Mekem Se Jeova i Glad, Hemia Faswan Mak Blong Mi
THEODOROS TEROS I TALEM STORI YA
Wantaem nomo, wan haeman i openem doa blong rum blong mi long kalabus, mo hem i singaot strong se: “?Hu ya Neros?” Mi talem se: “Hemia mi.” Ale, hem i givim oda long mi, se: “Yu girap. Naoia bambae mifala i kilim yu yu ded.” Samting ya i hapen long 1952, long wan kamp blong ami long taon blong Korin, Gris. ?From wanem laef blong mi i stap long denja olsem ya? Bifo we mi eksplenem samting ya, i gud mi storebaot laef blong mi long yufala.
RAONABAOT long 1925, ol Baebol Studen, (hemia nem blong ol Witnes blong Jeova bifo), oli toktok wetem Papa blong mi. I no longtaem biaen, hem i joen long olgeta mo hem i tokbaot bilif blong hem long ol eit brata mo sista blong hem mo evriwan ya oli akseptem trutok blong Baebol. Papa mama blong hem tu oli mekem i sem mak. Biaen hem i mared, mo mi mi bon long 1929 long Agrinio, Gris.
!Long ol yia ya, laef i had tumas long Gris! Fastaem, i gat man ya, Jenerol Metaxas, we i rul long wan fasin we i strong bitim mak. Ale, long 1939, Namba Tu Bigfala Faet blong Wol i stat, mo smoltaem biaen, ol Nasi oli kam insaed long Gris. Long taem ya, i gat fulap sik, mo plante man oli sot long kakae. Ol man oli yusum sam wilbara blong pikimap ol bodi blong ol dedman we oli sting finis. I klia nomo se wol i nogud tumas, mo ol man oli nidim Kingdom blong God.
Mi Givim Laef Blong Mi Blong Mekem Wok Blong Jeova
Long Ogis 20, 1942, wan grup blong mifala i joen long wan miting afsaed long Tesalonaeka. Ale, presiden elda blong mifala i poen i go long sam Engglis plen blong faet we oli stap sakem bom long taon, mo hem i soemaot klia se mifala i stap sef gud from we mifala i obei long oda ya blong ‘no lego ol miting blong yumi.’ (Hibrus 10:25) Long semfala taem ya, mifala i go long solwota, mo mi wetem sam narafala i tekem baptaes. Taem mifala i kamaot long wota, mifala i stanap wan klosap long narawan, mo ol Kristin brata sista blong mifala oli sing wan singsing blong presem mifala from disisen we mifala i tekem. !Hemia wan dei we bambae mi neva fogetem!
Smoltaem biaen, taem mi stap prij long ol haos wanwan wetem wan narafala boe, sam polisman oli holem mitufala mo oli karem mitufala i go long polis stesen. Ol polisman oli wantem makem klia long tingting blong mitufala se oli luk mitufala olsem ol Komunis, mo se gavman i bin putum tabu long wok blong prij, ale oli kilim mitufala, mo oli talem se: “!Yufala i krangke! ?Yufala i no save se Jeova i sem mak long Stalin?”
Long taem ya, wan strong faet i gohed bitwin ol defren grup blong man insaed long kantri, mo ol man oli kam strong moa blong ronemaot ol Komunis. Long dei we i kam biaen, oli fasem han blong mifala long jen, mo oli mekem mifala i wokbaot long rod i go pas long ol haos blong mifala, olsem se mifala i man blong brekem loa. Be mi no fesem traem ya nomo.
Oli Traem Bilif Blong Mi Long Skul
Long stat blong yia 1944, mi stap yet long skul, mo ami blong ol Nasi i bos yet long taon blong Tesalonaeka. Long skul, i gat wan Grik Otodoks pris we i tija blong mifala long saed blong ol tijing blong Jos. Wan dei, hem i talem se bambae hem i askem sam kwestin long mi long saed blong lesen we mifala i mekem long dei ya. Ol narafala pikinini oli talem se: “Hem i no wan Otodoks Kristin.”
Tija i askem se: “?Hem i wanem?”
Mi ansa se: “Mi mi wan Witnes blong Jeova.”
Wantaem nomo, tija i holem mi, i slavem fes blong mi mo i singaot se: “Hemia wan wael dog long medel blong ol sipsip.”
Mi tingting long mi wan se: ‘?Olsem wanem wan sipsip i save kilim wan wael dog?’
