutum mi i ded wetem masket from wan mastik olsemia. !Afta long samting ya, mi stap longwe long hem!

Wan nambawan asembli, hemia taem mi harem Brata Rutherford i toktok long Aleksanda Palas long 1931. Long ples ya, mifala i glad blong tekem nyufala nem ya, ol Wetnes blong Jeova. (Aesea 43:10, 12) Tu yia afta, long 1933, mi statem wok blong paenia, hemia wok blong prij fultaem. Narafala blesing we mi kasem long ol yia bifo, hemia blong wok wetem sam gudfala yangfala man, we biaen oli kam misinari long ol kantri farawe. I gat Claude Goodman, Harold King, John Cooke, mo Edwin Skinner. Nambawan eksampel blong olgeta ya i mekem se mi tu mi wantem go prij long wan narafala kantri.

Wok Blong Paenia Long Is Anglia

Mi mekem wok blong paenia long Is Anglia (Is blong Engglan). I nidim bigfala glad mo strong tingting blong prij long ples ya. Blong kavremap bigfala teritori blong mifala, mifala i mas yusum baskel blong go long ol wanwan taon mo wanwan velej, mo mifala i rentem wan rum blong slip long hem. Long Anglia i no gat plante kongregesen, taswe mi mo sista we i wok wetem mi, mitufala i toktok tugeta long saed blong olgeta haf blong ol miting evri wik. Long wok blong prij, mitufala i seremaot plante handred buk mo buklet we oli tokbaot stampa tingting blong God.

Wan nambawan samting i kamaot taem mitufala i go prij long wan haeman blong jyos long Engglan. Long plante ples, mifala i visitim haeman blong Anglikan jyos laswan, from plante taem oli mekem trabol long mifala taem oli save se mifala i talemaot gud nyus. Be long taon ya, evri man i talem gudfala tok long saed long haeman ya. Hem i go luk olgeta sikman, hem i givim sam buk long ol man we oli laekem blong ridim ol buk, mo hem i go visitim ol man long jyos blong hem long haos blong olgeta, blong eksplenem Baebol long olgeta.

Tru, taem mitufala i go prij long hem, hem i kaengud long mitufala mo hem i tekem sam buk. Mo tu hem i talem long mitufala se, sipos sam man long velej oli wantem sam buk be oli no naf blong pem, bambae hem i pem blong olgeta. Afta, mitufala i kasem save se samting we i hapen long hem long Faswan Bigfala Faet Blong Wol, i pusum hem blong holem pis mo mekem i gud long ol man long velej blong hem. Bifo we mitufala i lego hem, hem i blesem mitufala mo i pulum mitufala blong gohed long gudfala wok blong mitufala. Laswan tok we hem i talem long mitufala, hemia tok blong Namba 6:​24: “Masta bambae i blesem yutufala ya, mo bambae i lukaot long yutufala ya.”​—King James Version.

Mama blong mi i ded tu yia afta we mi statem wok blong paenia, nao mi gobak long London, we mi no moa gat mane mo famle tu. Wan naesfala Wetnes woman blong Skotlan i letem mi mi slip long haos blong hem, mo hem i sapotem mi long taem we Mama i ded. Mo tu, hem i leftemap tingting blong mi blong gohed long wok blong paenia. Ale, mi gobak long Is Anglia wetem wan narafala paenia, nem blong hem, Julia Fairfax. Mitufala i fiksimap wan olfala haos we i gat wil mo we trak i save pulum, mo mitufala i yusum wan trakta no wan kameong blong muvum haos ya i go long ol defren ples. Wetem mitufala, i gat wan olfala man mo woman blong hem, Albert mo Ethel Abbott. Tufala i gat wan smol haos tu we trak i save pulum. Mifala i gohed long wok blong prij tugeta. Albert mo Ethel i kam olsem papa mo mama blong mi.

Taem mi gohed long wok blong paenia long Kambrijsia, mi mitim John Matthews, wan gudfala Kristin brata we i soem finis se i stap tru long Jeova long hadtaem. Long 1940, i no longtaem afta we Namba tu Bigfala Faet Blong Wol i stat, mitufala i mared.

Taem Blong Faet Mo Pikinini

Taem mitufala i jes mared, mitufala i stap long wan smosmol haos we trak i save pulum, hem i olsem wan smosmol rum nomo, mo mitufala i yusum wan gudfala moto blong go prij. Wan yia afta we mitufala i mared, kot i panisim John se hem i mas go wok long wan plantesin, from we hem i no wantem joen long ami, wan disisen we i stanap long bilif blong hem long Baebol. (Aesea 2:4) From samting ya, mitufala i mas stopem wok blong paenia. Be panis ya we John i kasem i wan blesing, from we mi mi gat bel mo wok blong hem i mekem se hem i naf blong pem ol samting we mifala i nidim.

