Nem We i Lidim Man i Go Long Trufala Bilif

“YU no bilif long Jisas mo paoa we blad blong hem i gat blong pemaot yumi,” hemia tok we wan woman i talem long wan Witnes blong Jeova. Wan narafala man i talem wetem strong tingting, se: “Yufala i talem we yufala i Witnes blong Jeova, be mi mi wan Witnes blong Jisas.”

Tingting ya se ol Witnes blong Jeova oli no bilif long Jisas no oli no givim tumas ona long hem, i wan tingting we plante man oli gat. ?Be samting ya i rili tru?

I tru se ol Witnes blong Jeova oli tinghae moa long nem blong God, Jeova.a Itamar, we i wan Witnes long Brasil, i tingtingbak se: “Stamba samting we i jenisim laef blong mi, hemia taem mi lanem nem blong God. Fastaem we mi bin ridim nem ya, i olsem we hem i wekemap mi long wan dip slip. Nem ya Jeova, i seksekem mi mo i pusum mi blong mekem wan samting; hem i go dip insaed long sol blong mi.” Be Witnes ya i talem tu se: “Hat blong mi i laekem Jisas tumas.”

Yes, ol Witnes blong Jeova oli luksave se, blong kasem laef we i no save finis, oli mas bilif long “nem blong Pikinini blong God,” Jisas. (1 Jon 5:​13) ?Be wanem minim long tok ya ‘long nem blong Jisas’?

?Nem Blong Jisas i Minim Wanem?

Tok ya “long nem blong Jisas,” mo sam narafala tok we i klosap sem mak, oli stap long plante ples long Kristin Grik haf blong Baebol, no “Niutesteman.” Blong talem stret, tok ya “nem” i kamaot bitim 80 taem long Baebol, taem hem i tokbaot ol wok blong Jisas. Long buk blong Ol Wok nomo, tok ya i stap klosap 30 taem. Ol Kristin long faswan handred yia oli mekem baptaes long nem blong Jisas, oli mekem merikel long nem ya, oli tijim man long nem ya, oli soem ona long nem ya, oli safa from nem ya mo oli leftemap nem ya.​—Ol Wok 2:​38; 3:​16; 5:​28; 9:​14, 16; 19:17.

Wan diksonari long Baebol i eksplenem se long Grik lanwis, plante taem Baebol i yusum tok ya “nem,” blong tokbaot “olgeta samting we nem i save soemaot long saed blong wan man, raet blong rul, ol fasin, posisen, hae man, paoa, nambawan fasin, eni samting we nem ya i minim. Taswe nem blong Jisas i minim nambawan mo bigfala raet blong rul we Jeova God i givim long hem. Jisas hem wan i talem se: “God i givim olgeta paoa long mi, long olgeta samting long heven mo long wol.” (Matiu 28:18) Afta we Pita mo Jon, tufala i mekem se wan man we i no save wokbaot i kamgud bakegen, ol lida blong skul blong ol man Jyu oli askem long olgeta se: “?Yutufala i yusum wanem paoa, no yutufala i mekem long nem blong hu?” Pita i ansa wetem strong tingting, mo hem i soemaot bilif we hem i gat long raet mo paoa blong rul we nem blong Jisas i karem. Hem i talem klia se: “Man ya i stap stanap long fes blong yufala, we leg blong hem i gud finis, long paoa blong nem blong Jisas Kraes, man Nasaret.”​—Ol Wok 3:​1-​10; 4:5-​10.

?Bilif Long Jisas No Long Sisa?

Be bambae i no isi blong talemaot bilif long nem blong Jisas. Jisas i talem long ol disaepol blong hem se ‘ol man bambae oli no laekem olgeta nating, oli agens long olgeta, from we olgeta ya oli holem nem blong hem.’ (Matiu 24:9) ?From wanem? From we nem blong Jisas i soemaot paoa we God i givim long hem olsem Rula, King blong olgeta king. Olgeta nesen oli mas bodaon mo obei long hem, be oli no rere no oli no wantem mekem samting ya.​—Ol Sam 2:​1-7.

