Wol—?From Wanem Hem i Stap?

I gat wan kwestin we yu mas tingbaot: ?I tru se, wan waes Man we i gat wan stampa tingting long saed blong graon ya mo ol man, i wokem naesfala wol ya blong yumi? Sipos yu kasem ansa long kwestin ya, samting ya bambae i givhan long yu blong save wanem fyuja blong wol blong yumi.

PLANTE man blong sayens we oli bin stadigud long saed blong heven mo wol oli luk ol pruf we oli soemaot se wan Man i Wokem olgeta samting. Oli luksave se God i stampa blong olgeta samting ya. Tingbaot ol tok blong wan man blong sayens:

Tija Paul Davies i raetem long buk ya The Mind of God se: “Blong mekem se olgeta samting long heven mo wol ya oli rongud folem wan oda, i nidim sam spesel loa mo rul, blong lidim olgeta.”

Tija Davies i tokbaot ol “samting we oli kamaot from laki nomo” we ol man blong sayens oli stadi long hem, mo biaen hem i ademap se: ‘Taem yumi lukluk olgeta samting ya, oli givim klia pruf se laef i dipen long ol loa blong sayens ya fisiks. Sipos yumi ting se yumi God, mo yumi traem blong wokem laef, bambae samting ya i no save kamtru. Blong mekem se i gat laef long wol, i nidim moa i bitim ol samting we oli kamaot from laki nomo. . . . Sipos ol loa blong fisiks oli jenis smosmol nomo, bambae man i no moa naf blong stadi long saed blong heven mo wol. Hemia wan pruf se laef i no kamaot from laki nomo.’

Long plante man, ol tok ya oli minim se wan Man we i gat wan stampa tingting, i wokem wol blong yumi wetem olgeta narafala samting long heven. Sipos i olsem, yumi nidim blong faenemaot from wanem hem i wantem wokem wol ya. Mo tu, sipos yumi naf, yumi nidim blong suagud long stampa tingting blong hem long saed blong wol. Long saed ya, wan narakaen samting i kamaot. Nating se i gat plante man we oli talem se oli no bilif long God, be plante narafala oli bilif yet long wan waes Man we i Wokem olgeta samting. Bighaf blong ol jyos blong Krisendom oli tokbaot God olsem Man we i gat Olgeta Paoa, mo Man we i Wokem heven mo wol. Be, toktok blong olgeta jyos ya i soemaot se i no gat wan we i trastem mo we i suagud long stampa tingting blong God long saed blong fyuja blong wol.

?Baebol i Talem Wanem?

I stret blong lukluk long save we i stap insaed long wan buk we plante man oli agri se hem i kamaot long Man ya we i Wokem olgeta samting. Buk ya, hemia Baebol. Long Eklesiastis 1:​4, i gat wan tok we i isi nomo mo i klia long saed blong fyuja blong wol. Yumi ridim se: “Wan laen blong man i stap lus, wan narafala laen blong man i stap kam: be wol i stap blong olwe.” Baebol i tok stret taem hem i eksplenem from wanem Jeova God i wokem wol. Mo tu, hem i soem se God i putum wol long stret ples blong hem mekem se san i givim inaf laet we ol laef samting oli nidim. God we i gat Olgeta Paoa i pulum tingting blong profet Aesea blong raetem se: “Hemia nao Tok blong Jeova, Man ya we i wokem heven, hem nomo i tru God. Hem nomo i stampa blong wol ya, i wokem hem, i mekem hem i stanap strong. Hem i no mekem blong nating nomo, be hem i mekem blong ol man oli save stap long hem. Hem i se: ‘Mi mi Jeova, mo i no gat narawan.’”​—Aesea 45:18.

?Be olsem wanem long ol samting we man i wokem blong spolem laef long wol ya? God, we i gat bigfala waes, i talem se bambae hem i mas mekem wan samting bifo we man i spolem olgeta laef long wol. Makem gudfala promes ya long Revelesen, laswan buk blong Baebol, we i talem se: “Ol hiten man oli kros tumas, be naoia i taem blong kros blong yu i kamtru, naoia i taem blong jajem ol dedman. Naoia i taem blong givim pei long ol man blong yu, ol profet, wetem ol man blong yu, wetem olgeta we oli stap ona long nem blong yu, olgeta we oli haeman, wetem olgeta we oli no gat nem. Mo naoia i taem blong spolem ol man ya we oli stap spolem wol.”​—Revelesen 11:18.

