Mi Lanem Blong Trastem Jeova

JÁN KORPA-ONDO I TALEM STORE YA

Hemia long 1942, mo sam soldia blong Hangari oli stap gad long mi, kolosap long Kursk, Rasia. Mifala i presina blong ol kantri we oli joen wetem Jemani blong faet agensem ol man Rasia, long taem blong Namba Tu Bigfala Faet blong Wol. Hol blong berem mi i rere finis, mo oli givim ten menet long mi blong tekem disisen blong saenem wan pepa we i talem se mi no moa wan Wetnes blong Jeova. Bifo we mi talem wanem i kamaot biaen, i gud we fastaem mi talem olsem wanem mi kam kasem ples ya.

MI MI bon long 1904, long smol velej ya Saor, we i stap nao long is haf blong Slovakia. Afta Faswan Bigfala Faet blong Wol, Saor i kam haf blong wan nyufala kantri we oli kolem Jekoslovakia. Long taem ya, long velej blong mifala, i gat raonabaot 200 haos mo tu jyos, wan blong ol Grik Katolik, mo narawan blong ol Kalvinis.

Nating se mi go long Kalvinis Jyos, laef blong mi i olbaot mo i no gat wan samting we i blokem mi blong mekem ol rabis fasin. Wan man we fasin blong hem i defren olgeta, i stap laef kolosap long haos blong mi. Wan dei hem i toktok wetem mi mo hem i givim wan Baebol long mi. Hemia fastaem we mi holem buk ya long han blong mi. Raonabaot long semfala taem ya, long 1926, mi maredem Barbora, mo smoltaem biaen mitufala i gat tu pikinini, Barbora mo Ján.

Mi stat blong ridim Baebol, be i gat plante samting we mi no kasem save. Taswe mi go luk pasta blong mi, mo mi askem hem blong givhan long mi. Hem i talem se: “Baebol i blong ol man we oli go long hae skul nomo. Yu no mas traem blong kasem save long hem.” Ale hem i singaot mi blong plei kad.

Biaen mi go luk man ya we i givim Baebol ya long mi. Hem i wan Baebol Studen (hemia nem blong ol Wetnes blong Jeova bifo). Hem i glad blong givhan long mi, mo samtaem biaen, mi luksave se hemia trutok. Mi stop blong dring tumas mo mi stat folem ol gudfala fasin long laef blong mi. Mo tu, mi stat blong tokbaot Jeova long ol narafala. Trutok blong Baebol i kam kasem Saor smoltaem biaen long 1920, mo i no longtaem, i gat wan grup blong Baebol Studen we oli wokhad long ples ya.

Nating se i olsem, ol skul oli agensem mifala bigwan. Pris blong velej i talem se mi mi krangke mo i pulum bighaf blong famle blong mi blong agensem mi. Be naoia laef blong mi i gat mining, mo mi tekem strong disisen blong mekem wok blong trufala God, Jeova. Ale, long 1930, mi tekem baptaes blong soemaot we mi givim laef blong mi long Jeova.

Stat Blong Ol Strong Traem

Long 1938 kantri blong mifala i kam aninit long rul blong Hangari, we i joen wetem Jemani long Namba Tu Bigfala Faet blong Wol. Long taem ya, i gat samwe long 50 Wetnes long velej blong mifala, we i gat kolosap wan taosen man long hem. Mifala i gohed blong prij, nating se samting ya i putum laef mo fasin fri blong mifala long denja.

Long 1940, oli singaot mi blong joen long ami blong Hangari. ?Bambae mi mekem wanem? Yes, mi bin ridim ol profet tok blong Baebol long saed blong ol man we oli tanem ol tul blong faet blong olgeta oli kam tul blong mekem pis, mo mi save se God bambae i finisim olgeta faet long wol. (Ol Sam 46:9; Aesea 2:4) Taswe, mi no laekem nating ol faet, mo mi tekem disisen blong no joen long ami, nomata wanem bambae i hapen long mi from disisen ya.

Oli givim panis long mi blong go kalabus long Peks, Hangari, blong 14 manis. Faef narafala Wetnes oli stap long kalabus ya, mo mifala i glad blong stap tugeta. Be, blong smoltaem oli putum mi, mi wan nomo long wan smol rum mo oli fasem jen long leg blong mi. Taem oli askem mifala blong mekem sam wok we oli sapotem faet, mifala i no wantem, ale oli kilim mifala. Mo tu, oli fosem mifala blong stanap stret long ful dei, we mifala i gat raet blong spel tu haoa long sapa nomo. Samting ya i gohed long plante manis. Be yet, mifala i glad from we tingting blong mifala i klin long fored blong Jeova.

