?Yu Yu Rimemba?

?Yu yu tingting dip long ol Wajtaoa we oli jes kamaot i no longtaem? Sipos yes, bambae yu faenem se i gud blong tingbaot ol poen ya bakegen:

◻ ?From wanem i no stret blong talem se God i makemaot finis fyuja blong man?

Sipos God i save finis mo hem i makemaot finis se bambae Adam i foldaon long sin, hemia i minim se hem nao i stampa blong sin taem hem i wokem man, mo se hem nao i gat fol from ol rabis fasin blong man mo olgeta trabol we man i kasem. Samting ya i no laenap nating wetem ol fasin blong God. Hem i wan God we i gat lav mo stret fasin, we i no laekem nating ol rabis fasin. (Ol Sam 33:5; Proveb 15:9; 1 Jon 4:8)​—4/15, pej 7, 8.

◻ Folem Aesea 2:​2-4, ?wanem samting we fulap man blong plante nesen oli stap mekem?

Ol man ya oli kam insaed long haos blong wosip blong Jeova, mo oli no moa ‘lanem fasin blong faet,’ from we oli trastem se ol ami blong God long heven we oli stap rere blong tekemaot olgeta enemi blong pis, oli save protektem olgeta.​—4/15, pej 30.

◻ ?Hu ya ol strong man blong God we Baebol i tokbaot long Joel 3:​10, 11?

Samwe long 280 taem long Baebol, trufala God i karem nem ya se “Jeova blong ol ami.” (2 King 3:​14) Ol ami ya, hemia kampani blong ol strong enjel long heven we oli stap rere blong mekem wanem Jeova i wantem olgeta blong mekem.​—5/1, pej 23.

◻ Jeova i askem long Job blong prea from olgeta we oli bin sin agens long hem. ?Samting ya i tijim wanem long yumi? (Job 42:8)

Bifo we bodi blong Job i kamgud bakegen, Jeova i askem long hem blong prea from olgeta we oli bin sin agens long hem. Samting ya i soem se Jeova i wantem se yumi fogivim olgeta we oli sin agens long yumi, bifo we hem i fogivim sin blong yumi. (Matyu 6:​12; Efesas 4:​32)​—5/1, pej 31.

◻ ?Jemes i minim wanem taem hem i talem se: “Yufala i mas letem fasin blong stanap strong olwe i mekem wok blong hem gogo kasem en blong rod”? (Jemes 1:4)

Fasin blong stanap strong i gat wan “wok” blong mekem. Wok ya i blong mekem yumi kam stretgud we yumi no sot long wan samting. Taswe, sipos yumi stanap strong go kasem en blong wan traem mo yumi no brekem wan loa blong Baebol blong traem mekem traem ya i finis kwik, ale bilif blong yumi bambae i kam strong mo stret moa.​—5/15, pej 16.

◻ ?From wanem God i wet longtaem olsem, bifo we hem i stretem ol problem blong man?

Tingting blong Jeova long saed blong taem i no olsem tingting blong yumi. Taem we i stat long Adam kam kasem naoia i no olsem wan wik yet long tingting blong God ya we i no save ded. (2 Pita 3:8) Be nomata wanem tingting blong yumi long saed blong taem, evri dei we i pas i mekem se yumi stap kam kolosap moa long dei we bambae Jeova i leftemap hem wan.​—6/1, pej 5, 6.

◻ ?Wanem i pusum ol Wetnes blong Jeova?

Ol tijing blong Jeova oli mekem se kampani blong ol man blong Hem oli defren olgeta long ol narafala man. Oli kasem gudfala tijing blong laeklaekem olgeta mo blong mekem i gud long ol man raonabaot long olgeta. (Aesea 54:13) Lav, hemia nao samting we i pusum ol Wetnes blong Jeova blong gohed long wok ya blong prij, nating se bighaf blong ol man oli no intres mo oli mekem trabol long olgeta. (Matyu 22:36-​40; 1 Korin 13:​1-8)​—6/15, pej 20.

◻ ?Wanem mining blong ol tok ya blong Jisas: “Yufala i mas traehad tumas blong pas long doa ya we i smol nomo, blong go insaed”? (Luk 13:24)

Ol tok blong Jisas oli minim se yumi mas wokhad, yumi mas mekem evri samting we yumi naf blong mekem. Ol tok blong hem oli soem tu se maet samfala bambae oli traem ‘pastru long doa,’ be long fasin we olgeta nomo oli wantem folem, oli laekem moa blong go sloslou, oli no traehad. Taswe, yumi wanwan i save askem se: ‘?Mi mi stap soem fasin blong traehad mo wok strong?’—6/15, pej 31.

◻ ?Olsem wanem God bambae i ‘jajem olgeta we oli laef bakegen from ol fasin we oli mekem, folem samting we i stap insaed long ol buk ya’? (Revelesen 20:12)

Ol buk ya oli no tokbaot ol samting we ol man ya oli mekem bifo we oli ded, no gat. Ded i ravemaot ol sin we oli bin mekem long laef blong olgeta bifo. (Rom 6:​7, 23) Nating se i olsem, ol man ya we oli laef bakegen bambae oli gat sin blong Adam i stap long olgeta yet. Taswe, yumi save se, ol buk ya bambae oli fulap long ol tijing we oli kamaot long God. Olgeta man bambae oli mas folem ol tijing ya blong kasem blesing fulwan from sakrifaes blong Jisas Kraes.—7/1, pej 22.

◻ ?Yumi lanem wanem samting long parabol blong Jisas we i tokbaot wan man Sameria we i mekem i gud long ol narafala? (Luk 10:30-​37)

Parabol ya blong Jisas i soem se wan man we i rili stret, hemia wan man we i obei long ol loa blong God, mo antap long samting ya, we i folem ol nambawan fasin blong God. (Efesas 5:1) Hem i soem tu se tok ya, ‘ol man raonabaot long yumi’ i no jes minim olgeta we oli gat sem bilif olsem yumi nomo, be i minim tu ol man blong narafala laen, kantri, mo defren kaen laef. (Galesia 6:​10)​—7/1, pej 31.

◻ ?Wanem tri rod blong savegud ol pikinini blong yu mo lidimgud olgeta olsem ol gudfala papa mama?

(1) Givhan long ol pikinini blong yu blong jusum wan gudfala wok; (2) mekem tingting blong olgeta i rere blong winim ol traem we oli save spolem filing blong olgeta, long skul mo long wok; (3) soem long olgeta olsem wanem blong kasem ol samting we oli nidim long saed blong speret.​—7/15, pej 4.

◻ ?From wanem risen God i spel long “namba seven dei”? (Jenesis 2:​1-3)

Taem God i spel long namba seven dei, i no from we hem i taed. Spel ya i minim se hem i stopem wok blong hem long wol ya. Hem i mekem olsem blong letem olgeta samting ya we hem i wokem, oli kasem fulwan mak we hem i wantem, nao oli save presem mo givim ona long hem.​—7/15, pej 18.

◻ ?Long wanem trifala rod yumi save jajem man long stret fasin?

Fastaem, yumi mas mekem laef blong yumi i laenap wetem ol rul blong God long saed blong gudfala fasin. (Aesea 1:​17) Namba tu samting se, yumi soemaot stret fasin taem yumi mekem long ol narafala olsem we yumi wantem Jeova blong mekem long yumi. (Ol Sam 130:​3, 4) Namba tri samting se, yumi soemaot stret fasin blong God taem yumi strong long wok blong prij. (Proveb 3:​27)​—8/1, pej 15, 16.