Putum Wan Praes Blong Pem Woman We i No Bitim Mak

TEDE i gat sam kastom we oli sem mak long ol kastom long taem blong Baebol. Sam long ol kastom ya, hemia se man i mas pem wan woman bifo we hem i mared wetem hem. Jekob i talem long Laban, we i papa blong woman we bambae hem i maredem, i se: “Mi mi glad blong wok blong yu seven yia, blong bambae mi save mared long sekenbon dota ya blong yu.” (Jenesis 29:18) From we Jekob i laekem Rejel tumas, hem i pem wan praes we i bigwan. !Praes ya i sem mak long pei we hem i save kasem long seven yia! Laban i agri long praes ya we Jekob i wantem givim. Be biaen, hem i trikim Jekob, i givim fasbon gel blong hem, Lea, blong mared wetem Jekob. Samting we Laban i mekem long Jekob biaen, i soemaot se hem i gat narafala plan long tingting blong hem. (Jenesis 31:41) Laban i tingbaot mane tumas. From samting ya, tufala gel blong hem oli no moa respektem hem. Tufala i talem se: “Hem i stap mekem mitufala olsem we mitufala i no pikinini blong hem, mitufala i strenja nomo. Hem i salemaot mitufala, mo olgeta mane we hem i kasem long praes blong mitufala, naoia, hem i spenem evriwan finis.”​—Jenesis 31:15.

Sore tumas, tede, long wol ya we man i tingbaot mane tumas, plante papa mama oli olsem Laban. Mo samfala ating oli bitim Laban. Wan nyuspepa blong Afrika, i talem se samfala papa mama oli wantem we pikinini blong olgeta i mared, i “jes from we oli griri mo oli wantem kasem plante samting.” Hadtaem long saed blong mane, i wan narafala samting we i pulum sam papa mama blong yusum gel blong olgeta olsem rod blong kasem fulap mane blong pem sam samting.a

Sam papa mama oli no letem gel blong olgeta blong mared from we oli wantem faenem wan man we bambae i save givim praes we i bigwan moa. Fasin ya i save mekem bigfala problem i kamaot. Wan man blong nyuspepa long is Afrika, i raetem se: “Ol yangfala oli tingting se i moagud oli ronwe mo mared long fasin haed, from we praes we papa mama blong gel oli askem, i hae tumas.” Fasin blong slip olbaot bifo mared, i wan bigfala problem we i kamaot from we praes blong woman i hae tumas. Antap long samting ya, sam yangfala man we oli faenem rod blong pem wan waef, biaen, oli gat fulap kaon. Wan man long Saot Afrika, we i stap givhan long man we i trabol, i talem strong se: “Ol papa mama oli no mas mekem i strong tumas. I nogud oli askem praes we i antap tumas. Ol yangfala we oli jes mared bambae oli nidim sam samting tu blong laef. . . . Taswe, ?from wanem yufala i wantem karemaot evri mane blong wan yangfala man?”

?Olsem wanem ol Kristin papa mama oli save soem se oli no mekem i strong tumas, taem oli putum praes blong pem woman? Samting ya i impoten tumas, from we Baebol i givim oda ya se: “Yufala i mas soemaot long olgeta man se yufala i no stap mekem i strong tumas long narafala.”​—Filipae 4:​5, NW.

Sam Rul Blong Baebol We Oli No Strong Tumas

Ol Kristin papa mama oli gat raet blong putum praes blong pem woman. Be oli mas folem ol rul blong Baebol long saed ya. Tok blong God i talem se: “I nogud yufala i laekem mane tumas.” (Hibrus 13:5) Sipos wan Kristin papa no mama i no folem rul ya taem hem i putum praes blong woman, hem i no soemaot gudfala eksampel. Ol man we oli gat wok insaed long Kristin kongregesen oli mas “kwaet man,” oli no mas ‘laekem mane tumas’ mo oli no man blong ‘griri.’ (1 Timote 3:​3, 8) Wan Kristin we i griri, nao i askem wan praes we i hae bitim mak, mo i strong long narafala blong givim mane ya, kongregesen i save putumaot hem.​—1 Korin 5:​11, 13; 6:​9, 10.