?Bambae Mi Lego Bilif Blong Mi?

Wan dei, wan grup blong 15 Katolik pris i kam blong pulum mifala blong luksave se i impoten blong joen long ami blong sapotem faet. Ale mifala i toktok wetem olgeta mo mifala i talem se: “Sipos yufala i save pruvum wetem Baebol se sol i no save ded samtaem, mo we bambae mifala i go long heven sipos mifala i ded long faet, ale bambae mifala i joen long ami.” Be i tru se, oli no save pruvum samting ya, nao oli no moa wantem gohed blong toktok wetem mifala.

Long 1941, taem blong mi long kalabus i finis, mo mi glad tumas se bambae mi save joen bakegen wetem famle blong mi. Be, defren olgeta, oli fasem mi wetem jen mo oli karem mi i go long wan kamp blong ami long Sarospatak, Hangari. Taem mifala i kasem kamp ya, oli givim wan jans long mi blong gofri. Oli talem long mi se: “Yu mas mekem wan samting nomo, yu saenem pepa ya blong promes se bambae yu pem 200 pengo taem yu gobak long ples blong yu.”

Mi askem se: “?Olsem wanem mi save mekem samting ya? ?Bambae yufala i mekem wanem sipos mi givim mane ya?”

Oli talem long mi se: “Sipos yu givim mane ya, bambae yu kasem wan pepa we i talem se ol dokta blong ami oli no jekemap yu blong yu kam wan soldia.”

Samting ya i mekem se i had blong mi tekem wan disisen. Mi bin safa bigwan long bitim wan yia mo mi taed tumas. Naoia, oli askem mi blong givim mane blong mi save gofri. Mi talem wetem smol voes: “Bambae mi tingting long samting ya.”

?Bambae mi tekem wanem disisen? Mi mas tingbaot waef mo pikinini blong mi. Ale, kolosap long sem taem ya, mi kasem leta blong wan Kristin brata we i leftemap tingting blong mi. Hem i tokbaot ol tok blong Jeova we aposol Pol i raetem long Hibrus 10⁠:​38, se: “ ‘Ol stret man blong mi we oli stap bilif long mi, bambae oli save laef. Be sipos wan long olgeta i tanemraon i gobak, bambae mi no save glad long hem.’ ” Smoltaem biaen, tu bigman blong ami blong Hangari long kamp ya oli toktok wetem mi, mo wan i talem se: “!Yu no save olsem wanem we mifala i respektem yu bigwan from fasin blong yu blong holemstrong long ol rul blong Baebol olsemia! !Yu no mas lego!”

Long nekis dei mi go luk olgeta we oli talem se bambae oli letem mi mi fri sipos mi pem 200 pengo, mo mi talem se: “Jeova God i letem mi mi kalabus, ale bambae hem i lukaot tu se mi gofri. Be bambae mi no pem rod blong mi blong gofri.” Taswe oli panisim mi blong kalabus ten yia bakegen. Be ol traem blong pulum mi blong lego bilif blong mi oli no finis long ples ya. !Kot i talem se bambae oli fogivim mi sipos mi agri blong wok long ami blong tu manis nomo, mo bambae mi no nidim blong karem wan tul blong faet nating! Mi talem no long samting ya tu, ale oli sanem mi long kalabus.

Trabol Agensem Mifala i Kam Antap Moa

Oli karem mi mi gobak bakegen long kalabus blong Peks. Be naoia oli mekem nogud long mi long wan fasin we i nogud moa. Oli fasem ol han blong mi long wan pos biaen long mi, mo oli hangem mi olsemia long kolosap tu haoa. Risal blong samting ya se ol bun blong solda blong mi oli kamaot long ples blong olgeta. Oli gohed blong spolem mi olsemia long kolosap sikis manis. Mi save talem tangkyu long Jeova nomo we hem i givim paoa long mi blong no lego.

Long 1942 oli tekem sam blong mifala i go long taon blong Kursk, long wan ples we ami blong Jemani i stap lukaot long hem. Long grup blong mifala, i gat sam we oli presina from politik, i gat sam man Jyu, mo 26 Wetnes blong Jeova. Oli letem ol man Jemani oli lukaot long mifala, mo oli givim wok long mifala blong karem kakae, ol tul blong faet mo klos i go long ol soldia we oli stap long faet. Ol Wetnes blong Jeova oli no wantem mekem wok ya from we samting ya i agensem Kristin fasin blong no sapotem faet. From samting ya oli karem mifala i gobak long ol man Hangari.

