Paoa Blong Stanap Strong Tru Long Sam Bigfala Traem

ÉVA JOSEFSSON I TALEM STORE YA

Wan smol grup blong mifala i hivap long distrik blong Uypes long Budapes, Hangari, blong mekem wan smol miting bifo we mifala i go mekem Kristin wok blong prij. Hemia long 1939, i no longtaem bifo we Namba Tu Bigfala Faet Blong Wol i stat, mo oli putum tabu long wok blong prij blong ol Wetnes blong Jeova long Hangari. Long ol yia ya, plante taem, polis i holem olgeta we oli joen long wok blong tijim Baebol long olgeta man.

HEMIA fastaem we mi joen long wok blong prij, mo ol narafala oli luk se mi fraet lelebet mo fes blong mi i waet. Wan olfala Kristin brata i lukluk mi mo i talem se: “Éva, yu no nid blong fraet. Wan man i no save kasem ona we i hae moa, i bitim ona ya blong mekem wok blong Jeova.” Ol tok ya, we oli givhan long man blong kam strong moa mo oli soem fasin blong tingbaot narafala, oli givim paoa long mi tru long plante bigfala traem.

Mi Kamaot Long Wan Famle Jyu

Mi mi fasbon long wan famle Jyu we i gat faef pikinini. Mama blong mi i no glad long skul blong ol man Jyu, ale hem i stat blong stadi long sam narafala skul. Long rod ya nao hem i mitim Erzsébet Slézinger, wan narafala woman Jyu we i stap lukaot trutok blong Baebol tu. Erzsébet i mekem se Mama i mitim ol Wetnes blong Jeova, mo risal blong samting ya se, mi tu, mi intres bigwan long ol tijing blong Baebol. Smoltaem biaen, mi stat blong toktok wetem ol narafala long ol samting we mi stap kasem save long hem.

Long hot taem blong 1941, taem mi kasem 18 yia, mi tekem baptaes long Danub Reva blong soem se mi givim laef blong mi long Jeova. Mama i tekem baptaes long sem taem, be Papa i no joen long nyufala Kristin bilif blong mifala. I no longtaem afta we mi baptaes, mi mekem plan blong kam wan paenia, hemia i minim se mi joen long wok blong prij fultaem. Mi nidim blong pem wan baskel, taswe mi stat blong wok long rum blong sayens blong wan bigfala kampani blong wokem kaliko.

Stat Blong Ol Traem

Long taem ya, ol Nasi oli rulum Hangari finis, mo sam man Jemani oli lukaot long faktri we mi wok long hem. Wan dei, oli singaot ol wokman blong kam fored blong ol daerekta blong mekem wan promes blong stap tru long ol Nasi. Oli talem se olgeta we oli no wantem obei bambae oli kasem bigfala trabol. Ale long seremoni we oli mekem, oli talem long evriwan blong mekem saen blong ona long Hitler. Mi stanap wetem respek, be mi no mekem saen ya. Long semfala dei ya, ol daerekta oli singaot mi blong go long ofis, oli givim pei blong mi, mo oli sakemaot mi long wok ya. Long taem ya, i had tumas blong faenem wan wok, taswe mi no moa save nao long plan blong mi blong mekem wok blong paenia. Be, long nekis dei, mi faenem wan narafala wok, wetem pei we i moagud.

Naoia, plan blong mi blong paenia i save kamtru. Mi mekem wok blong paenia wetem plante defren sista, mo laswan blong olgeta, hemia Juliska Asztalos. Taem mifala i prij, mifala i yusum Baebol nomo, mifala i no gat buk blong seremaot. Taem mifala i faenem sam man we oli intres, mifala i go luk olgeta bakegen, mo letem olgeta oli ridim sam buk blong mifala.

Bakegen mo bakegen, mi mo Juliska i mas jenisim teritori blong mitufala. Hemia from we, taem wan pris i faenemaot se mitufala i stap go luk ‘ol sipsip blong hem,’ hem i mekem wan tok long jyos blong hem, mo hem i givim oda long ol man blong ripotem long hem no long polis ol Wetnes blong Jeova we oli kam visitim olgeta. Ale, taem sam man we oli gat kaengud fasin oli talemaot ol tok blong hem long mitufala, mitufala i muf i go long wan narafala ples.