From fasin griri, sam gavman oli stanemap sam loa long saed blong praes we man i givim blong pem woman. Eksampel, wan loa long Togo, wan kantri blong Wes Afrika, i talem se man i save pem woman “wetem mane, no maet wetem kakae mo narafala samting olsem, no oli save givim tufala samting ya tugeta.” Loa ya i gohed se: “Man i no gat mas bitim pem woman bitim 10,000 F CFA.” Plante taem, Baebol i givim oda long ol Kristin se oli mas obei long ol loa blong kantri. (Taetas 3:1) Nating sipos gavman i no fosem ol man blong folem loa ya, wan trufala Kristin bambae i wantem obei long hem. Long rod ya, tingting blong hem bambae i no stikim hem long fored blong God mo bambae hem i no mekem ol narafala oli foldaon.​—Rom 13:​1, 5; 1 Korin 10:32, 33.

?Hu i Mas Putum Praes?

Long sam kastom, fasin blong putum praes blong pem woman i save agensem wan narafala impoten rul. Folem Baebol, wan papa nao i bos long olgeta samting long famle blong hem. (1 Korin 11:3; Kolosi 3:​18, 20) Taswe, olgeta we oli gat wok insaed long kongregesen oli mas ol man we i ‘lukaot gud long ol pikinini blong olgeta, mo long ol narafala man we oli stap long haos blong olgeta.’​—1 Timote 3:​12.

Be, maet sam man oli gat kastom ya se ol famle blong hasban nao oli mas lukaot long ol impoten bisnes, olsem fasin blong putum praes blong woman. Mo ol famle ya oli gat raet blong kasem wan haf blong praes ya. Hemia i rili wan traem long ol Kristin famle. Sam papa oli letem famle blong olgeta i folem kastom olsem, nao oli putum wan praes we i antap tumas. From samting ya, samtaem sam Kristin gel oli mared long ol man we oli no gat sem bilif. Fasin ya i agensem advaes we i go long ol Kristin se oli mas mared long ‘masta nomo.’ (1 Korin 7:​39) Wan papa we i letem famle blong hem i mekem ol disisen we i spolem pikinini blong hem long saed blong speret, hem i no rili wan man we i stap “lukaot gud long famle blong hem.”​—1 Timote 3:4.

Olsem olfala Ebraham we i fraetgud long God, maet wan Kristin papa i no joen long bisnes blong tokbaot mane we bambae narafala i givim blong pem pikinini blong hem. Long taem olsem, ?Kristin papa ya i mas mekem wanem? (Jenesis 24:​2-4) Sipos wan narafala man i lukaot long bisnes ya, Kristin papa i mas meksua se man ya i folem ol rul blong Baebol we oli no mekem i strong tumas. Ol Kristin papa mama oli mas tingting gud fastaem bifo we oli agri long eni disisen long saed blong praes blong pem woman. I nogud oli letem ol kastom mo samting we narafala i askem, i pulum olgeta blong mekem wan disisen we i no stret.​—Proveb 22:3.

Lukaot Blong No Folem Ol Fasin We Oli No Kristin

Baebol i agensem fasin we man i tinghae tumas long hem wan mo we i ‘flas tumas long ol samting we hem i gat.’ (1 Jon 2:​16; Proveb 21:4) Be, sam memba blong Kristin kongregesen, oli soemaot fasin ya taem oli putum praes blong woman. Samfala oli folem fasin blong wol, oli wantem pulum ae blong man taem oli putum praes we i antap tumas. Defren olgeta, wan branj ofis blong Watch Tower Society long Afrika i talem se: “Sam hasban oli no soem respek taem famle blong gel i askem praes we i daon. Ol hasban ya oli tingbaot bisnes ya olsem we oli pem wan ‘nani.’ ”