Sam dei biaen, raonabaot 350 studen oli stap sidaon raon long tebel blong kakae long medel dei. Daerekta i talem se: “Bambae Neros i mekem prea.” Mi talem prea we oli kolem ‘Prea blong Masta,’ prea ya we Jisas i tijim long ol disaepol blong hem, we i stap long Matiu 6:9-13. Be daerekta i no glad nating long samting ya, taswe, wetem wan voes we i kros, hem i askem long mi se: “?From wanem yu prea olsem?”
Mi ansa se: “From we mi mi wan Witnes blong Jeova.” Ale, hem tu i holem mi mo i slavem fes blong mi. Biaen long dei ya, wan narafala tija i singaot mi i go long ofis blong hem, mo hem i talem long mi se: “Hemia wan nambawan samting we yu mekem, Neros. Yu mas holemstrong ol samting we yu bilif, yu no mas lego.” Long naet ya, papa blong mi i leftemap tingting blong mi wetem ol tok ya blong aposol Pol: ‘Olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli mekem i nogud tumas long olgeta.’—2 Timoti 3:12.
Taem mi finisim hae skul, mi mas jusum wanem wok bambae mi mekem. Be, from we i gat faet long Gris, mi fesem wan narafala traem tu. Mi mas soem se mi holemtaet Kristin fasin ya blong no sapotem faet. (Aesea 2:4; Matiu 26:52) Biaen, long stat blong 1952, kot i panisim mi blong go kalabus long 20 yia, from we mi no wantem joen long ami long taem ya we i wan strongfala taem long histri blong Gris.
Oli Traem Kristin Fasin Blong Mi Blong No Joen Long Faet
Taem mi stap kalabus long ol kamp blong ami long Mesolongion mo long Korin, mi gat jans blong toktok wetem sam haeman blong ami. Mi eksplenem long olgeta se mi trenem tingting blong mi folem rul blong Baebol, mo mi no save kam wan soldia blong sapotem ol politik pati blong wol. Mi tokbaot 2 Timoti 2:3 mo mi talem se: “Mi mi wan soldia blong Jisas finis.” Taem oli talem strong long mi se mi mas tingtinggud long bisnes ya, mi talem se hemia i no wan disisen we mi bin mekem kwiktaem nomo, be mi bin tingting dip long hem finis, mo mi tekem disisen ya from we mi givim laef blong mi i go long God blong mekem wil blong hem.
From samting ya, long long 20 dei oli fosem mi blong mekem sam strongfala wok, oli no givim kakae long mi evri 2 dei, mo mi mas slip long floa blong wan smol rum we tu saed blong hem i longfala olsem 1 mita, mo tu narafala saed blong hem i olsem 2 mita. !Mo mi mas serem rum ya wetem tu narafala Witnes! Long taem ya we mi stap long kamp blong Korin, oli singaot mi blong kilim mi mi ded.
Taem mifala i wokbaot blong go long ples we bambae oli mas kilim mi mi ded, haeman ya i askem se: “?Yu no gat wan samting nating blong talem?”
Mi ansa se: “No.”
“?Bambae yu no raetem wan leta i go long famle blong yu?”
Mi ansa bakegen se: “No. Oli save finis se maet yufala i kilim mi mi ded long ples ya.”
Mifala i kasem yad blong kalabus, mo oli givim oda long mi blong stanap fored long wol. Ale, haeman i no talem long ol soldia blong sutum mi, be hem i givim oda se: “Karem hem i gobak insaed.” Oli mekem samting ya jes blong traem fasin blong mi blong stanap strong.
Biaen, oli sanem mi mi go long aelan blong Makronisos. Long ples ya, mi no gat raet blong karem eni buk, jes wan Baebol nomo. Long kalabus ya, we i gat samwe long 500 man blong brekem loa, i gat tatin Witnes we oli stap olgeta nomo long wan smol haos. Nating se i olsem, mifala i faenem rod blong kasem sam buk long fasin haed. Eksampel, wan dei mi kasem wan bokis blong loukoumia (wan loli we ol manples blong mi oli laekem tumas). Ol gad oli glad tumas blong stilim sam pis blong loukoumia ya, mekem se oli no luk Wajtaoa we i stap haed aninit. Wan Witnes i talem se: “!Ol soldia oli kakae loukoumia ya, be mifala i ‘kakae’ Wajtaoa!”