Jeova i soemaot long yumi wanem stampa tingting blong hem fastaem, taem hem i wokem wol ya. Wan man we i wokbaot long mun i talem se wol ya i olsem wan naesfala ston long medel blong olgeta narafala samting we hem i luk long spes. Yes, God i wantem se ful wol i kam wan paradaes we ol man mo woman oli haremgud long hem mo oli laef long pis mo fasin joengud. Hem i mekem se faswan man mo woman oli save gat pikinini mo sloslou oli fulumap wol ya. Blong mekem tufala i glad mo haremgud, Jeova i wokem wan smol ples blong wol olsem wan paradaes. Taem tufala i gat pikinini long ol yia we oli kam biaen, oli save mekem garen blong Iden i kavremap ful wol olsem Jenesis 1:​28 i talemaot, i se: ‘God i talem long tufala, i se: “Yutufala i mas gat pikinini, mo yutufala i mas kam plante blong fulumap wol. Mo yufala i mas mekem wol ya i stap aninit long han blong yufala.”’

Taem yumi luk ol trabol we wol mo ol man oli stap kasem naoia, ?samting ya i minim se stampa tingting blong God i no save kamtru? ?I minim se Hem i jenisim stampa tingting blong hem mo bambae i letem wol i lus from we ol man oli stronghed, nao biaen hem i stat wokem olgeta samting bakegen? Nogat, yumi sua se samting ya i no tru. Baebol i talem long yumi se olgeta samting we Jeova i wantem mekem bambae oli mas kamtru. I no gat wan man no wan samting we bambae i save agensem wanem disisen we hem i mekem. Hem i talem long yumi se: “Bambae i mas hapen olsem long tok we i kamaot long maot blong mi. I no save kambak long mi sipos i no gat frut blong hem, be bambae i kamaot olsem we mi haremgud long hem, mo bambae i mekem samting we mi mi sanem hem from.”​—Aesea 55:11.

Stampa Tingting Blong God i Stop, Be i No Jenis

Taem Adam mo Iv oli no moa stap tru long God mo oli aot long garen blong Iden, i klia se God bambae i no moa yusum tufala blong mekem ful wol i kam wan paradaes. Nating se i olsem, Jeova i soemaot se sam pikinini blong tufala bambae oli mekem wok ya. I tru se, samting ya bambae i tektaem, maet i tekem plante handred yia. Be traem tingbaot, nating sipos Adam mo Iv tufala i gohed blong laef we tufala i stretgud olgeta, yumi no save tu se bambae i bin tekem hamas yia blong mekem stampa tingting blong God i kamtru. Samting we yumi save hemia se, long en blong Wan Taosen Yia Rul Blong Jisas Kraes hemia i lelebet bitim wan taosen yia stat naoia i go, ful wol bambae i kam wan paradaes olsem long garen blong Iden. Nao, Wol ya bambae i fulap long ol man we oli kamaot long faswan man mo woman we oli stap long pis mo oli glad. !Yes, bambae i klia nomo se Jeova i Man ya we i Mekem Olgeta Stampa Tingting blong hem oli kamtru!

Nao, ol nambawan profet tok we God i talemaot bifo bambae oli kamtru. Ol vas olsem Aesea 11:​6-9 bambae oli kamtru we i gud tumas se: “Wael dog bambae i stap smoltaem wetem smol sipsip, mo bambae lepad i slip kolosap long pikinini blong nani, mo pikinini blong buluk mo yangfala laeon mo anamol we i fatfat gud, bambae oli stap tugeta. Mo wan smol boe nomo bambae i lidim olgeta. Mo woman buluk wetem woman bea, tufala bambae i kakae gras. Mo ol pikinini blong tufala bambae oli slip wanples. Mo laeon tu bambae i kakae drae gras olsem buluk. Mo smol pikinini we i stap titi yet, bambae i plei long maot blong hol blong snek ya kobra. Mo pikinini we i no moa titi, hem bambae i putum han blong hem long hol blong posen snek. Bambae oli no mekem nogud nating, mo oli no mekem trabol nating long olgeta ples long tabu hil ya blong mi, from we bambae wol ya i fulap tru long save blong Jeova olsem we ol wora oli kavremap solwora.”

Helt we i nogud mo sik we i kilim man i ded, wetem ded tu, bambae oli ol samting blong bifo nomo. I no gat samting we i klia moa i bitim ol tok ya we yumi faenem long laswan buk blong Baebol, se: “Naoia God i mekem ples blong hem wetem ol man. Hem bambae i stap oltaem wetem olgeta, nao olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”​—Revelesen 21:​3, 4.

Yes, yumi save glad, naesfala wol blong yumi bambae i stap olwe. I gud tumas sipos yu kasem blesing ya blong stap laef afta we ol rabis man wetem olting blong olgeta we i stap spolem wol ya, bambae oli lus olgeta. Nyufala wol blong God we i klingud, hem i kolosap nao. Mo plante man we yumi laekem olgeta bambae oli girap oli laef bakegen long ded. (Jon 5:​28, 29) Tru tumas, wol blong yumi bambae i stap olwe, mo yumi save stap olwe tu, mo haremgud long hem.