Ol haeman blong jos long taem blong Jisas tu, oli no wantem stap daon mo obei long Jisas. Oli talem se: “Mifala i no gat king. Sisa nomo i king blong mifala,” ale oli tanem baksaed long Pikinini blong God. (Jon 19:13-​15) Oli putum bilif blong olgeta long nem​—paoa mo raet blong rul​—blong Sisa mo gavman blong hem. Mo tu, oli ting se Jisas i mas ded, olsemia bambae oli no lusum hae nem mo hae ples blong olgeta.​—Jon 11:47-​53.

Long ol handred yia afta we Jisas i ded, plante man we oli talem se oli Kristin oli soem wan fasin olsem ol hae man blong skul blong ol man Jyu. Ol man ya we oli talem se oli Kristin, oli trastem paoa mo rul blong gavman blong kantri ya mo oli joen long ol faet blong gavman ya. Eksampel, long ol yia 1000, jos i hivimap ol man blong faet we oli no gat wok, blong oli joen long militia Christi, no ol Kristin Hosman. “Wok blong lidim ol faet we oli tabu i aot long paoa blong gavman blong Krisendom mo i go long jos, tru long wok blong ol Kristin Hosman.” (The Oxford History of Christianity) Buk ya i talem tu se, toktok we pop i talem, i mekem ol soldia blong Krused oli bilif se taem oli joen long faet blong ol Krused, “oli stap mekem wan kontrak wetem God mo oli gat wan ples finis long Paradaes.”

Sam man oli talem se oli save stap tru long Jisas mo long semtaem oli save joen long politik mo ol faet blong kantri blong olgeta tu. Maet, olgeta ya oli ting se mak blong wan Kristin i blong agensem rabis fasin long olgeta ples. From samting ya samtaem i minim se oli rere blong joen long faet tu. ?Be wanem tingting blong ol faswan Kristin long saed ya?

Magasin ya The Christian Century, i talem se: “Ol faswan Kristin oli no joen long ami.” Magasin ya i talem se, go kasem ol yia 170-​180 K.T., i no gat pruf we i soem se ol Kristin oli joen long ami. Be hem i gohed blong talem se: “Sloslou nomo, ol Kristin oli lego fasin blong olgeta blong no joen long ami.”

?Wanem frut i kamaot from samting ya? Wan haf long The Christian Century i talem se: “Ating fasin ya blong Kristin Skul blong joen fulwan long ol faet olsem ol man we oli no Kristin, hem i wan fasin we i daonem gudnem blong olgeta moa i bitim ol narafala samting. Long wan saed, ol Kristin ya oli akseptem bilif blong kaengud Man ya we i Sevem olgeta, be long narafala saed, oli joen fulwan blong sapotem ol faet blong skul no blong politik. Samting ya i spolem bilif blong olgeta bigwan.”

Folem Eksampel Blong Ol Faswan Kristin

Tede, ?ol Kristin oli save folem nambawan eksampel blong ol faswan Kristin? Ol Witnes blong Jeova long taem blong yumi oli soem se samting ya i save hapen. Man we i wokem buk ya Holocaust Educational Digest, i tokbaot olgeta se: “Wan Witnes bambae i neva save joen long faet. . . . Sipos olgeta haeman long wol oli bin gat wan bilif olsemia, [Namba Tu Bigfala Faet long wol] i no save hapen.”

