Wan Dei Blong Bigfala Glad Namba 104 Klas Blong Gilead i Kasem Stefeket

TEDE i wan dei blong bigfala glad. Yumi hapi tumas.” Carey Barber, wan memba blong Hed Kampani blong ol Wetnes blong Jeova, i talem tok ya long Maj 14, 1998. Hemia i fastok blong wan miting blong givimaot stefeket long ol studen blong namba 104 klas blong Wajtaoa Baebol Skul blong Gilead. Brata Barber i askem ol 4,945 man we oli stap, blong joen long singsing ya blong Kingdom, namba 208, nem blong hem, “Wan Sing Blong Harem Gud.”

Ol Gudfala Advaes Blong Stap Glad

Long fashaf blong miting ya, i gat faef sotfala tok we oli stanap long Baebol. Oli givim ol gudfala advaes olsem wanem blong holem semfala glad we oli gat long dei ya blong kasem stefeket.

Joseph Eames we i wok long ofis blong Sosaeti we i raetem ol buk mo magasin, i givim faswan tok ya, “Folem Fasin Blong Ol Man We Oli Stap Tru Long God.” Tok ya i stanap long 2 Samuel japta 15 mo 17. Hem i tokbaot pikinini blong Deved, Absalom, we i mekem wan rabis plan blong pulum ol man blong agensem papa blong hem. Olsem nao, hem i save tekem ples we God i givim long papa blong hem olsem king. Be, i gat samfala we oli stap tru long King Deved, we Jeova i putumap hem. ?Store ya i lanem ol nyufala misinari long wanem samting? Brata Eames i talem se: “Nomata weples yufala i go blong mekem wok blong misinari, soem fasin ya blong stap tru long God. Yu save mekem olsem taem yu leftemap fasin blong wokgud tugeta mo respektem tiokratik oda. Givhan long ol narafala blong mekem samting ya tu.”

Nekiswan we i givim tok, hemia David Sinclair. Hem i tokbaot ten samting we oli stap long Ol Sam 15, we yumi mas mekem blong kam naf blong stap olsem ol man we Jeova i singaot olgeta oli go long ‘haos tapolen blong hem.’ Nem blong tok ya se, “Long Misinari Haos Tapolen Blong Yufala, Stap Olsem Ol Man We God i Singaot Olgeta Oli Kam.” Tok ya i pulum ol studen blong folem Sam ya long ples we oli go wok long hem, from we oli olsem ol man we God i singaot olgeta oli kam. Brata Sinclair i makemgud se i impoten blong folem ol hae rul blong God oltaem. ?Wanem frut i save kamaot from? Ol Sam 15⁠:5 i talem se: “Man we i stap mekem olgeta samting ya oltaem, bambae hem i no save foldaon samtaem.”

John Barr, wan memba blong Hed Kampani bakegen, i givim nekis tok. Hem i tokbaot fasin blong singsing long ol Kristin miting, mo olsem wanem samting ya i givim paoa long yumi blong wok. ?Be wanem sing we plante man oli stap singsing raon long wol, we i fulap moa long glad i bitim ol narafala singsing? Hemia gud nyus blong Kingdom blong God tru long Mesaea. ?Wanem frut i stap kamaot long singsing ya, no wok ya blong talemaot Kingdom? Namba tu vas blong singsing namba 208 i ansa wetem smol tok ya se: “Oltaem yumi stap talemaot Kingdom, nao plante moa man oli stap kam long God. Mo olgeta tu oli stap singsing long olgeta ples, blong ol man i harem.” Yes, evri dei samwe long 1,000 nyufala disaepol oli tekem baptaes. Brata Barr i finisim tok blong hem olsem: “Ol brata mo sista, i gud tumas blong tingbaot se yufala i stap go blong mitim ol man long ol narafala kantri we oli stap wet blong harem singsing blong yufala blong presem Jeova.”