Biaen, oli putum mifala long kalabus blong Kursk. Long plante dei oli kilim mifala tri taem evri dei wetem ol hud. Mi kasem wan kil long hed blong mi mo mi foldaon. Taem oli stap kilkilim mi, mi tingting se: ‘I no had tumas blong ded.’ Ful bodi blong mi i hafded, ale mi no moa harem wan samting. Long tri dei oli no givim wan samting nating long mifala blong kakae. Ale, oli putum mifala long kot, mo oli givim panis blong ded long sikis blong mifala. Taem oli kilim olgeta ya oli ded, i gat 20 blong mifala i stap yet.

Ol traem ya blong bilif, we mi kasem long Kursk long Oktoba 1942, oli strong moa i bitim olgeta narafala traem we mi fesem. Long taem ya, ol filing blong mifala oli sem mak long filing blong King Jehosafat taem ol man Isrel oli kasem wan traem we i bitim paoa blong olgeta. King ya i talem se: “Mifala i no naf nating long fes blong olgeta ya we oli stap kam blong mekem faet long mifala. Mifala i no save se bambae mifala i mekem olsem wanem, be mifala i stap luk long yu blong yu halpem mifala.”​—2 Kronikel 20:12.

Oli karem mifala ol 20 Wetnes we i stap mo oli talem long mifala blong digim hol we bambae oli berem mifala long hem. I gat 18 soldia blong Hangari we oli stap gad long mifala. Taem mifala i digim hol finis, oli talem se mifala i gat ten menet blong saenem wan pepa we i talem se: “Ol tijing blong ol Wetnes blong Jeova oli rong. Bambae mi no moa bilif no sapotem olgeta. Bambae mi faet from kantri blong mi Hangari . . . Saen blong mi i pruvum se mi joen long Roman Katolik Jyos.”

Afta ten menet, oda ya i kamaot: “!Tanem long raetsaed! !Wokbaot go kasem hol!” Ale, oli givim oda ya: “!Namba wan mo namba tri presina, yufala i go insaed long hol!” Oli givim ten moa menet long tufala blong tekem disisen blong saenem pepa ya. Wan long ol soldia i talem strong long tufala se: “!Yutufala i lego bilif blong yutufala mo yutufala i kamaot long hol ya!” I no gat wan we i talem wan tok. Ale bigman blong ol soldia i sutum tufala Wetnes ya i ded.

Wan soldia i askem long bigman ya se: “?Olsem wanem long ol narawan?”

Bigman i ansa se: “Fasem olgeta. Bambae yumi mekem nogud long olgeta bakegen, mo long sikis klok long moning bambae yumi sutum olgeta.”

Wantaem nomo mi fraet. Mi no fraet blong ded, be mi fraet se bambae mi no gat inaf paoa blong stanap strong nao mi lego bilif blong mi. Taswe mi go long fored blong olgeta mo mi talem se: “Masta, mifala tu i no obei, sem mak long ol brata blong mifala we yu sutum finis. ?From wanem yu no sutum mifala tu?”

Be oli no sutum mifala. Oli fasem mifala wetem ol han biaen long bak. Ale oli hangem ol han blong mifala long wan pos. Taem wan long mifala i lusum tingting blong hem, oli sakem wota long hem. Mifala i safa bitim mak from we bodi blong mifala i hevi tumas mekem se ol bun long solda blong mifala oli kamaot long ples blong olgeta. Oli gohed blong spolem mifala olsemia long tri haoa. Ale, wantaem nomo, wan oda i kamaot, blong no moa sutum wan Wetnes blong Jeova.

Oli Seftem Mifala i Go Long Is—Ale Mi Ronwe

Tri wik biaen, oli mekem mifala i wokbaot sam dei gogo mifala i kasem saed blong Reva Don. Ol man we oli lukaot mifala oli talem se bambae mifala i ded bifo we mifala i livim ples ya. Long dei, oli givim sam krangke wok long mifala, oli askem mifala blong digim sam hol mo biaen, blong fulumap olgeta bakegen. Long sapa, mifala i fri lelebet blong wokbaot raonabaot.

Long lukluk blong mi, i gat tu rod. Mifala i save ded stret long ples ya, no mifala i save ronwe long ol man Jemani mo kam presina blong ol man Rasia. I gat tri blong mifala nomo we i tekem disisen blong traem blong ronwe krosem Reva Don we i kolkol tumas. Long Desemba 12, 1942, mifala i prea long Jeova nao mifala i ronwe. Mifala i kasem laen blong faet blong ol man Rasia, mo oli putum mifala i go stret long wan kamp blong ol presina. Kamp ya i gat samwe long 35,000 presina long hem. Taem koltaem i finis, 2,300 man nomo oli laef i stap. Ol narafala oli ded from we oli no gat inaf kakae.