Sem samting i kamaot long sam faet we oli hapen i no longtaem, olsem faet ya long Not Aerlan. Sam yia bifo, wan Witnes blong Jeova i stap prij long ol haos wanwan, long eria blong ol Protestan long taon blong Belfast. Wan man blong haos i lesin long tok blong Witnes ya we bifo hem i wan Katolik, ale man ya i askem long hem se: “Taem yu wan Katolik, ?yu yu sapotem IRA [Aerlan Ripablik Ami]?” Witnes ya i luksave se man ya i save kilim hem. Man ya i bin go kalabus afta we ol polis oli faenem se hem i stap karem wan masket blong go sutum wan Katolik i ded. Hem i jes kamaot long kalabus. Taswe Witnes i ansa long hem i se: “Mi no moa wan Katolik naoia. Mi wan Witnes blong Jeova. Mo neva wan trufala Kristin i save kilim i ded wan man long nem blong gavman no eni narafala man.” Biaen, man blong haos i sekhan long Witnes ya mo i talem long hem i se: “Olkaen fasin blong kilim narafala i ded oli nogud olgeta. Yufala i stap mekem wan gudfala wok. Yufala i mas gohed long hem.”

Bilif Long Nem Blong Jisas i Minim Wanem

Be, bilif long nem blong Jisas i minim moa bitim fasin blong no joen long faet. Hem i minim tu se, man i obei long ol loa blong Kraes. Yes, Jisas i talem se: “Sipos yufala i stap mekem ol samting we mi mi talem long yufala, yufala i fren blong mi.” Wan long ol samting ya hemia se “yufala i mas lavlavem yufala.” (Jon 15:14, 17) Lav i pulum man blong wantem mekem i gud long narafala. Hem i sakemaot ol fasin blong no laekem man blong narafala laen, man blong narafala jos, mo man we laef blong olgeta i defren long laef blong yumi. Jisas i bin soem olsem wanem blong gat fasin lav.

Ol man Jyu long taem blong Jisas oli no laekem nating ol man Sameria. Defren olgeta, Jisas i toktok wetem wan woman Sameria, mo from samting ya, woman ya mo plante narafala man oli stat bilif long nem blong Jisas. (Jon 4:​39) Mo tu Jisas i talem se ol disaepol blong hem bambae oli mas talemaot hem “long Jerusalem, mo long olgeta ples long Judia mo Sameria, gogo [oli] finisim olgeta ples long wol.” (Ol Wok 1:8) Tok blong Jisas we i givim laef, i no blong ol man Jyu nomo. Taswe Pita i kasem oda blong go visitim Konilias wan kapten blong ami blong Rom. Nating se i no stret blong wan man Jyu i visitim wan man blong narafala laen, God i soem long Pita se Pita i “no save luk sam man se oli doti long fes blong hem, no oli rabis.”​—Ol Wok 10:28.

Folem eksampel blong Jisas, ol Witnes blong Jeova oli rere blong givhan long olgeta man, nomata wanem laen blong olgeta, jos blong olgeta, mo sipos oli rij no no gat. Oli tijim olgeta ya long rod blong kasem sef tru long nem blong Jisas. Bilif long nem blong Jisas i pusum olgeta blong oli ‘talemaot we Jisas i Masta.’ (Rom 10:​8, 9) Mifala i sapotem yu blong akseptem help ya, blong yu tu yu lanem blong bilif long nem blong Jisas.

Tru ya nem blong Jisas i pulum yumi blong wantem soem ona, respek, mo fasin obei long hem. Pol i talem se: ‘Nao olgeta long heven, mo long wol, mo long ples blong ol dedman, bambae oli foldaon, oli ona long nem blong Jisas, mo olgeta man bambae oli talemaot we Jisas Kraes i Masta blong olgeta, blong leftemap nem blong God, Papa blong yumi.’ (Filipae 2:​10, 11) Nating se bighaf blong ol man oli no rere blong obei long rul blong Jisas, Baebol i soem se i no longtaem bambae olgeta man oli mas obei long hem sipos no bambae oli mas lus. (2 Tesalonaeka 1:​6-9) Taswe, naoia i stret taem blong putum bilif blong yumi long nem blong Jisas taem yumi obei long olgeta loa blong hem.

[Futnot]

[Tok Blong Pija Long Pej 6]

Long nem blong Jisas, plante milyan man oli kilim man i ded mo plante milyan man oli ded

[Tok Blong Pija Long Pej 7]

Jisas i no gat fasin ya blong no laekem narafala laen. ?Olsem wanem long yu?