Wan dei, mi mo Juliska i toktok long wan yangfala boe we i soem intres. Mitufala i mekem plan blong gobak blong livim sam buk blong mitufala wetem hem, blong i save ridim. Be taem mitufala i gobak, polis i stap wet long mitufala. Oli holem mitufala mo oli karem mitufala i go long ofis blong polis long Dunavese. Oli bin yusum yangfala boe ya olsem wan trap blong holem mitufala. Taem mitufala i kasem ofis blong polis, mitufala i luk wan pris long ples ya, mo mitufala i kasem save se hem tu i joen long trabol ya.

Traem Blong Mi We i Had Moa i Bitim Ol Narafala

Long ofis blong polis, oli sevem olgeta hea blong mi, mo mi mas stanap neked long fored blong kolosap 12 polisman. Oli askem plante kwestin long mi, blong save hu ya lida blong mifala long Hangari. Mi eksplenem se mifala i gat wan lida nomo, Jisas Kraes. Ale oli kilim mi strong tumas wetem ol stik blong olgeta, be mi no givim nem blong ol Kristin brata blong mi.

Afta long samting ya, oli fasem tufala leg blong mi, mo oli fasem tufala han blong mi antap long hed blong mi tu. Ale, wan afta narawan oli repem mi, i gat wan polisman nomo we i no fosem mi. Tri yia afta, mi gat sam mak yet long han blong mi long ples we oli fasem tufala. Oli kilim mi strong bitim mak, mo from samting ya, oli putum mi mi stap blong tu wik long wan rum aninit long graon gogo ol bigfala kil long bodi blong mi oli kamgud lelebet.

Wan Taem We Mi Haremgud Lelebet

Biaen, oli karem mi mi go long presin blong Nagykanisa. I gat plante Wetnes blong Jeova long ples ya. Nating se mifala i stap kalabus, mi haremgud lelebet long tu yia we mi stap ya. Long fasin haed, mifala i mekem olgeta miting blong mifala, mo grup blong mifala i kolosap sem mak long wan kongregesen.a Plante taem, mifala i gat jans blong prij long ol man raonabaot long mifala tu. Long presin ya mi mitim Olga Slézinger, we i stret sista blong Erzsébet Slézinger, woman ya we i bin givhan long mi mo mama blong mi blong kasem save long trutok.

Long 1944, ol Nasi ol tekem disisen blong kilim i ded olgeta Jyu blong Hangari, long sem fasin we oli bin kilim i ded olgeta Jyu long ol narafala ples we oli rulum. Wan dei, oli kam tekem mi mo Olga. Oli putum mitufala long wan tren we oli yusum bifo blong karem ol buluk. Afta long trep ya we i had tumas tru long Jekoslovakia, mifala i kasem en blong rod, long saot blong Polan, hemia kalabus blong ded blong Oswits.

Mi Laef Tru Long Oswits

Mi harem olsem se mi stap sef taem mi stap wetem Olga. Hem i save laf, nating se i gat hadtaem tumas. Taem mitufala i kasem Oswits, mitufala i pas long Dokta Mengele, wan man we i nogud we i nogud. Taem sam nyufala man oli kam long kamp, dokta ya i seraotem olgeta we oli naf blong wok long olgeta we oli no naf. Ale hem i sanem olgeta we oli no naf oli go long ol rum we oli fulap long posen gas, hemia blong kilim olgeta oli ded. Taem mitufala i kam long Mengele, hem i askem long Olga se: “?Yu yu gat hamas yia?”

Olga i no fraet, mo wetem ol ae we oli smael, hem i ansa se: “20.” Samting we i tru se, hem i gat 40 yia finis. Mengele i laf, mo i letem hem i go long raet saed wetem olgeta we oli stap laef.