Griri fasin blong wantem mane we i antap tumas, i winim sam Kristin mo i mekem bigfala trabol i kamaot. Eksampel, tingbaot ripot ya we i kamaot long wan narafala branj ofis blong Watch Tower Society: “Plante taem, i hadwok long ol yangfala brata blong mared, no ol sista blong faenem hasban. From samting ya, mifala i mas putumaot fulap long olgeta from we oli mekem nogud fasin long saed blong seks. Sam brata oli mas go wok long ples blong digim gol no ol narafala sas ston blong kasem inaf mane blong pem woman. Samtaem, oli tekem wan no tu yia, no plante moa yia blong mekem olsem. From samting ya, plante oli kam slak long saed blong speret mo oli aot long kampani blong ol brata mo kongregesen.”

Blong blokem ol trabol olsem, ol Kristin papa mama oli mas folem eksampel blong ol narafala Kristin long kongregesen we oli bigman long saed blong speret. Aposol Pol i no wan papa, be hem i gat fasin blong no mekem i strong tumas taem hem i stap joen wetem ol narafala man blong bilif. Hem i no askem mane oltaem long ol narafala man, from we hem i no wantem mekem i hevi tumas long olgeta. (Ol Wok 20:33) Olsem nao, taem ol Kristin papa mama oli stap tokbaot praes blong woman, oli mas tingbaot gudfala eksampel ya blong Pol, we hem i no tingbaot hem wan. Tru tumas, God i pusum Pol blong raetem se: “Ol brata mo sista. I gud yufala evriwan i biaen long mak blong mi. Mifala i soemaot stret fasin finis long fes blong yufala, mo i gud yufala i stap luklukgud long olgeta we oli folem ol fasin ya.”​—Filipae 3:​17.

Sam Eksampel Long Fasin Blong No Mekem i Strong Tumas Long Narafala

Plante Kristin papa mama oli soemaot nambawan eksampel long fasin blong no mekem i strong tumas long narafala, taem oli putum praes blong pem woman. Tingbaot store blong Joseph mo waef blong hem, Mae, we tufala i joen long fultaem wok blong prij.b Tufala i laef long Solomon Aelan, long wan ples we samtaem, bisnes ya blong pem woman i save mekem problem i kamaot. Joseph mo Mae, tufala i no wantem kasem ol problem olsem. Taswe, tufala i plan se bambae tufala i mekem mared blong gel blong tufala, Helen, long wan narafala aelan. Tufala i mekem sem mak, taem narafala gel blong tufala, Esther, i mared. Mo tu, Joseph i mekem se man blong gel blong hem, Peter, i pem wan praes we sam man oli ting se i daon tumas. Taem mifala i askem long Joseph from wanem hem i mekem olsem, hem i talem se: “Mi no wantem mekem i hevi tumas long boe ya we bambae i maredem gel blong mi, from we hem i wan paenia.”

Plante Wetnes blong Jeova long Afrika tu, oli soemaot nambawan eksampel long fasin blong no mekem i strong tumas long narafala. Long sam eria, oltaem ol man we oli no stret famle, oli wantem kasem bigfala mane bifo we oli putum praes blong pem woman. Mo samtaem, man i mas promes se bambae hem i pem woman we bambae i mared wetem smol brata blong waef blong hem. Long rod ya hem i meksua se bambae hem i mared long woman ya.