Mifala i kasem wan kopi blong buk ya What Has Religion Done for Mankind?, we i jes kamaot long taem ya. Wan Witnes long kalabus ya we hem i save Engglis, i tanem buk ya i kam long lanwis blong mifala. Mo tu, mifala i mekem sam miting long fasin haed, blong stadi Wajtaoa tugeta. Mifala i luk kalabus olsem wan skul mo wan jans long mifala blong kam strong moa long saed blong spirit. Antap long olgeta samting ya, mifala i stap glad from we mifala i save se Jeova i haremgud long fasin blong mifala blong stanap strong.
Laswan kalabus we oli sanem mi i go long hem, hemia Tyrinta, we i stap long is blong Peloponisos. Long ples ya, mi luk se i gat wan gad we i lukluk gud olsem wanem mi stap stadi Baebol wetem wan narafala presina. !Sam yia biaen, mi mi sapraes tumas blong mitim gad ya long Tesalonaeka! Long taem ya, hem i wan Witnes finis. Biaen, wan long ol pikinini blong hem i go long kalabus, i no blong mekem wok blong gad, be olsem wan presina. Olsem mi, hem tu i go kalabus from we hem i no wantem joen long ami.
Mi Fri Bakegen Blong Prij Afta We Mi Kamaot Long Kalabus
Mi kalabus tri yia nomo long ol 20 yia we kot i panisim mi blong mekem. Afta we mi kamaot, mi tekem disisen blong go stap long Atens. Be, smoltaem biaen mi kasem wan strong sik long lang blong mi, mo mi mas gobak long Tesalonaeka. Blong tu manis, mi stap long bed nomo. Biaen mi mitim wan naesfala woman, nem blong hem Koula, mo mitufala i mared long Desemba 1959. Long 1962, Koula i stat blong mekem wok blong paenia, hemia nem we ol Witnes blong Jeova oli givim long olgeta we oli prij fultaem. Tri yia biaen, mi naf blong joen wetem hem long wok ya blong paenia.
Long Janewari 1965, sosaeti i askem mi blong mekem wok blong seket elda, blong visitim ol kongregesen mo givhan long olgeta blong kam strong moa long saed blong spirit. Long hot taem blong semfala yia ya, hemia fastaem we mitufala i gat jans blong go long wan bigfala distrik asembli, long Viena, Ostria. Asembli ya i rili defren long olgeta ya we mifala i stap mekem long Gris. Long Gris, mifala i mas haed long bus blong mekem ol asembli, from we gavman i putum tabu long wok blong mifala. Klosap long en blong 1965, sosaeti i singaot mitufala blong go wok long branj ofis blong ol Witnes blong Jeova long Atens. Be from we sam famle blong mi oli sik tumas, long 1967, mitufala i mas gobak long Tesalonaeka.
Nating se mitufala i stap lukaot long famle blong mitufala, mitufala i gohed blong stap bisi long wok blong prij. Wantaem, mi stap toktok long kasin blong mi, nem blong hem Kostas. Mi eksplenem long hem se ogenaesesen blong God i rili nambawan, mo mi tokbaot lav, fasin joengud mo fasin obei we i stap long ogenaesesen ya. Hem i talem se: “Sipos God i rili stap, bambae mi bilif se olgeta samting ya oli nambawan.” Hem i agri taem mi askem hem blong traem faenemaot sipos God i rili stap, no nogat. Mi talem long hem se long Ogis 1969, bambae mifala i go long wan intenasnal asembli blong ol Witnes blong Jeova long Nurembeg, Jemani. Hem i askem sipos hem i save kam wetem mifala, mo fren blong hem, Alekos, we hem i stap stadi Baebol wetem mifala, i wantem kam tu.
!Asembli ya long Nurembeg i rili nambawan! Hem i stap long bigfala stad ya we Hitler i bin yusum blong mekem lafet taem hem i win long faet. I gat moa long 150,000 man we oli kam, mo i klia se paoa blong tabu spirit blong Jeova i stap long asembli ya. Smoltaem biaen, Kostas mo Alekos oli tekem baptaes. Naoia tufala i wok olsem Kristin elda, mo famle blong tufala tu, oli Witnes.