Oli putum wan mak long klos blong olgeta presina long Oswits. Ol Jyu oli gat Sta blong Deved, mo ol Wetnes blong Jeova oli gat wan saen we i gat tri saed blong hem, we i blu mo i red lelebet. Taem oli wantem somap Sta blong Deved long klos blong mitufala, mitufala i eksplenem se mitufala i Wetnes blong Jeova, mo mitufala i wantem saen ya we i gat tri saed blong hem, we i blu mo red lelebet. I no se mitufala i sem we mitufala i Jyu, be naoia, mitufala i Wetnes blong Jeova. Oli kikim mitufala mo kilim mitufala wetem stik, blong traem fosem mitufala blong tekem saen blong ol Jyu. Be mitufala i stanap strong gogo kasem we oli agri blong putum saen blong ol Wetnes blong Jeova long klos blong mitufala.

Sam taem i pas, nao mi mitim stret sista blong mi, Elvira, we hem i tri yia moa yangfala long mi. Mifala i seven long famle, mo ol Nasi oli karem mifala evriwan i go long Oswits. Be oli jusum mi mo Elvira nomo se mitufala i naf blong wok. Papa, Mama, mo tri brata sista blong mitufala oli ded long ol gas rum. Elvira i no wan Wetnes long taem ya, mo mitufala i no stap long sem ples long kamp ya. Hem i no ded long kamp, mo afta, hem i muf i go long Yunaeted Stet. Long Pitsbeg, Pensylvania, hem i kam wan Wetnes, mo hem i ded long ples ya, long 1973.

Mi Laef Tru Long Ol Narafala Kamp

Long koltaem blong 1944-1945, ol man Jemani oli tekem disisen blong karemaot olgeta presina long Oswits, from we ol man Rasia oli stap kam kolosap. Taswe, oli tekem mifala i go long Bergen-Belsen, long Not blong Jemani. I no longtaem afta we mifala i kasem ples ya, oli sanem mi mo Olga i go long Bronsjweik. Oli givim wok long mitufala blong klinim ol doti we i stap olbaot afta we ol plen blong ol kantri blong Wes oli sakem plante bom long taon ya. Mi mo Olga i tokbaot samting ya tugeta. Mitufala i no sua sipos wok ya i agensem disisen blong mitufala blong no joen nating long faet, taswe mitufala i tekem disisen blong no mekem wok ya.

Disisen blong mitufala i mekem ol gad oli kros. Oli kilim mitufala wetem wan wip we oli wokem long skin blong buluk, mo oli karem mitufala i go long fored blong wan grup blong soldia we oli rere blong sutum mitufala i ded wetem masket. Oli givim wan menet long mitufala blong tingting bakegen long disisen blong mitufala, mo oli talem se sipos mitufala i no jenisim disisen ya, bambae oli sutum mitufala. Mitufala i talem se mitufala i no nidim blong tingting bakegen long samting ya, from we mitufala i holemstrong disisen blong mitufala. Nating se i olsem, oli no save sutum mitufala from we jif blong kamp i no stap, mo hem nomo i gat raet blong givim oda blong sutum wan man. Taswe, oli mas wet.

Ale, oli fosem mitufala blong stanap fuldei long yad blong kamp. Tu soldia wetem masket oli gad long mitufala, mo oli jenisim ol gad ya evri tu haoa. Oli no givim kakae long mitufala, mo mitufala i harem nogud tumas from we long taem ya, long Febuwari, ples ya i kolkol tumas. Wan wik i pas olsem, be jif blong kamp i no kambak yet. Taswe oli putum mitufala long bak blong wan kameong, mo mitufala i sapraes blong luk se oli karem mitufala i gobak long Bergen-Belsen bakegen.

Be long taem ya, helt blong mi mo Olga i kam nogud finis. Mi bin lusum kolosap olgeta hea blong mi, mo mi gat strong fiva. Mi mas traehad wetem ful paoa blong mi jes blong wok lelebet. Kabis supsup we i laet tumas mo smol pis bred we oli givim evri dei, oli no naf. Be mifala i mas wok from we oli kilim i ded olgeta we oli no gat naf paoa blong wok. Ol sista blong Jemani we oli wok wetem mi long kijin oli givhan long mi blong spel smol. Taem ol gad oli kam blong jekemap wok blong mifala, ol sista oli singaotem mi, nao mi stanap long fored blong tebel blong wok, mo mi mekem olsem se mi wok strong.