Tingbaot eksampel blong Kossi mo waef blong hem, Mara. I no longtaem i pas, gel blong tufala, Beboko, i mared long wan elda we i stap visitim kongregesen blong ol Wetnes blong Jeova. Bifo we tufala i mared, ol famle oli mekem hadtaem long papa mama blong gel ya from we oli wantem wan praes we i hae, blong olgeta tu oli save kasem wan haf blong mane ya. Be, papa mo mama ya, tufala i stanap strong mo tufala i talemaot se tufala i no agri long wanem we olgeta ya oli askem. Tufala i toktok stret long man ya we bambae i mared long gel blong tufala. Tufala i talemaot smol praes we tufala i wantem we man ya i givim from gel blong tufala. Ale, biaen tufala i givimbak haf mane ya long man ya wetem gel blong tufala, blong oli yusum blong mekem rere mared blong tufala.

Wan narafala eksampel long sem kantri ya, hem i long saed blong wan yangfala Wetnes we nem blong hem Itongo. Fastaem, famle blong gel ya i askem wan praes we i no antap tumas. Be ol narafala famle blong hem oli wantem se praes i go antap. Kolosap rao i kamaot, mo i luk olsem se ol narafala famle ya bambae oli win. Nating se Itongo i wan gel we i sem blong toktok, hem i stanap, mo wetem respek hem i talem klia se tingting blong hem i strong blong mared wetem Kristin man ya Sanze, stret olsem promes we i stap finis. Ale, wetem fasin no fraet hem i se, “Mbi ke” (we i min se, “Bisnes ya i stret nao”) nao hem i sidaon. Mama blong hem, Sambeko, we i wan Kristin tu, i sapotem hem. Toktok i finis long ples ya, mo gel ya i mared wetem brata ya olsem we oli bin plan long hem finis.

I gat sam samting we oli impoten moa long tingting blong ol Kristin papa mama we oli gat lav, i bitim wan gudfala praes blong pem woman. Wan hasban long Kamerun i talem se: “Oltaem, mama blong waef blong mi i talem long mi se mane we mi wantem givim long hem blong pem woman, i gud mi yusum blong lukaot long gel blong hem.” Ol papa mama we oli gat lav, oli wantem tumas we pikinini blong olgeta i stap strong long saed blong speret. Eksampel, tingbaot man ya Farai mo waef blong hem Rudo. Tufala i laef long Simbabwe mo tufala i spenem fulap taem long wok blong talemaot gud nyus blong Kingdom blong God. Tufala i no kasem pei from wok ya. Be, taem tu gel blong tufala i mared, oli askem wan praes we i daon moa i bitim praes we i stap. ?From wanem tufala i mekem olsem? Tufala i wantem se tufala gel ya blong tufala, oli mared long ol man we oli rili laekem Jeova. Tufala i eksplenem se: “Samting we mitufala i ting se i moa impoten, hemia se tufala gel blong mitufala wetem ol hasban blong tufala, oli mas strong long saed blong speret.” !I gud tumas blong luk fasin olsem! Ol papa mama we oli rili laekem pikinini blong olgeta, oli wantem se pikinini blong olgeta i stapgud long saed blong speret mo long saed blong bodi taem oli mared. I stret blong presem ol papa mama ya from gudfala fasin olsem.

Gudfala Frut From Fasin Blong No Mekem i Strong Tumas

Joseph mo Mae long Solomon Aelan, tufala i kasem blesing from we tufala i rere blong givim wetem gladhat mo from gudfala fasin we tufala i mekem blong rerem mared blong ol gel blong tufala. Taswe, tufala man we i mared wetem tufala gel ya, oli no gat bigfala kaon blong pembak. From samting ya, tufala gel ya wetem hasban blong tufala, oli gat jans naoia blong spenem plante yia long fultaem wok ya blong talemaot mesej blong Kingdom. Taem Joseph i tingtingbak long samting ya, hem i talem se: “Ol disisen we mi mo famle blong mi, mifala i mekem, oli karem bigfala blesing long mifala. I tru se, samtaem ol narafala man we oli no kasem save long tingting blong mifala, oli mekem plante toktok agensem mifala. Be, tingting blong mi i no stikim mi se mi mekem wan mastik. Mi mi glad blong luk se ol pikinini blong mi oli bisi mo oli strong long wok blong Jeova. Olgeta oli hapi, mo mi wetem waef blong mi, mitufala i hapi moa.”