“Lesin Long Ol Narafala We Oli Mekem Wok Ya Longtaem Finis.” Hemia nem blong tok blong James Mantz, we i wok long ofis blong Sosaeti we i raetem ol buk mo magasin. Hem i talem se i gat sam samting we yumi save lanem nomo from ol samting we oli hapen long prapa laef blong yumi. (Hibrus 5:8) Nating se i olsem, Proveb 22:17 i pulum yumi blong ‘lesingud mo harem tok blong ol waes man,’ hemia olgeta we oli laef plante yia finis. Ol studen oli save lanem plante samting from ol misinari we oli go fastaem long olgeta. Brata Mantz i talem se: “Ol misinari ya oli save finis olsem wanem blong toktok long ol man long ol stoa blong pulum olgeta blong daonem praes blong ol samting. Oli save ol ples long taon we i nogud blong wokbaot long olgeta from we i gat ol man blong kilim no repem man. Oli save finis ol smosmol fasin we oli save mekem ol manples oli harem nogud long yufala. Ol misinari we oli stap longtaem finis, oli save samting we yufala i nidim blong stap glad mo karem frut, long kantri we yufala i go wok long hem.”

Wallace Liverance, we i rejistarem ol studen blong Gilead skul, i givim tok ya, “Tinghae Long Ples We Tiokratik Rul i Sanem Yu Blong Wok Long Hem.” Hem i eksplenem se, bifo, God i yusum tabu speret no wan merikel blong lidim sam misinari oli go long ples we bambae oli wok long hem. Hemia i kamaot long aposol Pol, Timote, mo Banabas. Be tede, ‘slef we i stret mo waes’ i talem long ol misinari blong Gilead, weples long wol bambae oli go wok long hem. (Matyu 24:45-​47) Brata i talem se, ol ples we ol misinari bambae oli go wok long olgeta, oli olsem ol ples we Gideon i sanem ol man blong hem oli go long olgeta, blong faetem ol ami blong Midian. (Jajes 7:​16-​21) Brata Liverance i talem se: “Tinghae long ples we tiokratik rul i sanem yufala blong wok long hem. Ol soldia blong Gideon oli ‘stanap i stap, wanwan man long stret ples blong hem.’ Tingbaot ples we yu wok long hem olsem prapa ples blong yu. Bilif strong se Jeova i save yusum yu olsem we i bin yusum ol tri handred man blong Gideon.”

Fasin Blong Intres Long Ol Narafala i Givim Glad

Wan Wajtaoa i talem se: “I nogud blong fulumap laef blong yumi wetem olting we man nomo i wokem, mo ol samting blong wol ya. Olting ya oli no save stap olwe. I moagud mo i waes blong intres long ol man, mo lanem blong faenem trufala glad long ol samting we yumi mekem blong givhan long ol narafala.” Brata Mark Noumair, wan tija blong skul blong Gilead, i mekem tok blong hem i laenap wetem tingting ya, taem hem i askem wan grup blong studen blong talem sam store blong prij. Hem i talem se: “Fasin blong intres long ol narafala, hemia nao samting we bambae i mekem yufala i kam ol gudfala misinari.”

Ol Samting We Oli Givim Glad Long Wan Narafala Kantri

?Wanem sam impoten samting we ol misinari oli mas mekem blong faenem glad long wok blong olgeta? Nekiswan long miting ya, hemia Brata Charles Woody, blong ofis we i lukaot long wok blong prij, wetem Harold Jackson, we bifo hem i misinari long Latin Amerika mo naoia hem i givhan long Komiti blong Tijim Ol Man Blong God. Tufala i askem kwestin long samfala we oli joen long namba naen klas blong wan kos we Sosaeti i mekem, blong ol komiti long ol ofis blong Sosaeti raon long wol. Hemia sam advaes we oli givim:

Albert Musonda blong Sambia i talem se: “Taem misinari i no wet, be i girap i go talem halo long ol brata mo sista, samting ya i mekem wan gudfala fasin i kamaot. Ol brata mo sista bambae oli laekem moa misinari ya, mo misinari ya bambae i laekem moa ol brata mo sista.”