Mitufala i haremgud long ol spesel miting long taem blong faet, nating se i no isi blong mekem ol miting ya. Long 1941, mi mi gat bel wetem faswan bebi blong mi, be mi mo John i ron long moto go kasem Manjesta, we i stap 300 kilomita longwe. Long rod, mitufala i luk plante taon we bom i spolemgud olgeta, taswe mitufala i no save sipos miting bambae i gohed no nogat. Fri Tred Hol long medel blong Manjesta, i fulapgud long ol Wetnes blong plante defren ples long Engglan, mo olgeta tok long miting ya oli gohed folem plan we ol brata oli bin mekem.

Man we i givim laswan tok long asembli ya, i talem long en blong tok blong hem se olgeta man oli mas aot long ples ya kwiktaem, from we i gat sam plen oli stap kam blong sakem bom. Advaes ya i kam long stret taem. Mifala i jes aot long ples blong miting ya nao mifala i harem ol wesil oli krae blong givim woning, mo ol masket oli faerap blong sutum plen. Mifala i tanraon, mo mifala i luk bitim 24 plen we oli stap sakem bom i go long medel blong taon ya. Nating se i gat faea mo smok, mifala i save luk haos we mifala i bin sidaon long hem i no longtaem bifo. Ol bom oli spolem hem fulwan. Mifala i glad tumas we i no gat wan brata no sista i ded.

From we mitufala i mas trenem pikinini blong mitufala, mitufala i no save wok olsem paenia, be mitufala i glad oltaem blong singaot ol elda we oli wokbaot blong visitim ol kongregesen, mo ol paenia we oli no gat haos, blong oli kam stap long haos blong mitufala. Wan taem, i gat sikis paenia we oli stap sam manis long haos blong mitufala. Tru, gudfala kampani blong olgeta ya i givhan long gel blong mitufala, Eunice, from we long 1961, taem hem i gat 15 yia, hem i kam wan paenia. Mi sore blong talem se boe blong mitufala David, i lego wok blong Jeova taem hem i kam bigwan. Mo narafala gel blong mitufala, Linda, hem i ded long taem blong faet.

Disisen Blong Mitufala Blong Muf i Go Long Spen

Eksampel blong mama blong mi mo ol tok we hem i talem blong leftemap tingting blong mi, oli bin pusum mi blong wantem mekem wok blong misinari, mo mi neva fogetem mak ya we mi wantem kasem. Taswe, mitufala i glad long 1973 taem Eunice i aot long Engglan blong go long Spen, from we i nidim moa man blong talemaot Kingdom longwe. Tru, mitufala i sore blong luk se hem i mas lego mitufala, be tu, mitufala i praod se hem i wantem wok long wan narafala kantri.

Mitufala i go visitim hem plante taem long Spen, mekem se mitufala i savegud kantri ya. Mi mo John i go visitim hem long fo defren ples we hem i prij long olgeta. Be paoa blong mitufala i stap lus from we ol yia oli pas. Mi gat problem wetem hat mo trot blong mi, mo John hem i foldaon mo i spolem bodi blong hem. Ol joen blong mitufala oli soa tu. Nating se mitufala i nidim we Eunice i givhan long mitufala, mitufala i no wantem se hem i livim Spen blong lukaot long mitufala.

Mitufala i toktok wetem Eunice, mo mifala i prea blong tekem wan gudfala disisen. Eunice i agri blong kambak long haos blong givhan long mitufala. Be mitufala i tekem disisen blong aot long Engglan mo muf i go long Spen blong stap wetem hem. I tru se mi no save kam wan misinari, be mi save sapotem gel blong mi, mo tufala paenia we oli wok wetem hem fultaem. Tufala gel ya we oli bin wok wetem Eunice blong kolosap 15 yia, nem blong tufala Nuria mo Ana, tufala i kam olsem prapa gel blong mitufala. Tufala i glad se mitufala i stap wetem olgeta, nating se oli save jenisim ples we oli wok long hem blong go long narafala ples.

Sikis yia i pas finis, stat long taem we mitufala i tekem disisen ya. Naoia, paoa long bodi blong mitufala i stap sem mak, i no godaon moa, mo mitufala i haremgud moa long laef blong mitufala. Mi no save toktokgud long lanwis blong Spen yet, be samting ya i no blokem mi blong go prij. Mi mo Jon i harem olsem se smol kongregesen long Ekstremadura long saotwes blong Spen, hem i stret ples blong mitufala.

Laef long Spen i tijim mi long plante samting, long saed long wok blong yumi blong talemaot Kingdom long olgeta ples blong wol. Naoia, mi kasem save moa long tok blong Jisas Kraes se: “Garen ya hemia wol ya.”​—Matyu 13:38.

[Tok Blong Pija Long Pej 28]

Wok blong paenia long ol yia afta 1930