Wan narafala blesing we i save kamaot, hemia fasin joengud we i stap bitwin papa mama blong gel mo papa mama blong boe we tufala i mared. Eksampel, Zondai mo Sibusiso, tufala i wok long branj ofis blong Watch Tower Sosaeti long Simbabwe, wetem tufala waef blong tufala we oli stret sista. Papa blong waef blong tufala, Dakarai i wan man blong prij fultaem, i minim se hem i no stap kasem pei evri manis. Taem oli stap tokbaot praes blong pem woman, papa ya i talem se hem i agri nomo long eni samting we tufala man ya i naf blong givim. Zondai mo Sibusiso, tufala i talem se: “Mitufala i laekem tumas papa blong tufala waef blong mitufala, mo sipos hem i nidim wan samting, mitufala i rere blong mekem wanem we mitufala i naf blong mekem, blong halpem hem.”

Taem yumi no mekem i strong tumas long bisnes ya blong pem woman, samting ya i givim glad long famle. Eksampel, hem i mekem i isi long tufala we i jes mared, blong tufala i no wari from we tufala i mas pembak bigfala kaon. Mo tu, fasin ya i givhan long plante yangfala man mo woman we oli jes mared, blong oli save gohed blong kasem ol gudfala blesing long saed blong speret, olsem fultaem wok blong prij mo mekem disaepol. Antap long ol samting ya, gudfala fasin ya i givim ona long Man we i Stampa blong Mared, hemia Jeova God.​—Matyu 24:14; 28:19, 20.

[Ol futnot]

[Bokis blong pija long pej 27]

OLI GIVIMBAK PRAES BLONG PEM WOMAN

Long samfala ples, ol man oli tingting nogud long wan woman mo papa mama blong hem, sipos narafala i pem woman ya long praes we i daon. Taswe, samtaem, flas fasin mo tingting blong wantem leftemap nem blong famle i pusum sam papa mama blong putum wan praes we i hae tumas. Wan famle long Lagos, Naejeria, i givim wan eksampel we i defren olgeta long samting ya. Man ya Dele, we i mared wetem gel blong famle ya, i talem se:

“Famle blong woman blong mi i givhan bigwan long mi, from we oli no askem mi blong folem evri samting we kastom i talem, olsem mane blong pem ol klos we oli sas tumas. Mo tu, afta we famle blong mi i givim praes blong woman long olgeta, man we i karem toktok blong famle blong woman ya i askem se: ‘?Yufala i tekem gel ya blong hem waef blong boe blong yufala no hem i pikinini blong yufala?’ Ol famle blong mi oli ansa se: ‘Mifala i wantem tekem hem olsem pikinini blong mifala.’ Afta long samting ya, oli givimbak mane ya we mifala i bin givim blong pem woman ya.

“Kam kasem tede, mi tangkyu tumas we papa mama blong waef blong mi oli bin lukaot long ol bisnes blong mared blong mitufala. Fasin ya blong tufala i mekem mi tinghae long tufala. Oli tingbaot ol samting long saed blong speret, mekem se mi luk olgeta olsem prapa famle blong mi. Mo tu, fasin ya blong tufala i gat bigfala paoa long tingting we mi gat long saed blong waef blong mi. Mi glad tumas long waef blong mi from fasin we famle blong hem i mekem long mi. Taem i gat sam samting we mitufala i no agri long hem, mi no letem samting ya i kam wan bigfala samting. Taem mi tingbaot famle blong hem, samting ya i blokem problem ya blong i no kam bigwan tumas long tingting blong mi.

“Famle blong mi mo famle blong waef blong mi, oli rili frengud. Naoia, tu yia finis afta long mared blong mitufala, papa blong mi i stap gohed yet blong sanem ol presen mo kakae i go long famle blong waef blong mi.”