Wan dei, Olga i no gat naf paoa blong go long ples blong wok blong hem, mo afta long samting ya, mifala i no moa luk hem. Mi lusum wan fren we i no fraet, i bin stap oltaem kolosap long mi, mo i givhan bigwan long mi tru long ol had manis we mi stap long ol kamp. Hem i wan disaepol blong Masta blong yumi, Jisas Kraes, we tabu speret i makemaot hem, taswe i sua se wantaem nomo hem i kasem praes blong hem long heven.—Revelesen 14:13.

Mi Kam Fri, Mo Laef Blong Mi Afta We Mi Kamaot

Faet i finis long Mei 1945, be taem mifala i kam fri, mi mi slak bitim mak, mekem se mi no save haremgud we ol strong fasin agens oli finis. Mi no naf tu blong joen long ol grup blong presina we oli kam fri, we oli mekem trep i go long ol kantri we oli glad blong welkamem olgeta. Mi stap tri manis long wan hospital blong kasem paoa bakegen. Biaen, mi go long Swiden, mo kantri ya i kam nyufala ples blong mi. Kwiktaem nomo, mi faenem ol Kristin brata mo sista blong mi, mo samtaem biaen, mi joen bakegen long nambawan wok ya blong prij.

Long 1949, mi maredem Lennart Josefsson, we long plante yia hem i bin mekem wok blong elda we i goraon blong visitim ol kongregesen blong ol Wetnes blong Jeova. Hem tu i bin stap long kalabus long taem blong Namba Tu Bigfala Faet blong Wol, from we hem i holemstrong bilif blong hem. Mitufala i statem laef blong mitufala tugeta long wok blong paenia long Septemba 1, 1949, mo oli sanem mitufala i go prij long taon blong Boras. Long ol faswan yia we mitufala i stap long ples ya, mitufala i mekem ten Baebol stadi evri wik wetem sam man we oli intres. Mitufala i haremgud tumas blong luk se naen yia biaen, i gat tri kongregesen long Boras, mo naoia i gat faef kongregesen.

Mi no gohed longtaem long wok blong paenia from we long 1950, mitufala i gat wan pikinini gel, mo tu yia afta, wan pikinini boe. Ale, mi gat nambawan jans blong tijim tufala pikinini blong mitufala long trutok ya we i sas tumas, we gudfala brata ya long Hangari i tijim mi long hem taem mi gat 16 yia nomo. Hem i bin talem se: “Wan man i no save kasem ona we i hae moa, i bitim ona ya blong mekem wok blong Jeova.”

Taem mi tingtingbak long laef blong mi, mi luk se mi kasem save long trutok ya we disaepol Jemes i raetem taem hem i tokbaot fasin blong Job blong stanap strong. Hem i talem se: “[Jeova] i kaen tumas, mo i gat sore long man.” (Jemes 5:​11) Nating se mi tu, mi kasem sam traem we oli nogud tumas, be Jeova i blesem mi bigwan wetem tu pikinini, hasban mo waef blong olgeta, mo sikis smol bubu, we olgeta evriwan oli wosipim Jeova. Antap long samting ya, mi gat plante, plante pikinini mo smol bubu long saed blong trutok, mo sam long olgeta oli wok olsem paenia mo misinari. Naoia, bigfala hop blong mi i blong luk bakegen olgeta we mi laekem olgeta tumas we oli stap slip long ded, mo kisim olgeta taem bambae oli girap long beregraon.​—Jon 5:​28, 29.

[Futnot]

[Tok Blong Pija Long Pej 31]

Long wok blong prij long Swiden, afta Namba Tu Bigfala Faet blong Wol

[Tok Blong Pija Long Pej 31]

Wetem hasban blong mi