Rolando Morales blong Gwatemala i givim advaes ya se, taem ol man oli wantem givim wan dring blong soem gudfala fasin, ol misinari oli save ansa long kaen mo waes fasin se: “Mi mi jes kam long kantri ya. Mi wantem tumas blong tekem dring ya, be bodi blong mi i no lan long samting ya yet olsem bodi blong yu. Mi hop se wan dei mi naf blong tekem dring ya, olsemia, bambae mi glad.” ?From wanem i gud blong ansa olsem? “Bambae ol misinari oli no mekem ol man oli harem nogud, mo tu, oli soemaot kaen fasin.”

?Wanem i save givhan long ol misinari blong stanap strong longtaem long wok blong olgeta? Brata Paul Crudass, wan studen blong namba 79 klas blong Gilead, i bin wok olsem misinari long Laeberia blong 12 yia. Hem i talem se: “Mi save se ol papa mama oli sore taem ol pikinini blong olgeta oli stap longwe long olgeta. Maet wan misinari i stap traehad blong lan long nyufala kantri, ol samting raonabaot long hem, kastom, mo ol man. Maet hem i harem olsem se i wantem ronwe nomo. Sipos long taem ya hem i kasem wan leta long papa mama blong hem we i talem se, ‘Mitufala i mestem yu tumas, mo mitufala i no save se bambae mitufala i mekem wanem naoia we yu no moa stap,’ maet samting ya i naf blong pulum misinari ya blong fulumap olting blong hem long bokis mo gobak long ples blong hem. I impoten tumas we famle blong ol studen ya we oli stap long ples ya tede, oli no fogetem samting ya.”

Afta we oli askem kwestin long ol brata ya, Theodore Jaracz, wan memba blong Hed Kampani, i givim laswan tok. Nem blong tok ya se: “Mekem Kingdom i Stap Long Faswan Ples Long Laef.” ?Olsem wanem ol misinari oli save mekem samting ya mo no letem wan narafala tingting i pulum olgeta? Hem i givim advaes long olgeta blong folem wan gudfala plan blong stadi Baebol wanwan. Samting ya bambae i givhan long olgeta blong putum Kingdom long fasples long laef oltaem. Mo tu, hem i pulum olgeta blong tingbaot se: “Sam misinari oli bin kam slak blong stadi wanwan from we oli spenem tumas taem wetem ol lektrik mesin, E-mail, mo kompyuta. Yumi mas gat stret tingting long saed blong ol tul ya we yumi yusum, mo no spenem tumas taem long samting we i save spolem prapa stadi blong Tok blong God we yumi wanwan i mas mekem.”

Long en blong tok blong Brata Jaracz, oli givimaot ol stefeket mo ridimaot wan leta we klas i raetem blong talem tangkyu. Brata we i ridimaot leta ya i talemaot filing blong evriwan long klas, i se: “Mifala i luk finis wetem prapa ae blong mifala, bigfala lav ya we Jisas i talem se bambae i makemaot ol disaepol blong hem. Samting ya i mekem mifala i sua se, nomata weples mifala i go long hem, ogenaesesen ya we i olsem wan mama mo i gat lav mo kaengud fasin, bambae i stap blong givhan long mifala. From samting ya, mifala i rere blong go long ol laswan ples blong wol.” Tok ya i pulum filing blong evriwan, long en blong hapi dei ya we namba 104 klas blong Gilead oli kasem stefeket blong olgeta.

[Tok Blong Pija Long Pej 24]

Kaontem Klas Ya:

Oli kamaot long hamas kantri: 9

Oli go wok long hamas kantri: 16

Hamas studen: 48

Hamas hasban mo waef tugeta: 24

Oli gat hamas yia: 33

Hamas yia long trutok: 16

Hamas yia finis oli prij fultaem: 12

[Tok Blong Pija Long Pej 25]

Klas Namba 104 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go long raetsaed.

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T., (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Tok Blong Pija Long Pej 26]

Ol brata we oli tija blong klas namba 104: (stat long lefsaed) W. Liverance, U. Glass, K. Adams, M. Noumair