Mi Fri Be Mi Kasem Sam Narafala Bigfala Trabol

Mi laef i stap go kasem en blong faet, mo kalabus olsem presina blong ol man Rasia plante manis afta we faet finis. Biaen, long Novemba 1945, mi kambak long haos blong mi long Saor. Plantesin blong mifala i nogud olgeta, ale mi mas wokem evri samting bakegen. Waef blong mi mo ol pikinini, oli bin wok long plantesin long taem blong faet, be long Oktoba 1944, taem ol man Rasia oli kam kolosap long ples ya, famle blong mi i mas i ronwe i go long is. Ol soldia oli stilim olgeta samting blong mifala.

Samting we i nogud bitim mak, hemia se taem mi kambak long haos, waef blong mi i sik tumas. Hem i ded long Febuwari 1946. Hem i gat 38 yia nomo. Mifala i gat smoltaem nomo blong joen tugeta bakegen, afta we oli seraotem mifala long bitim faef longfala yia.

Ol Kristin brata blong mi oli leftemap tingting blong mi taem mi joen long ol miting mo long wok blong prij long ol haos wanwan. Long 1947, mi karem sam mane blong go long wan asembli long Brno, we i stap 400 kilomita longwe. Nathan H. Knorr, we i presiden blong Watch Tower Bible and Tract Society long taem ya, i kam long asembli ya tu. Long ples ya, long medel blong ol Kristin brata blong mi, mi haremgud mo ol brata oli leftemap tingting blong mi bigwan.

Mifala i no haremgud longtaem long fasin fri we mifala i kasem afta long faet. Long 1948 ol Komunis oli stat blong agensem mifala. Long 1952 oli holem plante long ol brata we oli lidim wok blong ol Wetnes blong Jeova long Jekoslovakia, nao mi kasem responsabiliti blong lukaot long ol kongregesen. Long 1954, oli holem mi tu, mo oli givim panis long mi blong mi go kalabus blong fo yia. Oli holem pikinini boe blong mi tu, hemia Ján, wetem pikinini boe blong hem, Juraj, from we tufala i holemstrong Kristin fasin blong tufala blong no joen long politik. Mi stap tu yia long bigfala kalabus blong Pankrak, long Prag. Long 1956, gavman i letem plante man oli aot long kalabus, mo mi gofri.

!Nao Mifala i Fri!

Biaen, long 1989, ol Komunis oli lusum paoa long Jekoslovakia, mo gavman i rejistarem wok blong ol Wetnes blong Jeova. Ale, mifala i fri blong mekem miting tugeta mo blong prij long open ples. Long taem ya i gat kolosap wan handred Wetnes long Saor, samting ya i mekem se i gat wan Wetnes long evri 10 man long velej ya. I no longtaem i pas mifala i bildim wan naesfala, bigfala Haos Kingdom long Saor, we samwe long 200 man oli save sidaon long hem.

Helt blong mi i no moa gud tumas naoia, taswe ol brata oli mas karem mi long trak blong go long Haos Kingdom. Mi haremgud taem mi stap long ol miting ya mo mi laekem givim ansa long Wajtaoa Stadi. Mi glad moa blong luk ol pikinini blong mi, mo plante blong ol smol bubu blong mi wetem pikinini blong olgeta tu, oli stap mekem wok blong Jeova. Wan long olgeta i bin mekem wok blong seket elda blong ol Wetnes blong Jeova long Jekoslovakia, go kasem taem we ol responsabiliti long famle blong hem oli blokem hem blong gohed blong wokbaot long evri ples.

Mi talem tangkyu long Jeova from we hem i mekem se mi kam strong moa taem mi kasem olgeta traem ya. Samting we i givhan long mi, se mi gohed blong putum tingting blong mi i stap fulwan long Jeova, “olsem we mi stap luk God ya we man i no save luk long ae blong hem.” (Hibrus 11:27) Yes, mi bin filim strongfala han blong hem we i mekem ol man oli gofri. Hemia from wanem, naoia yet, mi gohed blong traehad blong kam long olgeta miting blong kongregesen mo blong joen long wok blong talemaot nem blong Jeova long olgeta ples olsem we mi naf blong mekem.

[Tok Blong Pija Long Pej 25]

Haos Kingdom long Saor

[Tok Blong Pija Long Pej 26]

Mi tangkyu from jans we mi gat blong givim sam ansa long Wajtaoa Stadi