Mi statem wan stadi wetem wan woman we i intres. Hasban blong woman ya i talem se hem i wantem kasem moa save long saed blong bilif blong mifala. Smoltaem biaen, hem i talem long mi se hem i singaot wan narafala man blong toktok wetem mifala, nem blong hem Masta Sakkos, hem i wan Grik Otodoks tija we i stadi long ol bilif blong jos. Hasban ya i wantem askem sam kwestin long mi mo long man ya. Masta Sakkos i kam, wetem wan pris tu. Nao, hasban ya i stat, i talem se: “Fastaem, mi wantem se Masta Sakkos i ansa long tri kwestin.”
Hem i holem Baebol we mifala i stap yusum long wok blong prij, mo hem i talem se: “Kwestin namba wan: ?Baebol ya, hem i wan trufala Baebol, no hem i Baebol blong ol Witnes nomo?” Masta Sakkos i ansa se Baebol ya i stret nomo, mo hem i talem tu se ol Witnes blong Jeova oli “man we oli laekem Baebol.”
Hasban i gohed, hem i talem se: “Kwestin namba tu: ?Ol Witnes blong Jeova, oli folem ol gudfala fasin?” From we waef blong man ya i stat blong joen wetem mifala, man ya i wantem save se, ol Witnes blong Jeova oli wanem kaen man. Tija ya we i stadi long ol bilif, i ansa se ol Witnes oli rili gat ol nambawan fasin.
Man ya i gohed. “Kwestin namba tri: ?Ol Witnes blong Jeova oli kasem pei from wok blong olgeta?” Tija i ansa se: “No.”
Ale, man i talem se: “Mi kasem ol ansa long ol kwestin blong mi, mo saye, mi tekem disisen blong mi.” Afta samting ya, hem i gohed blong stadi Baebol, mo smoltaem biaen, hem i tekem baptaes blong kam wan Witnes blong Jeova.
Wan Laef We i Rij, mo We i Karem Plante Frut
Long Janewari 1976, mi stat bakegen blong wok olsem seket elda. Samwe sikis yia biaen, mi gat jans blong joen wetem ol faswan Witnes long Gris we oli statem wan niufala fasin blong prij, hemia prij long ol rod. Biaen, long Oktoba 1991, mi mo waef blong mi, mitufala i stat blong wok olsem spesel paenia. Sam manis biaen, mi mas go long hospital, mo ol dokta oli katem hat blong mi fo taem, be mi glad se mi kamgud bakegen. Naoia, helt blong mi i gud lelebet, mo mi kam naf blong wok bakegen olsem fultaem paenia. Mi wok tu olsem elda long wan kongregesen blong Tesalonaeka, mo long ples ya, mi joen wetem ‘Komiti we i Toktokgud wetem ol Dokta,’ blong givhan long olgeta we oli nidim help long saed blong helt.
Taem mi tingtingbak long laef blong mi, mi luksave se mi haremgud tumas from we mi mekem ol samting we Papa blong yumi long heven, i glad long hem. Mi glad tumas se longtaem bifo, mi bin obei long Jeova taem hem i singaot mi se: “Pikinini blong mi, yu mas kam waes. Sipos yu kam waes, bambae mi glad we mi glad, mo sipos man i faerap long mi, be bambae mi gat ansa blong givim long hem.” (Proveb 27:11) Mo tu, hat blong mi i glad tumas blong luk se oltaem, long ful wol, i gat plante moa man wetem stret tingting we oli joen long ogenaesesen blong Jeova. !Hemia i rili wan jans blong joen long wok ya blong halpem ol man blong kam fri wetem trutok blong Baebol, mo blong givim hop long olgeta blong laef gogo i no save finis long wan niufala wol we i stret olgeta!—Jon 8:32; 2 Pita 3:13.
Mifala i traem oltaem blong leftemap tingting blong ol yangfala we oli mekem wok blong Jeova, blong putum mak blong joen long wok blong fultaem paenia, blong givim taem mo paoa blong olgeta long Jeova. !Yes i tru, fasin blong trastem Jeova, mo blong faenem trufala glad long wan wok we i mekem hat blong hem i haremgud, hemia beswan laef we wan man i save gat!—Proveb 3:5; Prija 12:1.
[Tok Blong Pija Long Pej 21]
(Lefsaed i go kasem raetsaed)
Wok long kijin blong Betel long 1965
Mi givim wan tok long 1970, long taem we gavman i blokem wok blong prij blong mifala
Wetem waef blong mi long 1959
[Tok Blong Pija Long Pej 23]
Wetem waef blong mi, Koula